Thuciam Thak

  

Lesson 10                                            *May 29–June 4

 

Thuciam Thak

 

Sabbath Nitaklam                                               May 29

 

Tukalsung Simding: Jer. 31:31–34; Mate 5:17–28; Hos. 2:18–20; Isa. 56:6, 7; Heb. 8:7, 8; Heb. 10:4; Mate 27:51.

 

Kamngah: “En-un, Topa in kong cih inah, Israel minamte leh Judah minamte tawh thuciamna thak khat ka bawl ni hun hong tung ding hi.” (Jeremiah 31:31.)

 

          Khatvei, Cartoon laibu khat sungah, nasep makaipi khat in adang nasep makaipi tampi mai ah ding thingthiang hi. A khut sungah savan kuang khat tawi a, midangte kiangah lak hi. Tua kuang tungah laituisan tawh Thak kici laimal pen angtang takin kawk a, a bawl thak cihnopna ahi hi. Makaipa in, “Kuang tungah ‘Thak’ cih pen a thak ahi hi.” Kuang tunga Thak cihpen a bawl thak hi a, asung a teng pen a ngeiteng mah ahi hi a cihnopna hi.

          Thuciam thak zong tua bangin cih theih ahi hi. Tua thuciam’ bulpi, eite’ lametna bulpi, a hong pianzia cihte khempeuh pen thuciam lui sunga omteng vive mah ahi hi. Mihingte luahsuk thanemna leh gitnatlohna khempeuh tungah Pasian’ hong itna, lainatna leh hehpihna hang bekin hong bawl thuciam ahi hi.

          Tukal Enpak: Thuciam lui leh thak kibatna bang om hiam? Thukham in thuciamna sungah koibang in mapang hiam? Kua tawh thuciamna kibawl hiam? Hebrew in “a hoihzaw thuciamna” a cih pen bang cihnopna hiam?(Heb. 8:6). Thuciamna leh vantung biakbuk kizopna bangpeuh om hiam?

Sunday                                                            May 30

En un, Tua Nite Hong Tungding hi . . . 

 

          Jeremiah 31:31–34 sim inla, hih dotnate dawngin:

 

1. Thuciamna kua in hanthawn hiam?

 

2. Kua’ thukham kipulak hiam? Bang thukham hiam?

 

3. Pasian in a mite tawh a kizop nopdan tang bangzahna in kipulak hiam?

 

4. Pasian in a mite ading asepsak koi pen in tua thuciam piankhiatna bulpi hiam?

         

          Thuciam thak cih zong pen, Sinai mualah Israel tawh a ciam thuciam lui tawh kilamdang lua khollo hi. Sinai thuciamna pen lui lua in model out zong hituanlo hi. A buaina-pi pen tua thuciam ki palsatzo hi (Jeremiah 31:32).

          A tunga dotna teng a dawnna pen tua tang liite mahin dawng pah a, “thuciam lui” muhdan tampi tak mah thuciam thak sungah kihelkik hi. Thuciam thak cih pen a ki “puahthak thuciam” ahi hi. A masa pen picinsakna, tangtunsakna ahi hi.

          Jeremiah 31:34 a tawpna lam bulphuh lecin, Topa in Ama’ mite mawhna ka maisak ding hi ci hi. Ama’ thukham eite lungtang sungah gelh ding ci ahih hang, tua i lungtang tunga kigelh thukham palsatna ahi mawhna hong maisak ding ci leuleu hi. Hih tegel kikingkalhlua isa hiam? I sak keileh, bang hang? Rom. 2:15 in, amau lungtang sungah thukham om khin a cih pen bang cihnopna hiam? (Matt. 5:17–28).

……………………………………………………………………………………………………..………………………………………….………………..

          Tuni a Lai Siangtho sim dingte na sim ciangin, thuciam thak sungah Thukham sawm, a diakin Sabbath thukham kiphiatsiangta cih upna pen koi bangin na hilhcian thei ding hiam? Tua munte ah hih bangthu a om theih nading thu khatpeuh om hiam? A om khakleh, thukham in kip tawntung ahihna thu koi bangin kihilhcian thei ding hiam?

 

Monday                                                       May 31

Lungtang Nasep

           Khanglam gam a beikuan, Babylon ah a kisalmat madiakin Pasian in kamsang Jeremiah zangin “thuciam thak” pulak hi. Lai Siangtho sungah a gen masakpenna ahi hi. Saklam gam Israel nam sawmte a kisiat dinglai (Jeremiah masang kum 150 laipek) in, thuciam dang khatmah kipia a, tua pen Hosea tawh ahi hi (Hosea 2:18-20).

