Lesson 6                                                  May 1 - 7

 

Abraham’ Suan

 

Sabbath Nitaklam                                           May 1

 

Tukalsung Simding: Ezek. 16:8; Thuhilhkikna 28:1, 15; Jer. 11:8; Piancil 6:5;  John 10:27, 28; Gal. 3:26–29; Rom. 4:16, 17.

 

Kamngah: “Pasian in a hong teelkhiat minam, kumpi siampi pawl, a siangtho minam, Pasian’  mite nahi uh a, khuamial sung panin a lamdang mahmah ama’ khuavak sungah a hong samkhiapa’ nasepna a lamdangte genkhia dingin, Pasian in a hong teel mite na hi  uh hi.” (1 Peter 2:9).

 

          Khuaneu khatah, suangmanpha zuakpa tawlet panin et ciangin, anai pen 08:45 in khawl hi. Khua sung mi tampi takte in hun theih na’ngin tuanai a enzel uh ahi hi. Tua ni zingsangin nasem mi tampitak in, tua tawlet panin nai a etuh ciangin nai 9 satna’ng minute 15 bang samlai buang e ci uh a; sangnaupangte in zong asang paina lampi vuah tuanai enuh a, minute 15 neilai hang e ciciat uhhi. Tua nai a khawl manin, tua ni zingsangin mi tampi takmah ziakaikha uhhi.—C. L. Paddock, God’s Minutes (Nashville, TN: Southern Publishing Association, 1965), p. 244, adapted.

          Israel mite ginatlohna tawh kituak tabuang ey mataw. Topa in Israel pen “leitung laizang ah” koih hi (Ezek. 5:5). Africa, Europe leh Asia gamte kikal lei dinmun lianah om uh hi. Leitung khempeuh adingin khalam “nai” ahih ding uh ahi hi.

          Israel in, suangmanpha zuakpa tawlet a naikhawl mah tawh kibang hi. Sup siangna bel hi naikei sam e. Tu hun in Pasian in a beibaang mi citakneilai hi. Tukal i sinna in, akhang akhangin Israel mitaktak ahi eite mahmah zong hong hilh nuam ahi hi.

          Tukal Enpak: Topa in Israel tawh bang thuciamna kamciam bawl hiam? Amau dinmun e leh? Tua minam in tua kamciam tungah bangzah in kipding uhhiam? A thumanloh uh ciangin bang piang hiam?

 

Sunday                                                                    May 2

“Mi khempeuh Tungsiah ah”

             “Note pen Topa note Pasian tungah a siangtho mi na hi uhhi: leitungmi khempeuh sung panin ama’ mi ahi dingin Topa Pasian in hong teel na hi uhhi.” Thuhilhkikna 7:6.

            Tua vai in bel dotna venglel hi: Topa in Hebrew mite pen leitungah atuamvilvel in Pasian aiawh dingin a teelngiat ahi hi. “A tuam-vilvel” cih kammal pen, segulah pan kiletkhia hi a, “neihsa van manpha,” leh “sehtuam” khawng a cihna ahi hi. A thupi penpen i theih dingin, hih teelkhiatna pen Pasian nasepna hi a, a hehpihna hong lahna ahi hi. Mihingte lakah tua hehpihna tawh a kiphu khatbeek zong omzo hetlo hi. Omlo mah ding hi. Hehpihna in kiphu lopi in a kipiakhia hizaw hi.

            Ezekiel 16:8 simin. Topa in Israel a teelna koibangin hong hilhcian hiam?

