ZSS SINNA 3: JESU LEH MANGMUHNA THUBU

SINNA 3: JESU LEH MANGMUHNA THUBU

April 14 -20

NIPI NITAK                                                                   April 14

TUKAL SUNG SIM DINGTE: 1 Cor. 10:1-11; Rev. 12:1-17; 19:11-15; Eph. 1:20; Rev. 11:19; 1:10-18.

LAI SIANGTHO BULPHUH: “Kei gualzo in ka Pa tawh ama kumpi tokhom tungah ka tut bang tektek in, a gualzopa, kei tawh ka kumpi tokhom tungah a tut theihna ding thu ka pia ding hi” (Revelation 3:21, ZIV).

Thukhun Thak in Thukhun Lui tawh kizom ahihna teltak kimu thei hi. Lungdamna thubute leh laikhak te in Thukhun Lui thute mah a genkikna uh, alakkik zel uh tampi vei kimu thei hi. Ama thu leh a nasepna a ciangin, Lai Siangtho gen thu a tangtun zia ding Jesu in tampi vei agenna kimu thei hi. (Matt. 26:54, 56; Mark 14:49; John 13:18; 17:12 te sim in).

Mangmuhna thubu zong tua bang kici thei hi. Mangmuhna thubu zong Thukhun Lui thubu te, adiak in Daniel thubu tawhlo in amah bek deihna kicing theilo hi. Hih thu hangin, Daniel leh Mangmuhna a sin khawm zel ihi hi.

Mangmuhna sungah Thukhun Lui thu a genna tee n le hang Jesu thu hong lak telna vive hi. Mangmuhna thubu in Jesu thu bekbek hi a, Amah kua hi aa ami te’ a ding bang sepsak cih leh hun bei ciangin eite a ding bang hong sepsak cih thu ahi hi. Mangmuhna thubu in Jesu bek mah a gen bangmah in hun nunung thupiang te i sin ciangin Jesu eimau mitsuan leh laigil hi sak ding hi hang.

*Tukal in Mangmuhna thubu a Jesu i sin ding hi.

SUNDAY                                                                                         April 15

 MANGMUHNA THUBU A KILAMZIA

Daniel leh Mangmuhna thubu ah a kibang diak thukhennih te in leitung khangthu leh hun beina thupiang ding te ahi hi. Hih thu te gel kimemat mahmah hi. Leitung khangthu te in ni nunung a piang ding thute mahil bangin kimu thei hi. Thukhun Lui a thupiang te ciantak sintel na tawh tuhun leh mailam a thupiang dingte ki mukholthei hi. Hih thu Daniel leh Mangmuhna sung bek hi tuanlo hi.

1 Corin. 10:1-11 sim in. Thukhun Lui thu tawh kisai hih mun ah bang thugui hong gen om hiam?

Nungkal sinna ah i muh bangin, Daniel thubu a thupiangte (Dan. 3:6, 15, 27; 6:6-9, 21, 22) in Mangmuhna a kigen hun beikuan thupiang dingte hong lak hi. Hih thupiangte sinna pan in hunbei kuan a Pasian mite thuak ding te i mukhol thei hi. A thupi pen in, bangbang piang tase leh hotkhiatna om ding lungmuanna hong kipiak thu ahi hi. Mangmuhna thubu in a muanhuai te gualzo pelmawh ding cih thu hong hilh hi.

Leitung khangthu tawh kisai Mangmuhna alian 1-11 ah kimu thei a, Mangmuhna alian 13-22 in hun beina thu tawh kisai hong lak hi.

Revelation 12:1- 17 sim in. Leitung khangthu ahikeileh hun beina thu, koi zaw ah i koih diam? Bang hang?

Hih Mangmuhna 12 in a nihtuak tawh a kisai na muthei ciat ding hi hang.Ahang in, vantung panin Satan a kihawlkhiatna thu gen aa (Rev.12:7-9), Satan in naungek Jesu a dona (Rev. 12:4), leh pawlpi a bawlsiatna tangthute (Rev. 12:14-16) hi aa, tua zom ah hunbei kuan a cianlai pawlpi a dona thu zong hong lak hi (Rev. 12:17).

