ZIRLAI 10-NA JUNE 2-8, 2018
AMERICA LEH BABULON
CHÂNGVAWN: “Chumi hunah chuan i mipui fâte tan thîntu, hotu ropui tak Mikaela chu a ding ang a; tin, buaina hun, hnam awm tirh ata chumi hun thleng pawha la awm ngâi lo chu a lo awm ang: tin, chumi hunah chuan i mîte chu chhanchhuahin an awm ang, mi tin, lehkhabûa hming chuang apiangte chu”
(Daniela 12:1).
SABBATH CHAWHNÛ JUNE 2
CHHIAR TÛRTE: Jer 51:6, 7, 53, 57; Rev. 13:1– 12; 14:9–11; 16:2; 18:1–4; 19:20; 20:4.
KÂR kal tâah khân “trinity suak,” Setana (dragon) leh leia thuneitu pahnihte kan thlîr ho tawh a, chûngte chuan Pathian mîte an tihduhdah tûr thu pawh kan sawi bawk a nih kha.
An zînga pakhat, tuifinriat atanga lo chhuak sakawlh (Rev. 13:1–10) chu keitê ang tak a ni a, a kête erawh savawm kê ang leh a kâ pawh sakeibaknei kâ ang a ni (Rev. 13:2)—hetiang sa hi Daniel 7:4–6 pawhin a lo sawi a nih kha. Zirlai paruknaah khân Babulon (sakeibaknei) te, (Medo-Persia (savawm) te leh, Grik (keitê) lo din chhuah hnûah leia lalram hnuhnung ber, Rome chu a lo din chhuah vê thu Daniela 7 hian a sawi a ni tih kan hmu tawh kha. He lalram hi a tîrah chuan milem be mîte hnuaia awm niin, a hnûah pope thuneihna hnuaiah a awm vê leh ta thung a.
Hê lalram hi Daniel 7:7, 8; 19–21; 23–25-ahte chuan “ki te tak tê” tia sawi a niin, sakawlh pali-na atanga lo chawr chhuak a ni. Pope thuneihna hnuaia awm ta Rome lalram ziarâng tam takte kha, Daniela 7:7 leh 8-a târ lan ang khân Rev. 13:1–10-a kan hmu tuifinriat atanga lo chhuak sakawlhah pawh a rawn lang ve leh chiah a ni tih pawh kan hmu bawk a nih kha. Chutiang chu a nih avângin, Bible zir mîte chuan Rome lalram hi tâwpna huna Pathian leh a mîte dodâltu pawimawh tak pakhat ni tûrin an hnu rêng a ni.
Amaherawhchu, Rome hi a mal tan dâwn hauh lo va, thurualpui a neih tûr thu târ lan a ni. Tûn kârah hian Thupuan 13-ah kan insâwr bing deuh bîkin, hemi bunga thil thlengte leh thuneitu a sawite hi kan thlîr ho ang a. Hêng thil thlengte hi eng nge awmzia ni a, eng tin nge hetiang atân hian kan lo inpeih theih ang tihte kan sawi ho dâwn a ni.
SUNDAY JUNE 3
HLIAM NA TAK CHU A DAM LEH TA
Rev. 13:1–10 chhiar la, heta a thil sawi hi tûn hmâa pope thil lo tih tawhte leh nakina a la tih leh tûrte chungchâng a ni tih i lo hria em? A hnêna tih tûr an pêk chu eng nge ni a, chu chuan ni hnuhnunga thil la thleng tûrahte eng tin nge nghawng a neih dâwn le?
Kohhran hrang hrangahte hian Pathian chuan mi rinawm tak tak neih tho mah se, Pathian Lehkha Thu chuan he thuneihna-in khawvêl chanchin kal tawha thil a lo tih tawh leh ni hnuhnunga a la tih leh tûr chu chiang takin a sawi a.
Rev. 13:3 chhiar la. Hetah hian eng thil nge thleng a, chu chuan Rome huhâng lenzia eng nge min hrilh le?