            “Banghangin Yahweh in Israel teelse hiam? Tuabel thusim khat ahi hi. Amah in mi citawm ngeina lianlua nei khollo vang neikhollo lel hi. Tua bang teelna ngah theihna’ng mimal siamna zong neituan khollo hi. Ateelding penbel Pasian bekmah ahi hi. A teel theihna hangthu bel Pasian’ itna hi lel bek hi. A hang thu bulpipen bel, Pasian in Israel itin teel a, apupate hun panin kamciam khinzo hi. Yahweh’ itna leh dikna hang bekin kiteelkhia ahi hi. Yahweh vangliatna tawh Egypt sal panin kikhahkhia hi. Hihbang thuteng hangin amah pen asiangtho tuam leh keptuam minam ahihlam kithei tahen. Tua ahih manin themcikkhat bek a sawiphial zongin a zumhuai mahmah mawhna hiding hi.”—J. A. Thompson, Deuteronomy (London: Inter-Varsity Press, 1974), pp. 130, 131.

            Pasian’ geelnasa ombangin, Israel mite peuhmah pen kumpinam leh siampinam ahi uhhi. A gilo hih leitungah, amaute kumpite, lungsim leh kha lamah mawhna a zogawp dingte ahi uhhi (Mang. 20:6). Siampite hi uh a, thungetna, phatna leh biakpiakna tawh Topa kiang naih dinguh hi. Leitungmite leh Pasian kikal ah palaite ahihmah bangun, siate thuhilhte leh kamsangte hi a, etteh takcing a siangthote, vantung biakna maan a lakkhia mite hiding uhhi.

            Tuni Lai Siangtho mun en lecin, “leitung mihing khempeuh sung panin”cihi. Tua kammalte in kiniamkhiat theihna leh kiphatsak theihna kammalte hi uh a, bang a cihnopna hidingin nangaihsun hiam? Koibang danin “mi khempeuh tungsiah ah” om thei ding uh hiam? Ei pawlpi in zong tua lungsim i puazo ding hiam? Koi bangin maw?

 

Monday                                                       May 3

Leitang Piakna Piancil 35:12.

             Pasian’ mi, Israel mite tungah leitang pia ding cih kamciam pen, Abraham tungah kiciam masapen a, tuakhit Isaac leh Jacob tungah kisuut suksuk hi. Joseph in a sih kuanin akam vaikhakna ah suutkik hi (Pian. 50:24). Pasian in Abraham kiangah, asuanhte in tuagam alakma in “kum zalii” paiphot ding hi cihi (Piancil 15:13, 16). Tua kamciam a tangtun hun pen Moses leh Joshua hunlai ahi hi. Moses in tua thu a suutna ah: “En-un, note maiah leitang ka koihzo hi: pai unla . . . luah-un” (Thuhilhkik 1:8).

            Thuhilhkikna 28:1, 15 simin. Bang thu peuh kipulak hiam? Thuciamna picinna khat in leitang kipia hi. Thuciamna cih zong mawhpuak neilai hi. Israelte in bang mawhpuak nei uh hiam?

            Thuhilhkikna 28 apatna lam tengah, Israel in Pasian’ thu a manvua leh, a saandinguh thupha kigualsuk hi. A zom teng ah, azuihkei vualeh atungding samsiatna teng gualsuk leuleu hi. Hihbang samsiatna tepen avekpi ahikei zongin a tamzaw pen amau mawhna hanguh hilel hi. “Leitung pumpi deihna khaici a vawhleh sihna ngahding” cihi (Gal. 6:8). Tui bangin, amah guak nusia leng, a maitang akikim masiah peuhmah luang suksuk mai a: nai bangin, khawllo in abei mateng paipailel: singkung bangin koihlel leng khangkhangin ama’ gah ding gahlel: tua bangin, mawhna in zong ama maitang kikimdong zong, aluanna’ng lampi zong, agah ding mah gah in, “na khempeuh a tawpna in sihna” hi lel hi (Rom. 6:21).”–The Pulpit Commentary: Deuteronomy, H. D. M. Spence and Joseph S. Exell, eds. (Peabody, MA: Hendrickson Publishers, 1890), vol. 3, p. 439.

