ZSS SINNA 9: LUNGDAMNA (BIAKPIAKNA) SUMPI

SINNA 9: LUNGDAMNA (BIAKPIAKNA) SUMPI February 24 - March 2

---

NIPI (SABBATH) NITAAK Feb 24

Tukal sinna ah simding: Matt. 6:19-21; Eph. 2:8; 1 Pet. 4:10; Luke 7:37-47; 2 Cor. 8:8-15; 2 Cor. 9:6-7.

Lai Siangtho Bulphuh: “Pasian in leitung it lua ahihmanin, a Tapa a um khempeuh mangthang lo-a nuntak tawntungna a neih nadingin a Tapa khat neihsun a pia hi.” (John 3:16, ZIV)

Eite Pasian in a piakhia Pasian hi; hih a lian thutak Jesu hong kipiakna ah kimu thei hi. Pasian in leitung it lua ahihmanin, a Tapa a um khempeuh mangthang loaa, nuntak tawntungna a neih nadingin a Tapa khat neihsun a pia hi (John 3:16, ZIV). A mundang khat ah, “Note migilo hinapi, tua ci-in na tate uh na hoih mawkpiak ding thei nahih uhleh, vantungaa om na Pa un Ama’ kiangaa Kha Siangtho a ngen te pia nuam zawsem lo ding ahi hiam.” (Luke 11:13, ZIV).

Pasian in pia in pia kikkik hi. Tuain Ama’ nunzia hi. Tua nunzia a lenghkik ding eite in zong i piak ding kisam hi. “Angsungthei Christian” cih sangin hih nunzia tawh kilehbulh zaw omlo mai ding hi.

Ei hong kipiate sumpi piakna tawh ki piakik thei hi. I piak sumpite in i lungdamna leh itna lahtheih nading hunpha khat suak hi. Jesu in tatsa mite vantungah hong dawn ni ciangin Ama’ hehpihna a sang mi tampi i mu dingaa, tuate in eimau piak biakpiakna sumpite in Jesu a sanna dingun lampi honsak ahihna thu i phawk ding hi.

Biakpiak sumpite ii thupi-na tukaal sung i sinkhawm ding hi. Sum, hun leh siamna hitaleh phaltakaa piakkhiatna in i upna nuntakpih ihihna leh ana i sepsak Pasian nunzia muibuntaka lahna ahi hi. 
* Tukal sinna na simna tawh March 3 Nipi aading kigingkhol in.

NIKHATNI February 25“NA GOU (SUM) OMNA MUN AH”

Matt. 6:19-21 sim in. Hih kammalte i theihtheihsa himahtaleh koicibangin a thahat leitung neihsate; hencipna pan suakta thei ding i hiam? Col. 3:1-2 zong en in. 

Jesu in hong nget inah, “‘Ahang in, na gou-te uh omna munah na lungsim uh zong om ding hi” (Matt. 6:21, ZIV). Gou-te leitung ah kholna leh vantungah kholna thu kimu thei hi. Leitung genna kammal thum ahi: nget, kekseu, leh gutate (Matt. 6:19) in leitung gou-te in a beipak thei themvei bek a kimanzia hong lak hi. Leitung nate a beipak theihzia a tello kua a om diam? “Leitung ah na 81 82 T-6 khempeuh kiplo, kicianlo, leh muanhuailo hi. A muat-thei, a sia-thei, kigu-thei, leh kisumthei nate hi. Vantung in a kilehbulh hiaa, na khempeuh tawntung, sawt kimang, muanhuai, leh sia theilo hi. Vantung ah supna omlo hi.:- C. Adelina Alexe, “Where Your Heart Belongs,” in Beyong Blessings, edited by Nikolaus Satelmajer, (Nampa, Idaho: Pacific Press Publishing Association, 2013), p. 22. 

Na neihsate en in. Tam tasekeileh, a manlang leh a zekai hibekaa, a tamzaw paih ding vive hi. Gamh bel a tuamkhat hi. Ahizongin, a pil neihsakem-zeektu in a neihsa te vantung kepcingna ah khol ding ngaihsun ding hi. Leitung banglo in, tua laiah mankiam ding, guta, leh buluh te na lunghimawh kullo hi. 

