FSS ZIRLAI 13: KA BAWIPA JESUH RATSALNAK, June 23-29

ZIRLAI 13                                                        June 23-29

KA BAWIPA JESUH RATSALNAK

SABAT TLAI LAM:                                                     June 23

TUZARH SIAR DING: Isai. 13:6,9; Matt. 24:30,31; Dan. 2:34,35; 2 Tim. 4:6-8; 2 Thess. 1:7-10.

BIBLE CANG KEN: “Nisuahnak ihsin nitlaknak tiang hmakhat ih a tleu zukzo mi nimthla kau vekin milai fapa cu a ra ding” (Matt. 24:27).

T.S. ELIOT in hitin bezai a ngan, “In my beginning is my end” ka hramthoknak hi ka netnak a si tiah a ti ih, tawi fel famkim, thutak hmual nei zetmi a suahpi. Kan hramthoknak thil ummi a netnak a thleng. Seventh-day Adventist timi kan hmin in a langter duhmi taktak cu Bible ih zirhmi thu pahnih sirhsan in a fehpi. Seventh-day kha thukhaam 10 sungih a palinak Sabat a sim duh. Cumi cu zarh khat sungih niruk sungah leitlun ih thilnung a ummi hmuahhmuah sersiam a sinak hminsinnak a si. Cule Adventist timi in kan Bawipa Jesuh ratsalnak kha a sawh duh. Himi hminah Bible sungih ruahsannak hmuahhmuah le thukam hmuahhmuah kumkhaw nunnak thukampawl tiangin a funtel theh ti kan hmu.

Leilung sersiamnak kan hramthoknak hi hlanlaipi a si zo ih, Jesuh ratsalnak le kan netnak, misual sinak a um mi cem netnak ihsin cun hlanlaipi a si zo nan, a tu tiang pehzomawknak a um. Pathian in in sersiam (John 1:1-3), a ra sal dingmi tla amah a si. “Netabik tawtawrawt an tum tikah mitthep karah” (1 Kor. 15:52). Kan rundamnak tawpkhawk a thleng ding. Cumi ah kan hramthoknak ihsin kan cem netnak kan hmu ding.

Tuzarh sungah a netabik thil thleng ding mipawl kan reltlang ding. A tu kan leilung dinhmun thaw cun kan Bawipa Jesuh a ratsalnak ding hi a hlatawk tuk lai.

THAWHSAL NI                                                          June 24

BAWIPAI NI

Jesui ratsalnak thu hi Thlung Thar sung lawngah a um tiah kan ruatah cun a dik lo a si. Jesui voi khat a ratnak a thihnak, a thawhsalnak le van a kainak in a ratsal leh ding thutak famkim le sullam nei zetin a langter. Thlung Thar ah tampi kan hmuh vekin Thlung Hlun khalah thil um leh dingmi thutak sunglawi hi a thlamin an langter zo. Jesui ratsalnak thu hi Thlung Thar ngantupawl in thutak thar an hmuhmi a si lo. Bible sungih a um zo mi thutakpawl kha uar sawnin an cawisang.

Thinglamtah ih a thihnak le Bawipa thawhsalnak in a ratsalnak thukam theihfiang sinsinnak le a sunloihnak an theih famkimnak a si.

A tangih Bible cangpawl siar aw. Jesui ratsalnak thu ziangso in zirh? Isaiah 13:6,9; Zekha. 14:9; Dan. 12:1.

Bawipai ni hi siatnak ni, riahsiat ni le hloralnak ni a si. Nunnak cabu sungih hmin ngan mi hmuahhmuah Pathian zumtupawl luatnak ni a si (Fill. 4:3; Thup. 3:5; Thup. 13:8). Bawipa ni timi cu misualpawl an sual thuthennak can a si. Cui canah Pathian ih rinumtupawl cu humhim an si ding ih laksawng pek an si ding tiah Thlung Hlun sungah kan hmu. Cui ni ah mi hrekkhat cun Pathian thinhengnak an tong ding. Asinan dingfel thianghlimnak le tangdornak nun hawl dingin kawhnak a pomtupawl cu Bawipai thinhengnak ni tihnung kha an hnenah a thleng lo ding.

Matthai 24:30,31 siar aw. Jesui ratsalnak ni ah hloral dingmi le rundam mipawl thenfelnak ziangso in sim?

Ni netnak thil thleng mi ah khui tawkih ding ding so kan si? Rundamnak ih a dingsuaktu si thei dingin ziangvek duhhrilnak kan tuah ding?

