ZSS LESSON 14: SINGLAMTEH KISIALHPIHNA

LESSON 14 September 23 – 29

SINGLAMTEH KISIALH PIHNA

NIPI NI (SABBATH) NITAK LAM September 23

SIMDING TE: Gal. 6: 11 – 18; Rom. 6: 1 – 6; 12: 1 – 8; 2 Cor. 4: 10, 5: 17; 11: 23 – 29.

KAMNGAH: Ahi zongin keimah in ahih leh, singlamteh tungah i Topa Jesuh a sihna thu bek ka kisialhpih ding hi. Bang hang hiam cih leh singlamteh tungah ama sihna hangin kei-a’ dingin leitung thute misi bang a, kei zong, leitung thu-ah misi mah ka bang hi (Gal. 6: 14).

Galati Busung i thusinna hong khauhpai mahmah hi. Bang hang hiam cih leh, a laikhak te mahmah zong a khauhpai luat hang zong a hi hi. Pasian kiang pan in sapna a ngah cih a kithei pa leh, a thugen khempeuh in a thuman a hihna (tamvei pi tak zong a ki gengen khit) a thei Paul in, Thuciam Lui Bu sunga Kamsang te ahi, Isaiah, Jeremiah leh Hosea te’huzapna te tawh lunglut tak in agelh Galati bu a ahi hi. Tua Kamsangte in mau hun a, Pasian mite’ amau te khialna pan un a hilh mah bangin Paul in zong a ma hun lai mite tua bangin a genpih a hi hi.

A mau hun tek ah a thupiang te uh a kibat loh uh hangin, Jeremiah in a kammal tawpna azat kammal te in Galati mite a dingin a kizat theih mah bangin Jeremiah hun lai in zong tua bangmah a hi hi. “Tua ciangin Topa in, “Mipilte in a pilna uh kisaktheihpih kei uh hen la, mi hatte in a hatna uh kisaktheihpih kei uh hen. Mihaute in zong a hauhna uh kisaktheihpih kei uh hen. A kisatheite in, keimah, leitungah migitna, thuman leh thutang a zang ka hihna leh tuate sungah nuam a sapa ka hihna thu hong theihna uhah kisathei uh hen. Topa in hih thu kong gen khin hi,” a ci hi (Jer. 9: 23, 24).

“Eima vangliatna, mihing te pilna, eima hauhna, eima thahatna te in, Khris singlamteh mai ah a mawkna ahih zia, Galati a om a lamkhial tuuhon te tungah Paul in a bulphuh laikhak ahi hi.

NIKHAT NI (SUNDAY) September 24
PAUL’ KHUT NGIAT

Gal. 6: 11 – 18 sunga Paul in a tawpkhak hopihna leh a dangdang ama Laikhakte sunga a tawpkhakna te uh a kilamdan na enkak in, bang ci bangin Galati bu sunga thu vaikhak tawpna in a dangte tawh a ki batna leh a kilamdan na te bang om hiam? (Paul’ kammal tawpkhak na ahi, Rom, 1, 2 Korin, Ephet, Filipi, Kolose, leh 1, 2 The. Te sim in).

_______________________________________________________________________________

Paul tawpkhakna kammal te kibang kim den lo hi. A hi zongin a kibatpih kammal honkhat te in: 

1. Mite a mimal in hopih hamtang hi. 2. A tawpkhak hanthotna/nget keiikaai nei. 3. Ama min gelh den/ a hihna pulak, 4. Tawpkhak thupha piakna te ahi hi. Galati bu sung tungtawn in, Paul in a tawpkhak pulakna te tungtawn pan in, a thupi mahmah 2 kimu thei hi.

A masa pen in, Laikhak dangte bang lo in Galati bu sungah Paul in, a mimal in a hopihna om lo hi. Galati laikhak in a mimal tawh muakna kammal/ lungdamna kammal zang lo hi. Banghang hi ding hiam? Lakhak kipat na ah a ngeina in a zat lungdam kohna a zat lohna thu in, Paul leh Galati mite kikaal ah a thuk kizop taktakna om lo hi cih kithei hi. Paul pen kikholh dan siam mahmah napi, a kilawm a kituak in a gamta mi hi.