Matt. 6:16-21 ah neihsakep-zeekna tawh kisai thupi mahmah khat kihel hi. Na gou-te in na lungtang hong huup, kai, zawhthawh, zolin hong uk hi. Hih leitungzia ah na lungtang in na gou-te zuiaa, na gou-te omna thupi ngaihsut pen hiteh. Leitung kisapna leh ngah nadingte ngaihsun semsem leng, vantung thute ngaihsut ding haksa semsem hi. 

Pasian um ci-in i gou-te leitungah khol leng kineihtawm vai lua hi. I gamtatna leh i kampau a kihual kul hi. Leitungaa i gou-te a kilatzah i mu-aa, ahizongin vantungaa i gou-te upna tawh i muh theih kul hi (2 Cor. 5:7). Eite kisapna (teekzawh nasep nawnloh aading) te aa ding a thu bek hilo a takin kigin kul tham hi, ahizongin, a lianzaw muhna, tawntung aading mitsuan detding nakpi takin thupi hi. 

Heb 10:34 sim in. Paul in leitung gou-te leh vantung gou-te tehkaakna ah a thupi a gen bang om hiam? 

NINIHNI February 26 PASIAN’ HEPIHNA A KEEM-ZEEKTUTE 

Eph. 2:8 ah Pasian hong piak bangdang omlai hiam? 

Hehpihna in “akilawmlopi maipha piakna” hi. Ngah ding kilawmlopi na ngah letsong hi. Pasian in a hehpihna leitungah hong bua-sukaa, i nial kei nakleh tua Ama’ hehpihna in i nuntakna tu leh a tawntung aading hong khel ding hi. Vantung hauhna leh vangliatna khempeuh tua hehpihna letsong tawh kihualkhawm hi (2 Cor. 8:9). Vansawltakte nangawn in hih a lian letsong lamdangsa uh hi (1 Pet. 1:12). 

Pasian’ hong piak khempeuh lakah Jesu Christ sung a hong piak hehpihna sangin a lianzaw a omlohna kitelcian mahmah hi. Hehpihna lo tawh lametna i nei thei kei ding hi. Mihingte amau le amau suakta zolo ding zahin a dahhuai mawhna huzaap lian lua hi. Pasian’ thukham zuihna nangawn in nuntakna hong tunzo tuanlo hi. “Tua ahihmanin thukham in Pasian thuciamte a langpan hiam? Langpan peuhmah lo hi. Ahangin, nuntakna a pia thei thukham kipia hileh thukham hangin thumaanna hong tung khin takpi ding hi.” (Gal. 3:21, ZIV). Thukham khat peuh in hong hon zo ding hileh, Pasian thukham om hi. Ahizongin, Paul in thukham in nuntakna hong pia zolo ci hi. Hong ki honkhia ding hileh, hehpihna bek tawh hi thei hi. 

1 Pet. 4:10 sim in. Hehpihna leh neihsakep-zeekna ki koici zop hiam? Pasian leh midangte piakna in hehpihna koici lah hiam?

_________________________________________________________

Peter in hong genna ah, eite Pasian hehpihna sang ihih leh, “Pasian’ hehpihna namtuamtuam a kem-zeekte” ihih kul hi (1 Pet. 4:10). Pasian in siamna tampi hong pia hi, tua hong kipiate sungpan i piakkik ding kisam hi. Hehpihna tawh hong kipia i ngahte, eimau nopsakna leh hamphatna ding bek hilo in, lungdamnathu tangzai nading ahi hi. Hong ki piakhong hiaa, (hehpihna in tua hiven), ei zong man-ngenloaa ihih theihbang piakkik ding kisam hi.

NITHUMNI February 27 I BIAKPIAKNA (SUMPI) HOIHPEN 

Luke 7:37-47 sim in. Hih tangthu in Pasian i piak nading lungsim tawsawn hoih diktak in banghi ci hiam? 

Mary inndei sungah lut-in Jesu tutphah ah kingam mu hi. A manpha paaknamtui bung sukhamin Amah hong zut hi. Ngeina tawh kituakin nungta lo ahihmanin tua numei gamtatna pawlkhat in kilawm salo hi. 

Ahizongin, dawiveina pan Mary kisuaktasak zo hi (Luke 8:2). Tua banah, Lazarus thawhkikna a muhna in zong lungdamna tawh kidimsak hi. Tua paaknamtui in a manphapen a neihgil hiaa, Jesu tungah lungdam a lah theihnapen hipah hi. 

