HSS ZIRLAI 11-NA: PATHIAN CHHINCHHIAHNA NGE SAKAWLH CHHINCHHIAHNA ZÂWK?

ZIRLAI 11-NA                                                             JUNE 9-15, 2018

PATHIAN CHHINCHHIAHNA NGE SAKAWLH CHHINCHHIAHNA ZÂWK?

CHÂNGVAWN: “Aw LALPA Pathian, Engkimtithei, i thiltihte chu a ropuiin a mak a; nang mi thianghlimte Lalber, i kawngte chu a felin a dik a ni” (Thupuan 15:3).

SABBATH CHAWHNÛ                                                                              JUNE 9

CHHIAR TÛRTE: Genesis 17:9–11; Exodus 31:13, 17; Eph. 1:13, 14; Heb. 4:9, 10; Rev. 13:17.

MOSIA leh Berâm No hlâ hi tûn kâr zirlâi chângvawn atâna kan hman thû khian a bultan a ni a. Hê hlâ hi “sakawlh te, a lem te, a hming nambar te hneha lo chhuakten” vânrama awm dârthlalang tuifinriat kama an din lâia an sak a ni a (Rev. 15:2). Eng tin nge an zîngah hian kan tel ve theih ang?

Ni hnuhnunga Pathian mi dik takte hriat theihna tûr chhinchhiahna tam tak zînga pakhat chu sakawlh chhinchhiahna nei lo tûra mîte vaulâwkna thu vântirhkoh pathumna-in a sawi hi an puang em tih hi a ni a. Amaherawhchu, hemi âia vaulâwkna runthlâk zâwk hi Bible-ah a awm lo chungin, he chhinchiahna hi eng nge ni tih thû-ah ngaihdân mak pui pui a lo chhuak tawh thîn a. Mi thenkhat chuan “chaldârah bar code dah a ni ang” an ti a, thenkhatin “credit card nambar hi a ni dâwn” an ti a, thenkhat dang leh chuan “adhaar card” hi ni tûrah an ngâi bawk.

Babulon-ah hi chuan ngaihdân mak leh inkâwlkalh tak tak âwm tûr rêng pawh a ni hrim hrim a. A hming hrim hrim pawh hi “buaina” tihna a ni tlat alâwm. Nimahsela, Pathian mi la bângte chuan thiltihtheihna nêna vântirhkoh pathumna thuchah an puan darh theihna tûrin hemi chungchâng hi chiang taka an hriatthiam a pawimawh a. Tûn kârah hian, sakawlh nambar chu eng nge ni tih leh chumi neih loh dân chu Pathian chhinchhiahna neih hi a ni tih hriatthiam kan tum dâwn a ni.Tûn kârah hian, sakawlh nambar chu eng nge ni tih leh chumi neih loh dân chu Pathian chhinchhiahna neih hi a ni tih hriatthiam kan tum dâwn a ni.

SUNDAY                                                                                              JUNE 10

A MÎTE HRIAT THEIHNA TÛRA PATHIAN CHHINCHIAHNA

Thuthlung Hlui hunah khân Pathian mi dik takte hriat theihna tûr chhinchhiahna pahnih a awm thîn a. Pakhat zâwk chu serh tan a ni. Hê chhinchhiahna hi tû hnênah nge pêk hmasak ber a nih le? Genesis 17:9–11; Exodus 31:13, 17.

Pathian chuan Abrahama leh a thlahte kha chhandamna thuthlung chhinchhiahna atân an serh tan tûrin thû a pê a. Mipa tawh phawt chu an pian atanga chhiara ni riatnaah an serh hmâwr tansak zêl tûr an ni (Lev 12:3). Hei hian awmze thûk zâwk a nei a. Thinlung “serh tanna” emaw, tihtharna emaw an ngaihzia entîrtu atâna tih a ni (Deut. 30:6 en la). Chuvâng chu a nia Paula pawhin, “A lang a pau maia Juda mî ni chu Juda mî dik tak a ni lo va; pâwn lam lang thei tîsa tan pawh serh tan dik tak a ni hek lo; chhûngril lama Juda mî chu Juda mi dik tak a ni a, serhtan dik tak chu thinlung lama tan niin, lehkha thû-ah ni lo, Thlarau zâwkah a ni; chu  mi chuan mihring ni lovin, Pathian fak a hlawh a ni” (Rom 2:28, 29) a lo tih ni.