A kigen ngei zel khat in khangthu panin hilhlak i ngah thu in bangmah pilna i laklohna ahi hi. Amau nunzia thei khin napi amau mah bangin khial veve cihnopna hi. Hilhlak lak theihna ding khangthu tampi om a, tua sung pan in eite in koi bangin amau bang khialhna bawl ding pelh thei ding i hiam?

MONDAY                                                                                         April 16

JESU LIM LE MEEL

Anuai a Lai Siangtho munte na sim ciangin bang munte in Jesu min tuamtuam te ah Jesu kua hi a, eite a ding hong sepsaksa, asep laitak, leh a sep lai dingte hong lak hiam?

Revelation 1:5 ___________________________________

Revelation 1:18 _________________________________

Revelation 5:8 __________________________________

Revelation 19:11-15 ____________________________

Revelation 21:6 _________________________________

Hihte in Jesu lim leh nasep hong lak Mangmuhna sungah mun pawlkhat bek hi pan hi. Amah in hong pai masak lai in Amah mah eite mawhna tang ding hong kipiakna a lak Tuuno ahi hi. “Silngo sawhloh buhnel mekman thak na hi takpi bangun tua mah na suah nading un silngo lui paimang un. Ahang in, Christ eite Paisan Tuuno iin biakna i pia zo hi” (1 Cor. 5:7, ZIV).Amah pen a sihna leh a thawhkikna ciantak a lak, si zo aa a tawntung in a nungta den Pazong ahi hi(Rev. 1:18, ZIV). “Akigelhsa thu om bangin, Christ in thuak ding a a nithumna ni in tho kik ding hi” (Luke 24:46). Revelation 19:11-15 sungah, nihvei hong paikikna ah Ama omzia hong gen a, vangliatna, ukzawhna leh thukhenna tawh leitungah hong paikik ding ci hi. “Ahang in, Mihing Tapa ma vansawltakte tawh a Pa minthanna kengin hong pai ding hi. Tua ciangin mi khempeuh in amau sepna tawh kizui in pahtakman a sang ciat ding uh hi” (Matt. 16:27, ZIV).

Nisim i nuntakna leh khensatna khempeuh ah Jesu nuntakna, sihna, thawhkikna leh hong paikikna ding thute koi bangin i nuntakna laigil leh mungtup hisak thei ding i hiam?

TUESDAY                                                                                       April 17

MANGMUHNA THUBU SUNGA BIAKBUUK

Mangmuhna thubu thubul khenpinih ban ah, Hebru te biakbuuk kilamzia zong hong gen hi. Hih biakbuuk thu in tua khenpinih te tawh kihual in luangkhawm hi. Leitung a biakbuuk lut ding ciangin biakna ganhing te kithahna biakbuuk tual a meihal biakna tau tawh kipan hi. Singlamteh limcing ahi gansiluanna khit ciangin, biakbuuk inndei masa ah siampipa lut hi. Tua in van a kah khit van biakbuuk a Jesu nasep limciing ahi hi. Tua in meivaak lakah Jesu pai kawikawi na thu ahi hi (Rev. 1:13).

Revelation 4:1,2 sim in. A kihong kongpi in bang limciing hiam? Tua in koi lai hiam? Acts 2:33; 5:31; Eph. 1:20; Heb. 10:12, 13; Ps 110:1; Rev. 12:5 sim in.

Van a kah khit a sawtlo in, hih akihong kongpi tawn in van biakbuuk siangtho mun ah Jesu kimuak hi. Mangmuhna thubu sunga Jesu a kilat masak penna ah, biakbuuk inndei masa a meivaak te laizang ah a dinna ahi hi (Rev. 1:10-18).

Revelation 11:19 sim in. Van biakbuuk a kihon ciangin biakbuuk inndei nihna sunga om thukham singkuang John in a muhna in bang phawk-huai thu hong lak hiam?(Leviticus 16:12-14 sim in).