Hih tangthu in i biakpiakna khempeuh hong tawsawn lungsim in lungdamna hang ahih ding hong hilh hi. Tehpih omlo Pasian hehpihna letsong thuhkik theih nading bang lamdang neimawk i hiam? Ama’ citna in hong pianuamsakaa, lungdamna tawh a kigawm ciangin i biakpiakna ahi hun, siamna, neihsa, leh pumpi in mannei hong suak hi. 

Ex. 34:26, Lev. 22:19-24 leh Num. 18:29 te sim in. Ahun leh mun kibanglo hiphial mahleh, hih thute ah i biakpiakna tawh kisai bang thupi zuih ding om hiam? 

Eima piak biakpiakna hoihpen zong i mitmuh in kicing hetlo kha ding, ahizongin Pasian aading thupi hi. Pasian ahoihpen i piakna in i nuntakna ah Amah i masakpenna hipah hi. Maipha ngah nopman a pia hilo zaw in, Jesu Christ ah i ngah hehpihna hangaa lungdamna hangin a pia ihi zaw hi. 

“Itna hangaa lungdamna tawh a phulkhia kipiakna leh citna in tawm taseleh, lungkimhuai biakna, a namtui biakna suakin, i piakkhiatnate leizawhloh man neisak hi. Ahizongin Honpa i piak theihzah lungkim taka i piakte, ei aading manpha i sakte, Pasian tungah i lungdamna zah tawh i ngaihsut ciangin cihtaak loin, tawmsa kha ding hi hang. Ahizongin, vansawltakte in a hoihlo banga imuh i biakpiaknate na tawito-in, tokhom mai- ah a namtui biakna in na piaksakaa, hong kisansak hi.” – Ellen G. White, Testimonies for the Church, vol. 3, p. 397.

NILINI February 28 LUNGTANG II TUPNA 

Sinna masa lai-in, meigongnu’ sumpiak i sinkha hi. Sumpi dangte tawh tehkaak ciangin a tawm mahmah hangin a lungsim leh upna takpi lak ahihmanin tam mahmahaa, Jesu in, “hih a zawng numei nu in midang khempeuh sangin tam khiazaw hi” (Luke 21:3, ZIV) cih dong hong suak hi. 

Pasian bekin (James 4:12) eite tupna taktak thei hi (Pro. 16:2; 1 Cor. 4:5). Tupna diklo tawh nasep diktak kisem thei hi. Tampi piak nading upna kisam khol loaa, ahizongin biakpiakvai takin midangte’ hoih nading piakna ah i lungsim tawng kilang hi. 

2 Cor. 8:8-15 sim in. Hih laiah Paul in piakna leh piaknopna lungsim tawh kisai bang a gen om hiam? Hih thu ah neihsakep-zeek tawh kisai bang lak theih ding thuhoih om hiam? 

Bangcibang lungsim tawh na pia phial zongin, angsung ngaihsutna pan midang khualna kikal kizopna sung hi hamtang hi. Tua kizopna sungah angsungkhualna leh piakna kidona in khalam kidona dangte sangin piang mun denzaw hi. Pasian aading a lawp ngei lungsim angsung- khualna in mitsak hi. Christian nuntakna ah angsungkhualna i lutsak ciangin buaina hong om hi. Eimau angsung ngaihsutnate kidiksak tawm nadingin Christ min suang liangin lampi kizong hi. 

Kammal khat tawh a khum hileng, itna mah hi. Pumpi nialna omlo leh midangte’ hoih nading kipumpiakna a omloh in itna kilang theilo hi. 

Pasian itna i nuntakna ah a kilat kei ngalleh, i piakkhiatnate in Pasian’ itna langsak lo ding hi. Angsungkhual lungtang in amah bek ki-it hi. Pasian kiangah, “[ka] lungsim vun uh hong at in” (Deut. 10:16, ZIV) ci-in nget kulaa, tua hileh ei hong ki-it bangin en zong it ding i kisin thei ta ding hi. 

Piakkhiatna leh huhna dik khempeuh i bulpi in itna hi. A hong tung Pasian itna in Amah itkik ding hong vei sakaa, tua in piakkhiatna bulpi hong suak hi. 

Itna sangin piakku l ahihna tawh i piakna banghang diklo hiam?