Hêng Bible châng—1 Cor 7:19 te, Gal 5:6 leh 6:15-te hian Thuthlung Tharah chuan serhtan kha pian tharna, “thil siam thar nihna,” suala thihna leh nun thara nung tûra thawhlehna (Rom 6:3, 4) entîrtu baptisma-in a thlâk tawh a ni tih an entîr a. Chuvâng chuan Paula pawhin serhtan hi chu a pawimawh tawh lo va, “hmangaihnaa rinna” leh “Pathian thupêkte zawm chu” a tûl tawh zâwk niin a sawi rêng a ni.

Pathianin pâwn lam lang theia a mîte hriat theihna tûr chhinchhiahna dang a pêk chu eng nge ni a, chu chu eng vânga pê nge a nih? (Exodus 31:13, 17; Ezekiel 20:12, 20).

Serhtan kha Abrahama hunlâia chîn tan a nih lâiin, chhinchhiahna atâna Sabbath hman a nihna erawh hi chu khawvêl leh a chhûnga thil awmte siam a ni lâia lo intan daih tawh a ni thung (Genesis 2:2, 3). Chutiang chu a nih avângin Isua pawh khân, Genesis-a a inziah ang ngei hian, “Sabbath chu mihring tâna siam a nih” ni (Mark 2:27) thû a sawi rêng a. Sabbath hian Pathian siam kan nih avâng leh, Pathianin a tlan kan nih avângin Pathian tâ kan ni tih a tilang a. Chuvâng chuan, Paula pawhin serhtan chu pawimawh tawh lo niin sawi mah se, Pathian thupêkte (Sabbath serh tûra thupêk pawh tel hian) zawm erawh hi chu a la tûl rêng niin a sawi (Heb 4:9).

Eng tin nge i ngaihtuahna leh i thiltumte khân thinlunga serhtan dik tak i nih leh nih loh a lantîr ve le?

THAWHTANNΠ                                                                                   JUNE 11

SAKAWLH LEH CHIBAI BÛKNA DIK LO

Hêng chângte hi chhiar la. “Sakawlh chhinchhiahna” chu kan neih vê loh a pawimawhzia eng tin nge min zirtîr le? Rev 13:17; 14:9, 10; 16:2.

Sakawlh chhinchhiahna neitûte chuan Pathian thinurna pawlh dal loh chu an in ang a, a hremna berhbu pasarihte pawh tuarin, a tâwpah meidîlah chuan paih thlâk an ni bawk dâwn a ni. Sakawlh chhinchhiahna nei duh vê lotûte leh dârthlalang tuifinriat kama ding a, Pathian leh Berâm No-te fakna hlâ satûte nên chuan an chan a inang dâwn lo hlê.

Mi tu mahin neih an duh loh tûr chhinchhiahna chu eng nge ni rêng rêng le? Chibai bûkna dik lo nêna inzawm a ni tih a chûnga Bible châng târlante hian chiang takin an sawi a. Zirlâi hmasaa kan hmuh tawh ang khân, Daniela 7-a kan hmuh sakawlh palîna khân (Thupuan-ah chuan ‘tuifinriat atanga lo chhuak sakawlh’ tia sawi a ni a) a hun hnuhnung lamah “hunte leh dânte tihdanglam a la tum dâwn a” (Daniel 7:25). Dân pakhat tihdanglam a tum chu thupêk palîna Sabbath hi a ni—a chhan pawh he thupêk hi thupêk sâwm zînga hun sawina awm chhun leh Pathian chu “lei leh vân te, tuifinriat leh a chhûnga thil awmte Siamtu” leh ni sarih nî-a châwl ta (Exodus 20:11) a nih thu sawitu awm chhun a nih vâng a ni.