Kum za eng emaw ti chhûng chu Roman kohhran hi sâkhaw lian leh pui ber a ni thîn a, khawthlang ramahte phei chuan ram kaihhruaina (polictic) thilah pawh thû an nei hlê thîn a. Chutianga thû a lo neih len thinzia a lanna pakhat chu Roman Lalber (Emperor) Henry IV chuan Pope Gregory VII a tithinrim a, remna siam tumin pope chu a chênna hmunah a va kal chilh a. Mahse pope chuan a chênna ina a luh a lo phalsak mai hauh lo; thlasik lâi tak ni mahse pope thu ngâichâng chuan pâwn khaw vâwtah ni thum tlawng zuk awm â! Pope Gregory VII chuan hnehna chang taah inngâiin, lal chapo tak takte hnuh hniam chu a tih tûr a nih thû a sawi zui bawk.
Nimahsela, Kohhran Siamthatna lo thleng te, finna leh thiamna lama thanharhna (Enlightenment) lo thleng te leh, French Revolution lo thlengte khân kum zabi sâwm leh pariatna chawhnu lamah chuan ram rorêlna leh sâkhaw thila Rome-in huhâng a neih thin kha nasa takin a tihkiamsak a. Pope pakhat, Pius VI phei chu kum 1798 khân French sipaiten manin an tântîr a, a tânna hmunah ngei hian a kum lehah (1799) a thi zui ta a ni.
Amaherawhchu, Thupuan 13 hian hliam na tak a tawrh chu a dam leh thû a sawi tlat mai. Tûnlâi huna Rome hian Gregory VII hun lâia thuneihna a chan ang tak kha chu la chang leh rih lo mah sela, tûn hnâia pope thenkhat hi chuan khawvêl lawm/ngaihsân rawn an hlawh leh tan ta hlê mai—sâkhaw thil mai pawh ni lovin, ram rorêlnaah pawh hûhâng an nei hlê a nih hi (entîr nân lo sawi ila, Pope Francis-a chuan kum 2015 khân America ram rorêlna ina dân siamtu pâwl pahnihte kal khâwm hmâah thu a sawi a nih kha, hetiang hi tûn hmâin a la thleng ngâi lo). Hrilhlâwknain min hrilh dânin a hûhâng hi a la lian telh telh dâwn a ni.
Eng tin nge hril tûra min pêk thuchah hi rinawm tak, mi dangte tâna huatthla la lo thei ang ber tûr sîin kan hril darh theih ang? Chutih rual chuan, eng vângin nge tûnlâi hun atâna thu tak kan hrilna kawngah hian ram hruaitûte thû thû-a awm ringawt tûr kan nih loh le?
THAWHTANNÎ JUNE 4
HRILHLÂWKNA-IN UNITED STATES A SAWI DÂN
Mi tam tak chuan: ‘Thupuan 13-in a sawi ang hûhâng hi tûnlâi hunah emaw, nakîn hunah emaw pawh eng tin nge Rome hian a neih theih tehlul ang?’ tiin an zâwt thîn, an thlîrna atang chuan a âwm ve khawp tho mai. A duh ang tipuitling tûra sipaite thû a pêk mai thin hun kha chu hmânlâi thil a ni tawh a. Mahse an zawhna chhânna chu Rome 13-ah vêk hian kan hmû.
Rev. 13:11, 12 chhiar la. Hê mî hi tu nge ni tih kan hriat theihna tûra chhinchhiahna a sawite chu eng nge ni?
Hê sakawlh lo chhuah hmâa lo chhuak hmasa sakawlh, Rome nia Protestant-ten an hriat kha chu thla sawm lî leh pahnih chûng a duh thâla che tûra thu pêk a ni a (Rev. 13:5). Heta “thla sawm lî leh pahnih” a tih hi Daniel 7:25-a “hun khat leh hunte leh hun chanve” tih te, Rev. 12:14-a “kum thum leh a chanve” tih te leh, Thupuan 12:6-a “ni 1,260” tihte nên hian thuhmun a ni a—pope-in a mi huat zâwngte a rah beh hun chhûng tûr sawina vek an ni. Hê hrilhlâwkna hun hi (“ni khat” tih hi kum khat sawina zêl a ni a) hi pope-in thuneihna pumhlûm a neih tan kum, A.D. 538 khân intanin, pope man a nih a, tântîr a nih kum, 1798 khân a tâwp a. Hemi hunah hian pope thuneihna chuan hliam na tak a tuar a, hrilhlâwknain a sawi ang chiahin thil a lo thleng ta a ni.