A nihna ah, Paul in a laikhak sunga a gennop thu te a gelhna dingin, lai-atthei mikhat zang hi (Rom. 16:22). Tua bangin a kigelh khit tak ciangin, Paul in a tawpkhak na dingin amahmah in kammal tomcing tawh vaikhak na lai gelh pan hi (1 Cor. 16: 21). A hi zongin, Galati laikhak sungah bel Paul in, a ma ngeina te nusia in, ama laigelh pa kiang pan in laitui a lak khit ciangin, Galati mite sunga thupiangte a ngaihsut luat khak lai hangin, gelhbeh ding sangin khup bawl ziau hi. Hih Galati mite gitloh luat uh hangin, a laikung te a khiatma in tawmcik beek thuhilhna tawh thuhkik ding lunggulhna tawh a khup bawl hi mai hi.

Gal. 6: 11 sungah, a lungsim a phut luat manin, laimal gol pipi tawh a gelh hi. Bang hangin gelh hiam cih I thei kei hi. Khat khat ten a upmawh uh agen na ah, a laimal size (a gol in a gelh bembam) tawh kisai a gen na hi zaw lo in, a laimal te a gol a neu in ki-helh ziazua (kithai gawp) in a gen hi zaw ding hi ci uh hi. A mau te upna ah Paul khut te in a ki bawlsiatna hangin kawi gawp hi dinga, buuk khawng a bawlbawl na hangin phop gawp a hih manin kician takin gelh thei nawn lo hi kha ding hi ci uh hi. Khat khat te in bel, a mit hoih lohna mahmah hangin hoih takin a muh theihloh na hang hi ding ci leuleu uh hi. A muhna tuak uh a piangthei veve thu hi. Ih tawpna dingin a piang thei thu khat in zong, eite in a thupi khat i gelhnop ciangin, a nuaigitna, sawi-atna, LAIGUAL GOL tawh i ciapteh mah bangin Paul in zong, tua lai mun thupi a sak luat man in, a gol-at zong hi thei veve hi.

Bang bang hi ta leh, Paul in ama laigelh a sim dingte tungah vauna leh thuneem takin a thuhilh na  tawh a lunggulhna teng a phulkhia a hi hi.

NINIH NI (MONDAY) September 25
SI LEH SA KISIALH PIHNA

Gal. 6: 12, 13 sim in. Hih mun ah Paul in bang a gennuam hi ding hiam?

_____________________________________________________________________________

A beisa hun in Paul in, a langpang te’ sepnop te uh leh, amau lunggulh te tawh kisai in hemgen ngei  mah ta leh (Gal. 1: 7; 4: 17), tu in a hoih loh zia a ciaptehte, a hi bangbangin hong pulak giapgiap hi (Gal. 6: 12, 13). Amaute a cihna ah “ci leh sa tawh mihoih a hihna uh lakkhia nuam te” ci hi. “A hoih a lak” cih a khiatna in, “a hoih mahmah mel” cihna ahi hi. “mai” I cih ciangin, video sung khawnga a kineih siam te ki neih dan te a ci nuam ahi hi. Paul in a cihnop na in, “kineih siamte”(min-ta’) in, mipi te a lungkim na dingun a hanciam dan uh tawh kibang a ci a hi hi. Hih mite in, a maute thuhilh te in a maan lo pipi mah hi ta leh, mite zahtak theihna ding’ a lunggulh man un, Galati a om Jew te kiang hi ta leh, Jeresalem a om Jew te tungah hanciam uh hi.

Jewish Biakna makai te mahmah in zong mun tampi mah ah, gamsung ki-ukna vai ah panmun lian pipi tawh huzapna nei mahmah uh hi. A maute in bawlsiat theihna tawh kisai in zong Rome Kumpi tung pan in, phalna angah te zong ahi uh hi. Tua ahih manin, Jew Christian tampi takte in zong hih Jew Biakna makai te tawh kizopna kiptak in neih suak ding ut uh hi. Gentile mite vun-atna ding leh Torah (Jewte Laisiangtho) {Piancil – Thuhilhkikna kikaal} a zuih na dingun hilh ding cih te hi a, Tua bangin, Paul a langpangte in Jew minam honkhat te maipha ngah uh hi. Tua bangin akizop theihna hangun Jew te biakinn ah kikholh khawp theihna bek hi lo in, Jerusalem a om Jew thu-um te tawh zong hong ki zom thei uh hi.

