HSS ZIRLAI 7-NA: MATTHAIA 24 LEH 25,

ZIRLAI 7-NA                                                             MAY 12-18, 2018

MATTHAIA 24 LEH 25

CHÂNGVAWN: “Messia derte leh zâwlnei derte lo la langin, chûng mîte chuan theih ni se thlante meuh pawh an bum theih nân chhinchhiahnate leh thilmak tak takte an la ti ang” (Matthaia 24:24).

SABBATH CHAWHNÛ                                                                            MAY 12

CHHIAR TÛRTE: 2 Kings 23:13, Matt 7:24–27; 24:1–25; 25:1–30; Luke 21:20; Rev. 13:11–17.

MATTHAIA 24 leh 25-ahte hian Isuan ni hnuhnung chungchânga thu pawimawh tak takte sawiin, chumi atâna lo inbuatsaih dân tûr pawh min hrilh bawk a. Chuvângin hêng bung pahnihte hi ni hnuhnunga thil thlengte chungchânga Kristâ zirtîrna a nîte pawh kan ti thei ang. Chutih rualin, Jerusalem tihchhiatna lo thleng mai tûr chu a hmu lâwk tho bawk a, chu chu a mîte tân pawh thil lungngaih thlâk tak a nihna chen a awm a ni.

Nimahsela, a mîte hnêna Kristâ thil sawite hi chhuan lo awm leh zêl tûra amah zuitu, a bîk takin chhuan hnuhnung ber, a lo kîr leh huna nungdama lo la awm tûrte tân pawh a pawimawh êm êm tho a ni.  Isua hian thu mâwi leh hriat nuam a sawi lo va. Indona, indo thuthang, tâm tlâ, Krista derte leh tihduhdahna—hêngte hi khawvêlin a chan tûr a ni a,  kohhran ngei pawhin a chan tûr a ni bawk. Thil mak deuh mai chu, hun kal tâte kha han thlîr kîr mah ila, a hrilh lâwk ang chiah chiah vekin thil a lo thleng tih kan hmû ang. Chuvâng chuan, kan dam chhûnga lo la thleng hman rih loh a hrilhlâwkna dangte pawh hi a lo thleng dik leh ngei ang tih kan ring ngam tûr a ni.

Nimahsela, Isua khân thil lo la thleng tûr chungchâng a sawi a ni ringawt lo. Matthaia 25-ah hian a tehkhin thu sawi pakhat kan hmû a, chu a tehkhin thû chuan “Mihring Fapa” lo kîr lehna hun atân a mîte a buatsaih dâwn a. Ni e, hun khirh takte chu a lo thleng ngei ang a; mahse chûngte chuan a lo kîr leh huna amah tâwk thei tûrin a mîte a buatsaih dâwn a ni.

SUNDAY                                                                                                  MAY 13

HRIHLÂWKNA THU NEMNGHEHNA ROPUI TAK CHU

Krawsa khenbeh a nih hmâ deuh khân zirtîrte chu Isua nên Olive Tlângah an tîtî ho a. Pathian biak in tihchhiat a ni dâwn tih thû Isuan a sawi an hriata an awm dân tûr âwm ang kha han mitthlâ chhin teh. An rilru-ah eng nge awm ang tih chu hre lo mah ila, a hnua zawhna an zawhte hian Pathian biak in tihchhiata a awmna chu “khawvêl tâwpna” nên inzawm niin a ngai tih a tilang (Matt. 24:3).

Matt. 24:1–25 chhiar la. Amah zuitûte hnêna Isuan ni hnuhnung chungchânga thuchah a pêk chu eng nge ni?

Matt. 24:1–25 hian thil dang eng eng emaw min hrilh bâkah, a mîten hun hrang hrang, a bîk takin tâwpna hun chungchânga a mîte tibuai tûr bumna awm theite a ngaih thutakzia chiang takin a tilang a. Chutiang bumna hrang hrang zîngah chuan zâwlnei derte leh Krista derte pawh an tel. Mi thenkhat chuan Kristâ âiawhtu niin an insawi ang a (zâwlnei derte), Krista nia inchhâl ta mai tâwk pawh an lo la chhuak bawk ang. Thil râpthlâk tak mai chu, mîten an ring êm êm mai dâwn sî hi a ni.