          Hosea 2:18–20 sim in. Jeremiah 31:31–34 sunga Topa’n a mite kiang a gen thute tawh saikak in. A kibatna bang hi a, thuciamna in a deihna bulpi leh omzia bang ci hiam?

          Pasian in a mite ading thuciamna ageel laitakin amau langdona leh uplohna hangun hun bei toto a, kamsangte sawlin Ama’ tungah a thumaan mite tawh hih thuciamna in cikmahin khawllo ding cih gensak hi. Bangzahta in thumaanlo in lampial, langdo in thumanglo ahih uh hang, Topa’n amau lakah thuciamna tawh lutin thumangdingin kisikkik dingin Ama’ thuciamna tawh zollai hi.

          Anuai a munteng sim in. Thuciam dang a gen tuanloh hang, thuciam thak tawh kipawl bang thu pawlkhat kihel  hiam?

Ezek. 11:19            ……………………………………………………… 

Ezek. 18:31            ……………………………………………………… 

Ezek. 36:26            ……………………………………………………… 

          Topa in “Keimah in Topa ka hihlam a thei lungtang” vaihawm ding hi (Jer. 24:7). Amah in, “amau suang lungtang lakkhiatsak in satak lungtang ka guan ding” (Ezek. 11:19) a, “lungtang thak” leh “lungsim thak” ka pia ding hi (Ezek. 36:26)ci hi. “Note sungah Keima’ kha kong guan ding hi” (Ezek. 36:27) zong cilai hi. Hih bangteng pen Pasian in, thuciam thak a bul a patna ahi hi.

          Mi khatpeuh in, “Lungtang thak deih ing, ka lungtang sungah thukham gelh nuam ing, Topa a thei lungtang deih ing, ngah theih ding dan zong thei tuan ke’ng” ci leh bangci na dawn ding hiam?

 

Tuesday                                                       June 1

Thuciam lui leh Thak

          “Ama’ na a sem ding, Topa’ min a it ding, ama’ nasem a suak dingin Topa pawlin gamdang mite, Sabbath ni tangin a siasaklo ka thuciamna hoihtak alenkip mi peuhmah, —ka mual siangtho ah paipih in, Keima’ thungetna inn sungah ka lungdamsak ding a, amaute meihal biakna leh ka biakna tau tungah ka sang ding hi; ka inn pen mikhempeuh ading thungetna inn kici ding hi” (Isa. 56:6, 7).

          Jeremiah in thuciam thak pen “Israel innkuan tawh” bawl ding ci hi (Jer. 31:33). Hih thu in cilehsa Abraham’ suan, Jew sisan a piangte bekmah in thuciamna kamciam sang ding cihna maw? Hilo e! Lai Siangtho Lui hun lai-in zong tua bang hi tuanlo hi. Hebrew minambup tungah thuciamna kamciam kipia mah hi. Khatpeuh helloh nei tuanlo hi. Jew leh Gentile khempeuh huamsak a, amau thukimna dungzui in tua thuciamna sungah lut thei uhhi. Tu hun tawh kilamdang tuanlo hi.

          Atung a Isaiah kammal sim in. Topa’ na a sem nuamte ading bang thu om hiam? Tua lai a Pasian in a sawlte leh tulai a hong sawlte in kilamdanna a nei hiam?

          Wednesday sinna in thuciam thak pen “hoihzaw” cimah taleh, thuciam lui leh thuciam thak a bawlna ah kilamdanna bangmah omtuanlo hi. Hotkhiatna pen hehpihna mah tawh hong piapa tua Pasian mah hi a (Pai. 34:6; Rom. 3:24): Amite’ upna tungtawnin mawhmaina kamciam hong pia Pasian (Jer. 31:34, Heb. 8:12); Jew leh Gentile kuakua hileh, upna sungah Pasian tawh kikhawl nuam a (Jer. 31:33, Heb. 8:10), Pasian in a lungtang sungvuah thukham ka gelhsak ding hi a ci Pa mah ahi hi.