Thil pawimawh deuh mai chu, vântirhkoh pakhatna thuchah hian hê thupêk hi sakawlhin tihdanglam a tum thû a sawi bâkah, LALPA chu min siamtu a ni a, amah chauh chu chibai kan bûk tûr a ni tih pawh chiang takin min hrilh bawk.  Dik taka sawi chuan, Rev. 12–14-a chibai bûkna thû sawina châng pasarihte zîngah hemi (14:7) chiah hian chibai bûkna dik tak chungchâng a sawi a; châng dang zawngte hi chu sakawlh leh a lem chibai bûk lo tûra vaulâwkna thû vek a ni hlawm (Rev. 13:4, 8, 12, 15; 14:9, 11). Vântirhkoh pathumna-in hê chibai bûkna dik lova inhmangte chan tûr a puan zawh hnû hian, Pathian chibai bûktu dik tak chu tute nge ni tih sawi ve leh nghâl a ni a: “Mi thianghlim, Pathian thupêk âwihtûte leh Isua zuitu rinawmte tân hetah hian chhel a tûlzia a lang” tiin (Rev. 14:12).

Tawngkam danga sawi chuan, hêng thuchah pathum puan chhuaha awmte hian mihringte hi pâwl hnihah a then a, chûngte chu: Pathian thupêkte (ni sarih nÎ Sabbath pawh telin) zâwma Siamtu chibai bûktûte leh, sakawlh leh a lem chibai bûktûte an ni. Hê chibâi bûk dân dik lo hian Sabbath thupêk zâwma Siamtu chibai bûkna ni lo chibai bûkna dang a rawt chhuak a ni.

Chibai bûk leh tu emaw laka rinawmna inzawm dân chungchâng hi ngaihtuah la. Pathian laka kan rinawmzia tilangtu tûr hian eng ang chibai bûknate nge pawimawh le?

THAWHLEHNΠ                                                                                    JUNE 12

PATHIAN CHHINCHHIAHNA CHU

Chhinchhiahna chu, hming nemna (signature) ang deuh hian, lehkha pawimawh tinungtu, a pawimawhna tilangtu atâna hman a ni thîn. Hmânlai hunah kha chuan, thil neitu dik takin a thil neih chunga thuneihna a neihzia lantîrna tûrin hlumah emaw thil nêmah emaw chhinchhiahna an nemkâi thîn a ni.

Pathian chhinchhiahna chu eng nge ni a, eng tikah leh eng tiangin nge pêk a nih?  Eph 1:13, 14; 4:30; 2 Tim. 2:19; Rev. 7:1–4; 14:1.

Pathian chhinchhiahna hian Pathian chu neitu a ni a, a mîte vênghimtu pawh a ni bawk tih a lantîr a. Paula chuan chhinchhiahna chu pian tharna leh Thlarau Thianghlim thilthlâwnpêk dawnna nên inzawm niin a sawi. Hê thilthlâwnpêk hi bank-a pawisa kan dah ang emaw, motor kan leia a man kan pêk ang deuh hi nia sawiin, ringtu zawng zawngte hnêna tlanna famkim leh Isua lo kal huna rochan an dawn tûr tichiangtu a ni.

Thupuan bû hian Isua lo kal leh hmâ chiaha chhinchhiahna dang a thlen leh tûr thû pawh a sawi a. Hê chhinchhiahna hnuhnung ber hi chu mi 144,000-te hnênah ruah hnuhnung a lo sûr a, Thlarau Thianghlim a bawhawka leih buak a nih hunin pêk a ni ang. Hêng mîte chalah hian Pathian hming (a chhinchhiahna) chu ziah a ni a. An nuna Thlarau Thianghlimin hnâ a thawh avângin Pathian nungchang an lantîr thei a ni.