Van biakbuuk a thukham singkuang lim in biakbuun deinihna ahi Siangtho Pen Mun ahihna hong lak hi. Mangmuhna thubu in Jesu hotkhiatna nasep te hong musak bek hilo in, vantung leh leitung thupiang te kizom cih hong theisak hi. Mangmuhna thubu in khangtawn a om leh hun bei ciang om ding bawlsiatna te honglakna kawmkal ah, lungmuanna i ngah theihna in, “Topa hong kilat ni ciangin Topa mai ah ama mite a din theihna ding vantung a om khempeuh in kiginkholh nasepna ah kihel kim hi. Vantung le leitung kizopna in kinai pha mahmah hi” – Ellen G. White, My Life Today, laimai 307.

WEDNESDAY                                                                                April 18

MANGMUHNA THUBU SUNGA CHRIST – KHENKHATNA

Mangmuhna sunga thu khempeuh in mungtup khat bek nei a tua in Jesu Christ laktelna hi. Tua hangin hih thubu konghonna kammal ah, “Jesu Christ kilaakna” na ci ngiat hi. Hih kammal pen (1) Jesu Christ kiangpan kilaakna, ahikeileh (2) Jesu Christ thu kilaakna (Rev. 1:2) ci in mite in tel hi. A taktak in “kilaakna” cih kammal in Mangmuhna telzawh ding hilo hi ci aa a umte langah thugen hi. A simte teltheihloh ding hi leh banghangin Pasian in Lai Siangtho sungah hih thubu guang zenzen ding hiam?

Revelation 1:1-8 sim in. Hih munte in Jesu thu bang hong hilh hiam?

Mangmuhna sungah, Jesu pen “leitung kumpite a Ukpa” (Rev. 1:5, ZIV) ci in thupatna hong gen a, thubu tawpna lam ah Jesu pen “kumpite Kumpi” (Rev. 19:16) ci hi. Lungdam huai thu in, leitung a buaina leh lungzinna kawmkal ah eite lungmuan theihna in itna tawh kidim i Topa leh Honpa in na khempeuh ukpa ahihna ahi hi.

Revelation 1:5 sungah, Jesu in hong suak-tasakpa ahihna kiciantak kimu thei hi. “Eite hong it a, ama sisan hanga i mawhnate pan hong suaktasak” cih kammal in singlamteh ah sihna tawh hong thoihdamna thu a gen ahi hi. Eite dik hong tangsak bek loin, hong siangsak zo hi (1 Cor. 6:11). Hih munte ah Jesu in eite mawhnate hong sawpsiangsak Pa ahihna hong lak ahih manin tatkhiatna ah lungmuanna i nei thei hi.

Revelation 1:7 sim in. Hih mun in Jesu thu bang hong hilh hiam?

Christian te upna laigil pi in Jesu meiilom tuang a hong paikik ding kamciam ahi hi. Jesu hong paikik ding a, leitung khempeuh in mu iin, thuaksiatna, buaina leh leitung i gitlohna khempeuh beisiang a, tawntung a ding kamciam na sungah hong muak dingin hong pai takpi ding hi.

Revelation 1:8 in Jesu thu bang hong hilh hiam? Tu laitak a eite thuak hatsakna kawmkal ah hih mun in bang lametna hong neisak hiam?

THURSDAY                                                                                   April 19

 MANGMUHNA THUBU SUNGA CHRIST – KHENNIHNA

Revelation 1:10-18 sim in. Hih lai ah Jesu amah le amah ki bangci gen hiam? 

Jesu vantung biakbuuk dei masa ah a omna thu hih mun ah kimu thei hi. Hih lai a Amah kilaakna lianlua ahih manin launa tawh John a khe mai ah puuk hi. Hehnemtu ahih ziakin, Jesu in John alauloh ding genna, amah maha om tawntung Pasian ahihna Alpha leh Omega, a Kipatna leh a Tawpna ci in kigen hi. Tua khit ciangin Ama sihna, thawhkikna leh a thawhkikna in a puak lametna thu zong gen lai hi. Jesu in “sihna leh gawtmun” tawhtangte nei hi. Hih lai ah Jesu gennop thu in, a sanggampa Lazarus sih laitak in Martha tungah a gen mah ahi hi, “Keimah in thawhkikna leh nuntakna ka hi hi. Kei hong um mi a sih hangin a nungta ding hi. Nungta a kei hong um peuhmah a si ngei kei ding hi. Hih thu na um hiam? (John 11:25, 26, ZIV).