          Lai Siangtho Thak sungah, Jewte in, hehpihna tungtawn mahin Zeisu Khazih leh lungdam thu sang uh hi. (Rom. 11:7) sungah lungsim “khauh” a cihte hiphial mah tale uh, tawlpi khat sungmah “a beibaang, hehpihna tawh a teel” (Rom. 11:5)mite ahi uhhi. Tua laitak mahin, thu-umlo i cihcih Gentile mite in lungdam thu hong sanguh a, Pasian’ mi taktak, minam deidan omlo (Rom. 11:13–24) thu-um mite hong suak uhhi. Gentile pen “tua hunlai in Khazih tawh kikhen uh a, Pasian’ teel Israel minamte hi loin, a pualam mite na hi uhhi. Pasian in A mite tungah piakding a ciam thute zong angah ding na hikei uhhi” (Eph. 2:12) a cihte pen Khazih’ sisan in huai hi. Khazih in minam leh beh deidan omlo in “thuciam thak” (Heb. 9:15) hong khung hi.

 

Wednesday                                                      June 2

“A Hoihzaw Thuciamna” (Heb. 8:6)

          Zanni in thubulphuhte sungah thuciam lui leh thakin kilamdanna neikhollo cih mukhin hi hang. A taw-phahpi penbel eite bangmah mannei ngeeilopi upna hangin hehpihna tawh Pasian in mawhna hong maisak in, hong honkhia cih thu ahi hi. Tua mawhmaisakna hangin, Ama sungah ki pumpiak in Amah tawh kizopna upna leh thumanhna i neithei hi. Bangbang hitaleh, Hebrew laibu in “a hoihzaw thuciamna”  cihi. Bang a cihnopna hi a, thuciam khat sangin a dangkhat koi bangin hoihzaw thei ding hiam?

          Thuciam lui in a guallelh theihna “thanemna” koiah om hiam?(Heb. 8:7, 8).

……………………………………………………………………………………………..……………..……………………………………………………..

          Thuciam lui in buaina nei hizawlo a, mihingte in upnatawh tua thuciam ana pomkhakloh manuh hizaw hi(Heb. 4:2). A lui in Zeisu siampilian nasepnate gan sisan tawh limlasak a, a thak in Zeisu kibulphuh pah ahih manin hoihzaw hibek hi. Thuciam lui in a pulak hotkhiatna pen a thak pulak mah tawh akibang ahi hi. Athak sungah bel, Pasian in mihing hong itna a lianzaw leh a picingzaw in hong pulak hi. Lai Siangtho Lui in a gengen lim leh liimte khempeuh pen, mawhbanglo Zeisu’ sihna, lei biakbukah siampiliante in a limpuak bangin a sepna sungah picingsak ahih manin a thakin a hoihzaw limlim ahi hi(Heb. 9:8–14).  

          Tu’n bel alim, liim leh gentehnate khempeuh munah, Zeisu mahmah i nei a, eite’ mawhna hangin a sisan hong bua a (Heb. 9:12, eite adingin siampilianpa zong ahi hi (Heb. 7:25). Hotkhiatna a kibang veve ahih hang, Ama’ sung a hong pulakna picingzaw a, thuciam thak in thuciam lui sangin hoihzaw limlim hi.

          Hebrew 8:5 leh Hebrew 10:1 simin. Laikungpu in thuciam lui biakbuk nasepnate a pulakna ah bang kammal zang hiam? Tua kammal a zat manin, thuciam thak a hoihzawkna koibangin i telzaw thei hiam? 

          Hih thu ngaihsun in: Khazih’ nuntakna, sihna, leh eite aiawhin siampilianpa a sepnate theihcianna in, leitung biakbuk sunga sagawh biakpiakna lelte sangin, banghangin Pasian hong telzawsak thei hiam?

 

Thursday                                                     June 3

Thuciam thak Siampipa

          Hebrew laibu in Zeisu pen van biakbuk ah eite Siampilianpa ahihna kip takin gen hi. Khazih in thuciam thak Siampilianpa ahihna pen Lai Siangtho Thak sungah Hebrew laibu ah kicianpen hi. A kituakpak khawng hi hetlo hi. Khazih’ vantung nasepna pen thuciam thak tawh akizopna thuthukpi ahi hi.

          Lai Siangtho Lui biakbuk nasepnate in thuciamna lui thumaante hong hilh hi. Biakpiakna tawh hong palaisak hi. Ganhingte go a, a sisan tawh siampite in palai hi. Hihte khempeuh pen Zeisu sungah hotkhiatna limte vive ahi hi. Amaute sungah hotkhiatna omtuanlo hi.

          Hebrew 10:4 simin. Hih ganhingte sihna sungah bang hangin hotkhiatna omlo hiam? Hotkhiat nadingin ganhing sihna banghangin kicing zolo hiam?