Pathian chhinchhiahna leh sakawlh chhinchhiahna hi khâikhin la. An inan lohna a sawi chu engte nge ni? Rev 7:3, 14:9.

Pathian chhinchhiahna chu Pathian chibai bûktu dik takte hnênah pêk niin, sakawlh chhinchhiahna erawh chu sakawlh chibai bûktûte hnênah pêk a ni vê thung. Pathian chhinchhiahna hi chu chalah chauh pêk niin, chu chuan a thupêk ang taka amah chibai bûk tûra rilru duhthlanna chiang taka siam tih a kâwk. Sakawlh chhinchhiahna erawh hi chu chalah emaw, kutah emaw pêk a ni vê thung a, hei hian sakawlh chu a eng emaw zâwk zâwk avângin chibai an bûk thei tih a entîr. An rilrûa remtiin, Pathian chibai an bûk ngei emaw an inti a; a nih loh leh, a rilrua remti lo chungin sakawlh chu chibai an bûk a, a chhan pawh a thu zawm lohna nghawng râpthlâk tak, thil lei leh hralh theih loh mai bâkah, a tâwpa tihhlum nih chu an hlauh êm vâng a ni (Rev 13:17, 15).

“Khawvêl nêna inzawmte chuan khawvêl leitha chu an dawng a, sakawlh chhinchhiahna chu nei tûrin an inpuahchah mêk a ni. Mahnia rinna nghat lo va, Pathian hmâa inngâitlâwmte leh thutak zâwma an nun silfaite chuan vân leitha chu an dawng a, an chala Pathian chhinchhiahna dawng tûrin an inbuatsaih bawk.”—Ellen G. White, Testimonies for the Church, vol. 5, p. 216.

NILÂINΠ                                                                                             JUNE 13

SAKAWLH CHHINCHHIAHNA CHU

Neih loh kan tum tûr sakawlh chhinchhiahna chu eng nge ni?  Zirlâi hmasa lama kan sawi tawh ang khân, Daniela 7-a kan hmuh sakawlh palîna (Thupuan 13-ah chuan tuifinriat atanga lo chhuak sakawlh tia sawi a ni a) hian a hun hnuhnung lamah “hunte leh dânte thlâk danglam a la tum dâwn a” (Daniel 7:25). Dân pakhat thlâk danglam a duh chu thupêk palîna, Sabbath hi niin, tihdanglam a duh chhan pawh hê thupêk chiah hi Pathian chu “lei leh vân te, tuifinriat leh a chhûnga thil awmte siamtu” leh “ni sarih nî-a châwl ta” (Exodus 20:11) a nih thu sawitu awm chhun a nih vâng a ni.

Hetih lâi hian vântirhkoh pathumna thuchah chuan hê thupêk, sakawlhin tihdanglam a tum tho kha rawn sawi ve lehin, LALPA chauh chu Siamtu a nih avânga chibai bûk tûr a nihzia chiang takin min hrilh a. Chutichuan, “sakawlh leh a lem” (Rev 14:9) chibai bûk zâwktûte chan tûr a sawi zawh hnû-in châng 12-ah hian Pathian mi rinawmte chu a rawn sawi vê leh ta a ni.

Rev 14:12 chhiar la. Pathian mi rinawmte nihna a sawi dân hian engtin nge tâwpna huna thil thleng tûrahte hian Sabbath chu a pawimawh hlê dâwn a ni tih hrethiam tûrin min tanpui?

A inziah dân tak chu: “Mi thianghlim, Pathian thupêk âwihtûte leh Isua zuitu rinawmte tân hetah hian chhel a tûlzia a lang” (Rev 14:12) tih a ni. Kan hmuh tawh ang khân, “Pathian thupêkte” zînga a palîna, Sabbath serh tûr a nih thû hian Pathian chu Siamtu a ni a, amah chauh chu chibai bûk tûr a ni tih min hrilh a. Chuvâng chuan, mi tam takin “sakawlh chhinchhiahna” tih hi chibai bûkna nî atâna Sunday hmanna nên inzawma an ngâi pawh a mak vak lo rêng a ni. Hemi nî hi chu “sabbath” (“chawlhni”) lem, Bible-in serh tûra min tih pawh ni miah lo a ni a; Bible-in serh tûra min tih zâwk chu ni sarih nî hi a ni a, chumi serh chu thupêk palîna zawmna a ni bawk.