Martha leh John kiangah, Christian te upna sangpen leh a nuamhuai pen thu ahi thawhkikna lametna thu gen hi. Hih lametna lo lametna dang bang om hiam?

Revelation 22:7, 12, 13 sim in. Hih munte in zong Jesu thu bang hong lak hiam?

“Jesu Christ in Alpha leh Omega hi a, Thukhun Lui Piancil leh Thukhun Thak Mangmuhna ahi hi. Tua gel in Christ sungah kituah hi. Satan ze-etna khempeuh leh a zumhuai Adam khialhna leh puukna a zo Adam nihna thumanna hangin Adam leh Pasian kipawlkik thei hi.” – Ellen G. White Comments, The SDA Bible Commentary, vol. 6, laimai 1092. Hi hi, Jesu pen akipatna leh atawpna hi. A kipat cil in eite hong bawl a, beina ah zong eite hong bawlkik ding hi.

A kipat pan atawp dong, leitung khangthu bek hilo hun beina thupiang dingte zong hong hilh, Mangmuhna thubu in Jesu Christ kilaakna taktak ahi hi. Hun beina tawh kisai thupiang dingte bangbang sin ta leng, Jesu Christ mah a laigil ahih pelmawh kul hi.

Nisim in, bangci lampi te tawh Jesu eite nuntakna laigil hisak thei ding i hiam?

FRIDAY                                                                                           April 20

NGAIHSUT BEH DING: “Mangmuhna sungah Pasian ziate thuktak in kilak hi. “Kilaakna (Mangmuhna)” cih min ngiat zong akiselcip thubu cih upna tawh kilehbulh hi. Kilaakna in na khat peuh laktel cihna hi. Topa mahmah in thuthuk te Ama nasempa tungah lak a, a mite in hong in avek a sin ding ama geelna ahi hi. Hih sunga thute in John hun lai a nungta te hitaleh, hun bei kuan a nungta te a ding ahi hi. Hih sung akigelh thu pawlkhat te a piang khin om a, pawlkhat piang laitak iin pawlkhat ahih leh khuamial vangliatna leh vantung Mangpa kidona lianpi a tawpzia hong lak hi a, pawlkhat in gualzawhna leh lungdamna tawh tatkhiat mite in a kibawl thak leitung a luahna uh hong lak hi.” – Ellen G. White, The Acts of the Apostles, laimai 584.

Tukal sinna Lai Siangtho munte thubu kipatna ahi a thubu tawpna ahi zongin en leng, Jesu thu hong lahtelna bekbek ahi hi. Thukhun Lui thu a genna te nangawn ah Mangmuhna thubu in Jesu thu hong hilhzaw kan lai hi. Jesu thu a genna dang te ahi Revelation 3:14; 5:5,6; 7:14; 19;11-16 te zong sim in. Hih teng simkhawm leng Jesu in kua hi a, Ama nungzui kici te a dingin bang khiatna nei hiam cih te siangtak in kimu thei hi.

KIKUP DING DONATE:

1.    Thukhun Thak in a tawntung in Thukhun Lui a matkik zelna in ei a ding bang deihna nei hiam? Tua in Pasian thu in eite upna laigil ahih huai zia bang hong hilh hiam? Eite leh pawlpi nuntakna ah Lai Siangtho thuneihna neuseek khakna pan koi bangin kikem thei ding i hiam?

2.    Mangmuhna thubu sung simvek inla, Jesu thu a genna mun na ngah zah kaikhawm in. Kikupna ah mipi zak in simkhia in. Tua munte in i Topa pianzia, nasep, vangliatna leh pianzil te bang hong gen hiam? Tua te tung pan bang hehnepna ngah thei na hiam?

3.    Sihna tawh kidim leitung ah thawhkikna kamciam in koi bangin lametna leh hehnepna hong neisak thei hiam?