Pathian Thu dikzia nemnghehna ropui, lungchhiat thlâk tak bawk sî kan hmu tawh a. Hun kal tawhah leh, keini hunlâi ngeiah pawh hian bumtûte chu lo chhuakin, “Krista chu ka ni” te an ti a. Hrilhlâwkna chhinchhiah tlâk tak a va ni êm! Keini tûnlâi huna chêngte hi chuan (Krista hun lâia mîten an tih ve theih loh) kum liam tawha thil thlengte kha en lêt lehin, hrilhlâwkna thlen dikzia kan hmu thei a. Buaina hun hnuhnung ber chu kan hnaih chhoh ang zia zêlin, hetiang bumnate hi lo pung zêl tûr a ni a, mak kan ti vak tûr pawh a ni lo.

Isuan khawvêl dinhmun tûr a târ lan dân hi han thlîr bawk ila, rinna nemnghehna ropui tak a ni tih i hmu ngei ang. Khawvêl chanchin kal tawhte kan thlîr kîr chuan, mihringte hian tawrhnate leh manganna tibo emaw, tikiam emaw thei tûr nia an rin thilahte rinna an lo nghat tawh thîn a. Sawrkâr kaihhruai dân thar emaw, khâwl thil emaw, science emaw, ngaihtuahna fîm emaw—hêngte hian hun thar duhawm tak min chuân kâipui dâwn nia ringin, beiseina sâng tak an nghat thîn a. Nimahsela, hêng beiseinate hian engmah tak tak min thlen lo a ni tih chu a hretûte kan ni theuh a ni lo’m ni? Tûna khawvêl awm dân hi Isuan ni tûra a lo sawi lâwk ang chiah chiah kha a ni a. Kum sâng hnih dâwn lâi kal tawha Isua thu lo sawi khân hêng beiseinaten mi a hruai bo theih dân a târ lang.

Matt. 24:25 chhiar la.  Hê châng atang hian kan rinna sawh nghet tûra mi tanpui thei eng thû nge kan hmuh le?

THAWHTANNΠ                                                                                       MAY 14

A TÂWP THLENGA TUAR FAN FANIN

Matt 24:9 leh Rev 13:11–17 chhiar la. Matthaia bûa Isua thil sawi leh Thupuan bûa Johana thil sawiahte hian eng thu inang nge awm le?

Kristan tâwpna huna chêng a mîte a ngaihsakzia a lanna pakhat chu rinna dik do tûr leh, chabai bûkna dik lo kalpui tûra hnamte chawk thotu tûr khawvêl pum huap inbumna a lo chhuah tûr thu a hrilh a.  Nghet taka ding tlatte chuan huat, tihduhdah leh tihhlum hial pawh an tuâr dâwn a ni.

Matthaia 24:13 chhiar la. Chhandama awmna, khawvêl pum do rawn ni chung pawha rinawm taka awm tlat theihna bul chu eng nge ni?

“Bible thutaktea an rilru hung nghet tlat lote chu buaina hnuhnung leh râpthlâk berah chuan an ding tlang miah lo vang.”—Ellen G. White, Indona Ropui, p. 494. Chumi awmzia chu, Bible thutaktea an rilru hung tlattûte chu tâwpna huna bumna lo chhuak tûrte hian a hruai bo ve dâwn lo tihna a ni. Tûn hun atâna thutakah chuan a inthlun ngheh tlat a pawimawh a; a nih loh chuan bumnate hian min hneh lâk ve mai ang.

Matt 7:24–27 Pathian laka rinawm reng thei tûra thil pawimawh chu eng nge ni?