Hetih hunlâi vêl bawk, “thla sawm lî leh pahnih” a ral dâwn hnaihah (1798) hian thuneitu dang a rawn chhuak ve leh ta a (Rev. 13:11; Rev. 13:1). Tûn tuma mi hi chu, a hmâa lo chhuak tawhte (Daniel 7:2, 3 en la) ang lo takin lei atanga lo chhuak a ni vê thung. Sakawlh hmasâ kha chu tuifinriat atanga lo chhuak niin, “tuifinriat” tih chu mipui tam tak sawina a ni a. “Nawhchizuar thutna tui i hmuhte kha, mi te, mipui te, hnam te, tawng te a ni” (Rev. 17:15).
Hêngte avâng leh, thil dang dangte avângin heta sakawlh a sawi hi United States of America ngei a ni tih a hriat theih a. USA chu tûn hmâa mihringten an la luah lum ngai loh ram niin, a lo din chhuahna tûr hian eng lalram lian mah a hneh a tûl vê lo a ni.
“‘Khawvêl Thar’ tia an sawite zînga eng ram hi nge kum 1798-a lo ding chhuak a, [a khua leh tuite hnêna] chakna leh ropuina thu tiam a, khawvêl mit fûk rawn ni bawk chu ni le? He miin a entîr chu thil dang vak a awm lo. Ram pakhat, ram pakhat chiahin he hrilhlâwkna thû-in a sawite hi a rawn tifamkim thei a; chu ram chu hai rual lohin United States of America ngei hi a ni.”—Ellen G. White, The Great Controversy (Indona Ropui), pp. 399, 440.
Hê sakawlh hi berâmno kî ang ki pahnih nei nia sawi niin, chu chuan ngilnei tak ni angin a lang dâwn tih a entîr a; mahse “dragon tawng angin” a la tawng thung dâwn sî (Rev. 13:11). Chumi awmzia chu sakawlh hmasa hnuaia tihduhdahna thleng ang kha a hnuaiah pawh hian a la thleng ve leh dâwn tihna a ni. Tichuan, Rev. 13:11–17 hian eng tin nge hrilhlâwknain a sawi ang hûhâng kha Rome hian a neih leh theih ang tih zawhna kha a rawn chhâng ta chiah a. United States of America tanpuina leh thiltihtheihna hmangin a nei dâwn a ni.
THAWHLEHNÎ JUNE 5
CHIBAI BÛKNA CHUNGCHÂNG
Pathian mîte chanchin kal tawh zawng zawngte kha kan thlîr kîr chuan, LALPAN milem biakna leh chibai bûkna dik loha tlûte a hrem thin thu tam tak kan hmû ang (Matt. 4:8–10 en la). Buaina hun hnuhnung ber, Thupuan 13-a târ lanah pawh hian chibai bûkna thû bawk hi buaipui ber a ni leh dâwn a. Hetah hian Pathian mîte pawhin tu nge chibai an bûk a, tû rawng nge an bâwl tih thû-ah duhthlanna an siam a la ngâi dâwn a ni (Joshua 24:15 en la).
Zirlai 2-na: “Daniela leh Tâwpna Hun Chu” tihah khân rangkachak milim chibai bûk tûra thû an pêk, Hebrai tlangvâl pathumte chanchin (Daniel 3:5) kan zir tawh a. Hemi bunga a tawngkam hman tho hi Thupuan 13 pawhin tâwpna huna Pathian mîten tihduhdahna an la hmachhawn tûr sawina atân pawh a hmang vê leh a ni tih pawh kan hmu bawk a nih kha. Chumi awmzia chu, Daniela 3-a thil thleng hi ni hnuhnunga thil thleng leh tûr, sakawlhin a thuneihna hmanga Pathian mîte a tihduhdah tûr thu lo hril lâwktu a ni tihna a ni. Mi zawng zawng chu rangkachaka siam milim chibai bûk tûrin thu pêk vek an ni a; a zâwm lo chu rawh tuina meipuia paih luh tûr an ni. Chutiang bawk chuan, Thupuan 13 pawh hian sakawlh lem chibai bûk lo apiang chu tihhlum an nih tûr thu a sawi (Rev. 13:15).
Rev. 14:9–11; 16:2; 19:20; 20:4 chhiar la. Hêng chângte hian chibai bûk chungchâng hi a la pawimawh hlê dâwn a ni tih eng tin nge an sawi?