Paul in a langpangte tungtang ah athupi mahmah a mau te tat dan khat a genna ah, tungsiah lamah maipha ngah theihna tawh bawlsiatna pan-in a ki dal theihna dinguh a lunggulh pen uh hi ci hi. Bawlsiatna i cih ciangin pumpi tungah ahi lo zah dong dinga gamhtat na ci in ki tel na pi in, a thu” neem”zaw in nawngkai sakna, buaisakna leh kizopna sung panin pampaihna te kihel hi.

Bangbang haksatna Paul in thuak mah ta leh, a gennop thu in kician mahmah a, “Khrih Jesuh tawh kipawlin Pasian’ deihna bangin a nungta nuam khempeuh in bawlsiatna a thuakding mah hi” ci hi (2 Tim. 3: 12). Pau leh nidangin Judah gama om biakna lama a kikinsak, a khengval a um kha te in zong tua bang gamtatna na zang ngei uh hi (Gal. 1:13). A nung ciangin Christian sungah tua te hangin a nawngkai khawp bel hong om to hi.

 Abang ci bang in “a hoih penpen” gamtat luhek tup leh ngim te zong, khat veivei i kidop khak kei leh, lampial na hong piang thei a hi hiam? A beisa bang hun laitak in, na-tup na-ngim na hoih mahmah na pi in, a tawpna ah thusia tawh na khawlna khat a om ngei hiam?

NITHUM NI (TUESDAY) September 26
SINGLAMTEH KI SIALHPIH NA

“Singlamteh tungah i Topa Jesuh a sihna thu bek ka kisialhpih ding hi. Bang hang hiam cih leh singlamteh tungah ama sihna hangin kei-a’ dingin leitung thute misi bang a, kei zong, leitung thu-ah misi mah ka bang hi” (Gal. 6: 14) Mi honkhatte gamtatna tawh kisai, seppah dingin a gengen thu uh pen vun-atna ahi hi. Paul a dingin bel atom kaihna tawh a tawpna dingin Galati mite tungah ama lungdamna thupuak in upna thu ah letkip dingin thugui nih tawh nagen hi. 1. Singlamteh in thu laigil a hihna (aneu 14) leh 2. Upna sungah Dik tan theihna (aneu 15) neih theihna ahi hi. Tuni in I sinna sungah a abeisa hun thupiang te bulphuh kikna a hi hi.

21 Century (tu-a ei khanghun) ah a nungta te a dingin, Singlamteh tawh kisai (Gal. 6: 14)a thu in Paul in agen thu te, mat kikik na zong telhak kha mah ding hi. Tuhun ciangin Khris ii Singlamteh tawh kisai in lungsim sunga a phawkkikna dingin a lim (amaan) tawh a keem zong ki om hi. Bang bang ahi zongin Paul hun laitak in bel Singlamteh pen kisialhpih theihna hi lo in, kisimmawh bawlna, leh huaihuai suahna lim hi zaw hi. Jew mite a dingin Singlamteh tunga kikhai na athuak Messiah cih bel a huathuai mahmah amau ngaihsut kholh, a ngeina tawh a ki lehbulh mahmah khat hi a, Singlamteh tunga dan ki piakna in Rome gammi ahi lo namdang te a bawlsiana uh ahi hi.

