LESSON 4: TATKHIATNA LEH HUN BEINA
April 21 – 27
TUKAL SUNG SIMDINGTE: John 14:9; Zeph. 3:17; John1;1-3; Rom. 8:38,39; Ps 91:15,16; Rev. 14:6,7; Eph. 1:4,5.
LAI SIANGTHO BULPHUH: “Itna hih ahi hi: Eite in Pasian i it cihna hilo, amah in eite hong it a, i mawhnate thoihdamna dingin biakna-in a Tapa hong sawlna ahi hi” (1 John 4:10, ZIV).
A lunglut huai leh a thupi mahmah Christian leh a dang biaknate kilamdanna khat in, biakna dangte in biakna phuttu-te (phuankhiatu) thuhilh te thupi kinbawl uh a, ahi zongin tua biakna phuttu-te in amau a ding bang sepsak cih kin in neilo uh hi. Ahang in, biakna phuttu-te sepna in amau honkhia theilo ahih hang hi. Tua makai-te in midangte amau le amau koi bangin kihonkhia thei ding cih a hilhna val sepsak theih dang neilo hi.
Christian te in ahih leh Jesu hilhna te bek hilo Ama sepna thupi kinbawl hi. Ahang in, Jesu sepna bek in hotkhiatna hong pia thei bek ahihna hang hi. Christ mihing a hong pianna (Rom. 8:3), singlamteh tungah a sihna (Rom. 5:8), a thawhkikna (1 Peter 1:3), leh vantung ah a nasepna (Heb. 7:25) – hih te in eite hong honkhia ama nasep te hi. Eite sepna hi peuhmah lo hi. “Mihingte sung a hoihna, siangthona, zahtakhuaina leh ithuaina te gawmkhawm in Pasian vansawltakte mai ah mihing te hotkhiatna dingin mihing te pansan in vapuak le hang, tua ngetna in langdona-in kingaihsun ding a kinial ding hi.” – Ellen G. White, Faith and Works, laimai 24.
Hun nunung a buaina leh khemna kawmkal a nungta eite a dingin hih thutak thupi mahmah hi.
SUNDAY April 22
PA’ ITNA
Singlamteh ah a sihma in, Amah bek tawh Pa kiang kitung thei ahihna Jesu in a nungzui te kiang genzo hi. Tua ciangin Philip in, “Topa aw, Pa hong lak lecin tua pen ko a dingin phazo ding hi” ci hi (John 14:8, ZIV).
Philip dotna Jesu bangci dawn hiam?John 14:9.
Jesu dawnna in Pa thu bang hong hilh hiam?
Mi pawlkhat te in Thukhun Lui a Pasian pen thutang hi a, Thukhun Thak Pasian ahih leh hehpihna, lainatna, leh mawhmaisakna tawh kidim Pasian hi ci uh hi. Pasian nih in khen uh hi. Thukhun Lui a hi a, Thukhun Thak ahi zongin anih in a kibang Pasian ahi hi.
Jesu hih leitung ah hong paina ahang khat in Pa Pasian laktel ding ahi hi. Kum zalom tampi a kithei khial Pa Pasian leh Ama pianzil dawibia te lak bek hilo Pasian teltuam minam te sung nagawn ah kizel khin lua hi. “Pasian telkhialhna hangin leitung ziingcip hi. Khuamial na mun a tanna ding, leitung in Pasian kiang tunkikna ding, Satan khemna vangliatna a kisuksiatna ding.” – Ellen G. White, The Desire of Ages, laimai 22. Hihte in Jesu leitung ah hong paina ahang pawlkhat ahi hi.
Pasian kikhel lo hi. Thukhun Lui aa thupiang te en lehang, Thukhun Thak lai mah bangin hehpihna tawh kidim Pasian ahihna kimu thei hi. Lai Siangtho in “Pasian in itna” (1 John 4:8) hi a, amah kikhel ngeilo ci hi. “Jesu Christ zanni, tuni, leh a tawntungin kibang den. hi” (Heb. 13:8, ZIV).
Singlamteh tung a kikhai pen in Thuciam Lui Pasian mah ahih lam phawk in.Tua Pasian mah a hehhak, a muanhuai, a lainat, a hehpih, leh itna tawh ahi hi (Ex. 34:6,7). Pasian in itna kip nei(Ps. 143:8) a, Amah a itte tungah lungkim hi (Ps. 147:11). Pasian in mite nopsakna ding leh lametna apia geelna nei hi (Jer. 29:11). Ama itna sungah, mawhsakna omlo aa, Ami te tungah lungkim in nuamna late sa hi (Zeph. 3:17). Hihte in Pa Pasian zia le tong diktak hong lak hi.