Chuti a nih chuan, Sunday-a Pathian chibai bûktu Kristiante chuan tûnah hian sakawlh nambar an nei tihna a ni em? Ni lo ve. Rev. 13:15-a kan hmuh angin, hê chibai bûkna dik lo hi zâwm ve duh lote chu tihhlum an ni dâwn a ni. Thih emaw, dam emaw thû a la ni ang. Mahse chutiang hun êm chu a la thleng rih lo deuh; hê fiahna hnuhnung ber hi a lo thlen hmâ loh chuan sakawlh nambar pawh hi tu hnênah mah pêk a la ni rih lo bawk ang. Chumi awmzia chu, tûn dinhmunah mi tû mahin sakawlh chhinchhiahna an la nei rih lo tihna a ni.

Pathian thupêkte. Isua zuitu rinawmte. Eng vângin nge hetiang mizia hi tûnah ngei pawh hian Kristian dik takte nihna tûr pawimawh tak a nih tho le?

NINGÂNΠ                                                                                            JUNE 14

SABBATH HI CHHINCHHIAHNA A NI

Kan hmuh tâk ang khân, ni sarih nî Sabbath hi hmân ata tawh—Evi leh Adama-te hunlâi atanga Israel hun chhûng zawng thleng khân—Pathian mi dik takte chhinchhiahna a lo ni tawh thîn a.  Thuthlung Thar kohhranah pawh la ni chhunzawm chho zêlin, Isua leh tirhkohte pawh khân an serh thîn a, chu chauh ni lovin, ni hnuhnunga Pathian mi, “Pathian thupêkte âwihtûte leh

H-9

Isua zuitu rinawmte” (Rev. 14:12) chhinchhiahna langsâr tak a ni bawk a ni.

Eng vângin nge Sabbath hi a pawimawh viau a, Kristiante tân pawimawhna bîk eng nge a neih? Exodus 20:8–11; Heb 4:9, 10.

Sabbath hi Thu Sâwm Pêkah pawh lailî taka dah a ni a. Siamtu-in a thuneihna chhinchhiahna tûr atâna a pêk a ni. Amâ hming ngei, “LALPA i Pathian” tih chhâlin a thliar hrang a. A thuneihnain a huam chin chu “lei leh vân te, tuifinriat leh a chhûnga awm zawng zawngte” a ni tih sawiin, a thuneihna innghah chhan pawh “ni ruk chhûngin LALPAN lei leh vânte a siam a, . . . a ni sarih nî chuan a châwl ta a” tih hi a ni.

Thuthlung Thar bû ziaktûte hian Isua chu Pathianin thil zawng zawngte siamna atâna a hmana niin an sawi a (John 1:1–3; Col 1:16; Heb 1:1, 2).  Ni ruk chhûnga kan khawvêl hi siam a, ni sarih nî-a châwl ta kha Isua hi a ni. Chuvângin, Zirtâwpni chawhnûa kraws-a khâi kân a nih lâi a, “A kin ta!” (John 19:30) tia a âu pawh kha a pawimawh hlê rêng a. Thil siam hnâ a thawh zawh hnua Sabbath-a a châwl tâ ang chiah khân, Isua chu kan tlanna atâna kan thih âi a thihna hmanga sual thâwina hnâ a thawh zawh hnû khân, Sabbath nî chu thlâna chawlhna hun atân a hmang a.