            Kamciam leitang tawh kisai in, tua kamciamna in kimawkciam hetlo hi. Thuciamna’ phel khatmah hiveve hi. Israel in zong ama’ mawhpuak tengmah aguicinsak keileh, tua kamciamte a mawkna suak ding hi. Topa’n kiciantakin agenna ah, thumang kei uhleh, tua leitang amau khut sung pan kilakik ding hi. Siampi laibu 26:27-33 simin.

            Christiante in, vanthak leh leitungthak khapsa gamte i lamen hi. Hebrew mite ading gam akhap mah bangin eite zong vanthak leithak hong khapsa ahi hi. A kibanlohna ah, tua mun i tunkhit nakleh taanngei nawnlo in neisuak ding hihang (Daniel 7:18). Tualai tun theih nading dinmun pawlkhatbel omlai hi. Tua dinmunte bangteng hiding hiam? A diakin upna bektawh hotkhiatna ah bangteng tawh kizom ding hiam?

 

Tuesday                                                       May 4

Israel leh Thuciamna

             “Ahih hangin amaute in ka thu hong manglo in a bil uh hong ngatlo uh a, agitlohna lungsim uh azui tentan uh hi. Hih thuciamna a zuih dinguh thu ka piak hangin, hong nial veve uh ahih manun, tua sunga thute avekpi in ka tungsak ding hi.” Jeremiah 11:8.

            I Lai Siangtho mun enin. Topa in “hih thuciamna sunga om thu khempeuh” tungsak ding cihi. A sia mahmah thu khat a gen hi gige hi! Tua thuciamna in thupha vive hi napi, laimai langkhat neilai hi. Noah tangthu sungah kimuthei pah hi. Pasian in thupha lamdang mahmah Noah kiangah kamciam a- kisiatna pan suahtakna hi a, Noah in tua thuphate a ngah theih nadingin a thumanna kisam hi. Thu mangkei lehlah thuciamna laimai langkhat a omteng ama tungah tungpah ding hi.

            Atunga Lai Siangtho mun pen Piancil 6:5 tuiciin masang leitung omzia tawh enkak in. Aki zawitawn hiam? I lungsimte kepciat ding a thupitna bangteng hong gen hiam?

            Israel mite’ khangtangthu pen bel lampialna vive kisuut suksuk mai a, thukhenna thuak zel, kisikkik zel, thuman hun nei zel uhhi. Kumpi David leh Solomon hun sung bekmah khapsa gampen hoih takin kemzo uhhi.

            Israel mite lampialna Jeremiah ciaptehna bang endih in. “Mi khatin a zi ma henla, tuanu in zong amah nusia in, mi dangkhat’ zi vasuakleh, a pasal masa in tua nu lakik thei ding ahi hiam? Tua gamteng a ninsak khin suak ding hi lo ahi hiam? Nang pen numei paktat suak in mi tampi tawh na ki ngai khinzo napi in, tu in kei kiang hong zuankik na hi hiam? Thumaanlo zi in a pasal a nutsiat bang in, Israel mite aw, no zong kei tungah nong thumaan kei uh hi” (Jer. 3:1, 20).

            Hih thu in tangthu pawlkhat hong phawkkiksak a: Pasian tawh thuciamna pen, sumbawlte bangin atam zuakzo penpen khawngin thupha sangding cihbang hi hetlo hi. Thuciamna sungah kipiakkhiatna zong kihelngiat a, siangtho kiteenna thuciamna mahbang hi a, Topa in zong tuamah deihngiat hi.

            Israel’ lampialna bulpi in thumanlohna hipaklo a, Topa tawh mimal kizopna palsatuh ahih manun, thumanlohna tungsuak in, thukhenna dong thuaksuakkha uhhi.

            Christiante adingin mimal kizopna in bang hangin phamawh hiam? Pasian tawh i kizopna dikkeileh, mawhna sung hong tungsak in thumanlohna koibangin suakthei hiam? Pasian tawh kizopna hoih leh thuk neinuam ing aci khat koibangin na hanthawn thei ding hiam?