Pathian Thu hriat tam leh, chumia tanhmun rem chu pawimawh viau tho mah se, chu mi ngawt chu fiahna kan la hmachhawn tûrte pal tlangna tûr atân chuan a tâwk zo lo niin Isuan a sawi. Kan thil hriat ang chu a taka kan tih a ngâi a; chumi awmzia chu thutak chu Isuaa a awm angin kan zâwm tûr a ni. Isua tehkhin thu sawiah hian, in satu pahnihte hian Isua thil sawite chu an hre vê vê a. A danglamna chu: pakhatin Isua thu sawi a zâwm a, pakhat erawh chuan a zâwm vê lo thung hi a ni.

Eng vângin nge Isua thu sawi zâwmtu hi a dinchan lâia a zâwm lotu erawh a tlûk bîk le? Thuâwihnain rinnaa nghet tak thei tûra mi a puih theih dân chu eng nge ni?

THAWHLEHNΠ                                                                                    MAY 15

“TITIÂUTU TENAWM” CHU

Kristan tâwpna hun chungchâng a sawinaah khân “titiâutu tenawm” tih tawngkam a hmang a (Matt 24:15), hê tawngkam hi Daniela bûa mi a sawi chhâwn a ni (Daniel 9:27, 11:31, 12:11).

Pathian chuan a dân bawhchhiatna lian tham deuh, entîr nân, milem biakna (Deut. 27:15) emaw, mipat hmeichhiatna dik lo taka hmanna (Leviticus 18:22) emaw te hi “thil tenawm tak” tiin a sawi thîn a. Chuvâng chuan he “tihtiâuna tenawmah” pawh hian sâkhaw thila kal sualna eng emaw tak a awm a ni tih a chiang.

Matt. 24:15 leh Luke 21:20 chhiar la.  Hêngte hian “titiâutu tenawm” chungchânga Isuâ thil sawi kan hriatthiam theihna tûrin eng tin nge min puih le?

Hêng châng pahnihte hian Isua hrilhlâwknain A.D. 70-a milem be sawrkâr Rome-in Pathian biak in thianghlim meuh pawh zuah lova, Jerusalem khawpui a tihchhiat vek tûr thû pawh a huam tih chiang takin a sawi a. Amaherawhchu, hê hrilhlâwkna hian kawh dang pakhat a la nei tho bawk, chu chu tâwpna huna thil lo thleng tûrte niin, Jerusalem tihchhiatna kha chu a âitechhinna ang deuh chauh a ni. “Krista khân Jerusalem chu rin lohna leh helnaa tihsak vek ni tawh khawvêl, Pathian phuba lâkna leh rorêlnate entîrtu niin a hmû a.”—Ellen G. White, The Great Controversy (Indona Ropui), p. 23.

Daniel 12:11-ah leh 11:31-ahte hian “titiâutu tenawm” tih chu pope thuneihna hnuaia awm Rome nêna inzawm anga sawi niin, chu chuan chibai bûk dân leh chhandamna kawng dang, Kristan kan tâna a lo tih tawh leh, tûna vân biak bûka a tih leh mêkte luahlântu tûr chu a duang chhuak a.

Daniela 8, a bîk takin châng 9–12 hian milem be mîte hnuaia a awm lâi leh, chumi hnua pope thuhnuaia a awm tâk hnua Rome lalram thiltihte chu a sawi a. Milem be mîte hnuaia a awm lâi chu ki te tak tê anga sawi niin, chu ki te tak tê chu a lei hrût zâwngin a thang a, chhim lamah te, chhak lamah te, leh ram ropui lamah te nasa takin a ram a zauh a (Daniel 8:9). Pope thuhnuaia a awm tâk hnû-ah (Daniel 8:10–12) erawh he ki te tak tê hi a vân vâwr zâwnga thang ve tawh thungin, arsi thenkhatte chu leiah a paih thlâ a (chu chu Pathian mîte a tihduhdah tihna a ni), “mipuite lal” Isua awmna thleng hialin a intilian ta zêl a ni (Daniel 8: 11). Pope thuhnuaia awm Rome hi milem be mîte hnuaia awm thîn Rome Lalram tlu chhe ta atanga lo chhuak a ni a; Rome tih hming erawh a la pu reng tho. (Hei vâng hian a nia, “ki te tak tê” tih hian milem be mîte hnuaia a awm lâi hun leh, pope thuhnuaia a awm tâk hnûte kha a entîr vê vê a ni). Daniel 7:9, 10-a rorêlna te, Daniel 8:14-a biak bûk then fai te leh, Matt. 24:29-a kan hmuh vâna chhinchhiahnate hian, an zavâiin ni hnuhnunga a mîte tâna Pathian lo chêtna chu an entîr vek a ni.

