Sinna 21: Piansakna Mualsuang

Piansakna Mualsuang

        Thupatna:    Leitung ah mawhna hong lut pheta kipan mihing in a maan Pasian a mangngilh theihna dingin Satan hanciam hi. Milim khawng bia sakin, kha khawng bia sak hi. Tu hun ciangin mite in Pasian thei lo-in awlmawh lo uh hi. Pasian in eite hong piang saka, na khempeuh Ama tung pana a ngah ih hih manin, eite in Ama a phawk, Amah a beel, Amah a bia ih hihi.

1.        Amah a maan Pasian a hih  lam Pasian in bang tawh hong lak hiam? Isaiah 45:18.
            Theih ding:    Nuntakna ama thu-in piang tawm thei lo hi. Piansakna in Pasian om takpi a hihna leh Ama vangliatna hong kilatkhatna a hihi.

2.        Piangsakpa a hih lam mite in a mangngilh lohna dingin Pasian in bang sawl hiam? Exodus 20:8-11.

3.        Sabbath ni bang hunin hong piang hiam? Genesis 2:1-3.
            Theih ding:    Piansakna a kizawh phetin, mihiing a gim a tawl ma leh, mawhna hong lut ma-in, hun siangtho a hi dingin nisagih kal khat sungah a nisagih ni Pasian in a teel tuam hi.

4.        Bang hangin kal khata a nisagih ni bekmah phawkna mualsuang hong suak hiam? Exodus 20:11.
            Theih ding:    Sabbath ni ci-a ni khat peuh mihing in a seh theihna ding thu om lo hi. Leitung a piansakna ah Pasian in niguk sung na sem hi. A nisagih ni ciangin nasepna pan khawlin, tua ni siangtho sakin, thupha pia hi. Tua ni-a kipanin leitung in nisagih kal simna a nei ih hihi. Pasian mah bangin eite zong Sunday pan Friday dong niguk sung na ih sep ding hi-a a nisagih ni Saturday-a ih tawlngak ding a hihi.

5.        Gamlak ah Israel mite Pasian in koici hilh hiam? Exodus 16:4.
            Theih ding:    Egypt gam ah Israel mite silain kum tampi om uha, biakna lam kipattahna bangmah om lo hi. Pasian in amaute pantahin Ama tungah a thumaan dan ding uh hilh hi. Kal khata a masa niguk sung teng van panin manna, Israel mite' an ding khiat hi.

6.        Bang ni-in manna a zahnih khiat hiam? Exodus 16:22,23.
            Theih ding:    Tua an pen ni khat kan kikoih thei lo hi. A hi zongin kal khata a niguk ni, Friday ciangin a zahnih kikhiat hi. Kal khatin khatve bekmah ninih ai ding a kikoih thei suak hi.

7.        Bang hangin niguk ni-in manna a zahnih kipia hiam? Exodus 16:23.
            Theih ding:    A nisagih ni pen Sabbath nii hi-a, tua ni-a A mite in an kaikhawma a huan ding Pasian in deih lo hi. Tua i ni siangtho hi-a, Amah phawkna huna a kizat ding Pasian in deih hi.

8.        Sabbath ni in bang lim (melcikna) a hi hiam? Ezekiel 20:12.
            Theih ding:    Sabbath ni in piansakna phawkna mualsuang a hih mah bangin, Sabbath tanna in Piangsakpa Pasian ih muanna lim a hihi. Mawhna pana hong suakta sak, hong Bawlthakpa leh hong Tanpa hi ci-a ih saanna lim zong a hihi.

9.        Sabbath ni in bang tanvai lim (melcikna) hi ding hiam? Exodus 31:16,17.
            Theih ding:    Pasian a om laiteng, Amah in om loh hun nei lo a hih mah bangin, Amah eite hong Piangsakpa hi ci-a, Ama Sabbath ni zong ih tan ding a hihi.

10.        Sabbath ni, Judah mite' a ding bek a hi hiam? Isaiah 56:6.
            Theih ding:    Mawhna hong lut matham, Judah minam hong pian ma pekpek kum tul tampi lai-in Sabbath om khin zo hi. Sabbath ni in Adam' suan leh khak a hi, mihing khempeuh' a ding a hihi.

11.        Pasian in Sabbath ni, kua' a hi ci hiam? Ezekiel 20:20.
            Theih ding:    Pasian in Sabbath ni pen "Keima Sabbath" ci hi. Sabbath ni a siangtho sak Amah, thupha a pia Amah, siangtho sak un ci-a hong sawl Amah a hih manin Sabbath ni pen Pasian' a a hihi. Mihing in khel theih na'ng, awlmawh loh theih na'ng thu nei lo hi.

12.        Sabbath ni pen mihing' a dinga vangik dinga kibawl hiam, thupha dinga a kingaihsun hiam? Isaiah 58:13,14.
            Theih ding:    Eite in Sabbath thu tela, ih it ih biak Pasian tawh a kizopna zong ih tel ciangin, Sabbath tanna in ei' a dingin nopsakna hong hihi (Mark 2:27).

            Thukhupna:    Thupiak Sawm thu ih sinna ah, a masa thupiak lite zuihna in, lungsim, kha leh hatna khempeuh tawh Pasian ih itna a kilatkhiatna ahih lam ih thei hi. Thupiak lina ih zuihna in hong Piangsakpa hi ci-a Pasian ih saanna  hi-a,, tua lo-in biakpiakna a maan om thei lo hi. Hih thupiak a tawntungin thumaan takin kizui paisuak hi  leh, milim biakna khawng, kha biakna khawng leh, zawng khawng pana mihing piang hi, ci-a ngaihsuta mawkmawkte hong piang lo ding hi. Pasian' Sabbath ni ih ngaihsut dan in Pasian ih ngaihsut dn hong kilang khia sak hi.  Pasian ih biakna ah Ama mun maan a hi Piangsakpa mun ah Amah a koih kik dingin ih lungsim khensat ni.