Zeisu’ Singlamteh tawh kisai tualai mite in a niammuh na, a zahpih na uh tawh kisai in, tua hun lai in lim a kisuai te tungah a hang kimu thei hi. Kum zalom 2 lai kiim in mikhat bawlsiatna tawh thahna a thuak sak uh ciangin, la-no lu tawh kikhai khawm a hihna a kisuai kawmpek tunga lim te tungtawn ki mu thei hi. Amau pasiante a biak uh ciangin zong Singlamteh nuai ah, a hih kei leh a kiang nai ah a khut uh a laptoh na lim a kisuai te zong kimu thei hi. Tua lim suaihna tunga kigelh lai khat in” Alexander in ama pasian a biak laitak” kici hi. Hi te thu hangin mite a dingin Zeisu singlamteh in ciamnuihna khat dingin ki ciamteh hi. Tua bang thu te a om na tawh kizui in Paul in, hangsan takin a genna ah, mite in a zahpih simmawh bawl ta leh keimah in, Zeisu singlamteh lo siah kisialhpih ding bangmah ka nei kei hi a ci ahi hi.

Zeisu singlamteh hangin, Paul leh Leitung mite kikaal ah a bang ci bangin kilamdang na om a hi hiam? (Gal. 6: 14; Rom. 6: 1 – 6; 12:1 – 8; Phil. 3: 8.

_________________________________________________________________________________

Zeisu Singlamteh in thu-um mite adingin na khempeuh ah kikhelna piangsak hi. Tua in, ei te a bang ci dinmun ah om cih leh Leitung tawh bangzah kizopna nei lai cih bangin a hong ki sittel sak thei hi, Tu khanghun siatna sungah, leitung’ nate khempeuh in Pa Pasian tawh ki langneihna hong piang sak hi (1 John 2: 16). Bang hang hiam cih leh Zeisu sungah i sihkhit nak leh, leitung vai a hong uk sila te i tawh I kizom nawn kei dinga, I nuntakna lui khempeuh i suahkhia khin ta hi. Thu um mite leh leitung mite kikaal a ki lamdan theihna in, koi zawzaw a hih kei leh khat zaw sangsang tunga “sihna” a hih zia Paul in, hong gen hi.

Leitung tawh na kizopna ah Singlamteh in a bang dan in a hong sepsak khin ta hiam? Singlamteh hangin na kilamdan na in bang a hi hiam? Nang tang dingin a hong kipia Topa tungah, na kipiak ma leh na kipiak khit a kilamdang nuntakna bang ci bangin nei na hi hiam?

NILI NI (WEDNESDAY) September 27
MITHAK SUAHNA

Christian nuntakna sungah Singlamteh a thupit zia a bulphuhn khit ciangin Paul’in, Upna sungah thugui  pi a hi: Upmuanna hangin diktan sakna tawh kisai hong kuppih kik hi.

Tu kuatar buppi sungah Paul in, vun-atna tawh kisai in Lungdamna thu tawh ki-elpuak ahih zia thuk takin hong kuppih khin hi. Ahi zongin amah in ngeina in a kizang tua gamtatna (vun-atna) pen a langpan cihna ahi kei hi. Vun-atna tawh kisai mun tam sim ah a langpanna zong kimu thei hi (Gal. 5: 2 – 4).  Tua hi a, Galati mite tungah Paul in a theihsak nop tawpkhakna in, vun-atlo te in vun-atte sangin Pasian lungkim sak zaw uh hi, cih ahi hi. Mikhat in vun-at thukham a zuihna tawh dik ngah ding a ki cih pah theihna ding leh vun- at thukham zuihloh hangin dikna ngahlo cihna ding om pah tuan kei a ci nuam zong ahi hi. Vun-atna thukham zuihna in, Kha thu tawh bangmah kisai lo hi. Biakna maan taktak i cih in, a pua lam gamtatna tungtawn in a kinga hi lo a, mihing te lungsim sungtawng ah zungkhak na hi zaw hi. Zeisu in zong agen na ah, mihing khat pen, muhtheih a pualam te a hoih mahmah tawh kibang napi-in, a sunglam kha thu ah kihhuai nin tawh a kidim in om thei hi (Mat. 23: 27) na ci hi.

Mithak suahna i cih in bang a cihna hi ding hiam? (Gal. 6: 15; 2 Cor. 5: 17), hih thu tawh kisai in a deihna tawh kituak in, na nuntakna ah khiatna nei sak na hi hiam?