NILÂINΠ                                                                                                 MAY 16

NULA THIANGHLIM SÂWM

Matt. 24-ah hian Isuan a lo kal lehna chhinchhiahna hrang hrangte a sawi a, Matthaia 25-ah erawh hi chuan a lo kal lehna atâna lo inbuatsaih dân tûr a sawi vê thung.

Matthaia 25:1–13-a nula thianghlim sâwm tehkhin thû hi chhiar la. Hetah hian a lo kal lehna atân lo inbuatsaih dân tûr kan thiam theih nân eng thû nge Isuan a sawi?

A lo kal lehna atâna lo inbuatsaih dân tûr chu, nula thianghlim sâwm tehkhin thu hmangin a han sawi hawng phawt a. Heta “nula thianghlim” a tihte hian Kristiana inchhâlte a entîr a. Indona ropuiah khân Setana lamtang an ni lo va. Vân ram nêna tehkhin an ni tawh bawk (Matt 25:1). Hun hnuhnungah erawh chuan an zavâiin an lo muthlu vek a (Matt. 25:5). Krista chuan a lo kal leh huna inpeih lova an lo awm lohna tûrin inring renga awm tûrin a lo chah tawh a ni (Matt. 24:42).

Hêng nula thianghlim sâwmte hian khâwnvâr an nei theuh a, an zavâi hian mo neitu hmuak tûrin an rawn chhuak vek bawk, chumi awmzia chu Krista lo kal lehna an lo thlîr tihna a ni. Mahse an beisei âiin a lo kal har ta sî a, chuvâng chuan hêng a lo kal lehna ringtûte zawng zawng hi an zavâiin a lo muthlu ta vek a ni. Thâwklehkhatah, zan lâi takah chuan an zavâiin an lo tho vek a; mo neitu chu a lo kal ta (Matt. 25:1–6).

Nula thianghlim sâwm zînga a â pangâte chu an chîâi a, an inpeih ve hmang lo. Eng vâng nge ni le? Sâp tawng Bible version pakhatah chuan “kan khâwnvârte a thi ta” tiin an sawi nia dah a ni a (Matt. 25:8). Version dangahte erawh chuan “kan khâwnvârte a thi dâwn e” a ti vê thung, chutiang chu a Grik tawnga a inziah dân tak pawh a ni. An khâwnvâr chu chhe tê-in a la alh ve teng teng a. Khâwnvârtui pawh tlêm tê chu an la nei ve; mahse Krista lo hmuah thlenna daih tûr an nei tawh lo a ni. A eng chu nge dik lo ni ta le?

Hêng nula thianghlim â pangâte hian Krista lo kal lehna nghâktu Kristian, mahse amah nêna inzawmna tak tak nei sî lote chu an entîr a.  Khâwnvârtui pawh tlêm azâwng chu an nei vê a, Thlarau Thianghlim pawhin an nunah hnâ eng eng emaw chu a thawk vê tho bawk; nimahsela an khâwnvâr chu a êng chê chê chauh a ni a, khâwnvârtui tam tak an mamawh lâiin an neih tlêm tê-ah an lungâwi ta mai a ni.