Wednesday                                                       May 5

A Beibaang

          Israel’ lampialna, Pasian’ thukhenna, a kisikkikna cihte theihmawh bawl inla, anuai a mun tengin bang lametna neisakzaw hiam?

 

Isaiah 4:3………………………..…………………………………………

Micah 4:6, 7 ………………………………………………………………

Zephaniah 3:12, 13 ………………………………………………………

          Israel adingin Pasian’ geelsa khempeuh thumanlohna in susia mah taleh, beisiang sitset sam lo hi. Kiakte lakah, pak hong momlai sam hi. Lai Siangtho Lui kamsang tampitak mahin, a thumaan abeibaang tethu, Pasian in paklom khop bangin Ama’ kiangah khawm ding hi. Pasian in acitak a beibaang cih a omsak sese mahbangin Israel mite zong tuamah bangin omsak hi. Tuate pen “Ka minthanna a genthang ding”(Isa. 66:19) a cihte ahi uhhi. Amau hangun a citak midangte in zong “Topa Kumpipa a bia ding” (Zech. 14:16) in hong kikhawm ding uhhi. A dinmun uh bangzah in kisia mahleh, Pasian in a lampialte kawmkal ah a citakmi, “Pasian’ sapna ah a citak mi” neilai veve hi (2 Pet. 1:10).

          A minambup et ciangin pukkhin himah taleh, amau hihtheih zahin thuciamna ah kipkho in a ding tentan pawlkhat om veve hi (1Kumpi 19:14–18). A minampihte tawh gam sung pan hawlkhiat ciangdong thuakkhawm veve lel uh a, ahih hang thuciamna kamciamte a mau a’ hiding a, tawntung nuntakna ahi hi.

          John 10:27, 28 simin. Zeisu in bangci hiam? Ama’ kampaute lakah kamciamte leh tanglai Israelte’ lampialna enkak dihin. A beibaang omtaktak ahihna namukha hiam?

 ……………………………………………………………………………………………………..……………………………………………………………

           Kum tawmno khat lai in, numei khat in Christian upna nusia a, adiakdiak in ama’ mawhna leh lampialna, pawlpi makaite’ kineihkhemna cihte amuh hang ahi hi. “Hihte bel Christian taktak hi peuhmah kei e” ci in ama’ upna anusiat theih nading paulam in zang hi. Tuni sinna na siksan manin tua nu paulap in Koi bangin bulneilo hi  cithei ding na hiam?

Thursday                                                     May 6

Khalam Israel

             Tanglai Israel in bangzahta in khialmah taleh, Topa in Ama’ tungah acitak nasemmi na nei veve lai hi. Topa in khalam Israel abawl dingthu Lai Siangtho Lui in lamen mahmah hi. Tuate pen Jew leh Gentile thu-ummite, leitungbup ah lungdamthu atangko ding mite ahi uhhi. Welcome maw Pawlpi masate aw.         

 Galati 3:26–29 simin.

  1.       Aneu 29 ah Paul in bang kamciamna gengen hiam?       

  2.       Mikhat kamciam gamluah ahihtheihna bulpi in bang hiam?(Gal. 3:26).

  3.       Banghangin Paul in numei pasal, minam leh mimal kideidanna susia hiam?

  4.       “Khazih sungah Pumkhat” cihin bang khiatna nei hiam? 

 5.       Rom. 4:16, 17 simin. Galati 3:26–29 sunga Paul kammalte koibangin hong  telsak zawdeuh thei hiam? 

             Khazih mahmah in Abraham’ tapa hon gsuahna hangin, thuciam bangin gamluahpa ahi hi. Kituiphumna tawh Khazih sanggam unau i suak a, Ama hang mahin, Abraham tungah kamciam tezong i tangthei hi. Pasian in Abraham tungah a kamciam khempeuh Khazih hangin eite’n i tang theikha a, eima minam, numei pasal hang hihetlo Pasian hong hehpihna leh upna hang bekmah in hong piakkhiat ahi hi.