Jesu in Pa Pasian kilangsak cih thu ngaihsun in. Adiak in Pasian a lauthei mite a dingin hih thu in bang lungdamna ding leh lametna hong neisak hiam?
MONDAY April 23
CHRIST’ ITNA
John 1:1-3, 14 leh Philippi 2:5-8 sim in. Jesu kua cih hih te in bang hong gen hiam?
Christ pen khangtawn a om hi a, ama pianna dingin khat peuhpeuh tungah kinga lo hi. Amah ngiat Pasian ahi hi. Ama pianzia ngiat in Pasian hi aa, a nungta tawntung Pa ahi hi. Pasian ahihna a neih kawm mah in, mihing ci le sa tawh thukham a zuih theihna ding leh thukham a palsat te ahi eite khempeuh ai-awh (taang) in hong sih theihna dingin mihing in hong piang hi (Rom. 3:23).
Mihing dangte mah bang lian in Christ mihing iin hong piang hi. A sung a om Pasian hihna tha tawh hilo in midang khempeuh in zong a ngah theih tunglam pan kha thahatna tawh Amah in Pasian thukham zui zo hi.
Jesu in mihing taktak leh Pasian taktak hituak hi. Ama kammal vangliatna tawh na khempeuh a lenkip Pa hi a (Heb. 1:3), bawngkuang sunga kisial naungek zong Amah mah ahi hi (Luke 2:16). Na khempeuh a om ma in om a, Ama sungah na khempeuh kizom khawm (Col. 1:17) Pa in lungsim pilna leh pumpi a khang mihing naupang (Luke 2:52) mah ahi hi. Piansak khempeuh a bawl Pa (John 1:3) leh singtung a kikhailum Pa (Acts 5:30) a kibang mah ahi hi.
Hih te khempeuh in Christ hong itna kilangsak a, tua Christ itna in Pa hong itna a lahna ahih leh eite i kipaak ding leh lungdamkoh ding tampi nei hilo i hiam!
Rom. 8:38, 39 sim in. Hih mun in eite lungmuanna i neih theihna ding a vanglian thu bang hong lak hiam?
KHA SIANGTHO’ ITNA
Pa Pasian zanphial in Kha Siangtho zong kitelkhial pahpah hi. Lai Siangtho siam pawlkhat in Kha Siangtho pen Pa Pasian leh Tapa kikal a om itna in ngaihsun uh hi.Cihnopna ah, Kha Siangtho pen Pa leh Tapa kikal ki-itna ciangbek cihna hi. Tua in Tonih Pasian kikal ah kizopna neu hi aa tua te bangin Pasian khat hilo cihna ahi hi.
Ahi zongin Kha Siangtho pen pumpi khat mah in om ahihna Lai Siangtho in hong lak hi.Pa leh Tapa min tawh kigawm in Kha Siangtho min sungah Christian te kituiphum hi (Matt. 28:19). Kha Siangtho in Christ pahtawi hi (John 16:14). Kha Siangtho in mawhna laktel hi (John 16:8).Dah thei hi (Eph. 4:30).Hehnemtu(14:16), Huhtu, Thukuppihtu ahi hi. Amah in hilh (Luke 12:12) , mawh thumsak (Rom. 8:26), leh siangthosak (1 Pet. 1:2) hi. Kha Siangtho in thutak khempeuh ah mite makaih ding Christ in ci hi (John 16:13).
A tom in, Kha Siangtho pen Pa leh Tapa mah bangin Pasian hi. Akigawm un Pasian khat ahi hi.
Kha Siangtho sepna khempeuh in Pasian itna lak hi. Ama sepna bang khawng om hiam?Luke 12:12, John 16:8-13, Acts 13:2.
Kha Siangtho Pasian mah hi cih laktelna ding alian pen in Christ mihing hong pianna thu hi. Jesu in Kha Siangtho tawh hong piang hi(Matt. 1:20). Pasian bek in tua bang piangsak thei hi.
Kha Siangtho in Christ a ding akilehbulh na lamdang nih bawl thei hi. Khatna ah, mun khempeuh a om thei Christ pen Mary naubu sungah koih hi. Leitung pumpi mahmah tawh Christ van ah kah aa tua pumpi mah tawh om suak hi. Anihna ah, Ama mihing pumpi a om Christ pen mah leitung mun tuamtuam aa om Christian te sungah Kha Siangtho in omsak hi.