Hmâsâng hun ata tawh Babulon chu chibai bûkna dik lo khawpui a ni tawh thîn a. Babel In Sâng khân a satûte thiltum chu tilangin, Lucifera ang mai khân “chhûm âia sâng zâwkahte khian” (Isa 14:14) han chhoh an châkzia leh, khawvêl pum huap chhiatna dang lo thleng leh thulha anmahni inchhanhim a tumzia an lantîr a. Pathianin lei chungah tui a lêttîr leh tawh ngâi loh tûr thu a sawi chu an âwih duh lo tlat a ni (Genesis 9:8–11).
Babulon Lalram thar zâwk pawh khân mihringte kut chhuak chu a châwi sâng leh tlat mai tho a. An lal Nebukadnezzara chuan “Hê Babulon khaw ropui tak hi keimâ chakna ngeia ka din a ni” (Daniel 4:30) te a ti vêl a. A hnû-ah rawn lal ve leh, Belshazzara phei chuan Solomona temple-atanga an lâk chhuah rangkachak bungbêlte chu ruaitheh nâna hmangin, chumi chuan zû te an in a,
“rangkachak te, tangkarua te, dâr te, thîr te, thing te, lung tea siam pathian chu an châwimâwi ta dur dur mai a ni” (Daniel 5:3, 4).
Pathiam biak in bungbêl thianghlimte chu ruih theih thilin an tibawlhhlawh a, chumi intu zawng zawng chu an hriatna a lo chawlawl ta vek mai a nih chû! Chuvâng chuan, khami zâna hmêlmâte kuta Babulon a tlûk khân mi tam tak chu an boral ta rêng a ni. Thu dik ni âwm taka lang hian “Babulon uain” hlauhawm tak chu hliah khuhin mi a bum thîn a. Chibai bûkna dik lo leh ngaihdân dik lote hi Setana lalram tangka chu a ni.
Eng tin nge chibai bûkna dik lovah chuan kan inhnamhnawih vê lo tih kan hriat theih ang?
NILÂINÎ JUNE 6
“BABULON KHAW ROPUI CHU”
A hnuaia Bible chângte hi chhiar la. Babulon chungchâng eng nge min hrilh le? Jer 51:6, 7, 53, 57; Zec. 2:7; Rev. 17:5, 6; 18:2, 3.
Nimin lama kan hmuh tâk ang khân “Babulon” tih chu hmâsâng ata tawh chibai bûkna dik lo hmunpui nia sawi a ni thîn a; chuvâng chuan hun hnuhnunga hnam hrang hrangte la bumtu tûr sakawlh sawina atân pawh a inrem hlê a ni.
Dragon te, tuifinriat atanga lo chhuak sakawlh te, leh sakawlh sen tak te hi khâikhin la (Rev. 12:3; 13:1–3, 17:3). Inan tlânna engte nge an neih a, danglamna engte nge an neih bawk le?
Hêng sakawlh pathumte hian lû pasarih leh kî sâwm an nei theuh a, hei hian Daniela 7-a sakawlh a sawite lû neih zât belh khâwm leh kî neih zât belh khâwm kha a entîr a. Lalram tinte hi an hma chiaha lalram lo awm tawhte atanga lo ding chhuak a ni theuh bawk. Chutiang chiah chuan, sakawlh sen tak hian dragon leh tuifinriat atanga lo chhuak sakawlh (chu chuan milem be mîte hnuaia awm thîn Rome leh pope thuhnuaia awm ta Rome-te kha an entîr a) mai bâkah, lei atanga lo chhuak sakawlh (Rev. 13:11–14) thiltihtheihnate chu a rawn nei kim vek a, “sakawlh pathum—Pathian hmêlmâte chu a thawh hotîr dâwn a ni.”—Jacques B. Doukhan, Secrets of Revelation: The Apocalypse Through Hebrew Eyes (Hagerstown, Md.: Review and Herald® Publishing Association, 2002), p. 162.
Thupuan 17-ah hian hmeichhia chu sakawlh sen tak chungah a chuang tih a sawi bawk a, hei hian sâkhaw thil leh ram rorêlna thilte chawhpawlh a nih thu a sawi. He hmeichhia hi Thupuan 12-a hmeichhe thianghlim nên kha chuan an inang lo hlê mai.