TLAWNGKAI NIKHAT                                               June 25

DANIEL LE JESUH RATNAK

Judah miphun tampi in anmai sanah Jesuh, Messiah in Rome uknak nehtu ding le ramdang hnakih cak sawnih din dingah an beisei. Jesui vokhat ratnak le voi hnih ratnak hi ram uknak tuah dingah a ra lo. Pathian in amah zumtu mi rinumpawl hrangah an sunlawinak a tuahsak sawn. Sualnak ih siatsuah theh zo mi kan leilungpi kha a tharin a tuahsal ding.

Thuthlung Hlun sungah hi thu fiangte ih a langmi a um lo. Dan 2 nakih thutak phuanmi ah leithar kha a hlun mi leilungpi ihsin a hung suak lo ding. Lei thar kha a hramthoknak ihsin danglam zetih sersiam a si ding.

Dan. 2 ah a langmi cu leitlun ih ram uknak pali a hung suahmi cu Babulon, Media-Persia, Grik le a netabik Rom tla ans i. Rome hi Europe ram thendarhawknak a suahnak ram a si. Nibukhanizar in a mangah mizuk tumpi a hmuh tikah leitlun ah thuneihnak ropi zet neitu le nehnak cotupawl khihhmuhnak a si. A netnak ah a sunglawi zetmi Jesui rat hnu ih a um ding mi leilungpi thawn pehzomawknak a nei lo.

Dan. 2:34,35,44,45 siar aw. Hi leilungpi a cem netnak le leilung thar pakhat a um ding.

Himi Bible cangin Jesuh rat tikah ziang a cang ding timi thu fiangte ih sim loin a tanta. Luka 20:17,18 ah Jesuh in lungpi tiah as tarlang aw. Zokhal cui lungpi ih a nenmi cu an zam theh ding a ti. Dan. 2:35 kha Armaic tongih ngan mi siar ahcun sui, theh in ngun, cutheh ah dar le thir le tlak rawi mi hipawl dengzaam theh an si ding ih fanghi thli in a semhlo theh vekin anmai hmun kelih a umtu an um lo ding. Cui can cu leilung hlun kha Jesui rat tikah zianghman a tang nawn lo ding tinak a si.

Leilung hmaisa ih miphunpawl a siatsuah thehtu lungto kha tlang tum zetah a cang ih, leilungpi a khat theh tiah a ti. Himi uknak hi Jesui ratnak a si ih, “Ziangtik hmanah a siat nawn lo dingih kumkhua a hmun ringring ding” (Dan. 2:44).

Minung hmuahhmuah hrangah thu cemnetnak pahnih a um. Jesuh a hngaktupawl cu lei thar ah an nung ringring ding. Jesuh thawn thenaw loin kan um tlang ringring ding. A hrekkhatpawl cu a siatmi leilungpi ah fanghi vekin thli in semhlo dingah beidong zetin kan um ding. Asinan, kumkhua nunnak in kan zaten in hngak theh a si.

TLAWNGKAI NIHNIH                                               June 26

CAN REIPI RAK THURMI (Long term Prospects)

Tita 2:13 siar aw. A sunglawi mi ruahsannak ziangso a sim?

Zirhtu pakhatin kan leilungpi hi amai zumnak in kum 13 billion rei ih hram a rak thok mi a si tiah a sim. Abu buih a ummi siarcawk lo thil fate tam zetin hlan laiah a rak um lo. Cui thil hlawmpawl cu a puakkuai ih kan leilungpi ah a thlengih an um tiah a sim. Hi mipawl sah zetih a ummi kha a um pangmi a si tiah a sim.

Tuzarh kan zirlai thuhmaihruai hminsin aw. Kan hramthoknak ihsin kan cem netnak kan hmu thei. Himi thu hi zirhtu ih a zirhmi sawn a si. Kan cem netnak hi can reipi um hman sehla, ruahsan ding a um lo. Kan leilungpi hi thil fate a hlawmhlawm in sah zet le siar cawk loih a ummi thil ihsin umsuak mi sisehla, thiamlo coternak, thihnak tivek tla a um lo ding. Hipawl hi milai hnenah can reipi ihsin a um zo mi a si.

Bible simdan thawn kan hramthoknak zohsal ahcun a hmuhdan hnakin thil umdan fumfe sawn le ruahsan ding tampi tla a um. Kan hramthok thil umdan ah Pathian hnenih lungawi thusim ding kan si. Can reipi thil kan rak thlir rero mi kha a tha zetmi a si. A ra thleng dingmi hrangah ruahsan ding tampi kan nei ih, hi mipawl tla Jesui ratsalnak thukam parah a thumaw a si.