Chutiang chuan Sabbath chu thuah hniha malsâwmin a awm a—thil siamah khân malsâwm ni phawtin, kraws-ah khân malsâwmin a awm leh bawk. Chuvâng chuan a nia, Hebrai lehkhathawn ziaktu’n a lo sawi angin, Sabbath-a kan chawlh hian Kristiante chuan “Pathianin a lo tih ang khân an hnathawhte chu an chawlhsan vê a ni” (Heb 4:10) tih an tilang. Sabbath hi keimahniin kan inchhandam thei lo va, chhandamna chu a tîr atanga a tâwp thlengin Krista hnathawh a zârah vek a ni zâwk a, chu chu rinnaa pawm mai tûr kan ni (Heb 12:2 en la) tih lantîrna a ni.

Sabbath hian kan hnathawhte chawlhsanna a entîr a nih chuan, Sunday serh hian eng nge a entîr ve thung a, eng tin nge chu chu Babulon ze bulpui nên inrem chiah a nih le?

ZIRTÂWPNΠ                                                                                        JUNE 15

NGAIHTUAH TÛR: “Pathian mîte chu an chalah chhinchhiah an nih a—chu chhinchhiahna chu mita hmuh theih chhinchhiahna ni lovin, sâwi nghîn rual loh khawpa nghet an nih theih nâna rilru leh thlarau lama thutaka intukluhna a ni a—sâwi tilhna hun lo thleng tûr atâna an inpeih hunah a lo thleng ang. Dik tak chuan tûnah hian a thleng tan tawh reng a; eng nge lo thleng tûr chu ni tih kan hriat theih nân, Pathian rorêlnate chu tûnah hian lei chungah a thleng mêk tawh a ni.”—Ellen G. White, The Faith I Live By, p. 285.

“Sabbath hi thutak chungchânga mîte inhnialna ber a nih avângin rinawm leh rinawm loh fiahna ropui tak a la ni dâwn a. Fiahna hnuhnung ber chu mihringte chunga a lo thlen hunah chuan Pathian rawngbâwltûte leh a

rawngbâwl vê lotûte thliar hran an ni tawh ang. Sabbath suak (Sunday) serh chu thupêk palîna kalha sawrkâr siam dân rema kalna a nih avângin, Pathian dotu laka mi a rinawmzia pho langtu a ni a; chutih lâiin, Pathian dân zâwma Sabbath dik tak serhna erawh chu Siamtu laka mî a rinawmzia tilangtu a ni vê thung. Pâwl khatte hian leia thuneitûte laka an intukluh nghehzia tilangtu chhinchhiahna chu an neih avângin sakawlh chhinchhiahna an dawng a; pâwl khat dangte erawh chuan Pathian thuneihna tilangtu chhinchhiahna chu an thlan vê thung avângin Pathian chhinchhiahna an dawng a ni.”—Ellen G. White, The Great Controversy (Indona Ropui), p. 606.

SAWI HO TÛRTE:

u Eng tiang kawngtein nge sakawlh chhinchhiahna leh Pathian chhinchhiahna chungchâng hi tûl lova inhnialna ang chî chawk chhuak lo tûr zâwngin kan puan chhuah theih ang? Entîr nân, tûn dinhmunah mi tu mahin sakawlh chhinchhiahna chu an la nei rih lo a ni tih hi uâr taka kan sawi a tûl.

v  Eng tiangin nge Sabbath leh Thlarau Thianghlimin chhinchhiah hnâ a thawh hi a inzawm le?

w Chhinchhiahna chu “rilru lam leh thlarau lama thutaka intukluhna a ni” tih thû hi ngun takin ngaihtuah la. Eng nge ni a awmzia?

x Thlarau lam Babulon-in a ngaih hlut zâwngte leh a kalphungte chu eng nge ni? Eng tiangin nge Pathian ramin a ngaih hlut zâwngte nên a danglam? Eng tiangin nge Babulon-in a ngaih hlut zâwng thenkhatte chu kan kohhranah ngei pawh hian a rawn inzeh luh vê mai theih? Chutiang a rawn inzep lût vê a nih chuan, eng tin nge kan lo hriat chhuah ang a, Pathian ram dân ang, Kristiante tih âwm rêng ni bawk chuan kan lo chin fel theih ang le?