“Thlarau Thianghlim chuan amâ duh ang leh a rem tih angin mihring thinlungah hnâ a thawk a, nun ze thar a zuk phun bawk thîn; nimahsela nula thianghlim â-te’n an entîr Kristiante hi chu a phawvuaka thil tihah an lungâwi mai sî. Pathian hriatna an nei tak tak lo va. A nungchang an zir ngâi lo va. Amah nêna inpâwlna an nei ngâi miah lo bawk; chuvâng chuan amaha rinna nghah dân te, amah en leh nun dân pawh a thiam ta lo rêng a. Pathian tâna rawngbâwlna an neih vête pawh pâwnlâng tak, dân ang mai chauh a ni.”—Ellen G. White, Christ Object Lessons (Krista Tehkhin Thûte), p. 345.

Eng tiang kawngte-in nge keimahni hi kan inen lêt a, hêng mîten an lo tihsual tawh ang hi kan tih sual vê loh nân kan invên ang? An tih ang hi keini pawhin kan lo ti vê reng a nih chuan, eng tin nge kan inthlâk danglam ang?

NINGÂNΠ                                                                                                MAY 17

I TALENT NEIHTE HMANG RAWH

Matt. 25:13–30 chhiar la. Kan thilpêk dawnte hian Krista lo kal lehna atâna inbuatsaihna kawngah eng nge tangkâina an neih vê?

Heta Isua tehkhin thu sawi hi a hmâ chiaha a sawi nên kha chuan a inang lo nâ-in, an pahnih hian Krista lo kal lehna atâna lo inpeih a pawimawh thû an sawi vê vê a. Tûte nge lo inpeihte chu ni a, tûte nge lo inpeih vê lote chu ni tih pawh sawiin, thlarau lama an inthlahdah avânga chatuana boralna tâwk tâte chungthû pawh an sawi vê vê bawk a ni.

Khawvârtuiin nula thianghlim sâwmte tâna Thlarau Thianghlim a entîr ang chiah hian “ip” tih emaw, “rangkachak ip” tih emaw (Matt 25:15) hian talent a entîr a, chutiang chu a Grik tawnga (talanta) a indah dân pawh a ni rêng bawk. “Talent tih chuan Thlarau Thianghlimin a bîk taka thilpêk min pêkte hi a entîr a, chu chuan kan pianpui finna leh theihna zawng zawng pawh hi a huam vek a ni.”—The SDA Bible Commentary, vol. 5, p. 510.

Hê tehkhin thûa bâwih zawng zawngte hian an pû hnên ata sum an dawng theuh a. Chûngte chu anmahni tâ ni lovin, an pû tâ vek a ni a (Matt. 25:14), an hnênah hian “an tih theih tâwk tûr ang zêlin” (Matt. 25:15) a kawltîr a ni tih hria ila. Hêng thilpêkte hi an pû-in anmahni a rin ngam avânga pêkte a ni; chuvângin a nihna takah chuan, hêng a bâwihte hi a neitu ni lovin, an pû thil neih enkawltute mai an ni zâwk. Chuvâng chu a nia, an pû zin lo hâw pawh khân an hnênah a sum chanchin a tihfel leh thlap rêng ni (Matt. 25:19).

Thlarau thilpêkte chu Thlarau Thianghlim hnên atanga lo chhuak a ni a (1 Corin 12:1–11, 28–31; Eph. 4:11 en la). Thilpêk beitham tê chauh kawl vê nia inngâite tân pawh chanchin lâwmawm tak a awm. Thilpêk rêng rêngte hi a Petu tel lova dawn a ni ngâi lo va. Chuvângin, hêng mîte pawh hian an thilpêk dawngte chu thilpêk ropui ber— Thlarau Thianghlim chu changin an dawng thîn a ni.

Thilpêkte chu Krista zârah kan tâ a ni tawh sa reng a; a tak taka kan neih theih nân erawh Thlarau Thianghlim kan dawn a, a hnêna kan inpumpêk a ngâi thung. Hetah tak hian a ni bâwih tlâktlâi lo pawh khân a tihsual ni. Thilpêk chu pêk a ni vê ngei a; mahse engah mah a chan sî lo. A dah tâwl ta vêl mai mai a. Khawngaihna nêna a pûin a pêk chu peipung tûrin eng mah tih a nei lo va. Chuvâng tak chuan Isua pawhin “bâwih sual leh zawmthawpa” tiin a hâu ta rêng a ni (Matt. 25:26)—a na ngawt ang.