Tua hi a, Pa leh Tapa te tawh kikop in Kha Siangtho eite tangin nasem hi. “Tothum Pasian in mihing te lainat a, Pa, Tapa, leh Kha Siangtho in tatkhiat ding geelna tangtun na dingin semkhawm ngiat uh hi.” – Ellen G. White, Counsels on Health, laimai 222.
Pa, Tapa, leh Kha Siangtho in hong itna uh kibang a, a tawntung Pasian gam tun theihna ding tatkhiat nasep semkhawm uh hi. Tua ahih leh, hi zah a lian tatkhiatna koi bangin awlmawh lo in om thei ding?
Eite tawntung hoihna dingin Pa, Tapa, leh Kha Siangtho in semkhawm cih i theihna ah bang hehnepna lian ngah thei ding ihiam?
WEDNESDAY April 25
TATKHIATNA AH LUNGMUANNA
Seventh-day Adventist pawlkhat gupna ngah ding kicianlo thei uh hi. Lungmuanna nei lo uh a nuntak tawntung thu tawh kisai in amailam ding uh thei nuam uh hi. A hoih pen nuntak ding hanciam uh a ahi zongin picing zolo cih kithei uh hi. Amau nuntak a ki-et uh ciangin thangahna nei zolo uh hi.
Jesu nunzia leh eite kitehkaak ban ah “nuntakna a tun kongpi neu a, lampi kawcik in mi tawmcik bek a lut hi” (Matt. 7:14) cih kammal i ngaihsut khak ciangin ka tawntun zo takpi tam ci aa a lunghimawh lo i om hiam?
Hun nunung a ding kiginkholhna dingin, tu laitak in gupna thu ah lungmuanna neih a kul ahi hi. Mailam thu hangsan tak phut zawhna dingin tatkhiatna sungah lungnopna a neih ding uh kisam hi. I sinsa bangin a nungta To Thum Pasian in eite tatkhiat nasep sem laitak ahih manin tatkhiatna ah lungmuanna a nei thei ihi a neih ding zong a kilawm ahi hi.
Anuai a Lai Siangtho munte sim inla, Pasian in hong sepsak sa leh hong kamciam te tungtawn in tatkhiatna tawh kisai lametna leh lungmuanna ding bang om hiam?
Psalms 91:15, 16 _________________________________________
Joel 2:31, 32 __________________________________________
John 10:28 ____________________________________________
Rom. 10:9-13 __________________________________________
1 John 5:11-13 ________________________________________
Eite a siangtho a nungta dingin hong kisam hong kisawl zong hi mai hi. Ahi zongin, tua a siangtho nuntakna in gup ngahna ding hilo in Christ hotkhiatsa te ihihna gah ahi zaw hi. Sihna dongin muanhuai ding a kul mah bangin akhonkhong hong kipia hotkhiatna lametna ah kinga det ding thupi hi. Hun nunung ciangin Christ in amaute a ding asepsakna ah lungmuanna nei uh ahih manin Pasian mite in muanhuai leh thumang ding uh hi.
THURSDAY April 26
A TAWNTUNG LUNGDAMNA THU
Kilaakna (Rev 14:6, 7) sim in. A tawntung lungdamna thu icih bang hiam?
Hih lai ah lungdamna thu in a tawntung cih hong gen hi. Tua in Pasian kikhel ngeilo ahihna hong lak hi. Akikhel ngeilo Pasian in a kikhelngeilo lungdamna thu nei hi. Tua a tawntung lungdamna thu in a sang te lungmuang sakhi. Tua lungdamna thu in a kikhel ngeilo Pasian itna hong lak a leitung khempeuh ah kizelhsak a kul ahi hi. Mi khatsim in a zak kul ahih manin hih thu akizelsak dingin Pasian in a mite sam hi.
“Ahang in, ama mitmuh ah siangtho aa pau i ban loh na dingin leitung piansak ma in ama sungah eite hong teel zo hi. Ama nopsakna le deihna tawh kizui iin Jesu Christ tungtawnin tate aa hong san theihna ding” (Eph. 1:4, 5, ZIV). Hih lai ah lungdamna thu in “a tawntung” taktak ahihna bang hong gen hiam?
Leitung piansak ma in kiteel zo. Hih in “a tawntung” lungdamna hilo hiam! Leitung ki piansak ma pek in Pasian in ama sungah tatkhiatna a ngah dingin eite hong geelsak zo hi.
