MS 7: A Kihuan Thak An Bek Ne Nuam

February 17: A Kihuan Thak An Bek Ne Nuam Belize Gam

Agen: Sadie McKenzie, 63

---

Sadie [Sadii] in Belize gam aa, Lungdamnathu taangkona ah amah tui a kiphum nopna thu a pasal Marcus in a theih ciangin bang hong gen mawktam, cih lung kimawh hi.

Sadie in nitaak sim, Pasian’ thugenna ngaai den hi, ahizong in, a pasal Marcus pai nuam lo hi. Ama’ khensatna pen a pasal in deihlo mah ding hi, ahangin, laamna leh zudawnnate ah a pasal tawh paikhawm nawnlo ding hi.

Sadie in a kituiphum ma ni nih ni, Ningani (Thursday) zaan dong tui a kiphum thei ding hiam cih thu ngak in om hi. Sadie in a gen nop thu bang hunaa gen ding cih thei hi. Marcus a lup sim in, a zi a baan tungah lumsak hi. Tua ahihmanin, Sadie in thu a gen ma-in, a pasal baan tungah lum in, a lu nga hithiat phot hi.

“U aw, Sabbathni ciangin tui kiphum ning,” awneem takin ci hi. Marcus in thakhatthu-in, a baan lakhia aa, heh mahmah hi. “Tui na kiphum peuhmah leh kong taisan ding hi. Adventistte tawh na teen khop kul ding hi,” ci guapguap mawk hi. 

Amah tawlkhat sung heh lua maahmahaa, Sadie in a haan tawp dong na ngai hithiat hi. Tuakhit ciangin Sadie pau pan hi. Sadie in zong, “Nong taisan leh Pasian in nang tawh loin hong lungnuamsak ding hi,” ci giap hi.

Marcus zong kam malkhat nangawn pau loin, lumkik hi. A zingciangin, ama’ Adventist zi tungah a lungkim lohna teng gen ziahziah ding ngaihsun hi. “Kiginni (Friday) ni aa a kihuan, Sabbath (Saturday) ni ciangin a niingsa an ne nuam keng!,” ci lualua mawk hi. 

Sadie in, “Tua ankhing na neek nop keileh, na duh daanin hong huan sak ning,” lungduai takin ci hi. A zi’ dawnna tawh a lungkim naailo laai hi. “Hih bangdaan in an na huan laai peuhmahleh, kong vuagawp ding hi,” ci gamhgamh hi. 

Sadie zong hong lauthawngaa, Lungdamnathu taangkona ah thu ngaaite kiangah a nupa buaina uh thu a ngetpih dingin kun hi. Amah zong Pasian in a kep nadingin thu ngeen hi. Sabbath ni tui a kiphum khitciangin Sadie a inn vuah a ciahkik leh a pasal Marcus inn ah na omlo mawk hi. Ahizongin, a inn mai vuah a pasal hong pai ciangin Sadie lau-in a lungtang kisaai ziahziah hi. A pasal in a vua takpi ding sa hi.

Sadie ngaihsutna tawh kilehbulh in, Marcus in a kawi kawm in, “Tu-in nupi thak nahi ta hi,” a cih khitciangin, “Ka nuntak lai teng, Adventist pawlpi ah kong kikhawm ngeikei ding hi,” ci mawk hi. 

“Tua bel nang thu hi. Pasian in mi khepeuh teel theihna hong pia hi. Ahizongin, na teelna lampi a mong dong na tun ciangin hong mawhsak ken maw. Thumaan lampi kong lakkhin zo hi,” ci-in Sadie in dawng kik hi.

Sadie tui a kiphum khitciangin amau nuntakna pen Sabbath ni aa ankhing neek lungkim lohna cih lobuang nuamsa uh hi. Amah in Sabbath (Saurday) ni sim-in, Sadie an a thak huansak nuamaa, tua a man noploh pen mawhsak hi. Sadie huan an ne nuaam loin, Adventist biakinn naai aa zu kizuakna ansai ah ne sese hi. Sadie biakinn ah a kikhop sung in

ama’n zu zong dawn aa, a zi hong ciah ciangin zu kamnam pi tawh na dawntuah hi.

A pasal’ lungsim Pasian in a lawn nadingin Sadie in thu ngen hi. Kiginni (Friday) ni sim-in, biakinn ah a silh dingin a pasal puan hoihpente taihsak hi. 

Kiginni khat, a zingciangin a zi tawh kikhop ding Marcus thukim ta hi. Ahizongin, tua zan in lim taangthei etna ah a pai khit ciangin zusai ah zong pai laailaai hi. 

Inn a tun khitzawh tomcik sungin, a nasia mahmah zinliing in a inn uh lokgawp hi. Marcus zong lau lua peuhmah in, sual tungah puuk hi. “Pasian aw, a nihveina hunpha hong pia inla, ka nuntakna hong kepsak laai tapeuh in” ci-in kap lialua hi.

Sadie in a pasal khauhtakin hong paupih hi. “Zinliin hun ding kuama’n a theih kholhloh mahbangin, Topa Zeisu hong pai ding hun zong ki thei khollo dina aa, hong pai baih tading

hi. Nang kigingkhol naaikei hi,” ci giap hi. A inn uh a liing den ding daan in ommawk ahihmanin Marcus kap thapaai hi. A veengte khat in a kongkhak vang pan a kah lam na mu

hi. 

Zin a liin nawnloh ciangin, Marcus in pawlpi vaai a nihveina ngaihsut ding hong kipan hi. “Biakinn ah kikhawm kei ning, ahang in, ‘a inn ah zin a liin manin a kikhawm hi,’ hong ci ding uh hi,” ci hi.

Sadie in, “Mite ngaihsutna lung himawh ken. Mi tampitak vantung gam tung lo ding uh hi, ahang in, mite ngaisutna tawh lung himawh uh hi,” ci-in khauhtak in hilh hi. Marcus biakinn ah kikhawm ta hi.

Tua zawh a sawt loin, tua khua ah Lungdamnathu tangkona kibawl aa, Sadie in zong a pasal thugenna ah paisak hi. 

A nitaak masa ni Sadie inn hong ciah ciangin a pasal in zu na kham hi. A nitaak nihna zong zu na kham leuleu hi. A nitaak thumna ciangin, “Na lawmte tawh na kithuah laai leh, kei saangin amau a it zaw na hi hi. Tua bangin na khensat leh amau tawh na omkhawm thei hi,” lungduai zo nawn loin Sadie in ci giap ta hi.

Marcus in Pasian’ thu genna ah pai-in ki-ap dingin mipi a kisap ciangin pulpit lam ah va pai gemgam saam hi. Sadie in bel, tui sung pan in hong taikhiat mateng siah, tui kiphum dingin lamen ngam ngiatlo hi. 

Sadie in, “Um zolo ka hihmanin Marcus tui kiphum takpina ka muh ciangin lungdam lua in ka kap hi,” ci-in kipaak takin geenkhia hi. Sadie leh Marcus te nupa Blize gam ah a muanhuai a citak paawlpi makaite hong hita uh hi. Tu-in, kum 63 a phata Sadie in, Lungdamnathu taangkona mun guk ah bawlaa, kha thak 50 vaal tui ki phumsak zo hi. Amah leh a pasal huzaapna tawh a 100 aa sim midangte in pawlpi ah hong ki-aap uh hi.

Belize gam ah tu aa Lungdamna Thu taangkona phualpi pen 2015 kum Sabbath sawm leh thumna sumpi tawh a kilam ahi hi. Sabbath School sumpi nong piak man un lungdam ung. 

############@@@@@@@@@#############