______________________________________________________________________________

“Piansakna” I cih pen Greek kam in “Ktisis” hi a, a khiatna in mimal khempeuh te in, “piansakte” (Heb. 4: 13) i hihna leh, a “kipiang sak khin” na te (Rom. 8: 22) a hi hi. Hih kammal tuak in Piangsakpa sepna tungtawn in a piangte cih a khiatna nei hi. Tua tungtawn in Paul in, “mithak suahna” mangkam in “a thak piansakna” I cih ciangin Mihing te hanciam na tungtawn pan in (vun-atna, Thukham zuihna te) hangin tua “mithak suahna” a hong piangkhia ahih loh zia ki thei hi. Topa Zeisu in tua bang kalsuan na te “suah kikna” (John 3: 5 – 8) na ci hi. Kha thu sungah a si khin khat, Pasian sepkhiat na tungtawn pan in, kha lam thu ah a nuntak theihna kik na dingin kha huih a diik kikna ahi hi. Hih thu pen mah Paul in, Upmuan na hangin Diktan theihna a gengen pen ahi hi.

Hi ci bangin “mithak suahna” tawh kisai in Paul in, 2 Cor. 5:17 sungah a tangzai zaw in kician takin  ong gen hi. Tua mun sungah, mithak suak cih na in vantung laibu sunga kihel theihna ding ciang bek kikhel na hi lo in, tuni mahmah in nuntakna sungah kikhel theihna agen nuam ahi hi. Timothy George in a gen na ah, “kikhelna buppi paizia sungah va kihel cih a khiatna in, thahat takin a sepkhia a hi, Khasiangtho lamlah na sungah Upmuanna leh kisikna maan tawh siatcip na panin nuntakna thak ah, siangtho-na sungah khantohna hangin a tawpna ah Zeisu mel tawh ki batna ciang tun theihna a hi hi.” – Galatians, p. 438.

NINGA NI (THURSDAY) September 28
TAWPKHAK THUVAI KHAK

Paul in ama “thukhun/ thugen a zui” mi khempeuh tungah thupha om ta hen ci hi (Gal. 6: 16) Hih “thukhun/thugen” acih in bang thu te hi dingin ngaihsun na hi hiam?

_____________________________________________________________________________________________________________

Thukhun I cih “rule” a khiatna in a tang mahmah ciang, a hih kei leh sikzawl hi a, leisek tawh innlam te a hih kei leh sing nasep tawh kisai khut siam te (pa-zan, lettama), in a tehna dingun a zat uh “piciang” cihna ahi hi. Hih kammal in, muhtheih dingin mikhat tungah a hoihna leh a manphatna te a teh na dingun zong zang uh hi. Gentehna in, Mi khat in Thuciam Thak Laisiangtho a kicih leh thuciam thak sunga bu 27 te hi a, Pawlpi te in a mau Upna leh zuihna tawh kisai in, a muanhuai thuneihna anei ci in, a khensat uh laibu a hi hi. Tua ahih man in, bang ci bangin thuhilhna a hoih mahmah phial zongin a tehna “piciang” tungtawn in a a kilem kei leh, tua bu sungah kiguang thei tuan lo hi.

Paul in ama pumpi tunga om “Khrih sila ka hihna lim” a hi kei leh, “Zeisu ciaptehna” in bang hiam? Tua a ki ciaptehna hangin kuamah in “nawngkaisak” nawnlo a cih ciangin bang hi ding hiam? Gal. 6: 14 in hih dotna te theihtel na dingin hong huh thei ding hiam? Gal. 6: 17; 2 Cor. 4: 10; 11: 23 – 29.