NINGANI March 1 PIAKKHIATNA II TUAHKHAKTHUTE 

Christ in Pasian zia-le-tong lak ding hong pai ahih leh, Pasian hong itna leh eite aading a hoihpen hong deihsakna thu siangtak telhuai ta hi. Ama’ hong sawlte eite phattuam nading bek hiaa, i siat nading om ngeilo hi. Tua lakah, eite hong kipiate ah phalna leh lungkimtakin a piate ihih ding hongsapna kihel hi. Lungkim leh cinghtak in i piakte angahte mahbangin a piakhia eimau hamphatna ding mah ahi hi. Hih bang a piakhiate bekin ngahna sangin piakna ah thupha a om zawkna tel ding uh hi. 

2 Cor. 9:6, 7 sim in. Hih mun ah piakkhiatna in koibangdan ding cih a thupi bang hong gen hiam? 

Cinghtaka piakkhiatna in mimal leh kha vai nasep ahih kul hi. Upna nasep hi-in, Christ sungah i ngahte hanga lungdam lahna hi. 

Upna nasep dangte mahbangin, piakkhiatna in upna khangsak hi, “gamtatna omlo upna a si hi” (James 2:26) ci hi. Upna nuntakpih ding sangin upna khansak nading ahoih zaw lampi omlo hi. Suaktatak leh cinghtakin i piak ciangin Christ zia-le-tong a lenghkhia ihi hi. Eimau’ sepna tawh Pasian koibangdan hiam cih a sin toto ihi hi. Hih bang piakna bekin Pasian muanna lamto in, Topa’ hoihna muhna hi. “Topa hoih hi, ciam unla mu dih un, amah beel mi thupha ngah ahi hi” (Ps. 34:8, ZIV). 

“Jesu’ maitang a taang vangliatna in kipumpiak itna vangliatna ahihna kimu ding hi. Calvary a khuavak sungah pumpi-nialna itna thukham kimu dingaa, tuain leitung leh vantung aading itna thukham hi ding hi; tua itna in “ama’ aituam ding zonglo” in Pasian lungtang ah zungkha hi; kuamah in aneh theihloh khuavak sungah a dik leh kiniamkhiat Ama’ zia-le-tong kilangh ding hi.” – Ellen G. White, Khangcin Lungdeih, p. 20. 

Nang hong kipia lak panin suaktatak leh cinghtak in na piakna hangin na upna a khan takpizia koicibangin naki thei hiam?

KIGINNI March 2 

NGAIHSUT BEH DING: "Suahtakna lungsim in Vantung’ lungsim hi. Angsungkhualna lungsim in Satan’ lungsim hi. Christ kipumpiak itna in singlamteh tungah kilangzo hi. A neih khempeuh piain, mihing in hotna a ngah theih nadingin Amahmah zong hong kipia hi. Thupha Tanpa in nungzui khempeuh tungah Christ singlamteh in cit ding hong kun hi. Singlamteh ah kilak thugui-in pia ding cih bek hi. Citna leh nasep hoih in Christian nuntakna ii gah diktak ahi hi. Leitung thugui in ngah ding, ngah ding bek hiaa, lungnopna ngah ding bek sawm uh hi. Ahizongin a gah in lungkhamna leh sihna ahi hi.” - Ellen G. White, Advent Review and Sabbath Herald, Oct. 17, 1882.

KIKUPDING DOTNATE: 
1. Christ lungsim tawh a kilehbulh hih angsung-khualna in bang hiam? Mimawh khat ii puak hih pianngei lungsim pan bangte in hong kemcing thei ding hiam? 

2. “Mi khempeuh in piak dinga a lungsimaa a khensatsa bangin pia uh hen; lungsitpipi ahikeh piakloh phamawh cihna in pia kei uh hen, ahangin, Pasian in lungtaitak a piate a it hi” (2 Cor. 9:7, ZIV). Hih thu in i piak ciangin i lungsim puakzia ding bang hong gen hiam? 

3. Christ sungah hong kipia khempeuh gualsuk in. Hih na gelh thute in hong kipiate hangin banghang piakhuai cih hong hilh hiam? Na piakkikte na ngah te tawh na tehkaak ciang genthamlo a hihzia na gelh te in hong hilh hiam? 

4. Banghangin angsungkhualna in mangbatna hong tun thei hiam? 

5. Na pawlpi sungah panpih kisam mi khat ngaihsun in. Tua mi, mite aading tu laitak lianin bang panpihna na pia thei ding hiam? Nang lam pan kipiakna a kisap phial leh zong bang na hihsak thei ding hiam?

oo00oo