Hih lai ah kammal pawlkhat en ni: “teel”, “sehkhol”(Eph. 1:6 ah), “nopsakna”, “tate a sang.” Hih kammal te in Ama sungah tatkhiatna i ngah ding Pasian in bangzah lunggulh cih hong lak hi. Hong sepsaksa teng khempeuh (2 Thess. 2:13, 2 Timothy 1:9) te in eite tatkhiatna in Pasian hong itna pan hong paikhia bek hi a eimau sepna hang ahih lohna hong lak hi. Eite pianma in tua tatkhiatna ngah dingin hong kiteel khin ahih leh eite sepna hang tawh kingah hi thei mawk ding maw? Sang ding maw nial ding cih eite teel ding ahi hi.
Teelna ngah te in tua teelna bangci bangin taksuak sak thei ding? Itna tawh Ama mai ah siangtho aa pau banlohna” ahi hi (Eph. 1:3). Tua dingin eite hong kiteel ahi hi.
Christ hong paikik ma in hih “a tawntung lungdamna” a tangko dingin eite hong kisam hi. Midangte kiang ihop sawn ma in eimau nuntakna ah tua a tawntung lungdamna thu nuntakpih a ciapkhak masa ding bang hangin thupi hiam?
FRIDAY April 27
NGAIHSUT BEHDING:Tatkhiatna ah lungmuanna neih ding ahi hi. Ahi zongin, kimuan khialh loh ding thupi hi. Tatkhiatna ah kimuangkhial cih a om thei diam? Om thei lua hi. Jesu in zong tua thu hong hilhna ah, “Topa, Topa hong ci khempeuh vantung gam ah a lut kim kei ding hi. Ahi hangin vantung a om ka Pa deihna banga gamtate bek a lut ding hi. Tua ni ciangin mi tampi in ka kiangah, ‘Topa, Topa, nangma minin thu hilh hilo ka hi uh hiam, nangma minin dawite hawlkhia in, na lamdnag tampi bawl hilo ka hi uh hiam? hong ci ding uh hi. Tua ciangin, ‘note kong thei ngei kei hi. Siatna a gamta te aw, kei kiang pan taikhia un! ka ci ding hi.” (Matt. 7;21-23).
Hih mite in khialhna lianpi nih bawl uh hi. Khatna ah, hih mite in Topa minin na lian tampi a bawl uh hangin Topa deihna bang ahi a thukham bangin gamta lo uh hi. Jesu in, “mawh neite”, “khialh na neite”, “paubangte” pai khia uh cilo hi.”Siatna a gamta te” ci aa tua in anomian cih kammal akhiatna in “thukham bang a gamta lo” cihna ahi hi. Anihna ah, amau sepna kisialhna te na phawk kha hiam: “nangma minin hih te, tua te bawl hilo ka hi uh hiam? Hih na lianpi a dangte zong nangma minin bawl hilo ka hi uh hiam? Amau hoihna tawh Topa mai ah dikngah ding hanciam uh ahih manin Christ tawh nak kigamlat lua hi.Sepna khatbek in eite hong tan thei a, tua in upna tungtawn in eimau sep iin hong kiciamtehsak Christ sepna ahi hi. Hih lai ah eite lungmuanna ding om a tua in eimau sepna leh hoihna hilo Christ hong sepsakna sung bek ahi hi.Lungmuanna na nei nuam hiam? Pasian thukham zui inla, Christ dikna tung bek ah kinga le cin na kisap lungmuanna na ngah ding hi.
KIKUP DING DOTNATE:
1. Martin Luther in, “Kei le kei ka ki-et ciangin hotkhiat koici ngah ding ka thei zo kei a, Jesu ka et ciangin, koi bangin mangthang thei ding ka thei kei” ci hi. Hih kammal sungah bang pilna kimu thei hiam? Hih bang a muh theih ding banghang in thupi hiam?
2. Leitung kipiansak ma pek in tatkhiat ngah dingin hong kiteelzo cih thu ngaihsun in. Hih in mi khempeuh in gupna ngah ding cihna ahih loh koi ci theih ding? Gupna ngahlo om leh Pasian in teello maw ahikeileh amau khensatna hang maw?
3. Kidona Lianpi in Pa, Tapa leh Kha Siangtho te it hih leitungah gitlohna i zawhna ding hong bangci huh hiam?
إرسال تعليق
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.