____________________________________________________________________________________

Ciaptehna cih a khiatna in Greek kam in, “stigmata” ki ci a, tua pan in mangkam in “stigma” hong piang  hi. Tanglai sila te in sila ahih na uh leh, a pu te un a ciapteh theihna dingun a mau tungah ciaptehna kikoih hi. Tua mah bangin biakna khatkhat te ah aki pumpiak na uh a kilat theihna dingin, a pumpi tungah ciamteh na nei uh hi. Tua thu te tawh kizom in Paul in, “Zeisu sila ka hihna lim”a cih nopna in Pasian adingin a kipiak na hangin haksatna te leh bawlsiatna tungtawn in a ngah a meima pawn te (2 Cor. 4: 10; 11: 24 – 27) hi pah ding hi cih kician hi. A langpang te in, Gentile te bangin a pianthakna hangin a mawhsak na khempeuh uh a sut theihna dingin Judah mi a hih zia kitheihna dingin vun-at a hihna kigen hi. A hi zongin Paul in ama kiciapteh na in sila khat a hihna leh, a mah a nei pa Khris a hihna leh, Khris lo siah, kuamah muanhuai na a om loh zia thei hi…Tua a meima pawn te in, a To’ adingin a nasep na tungtawn pan in a ngah a hih zia leh a pumpi mahmah tua a To’ adingin kiphal mahmah ahih zia gennop sa mahmah hi.” – Ellen G. White: The SDA Bible Commentary, Vol. 6, p 989.

To Zeisu na upna hangin bang “ciaptehna” “apawn” na pumpi tungah ahih kei leh mundang ah nei na hi hiam? A hih kei leh na Upna in bangzah mansak na hi hiam?

KIGIN NI (FRIDAY)

SIMBEH DING: Calvary mual tunga Singlamteh in to’na thuak tawntung a, a hi zongin a tawpna ah leitung vai khempeuh a hi zongin, Hell gam vai khempeuh ahi zongin hong zo thal gawp lel ding hi. Huzapna khempeuh Singlamteh sungah kinga a, Singlamteh huzapna hangin masuan tek ah hong pai khia sak hi. Singlamteh in deihhuai lunggulhna khempeuh kingakna phual hi. Tua Singlamteh tung pan in Khris in Leitung mi khempeuh te a dingin a nuntakna hong pia hi. A nuntakna piakkhiat na hangin mihing te in, a ngei picinna a tun kik theihna dingin a ong ki-aap a hi hi. Hi lua hi, tua hong kipiakna hangin nuntak gamtat zia khempeuh hong khelmanga gualzo mite sangin a gualzo te hong suak sak hi.

“Zeisu sunga thahatna a nei khempeuh te in, Mihingte leh Pasian gal ahi khempeuh tungah gualzawhna ngah ding uh hi. A mau te in a puuk ngeilo Vantungmite tungah om Vantung thukhenna mun ah mun a hong luah ding uh hi.

“Khris in a gen in ah, 'Leilak panin kei hong kikhai toh ciangin ka kiangah mi khempeuh ka kai ding hi,' ci hi. Kuamah in Singlamteh huzapna tawh maipha ngah theihna a zon kei leh, a mah in huzap na bawl thei veve ding hi. A khang a khang kizom in, a hong kilak khia, tu hun eite a dingin a om sun thuman pen, “Tu-lai thuman” a hi hi. Singlamteh tunga Khris Zeisu in ei te tawh i kikal ah, hehpihna leh thumaan na hong kimu khawmsak thei a, dik ngah theihna leh lungnop na tawh hong kimat sak hi. Tua thu te in leitung hong ki khiin sak zo hi.”- Ellen G. White Comments, The SDA Bible Commentary, Vol. 6, p. 1113. 

KIKUP DING TE:

1. Bang hangin Paul in a laikhak patna leh tawpna sungah, Pasian hehpihna bekmah bulphuh in thupi sak hiam? Gal. 1: 3 leh Gal. 6: 14 saikak in.

2. Gal. 6: 14 sunga, Paul in 'Leitung thu ah misi a bang hing’ a cihna tawh kizui in, tulai Christian te in Leitung tawh kibang ci zop I hi hiam? Leitung thu ah si khin a hih uh leh Christian te in, Leitunga siatna ahi, kiim le paam kizopna, minam kideidanna, leh naupaihna(nauphiatna) …etc. te ah bang ci bangin kizop kul veve hiam?

3. Paul in a gen, “mithak” bang ci bangin i nuntakna ah i neih theih na dingin, bang ci bangin nungta ding I hi hiam?

4. Tu kuatar sung I sinna tungtawn pan in anuai a te bang ci bangin tomcing tak in tel thei ding na hi hiam? Thukham, Thukham zuihna, upna tawh diktan theihna, thuciam lui leh thak, Khris nasep, leh Christian nuntak zia.

*************************************************************