2 Timote 4:6-8 siar aw. Paul in ziangthu so a sim? Ruahsan ding ziangso a si?

A rei hlanah Paul tla thah ding a si ih, rundam hnangamnak nei in Jesui ratsalnak a hngak. Jesuh a langnak kha Paul in ziangtin so a sim? (2 Tim. 4:8). Dingnak sui lukhum a hngakih amai dingfelnak si loin (1 Tim. 1:15) Jesui dingfelnak sawn kha Paul in ruahsannak a neihmi a si ih, Jesui ratsalnak ah a thumaw. A kiangkap ih thil um mipawl kha hngilh in a thabik mi kha a ruat (thih hngakin thawnginn sungih a um lai thil a si sawn). Paul in reipi a rak thlir rero mi kha a tha zetmi thil a si ti a thei. Tui amai dinhmun lawngin a thinlung ruahnak a luah khat lo, thil ziangkim a tha zawngin kaupi in a thlir sawn.

Tui na kiangih thil ummi kha hngilh aw. Paul ih a neihmi ruahsannak ziangtin so na nei thei ding? Ruahsannak in pek ruangah hmailam thil kaupi ih thlirdan ziangtin so kan zir ding?

TLAWNGKAI NITHUM                                              June 27

VAN IH MERO LAKAH

TAksa thawn a ra ding timi kha Bible simdan ih thulaimu a si. Khrihfapawl lawng si loin a rat lai a hmu hmuahhmuah hrangah a thupi zet. Mi hrekkhatpawl in Jesui rat salnak ah amah rori ra loin, Thiang Thlarau in leitlun kawhhranpawl hnenah a um ding. A ratsal tikah Khrihfapawl ih ziaza ah hmuh theihin a famkimter ding tiah an ti.

Zirhnak dik lo a si ih, an ti vek sisehla can reipi kan hngak rero mi ruahsannak kan nei taktak thei kem?

A tangih Bible cang Thlung Thar sungih nganmi Jesui ratsalnak thupawl kha siar aw. Khrih ratsalnak umdan ziangso an langter.

Matthai 24:30 …………………………………………….........

1 Thessalon 4:16 ……………………………………………

Matthai 26:64 …………………………………………….........

Thuphuan 1:7 …………………………………………….........

2 Thessalon 1:7-10 …………………………………………....

A khar-aw mi van kha a ong ding. Cutawk in Pathian Bawi tohkham ih a sunlawi tleunak a ra ding. Thli in hrampi a semih a hnin vekin tlang tumpipipawl tla an hnin ding ih, lungpawl tla hmuntin ah an sepdarhaw ding. To tum thlipi a hrangih tifinriat cu thinheng aw vekin a huk ciamco. Setan ih thlaphang au-aw cu to tum thlir hrang vekin siatsuahnak a thlentertu hnenah a au ciamco. Leilungpi cu tifinriat ih a dolhmi vekin a hlon hlo-aw ding.

Cule kan leilungpi kha a deng kuai aw theh ding. Thil hramthoknak zianghman um lo vekin a hlo theh ding. Tlang tumpipi an zomawknak pawl an hlo theh. Minung umnakpawl an lung theh. A sual zetmi Sodom khua vekin lawng colhnak khawlipipawl tla tidai in a dolh. A ropi zetmi Babulon kha Pathian in a hngilh lo. Pathian thinhengnak khuahai Sabit zu hran kha pek a si ding. E.G White, The Great Controversy, Pp. 637.

Jesui rat tikah lei can cemnak hi nasa zetin a um ding ti kan thei. Hi thil thleng theitu an um lo ding. Jesuh voikhat ratnak ih kan hrang a rak tuah theh mipawl kha vawi hnih a ratsalnak in a famkimter ding.

Atui kan nun ziaza in Jesui ratsalnak hrangah thathnemnak ziangvek in so a um? Kan nun ziangtluk in so a thupi ti hngilh lo dingah ziangvekin so in sim?

TLAWNGKAI NILI                                                     June 28

A NUNGMI LE A THI MI

Thlan sung ihsin a rualpa Lazarus a thawh hlanah himi thu a sim. Keimah cu nunnak le thawhsalnak ka si. Keimah I zumtu cu a thi khalle a nungsal ding (John 11:25). A thihnak a rei zo ih, a rim a sia zo mi kha ka thotersal ding tiah a simmi thu kha zum ding um lo an ti ko nan, Lazarus kha thihnak ih thotersal dingah a feh (John 11:39).

Jesui tuahmi hmutu a simmi thei ih a zumtupawl tla an thi ngaingai. Jesuh ih a simmi cu an thi khalah a nungsal ding tiah a ti. Himi hi a thi mi hmuahhmuah thawhsalnak a si. Himi Jesui ratsalnak hi ruahsannak kan neihmi hmuahhmuah ih a hnukpi (a laimu) a si.

Jesui ratsal tikah amah a zumtu a thi mipawl parah thil thleng ding ziangso um ding? Rom 6:5; 1 Thess. 4:16; I Kor. 15:42-44,53,55.