Hmeichhe Thianghlim (Thup 12) Nawhchizuar (Thup 17)
Vâna awm a ni Tui chunga awm a ni
Nîin a inthuam Puan sen duk leh sen lâr a sin
Arsi sâwm leh pahniha siam Rangkachak leh lung man tam
lallukhum a khum leh tuikeplungin a inchei
Dragon—in a bei Dragon-in a tanpui
A la bângte nû a ni Nawhchizuarte nû a ni
Babulon chu “Nawhchizuarte Nû” a ni bawk a, nawchizuar pawh a hring chhuak tam na ngiang mai. Uire kohhran nû chuan uire fanu tam tak a nei a. Nimahsela, Kristian kalsualten zirtîrna dik lo an theh darh leh thil sual an tihahte hian Pathian chuan mawhphurhna pakhat mah a nei lo. A mi dik takte chu—Setanan bei eng ang mah se— kum zabi tinah khân an lo dam khaw chhuak zêl tho a ni.
Rev. 14:8 hian Babulon tlûk chhiat thu leh thutak ata kal pênna a thlen tûr thu sawiin, chumi chuan sakawlh chhinchhiahna nei tûra inbumna hnuhnung berah mîte a la hruai lût dâwn niin a sawi bawk (Rev. 14:9–11). Hê vaulâwkna thû hi nasa lehzuala puan nawn leh a ni ang a, Pathian mî Babulon khawpui chhûnga la awm sîte chu lo chhuak a, tâwpna huna Pathian kohhran la bângte nêna inzawm khâwm thuai tûra sâwmna hnuhnung ber chu puan a ni dâwn a ni (Rev 18:1–4).
NINGÂNÎ JUNE 7
KA MÎTE U, A CHHÛNG ATA LO CHHUAK RAWH U
Kum tam tak chhûng chu Bible hrilhlâwkna thu zirtûte hian khawvêla thil thleng, a bîk takin tâwpna hun nêna inzawmna nei nia langte chu ngun takin an lo thlîr tawh thîn a. Entîr nân, United States-in thil a la tih tûr hi lo sawi ta ila. Kum 1851 vêl daih tawhah khân Adventist thenkhat chuan America hi sakawlh pahnihna (Rev. 13:11–15) niin an lo sawi tawh thîn a; chutih lâi huna United States dinhmun thlîr chuan a inhmeh lo hlê a ni.
Kum zabi sâwm leh pakuana (1800 chho) laihâwl vêla ram ropui leh thiltithei deuh deuhte chu “khawvêl hluite” tia an sawi mai thin: Prussia, France, AustriaHungary, leh England-te kha an la ni a. Hetih lâi vêl hian America chuan sipai sîng hnih emaw vêl chauh a la nei a, chu chu Waterloo Indona (1815)-a tel sipai hmun sâwma thena hmun khat ang vêl chauh a ni. A hma kum sawmlî, 1814-ah khân British chuan Washington, D.C. rûnin a hâl chhe vek a. Kum 1867 khân Red Indian hruaitu pakhat, Sitting Bull-a leh a hote chuan General Custer-a sipai, Seventh U.S. Cavalry regiment chu a that chimit vek bawk. Chutiang chuan, hrilhfiahtu thenkhatten United States chu eng tik nî emawa “sakawlh chhinchhiahna” la lek kawhtu a ni dâwn nia an sawi hnû-ah pawh he rama lo chêng hmasa, Red Indians an tihte nên an la inchai tâwk êm êm mai a, vawi emaw zât a tlâwm zâwkah an tang thîn a ni.
Khawvêla thil thlengte hi hrilhlâwknain a lo sawi ang taka rawn thleng zêl niin kan ring a. Nimahsela, tâwpna tak tak chu kan thlen hmâ hian thil dang lo la thleng leh tûr a la awm nual. Chuvâng chuan, entîr nân, “sakawlh chhinchhiahna” chungchâng kan sawi pawh hian tûn dinhmunah tû mahin—thupêk palîna an zâwm emaw, zâwm lo emaw—an la dawng rih loh tih hi uar taka kan sawi a pawimawh rêng a ni.
Rev. 18:1–4 chhiar la. Hetah hian eng thil nge thleng a, eng vângin nge chu chu kan tân hriat reng a pawimawh? Hêng chângte hian khawvêl hnêna kan hnathawh tûr chungchâng eng nge min hrilh le?