          Hih biakpiaknate leh siampi palaina a kizom hi a, Khazih sungah picing uhhi. Thuciam thak ah sisan in Zeisu hong piak penmah hipah hi. Khazih’ sisan in thuciam thak kipsak a, Sinai thuciam pen “lui” sakin beisak hi. Biakpiakna taktak pen khatvei leh a tawntung adingin hong pia hi (Heb.9:26). Khazih khatvei si a, gangawh kul nawnlo ta hi. Leitung biakbuk nasep khempeuhin a nasep uh khinzota uhhi.

          Matthew 27:51 sim in. Zeisu sihlai in leitung biakbuk sung puandaal kikeekthu gelh hi. Leitung biakbuk nasepnate kilaihzo ahihna hih thu in koibangin hong telzawsak naci hiam?

          Sagawh biakna leh siampi nasepna kizom a, Levi mite in mipite aiawh in, biakbukpi sungah sagawh biakna piaksak uh a, palai sepsak uhhi. Biakpiakna a zawh uh ciangin, a nasep azo hipeuh uhhi. Na khempeuh Zeisu sungah a picin khit ciangin, tu in Ama’ sisan ngiat tawh van biakbuk ah na hong sepsak gige hi (Heb. 8:1-5). Hebrew laibu in Zeisu vantungah Siampilian sem cih gen pha a, Ama’ sisan ngiat tawh eite palai hong sepsak (Heb. 9:12) cihi. Hih pen thuciam thak sungah eite’ lametna leh kamciamte thubulphuh ahi hi.

          Zeisu in, Ama’ sisan tawh nang adingin vantungah na hong sepsak gige cih na theih ciangin na nuamna koibang ahi hiam? Tua in hotkhiatna tawh kisai lungmuanna leh khamuanna bangzah hong piazo ding hiam?

 

Friday                                                                   June 4

Ngaihsutbeh Ding: “Nungzuite tawh khomun leh lengtui a dawnkhop lai-un, Khazih in amau’ honkhiapa ahih ding kamciam hi. Ama hangin Pasian’ tate leh gamhluah ahihtheih na’ngun, thuciam thak pia hi. Hih thuciam hangin vantung thupha in leitung nuntak lai leh vantung nuntak zong amau a hiding hi. Hih thuciamna ah sepdingteng Khazih sisan tawh kipicingsak hi. Tua banah neekkhop pawi zong, a puksa mihing peuhmah, a mimalin kiheltheih dingin, nungzuite tungah Topa in pia hi.”—Ellen G. White, the Desire of Ages, p. 659.

            “Hih kilemna thuciamna pen, a kisik mawhnei mi, mawhna nusia peuhmah adingin, mawh maisakna’ng hehpihna kicing hi cihpenin lungsim hong sukha pen hi. Khasiangtho in zong Pasian’ hehpihna tungtawn hotkhiatna pen lungdam thu hi ci in hong hilh hi. Topa in “A mawhna a khialhna uhah amaute ka hehpih ding a, tua bangin phawkin ka nei nawnkei ding hi” (Heb. 8:12) cihi. Pasian in mawhneite a hehpihna tawh thumaan nusia hiam? Hi lo; Pasian in mawhneite gimsaklohna tawh a thukham nuaisiah theilo hi. Thuciam thak sungah thumanna nuntakpih kul hi. Mawhnei in kisik in amawhna pulak leh, mawhmaina ngah ding hi. Khazih ama’ ading aki piakhiatna hangin mawhmaisakna a ngahthei hi. A kisikkik mawhnei khempeuh adingin thukham hong kalh khempeuh Khazih in hong lohsak khinzo hi”—Ellen G. White, God’s Amazing Grace, p. 138.

 

Kikupding Dotnate: 

1. Thukham i lungtang tungah hong kigelhsakna in bang hamphatna hong pia thei hiam? Suang tungah kigelh leh lungtangah kigelh, koipen mangngilh ding baihzaw naci hiam?
2. Mi a pukpan kipanin hotkhiatna limlim Zeisu sungbekmah hi a, ahunzui in aki pulakkhiatna kibanglo hibek hi.Thuciamte zong tuamah bang ahi diam?
3. Tuni sinna sungah EGWhite kammal anihna enin. Thuciamna in a kalh “apicing thumanna” acihpen bang a cihnopna hiam? “Apicing thumanna” aneizopa khatbek pen kua hiam? Tua thumanna in thukham hongkalhte koibangin hong lohsak hiam?

                            

THUKHUPNA:     Thuciam thak in lianzaw, kicingzaw in a hoihzaw hotkhiatna ngiimna pulakna ahi hi. Tua sungah a kihel mi peuhmah upna tawh kihel uhhi. Tua upna in lungtang tungah a kigelh thukham thumanna piangsak hi.