Hê tehkhin thû hi ni hnuhnung leh a lo kal lehna chungchâng sawifiahna tûra Isuan a sawi a ni a. Chuti a nih chuan, kan talent kawlte kan hman dân hian ni hnuhnung atâna kan inbuatsaihna kawngah kawngro a su hlê a ni tih eng tin nge min hrilh le?

ZIRTÂWPNΠ                                                                                            MAY 18

NGAIHTUAH TÛR: “Talent khat dawngtu erawh chuan ‘lei a va lâi a, a pû tangka chu a thukru ta zâwk a.’

“Thilpêk tlêm ber dawngtu khân a ni, talent peipung lova dah tâwl ta mai mai ni. Talent an dawn angte a beitham deuh avânga Krista rawngbâwl vê lo tûr nia inngâite tân hetah hian vaukhânna thu a awm. Thil ropui tak ti thei tûr ni sela chuan lâwm taka thil ti ve mai tûrah an inngâi a; amaherawhchu, an tih theih tâwk a tlêm tham êm avângin eng mah ti lova lo awm ve vêl mai mai chu tisualah pawh an inngâi lêm lo. Nimahsela, hetah hian an tisual a ni. LALPA chuan a thilpêk hrang hrangte a sem darh dân hmang hian nungchang a teh a lo ni reng a. A talent dawn peipum tum miah lo chuan chhiahhlawh rinawm lo a nihzia a tilang a ni. Hê pa hian talent nga pawh lo dawng ta sela, a phûm bo leh mai mai tho vang. Talent khat a dawna chunga a thil tih khân vân thilpêkte a ngaihnêpzia a tilang.

“‘Tlêm te chunga rinawm chu tam tak chungah pawh a rinawm tho thîn a’ Luke 16:10. Thil tlêm na nâ nâ chu a tlêm tham avângin a pawimawhna pawh ngaihthah a ni fo thîn; mahse mihring nunphung leh khawsak dân rêltu a nihna tam tak a awm tho a ni. Kristiante nunah phei chuan tangkâina nei vê tham lo hi a lo awm tak tak lo. Thil tê thamte pawimawhna kan ngâinêp ngawt zêl a nih chuan, kan nungchang kan chher chhoh zêlna kawngah hlauhawm tam tak kan tâwk ang.”—Ellen G. White, Christ Object Lessons (Krista Tehkhin Thûte), pp. 293, 294.

SAWI HO TÛRTE:

u   Mi thenkhatin hê leia duhthusâm ram thlen thei tûr thilte nia an rin leh beisei chu eng nge ni hlawm? Chutianga an thil beseite chuan eng vângin nge a tak ram min thlenpui tak tak theih hlawm sî loh?

v  Pathianin ti tûra min hrilhte zawm maina-in eng tiangin nge kan rinna a tihchak sawt thin? Eng vângin nge thil tihin a zui nghâl loh rinna chu “thî” a nih (James 2:26)? “Pathian thupêkte zâwmtûten” (Rev. 14:12) tihduhdahna an la hmachhawn tûr chu ngaihtuah hian eng vângin nge kan rin loh deuh huna thil lo thleng tûr atâna lo inpeih sâ chu a pawimawh viau?

w  Nula thianghlim sâwmte chanchin kha ngaihtuah la. Eng vângin nge an lan dân maiah chuan inang tlâng vek an nihna kha kan tân vaukhânna thu pawimawh tak a nih? Eng tin nge a â-te ang khân mahni inbum mai kan ni lo a ni tih chiang takin kan hriat theih ang?

x Theih ni se, “thlante” meuh pawh a bum theih nân tih thû hi eng nge ni a awmzia? “Thlante” tih hi eng tiangin nge kan lo hriatthiam ve? (Matt. 24:31; Rom 8:33; Col 3:12 en la.) Hei hian inbumna chu a nasa hle dâwn a ni tih eng tin nge min hrilh?