Hêng chângte hian ram rorêlna, thil dik leh dik lo thliar hranna leh, thlarau lama khawvêl dinhmun hniamzia min hrilh a. Sâkhaw dik lo zirtîrnain hûhâng tha lo tak a neih dân chu a tilang bawk. Chutih rual chuan beiseina ropui tak min sawi hmuh tho bawk a, a chhan pawh vân atanga lo chhuk vântirhkoh dang pakhat chuan a ropuinaa khawvêl hi a ên vâng a ni. Chûbâkah, Pathian mi rinawm, an hriat tûr ang la hre hrih lote chu Babulon atanga lo chhuak tûra koh an ni bawk a. Chumi awmzia chu tâwpna hun a thlen thlengin Pathian mi, Babulon atanga chhuak tawhte hian Babulon chhûnga la awm mêkte koh chhuah hna chu an thawh a ngâi tihna a ni.
LALPAN Babulon chhûnga la awm mi thenkhatte “Ka mîte”tia a ko tho mai hi eng nge ni a awmzia nia kan lo hriat ve? Eng vângin nge hei hi mi dangte nêna kan inkûngkaih tawnna kawnga thil pawimawh kan hriat reng tûr a nih le?
ZIRTÂWPNÎ JUNE 8
NGAIHTUAH TÛR: Setanan Pathian dân a beih hian amah Pathian, a thuneihna leh a inrêlbâwlna (sawrkâr) a bei tihna a ni. Chuvângin ni hnuhnung, buaina hun hnuhnunga thil mak tak tak a thlen hunah chuan Setana hian “Pathian thupêk” (Rev. 12:17, 14:12) zâwmtûte chu a la bei dâwn a ni, a chhan pawh anni chu he leia amâ âiawhtûte chibai bûk duh lotu awm chhun an nih vâng a ni. Kum tam tak liam taa vâna Pathian a lo beih tawhna kha he leiah hian a chhunzawm leh dâwn a; mahse vâna hneh a lo ni tawh ang chiah khân he leiah pawh hian hneh a ni leh dâwn a ni. “Indona ropui chu tan a nih phat atang rêngin Pathian dân paih thlâk hi Setana thiltum ber a la ni ngar ngar a. Chu a thiltum hlen tûr chuan a ni Siamtu lakah pawh helna a tihchhuah tâk rêng ni. Vân atanga paihthlâk a nih hnû-ah pawh leiah hian Pathian chu a lo do chhunzawm ta zêl a. Mihringte bum a, Pathian dân bawhchhiattîr chu a thiltum ruh tak a la mi reng tho. Hei hi dân zawng zawng a zavâia hnâwl vekna emaw, pakhat chauh emaw hnâwlna hmangin a hlen chhuak a ni thei e; mahse a nghawng chhuah chu thuhmun reng a ni. Dân pakhat chauh bawhchhetu chu a zavâia bawhchhetu anga chhiar a ni tho dâwn a; a thiltihte chuan mi dangte pawh dân bawhchhe vê tûra a tihhuangtau avângin ‘a zâa chungah thiam loh changin a awm ang.’ James 2:10.”—Ellen G. White, The Great Controversy (Indona Ropui), p. 582.
SAWI HO TÛRTE:
u In class-ah khân khawvêla thil thlengte leh, chûngte chuan thleng tûra kan rinte hi ni hnuhnungah a la thlen ngei a tûlzia an tihlan dân sawi ho ula. Tûnah hian eng thil dangte nge thleng ngei tûr la awm? A lo a luata phûrna, hun bi lo tukna bâkah, Bible leh Ellen White-i thuziaktea chiang taka târ lan ni sî lo thil eng eng emaw huai taka lo sawi lâwk ve ngawtna ang chî-te laka invêng tlat chung hian eng tin nge hun chhinchhiahte hi ngun takin kan lo thlîr theih ang.
v Chibai bûkna chungchâng kha ngun lehzualin ngaihtuah la. Thil eng emaw chibai bûk hi eng nge ni a awmzia? Chibai kan bûka chu eng pawh lo ni se, eng tin nge chu chu chibai kan bûk?
w Babulon-ah hian Pathian mi eng emaw zât an la awm a ni tih thû hi ngun takin ngaihtuah la. “Babulon” tih hi eng tihna nge ni? Hei hian mi dangte hnêna chanchin tha hril chhunzawm zêl kan batzia eng nge min hrilh le?
إرسال تعليق
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.