            “Abraham leh a suanhte tungah gamhpiakpen Canaan gambek hi lo a, leitungbup hizawsop hi. Tua ahih manin sawltakpa in ‘Abraham leh a suante in leitung luah ding hi acih pen, Pasian’ thukham azuihmanuh hi lo in, upna hangin Pasian in mi hoihin a saanhang ahi hi’ (Rom. 4:13). Tua pen Lai Siangtho in zong Abraham tungah kamciamteng pen Khazih hangin picing cihi. Thu-um mi in ‘a siangeilo, a ninngeilo, a mual ngeilo tawntungna’ a cihte gamhluah hi uh a(1Peter 1:4), tua in samsiatna tawh akipelh leitungthak ahi hi.”—Ellen G. White, Patriarchs and Prophets, p. 170. Hih kamciamte pen Khazih leh misiangthote leitungthakah a tenkhopuh ciangin tangtung ding hi. (Daniel 7:27).

 

Friday                                                                       May 7

 Ngaihsutbeh Ding: EGWhite, Prophets and Kings pan “The Vineyard of the Lord,” pp. 15–22; “Hope for the Heathen,” pp. 367–378; leh “The House of Israel,” pp. 703–721, simin.

            “Pasian in minam, beh, nampi namneu cihte bangmah khenlo hi. Minamkimte Ama piansak hizaw hi. Piansakna leh hotkhiatna sungah innkuan khat i hilel uhhi. Khazih in kideidanna khem peuh susia dingin hongpai hi a, biakinn sung mun deina teng liipkhia in, kha khempeuh in Pasian’ mai ah luttheih na’ng thu hong pia hi.Hong itna in zai, thuk leh kicing in munkhempeuh apha hi. Satan’ khemna sungah lamkhialte tua itna in domto a, sakhituihup kamciamin a tuamcip, Pasian tokhompan batphakna mun tun hi. Khazih sungah Jew, Greek, sal, misuakta cihbang omtuanlo hi.”—Ellen G. White, Prophets and Kings, pp. 369, 370.

            1Peter 2:9, 10 sim inla, Peter in pawlpi ading dinmun 4 agenteng zongin. A tamzaw pen Lai Siangtho Lui sung Israelte dinmun vive hi a: Paikhiatna 19:6 leh Isaiah 43:20. Hih dinmun tengin Pasian tawh kizopna koi bangin pulak na ci hiam? Gentehna in “teeltuam minam” cihpen, Pasian in tuhun tulai in pawlpi hong teeltual hi.

 

Kikupding Dotnate:

1.    Tanglai Israel siampite sagawh biakpiakna in Messiah kawk hi. Tulai kumpi nam leh siampinam ahi pawlpi in bang “biakpiakna” neih kul hiam?1 Peter 2:5. 

2.    Pasian in Israel pen minamdangte lakpan a siangtho minam ahi dingin tuamkoih hi. Leitung buppi ah hotkhiatna thu tangko sawn ding uhhi. Tulai pawlpi zong tua mahbang ahi hi. Leitungah lungdamthu tangko ding kawmkal ah leitung panin koibangin tuamkoih thei ding hiam? Israelte phutkhaak leh    Zeisu gentehna in koibangin hong telzawsakthei ding hiam?

3.    Tanglai Israel lak panin Pasian in a beibaangmi nei hi. Elijah leh tua hun in a beibaangte ngaihsun in (1Kumpite 19; aneu 18 simpha  diakin). A nungtolh pawlpi mite laksangin, leitungmite lak panin, Pasian tungah cihtak ding banghangin baihzaw thamthei hiam?

THUKHUPNA: Singlamteh masang ahi a, khitciang ahi zongin Pasian’ Israelmi taktak cihte pen, upna Israel hi a, kha tawh ahi a, Pasian thuciamna sungah ahi zongin anungta uh ahi hi. Tua bangte pen Pasian aiawh taangmite hi a, leitungah hotkhiatna thupha puak ding uh ahi hi.