Jesuh ratsalnak ih ruahsannak sang zet a neitu cu thihnak ihsin thawhsalnak a si ding. Kha mi kha sankhat hnu sankhat a hnenah rinum ih a umtupawl ih tonnun a si. Jesui thawhsalnak ah khan a hnenih mi rinum zetpawl in pumpak hrangah ruahsannak hngetkhoh zet an neihnak a si.

Jesui ratsal tikih a nungdampawl hrangah ziang thil so thleng ding (Fil. 3:21; 1 Thess. 4:17).

Jesui ratsal tikah taksa thihnak tong loih a luattupawl rinum zetpawl in thawhsalnak tonnun an nei lo ding. Thihnak ihsin a thosaltupawl in thi thei lo nunnak nei loin vanlam thiltitheinak Pathian mi thianghlim a nungmipawl in mitthep karah thi thei lo sinak ah an thleng ding. Anmah sunloihnak dingah Pathian ih a au suakmi cu “a tu ah annih cu thi thei lo mi ah an tuah zo” ti a si ding. Cule thihnak in a thosaltu mi thianghlimpawl thawn an Bawipa tong dingah lakso an si ding. E.G White, The Great Controversy, Pp. 645.

Na hrangah a thupi zetmi leithlun thilpawl kha ngan aw. Khapawl kha na hnenih pek mi kumkhaw nunnak hnakin na hrilsawn ding maw?

TLAWNGKAI NINGA                                                 June 29

RUAH BET DING: Jesui ratsalnak kha misualpawl riahsiat ih an um hnu ih thunetnak bet cop mi a si lo. Jesui ratsalnak hi Khrihfa hrangah ruahsannak sunglawi a thleng mi a si. Himi um hlah sehla ziangvek so a si ding? A tui kan sinak vekin milai thuanthu ah beidonnak pakhat hnu pakhat, riahsiatnak pakhat hnu pakhat kan tong ding, kan thih ih kan cem ralni tiang a reh lo ding. Khrih ratsalnak beiseitu lakah kan tel ih, William Shakspear ih nganmi ah, “Thuanthu hi mi aa-pawl ih sim mi a si, san nei zianghman a um lo, Aatthlak tongnak men a si” tiah a ti. 133

Himi ruahsannak kan neih mi hi a tu le a tu Pathian thu ih in nemhnget sak rero mi a si. Jesui nunnak ih tlenmi kan si ruangah himi ruahsannak kan nei thei (Mark 10:45).

Cule tlennak man pek zo mipawl lak dingah a rasal ding. Kan hrangih a ratsalnak dingah vanih arsi-pawl in thusim ding an nein awn lo. Thingkung par ihsin vatepawl khalin an tlangaupi lo ding. Hipawl in an sinak umdan in kan hrangah ruahsannak thawn a khatmi thil tha tampi an langter zo. Nikhat ni ah Jesuh a ra ding tiah au in an sim lo ding. Van in tawtawrawt a thang ding ih, a thi mipawl kha siat thein awn lo dingin an tho ding. Cule kannih tla thi thein awn lo mi ah thleng theh kan si ding (I Kor. 15:5). Milai fapa hi ziangkim tithei vorhlam kapah to in vanih mero thawn a rat khal nan hmu leh ding. Cuih ni cu rak thlir uh tiah in zirh hai lo ding (Mark 14:62). Hi thupawl Bible ah kan hrangih sim theh zo mi a si ih, cui tongkam kha kan rinsan ding a si.

RELTLANG DING:

1.     Mi hrekkhat ih zumdan vekin Jesuh ra lo ngaingaisehla, Khrih dungthluntu Khrihfapawl ih nundan thu kha ruat hnik. Ziangso a si ding? Ni netabik ni ah a um rori dingmi a si ih, ruahsan ding um loin ziangah so in tanta ding?

2.     Tui sanih a lar zetmi leilungpi hi zianghman lo ihsina rak umsuak a si timi thu hi ziangah so aatthlakza ruahnak a si kan ti thei? Kha vek ruahnak kha ziangah so minungpawl in an uar zet? Mi tampi in ziangah so an zum? Lei le van thuhla hrilhfiahnak ah ziangkim sersiamtu Pathian hi kumkhua in a nung ringring timi zum hi ziangah so daan vekih fehnak a si kan ti thei?

3.     Kumkhua nunnak a lo pekmi hnakih thupi sawnahna nunih na ruah mi kha nan zirnak ah sim aw. Na rak nganmi thu ihsin zirmi a dang ziangso na neih? Mi tampipawl in an duhsawn mi ngai ding nei loih an um ahcun rundamnak ah himnak a um lonak thu theifiang dingah ziangtin so kan sim thei ding?