MS 3: England Kumpinu leh Vantung Kumpi

England Kumpinu leh Vantung KumpiJanuary 20 

Agen: Leticia August, kum 60, Belize Gam

Leticia nuntak sungin a lawphuai bel thu in, a nu in Guatemala panin a gam veeng Belize gam ah a teeng a pi tawh a om khawm dingin paisak hi. Ama’ nu leh pate in Sunday hoihtakin a tang innkuante hi uhaa, Leticia pen numei dangte bangin gamta theilo ahihmanin suakta kisa lo hi.

“Ka pi kiang ka tun ciangin, “ Ka utut in om theita ing,” ci-in Leticia in gen hi. Amah zong lampawi omna ah pai kipan pah hi. Suakta kisa hi. Ahizongin, nisim in, “Tuzaan in si leng gupna ka ngah ding hiam?” ci-in a lung kham hi.

Tawlkhat khit ciangin, Adventistte nupa kop khat in Leticia inn ah va hawh uhaa, a pano Lai Siangtho thu sinpih hi. Kum 17 a pha Leticia in zong a lupna inndei sung panin na ngai khiikhee aa, “Tua bang thu Lai Siangtho in hilh kei!”ci-in ama’ tumtakin na buai mahmah hi. Adventistte in kampau silpiak tawh kisai genpih uh hi. Sawltaak bu sung sim uhaa, sawltakte in amau pau tawh a gen ciangin tua laai ah a om khempeuh in telthei uh hi. Leticia inbel, kamtuam pau in, kuamah tel theihloh a manlaang in a kician meello kampau pau khiatna hi cih na um hi.

A tawpkhakna ah, Leticia a lupna inndei sung panin hong pusuakkhia-in, Adventist nupate tungah a hehsa in, “Na thuhilhna uh maan kei”, ci hi. Ama’ upna bang hilh ding hanciam hi. A kikupna uh tungtawn in Leticia zong Adventist nupate tawh Lai Siangtho thu sinkhop ding

hong kipan uh hi. Tua khitciangin, Adventist biakinn ah hong kikhawmaa, tui kiphuum ding zong hong khensatta hi. 

Ahizongin, a naaihuai tengin Adventist pawlpi pen pawlpi maanlo hi cih gen uhaa, “Adventist pawlpi sungah tui na kiphuum leh hih laai ah innkuanpih a nei nawnlo ding nahih lam thei in,” ci ngiau mawk uh hi. 

A kituiphum dingpen buaihuai simtham ahihmanin a ktuiphum ni ding ciangin tui kiphumna ah kihel nawnlo hi. Laam pawi ah va pai zaw ta-aa, tui kiphum nawnloh dingin khensat tamawk hi. 

“Ahizongin Topa in kituiphum ding ka ngetkik ni mateng hong nusia tuanlo hi,” Leticia in ci hi. “Pastorpa in na cihtakpi ahi hiam ci-in hong dot ciangin, ka cih takpi a hihna ka genphet leh thumaan ka zuih ding ka teelna pen maan hi cih ka tel hi. Topa Pasian in hunpha a nih veina hong piak manin Ama’ hong hehpihna ka phat hi. 

Leticia ii naaihuaite hehthei mahmah uh hi. Amau in Leticia in a upna thak a nusiat nadingin ama’ neek theihloh dingin a meh uh vok thau tawh kangin an lak ah voksa tawh helsak uh hi. 

Leticia in moh leh niangtui bek kaal thum sungbang ne-in dawn hi. Sabbath nita bekin pawlpimite in an ne-in a sap ciangin gilvahin an kician ne pan hi. “Ka nuntakna ah ka theih thu in, tui hong kiphum thak pawlpi mite i khual ding kisam hi, ahangin, amau nuntakna ah bang teng piang cih i theipih kei hi. Amau thu kan unlaa, it in, khual un,” Leticia in ci hi.

Leticia zong a nu kiang Guatemala ah hong ciah hi. Tua hun sung in zong Pasian in thupha a piakna gen hi. Tua zawh a sawt loin, a pasal ding tawh hong kimu uhaa, a sawtlo mahin hong kiteeng uh hi. 

Leticia in zato siama suah ding ngiimna neiaa, a pasal tawh kop in, Guatemala leh Belize khuapi ah pawlpi thak (3) phuh ding geelna nei hi. A nupa un tui a kiphum ding 1,000 bang makaih zo uh hi. A pasal in a sihsan khitciangin Leticia in tu-in kum 60 bang phaaa, Belize khuapi ah teengin, a citak, a thanuam pawlpi mi khat ahi hi. 2016 kum-in, England kumpinu nihna Elizabeth in Leticia pen veeng leh paam phattuam nading bawlna ah England gamsung khempeuh ah a hoih penpen, a thanuam penpen in pahtawina pia hi.

“Mi pawlkhat in ka min na piaksak uh hi,” ci-in lungdam takin Leticia in gen hi. Ahizongin, ka lungsim hong sukha penpen in, mite pah tawi ding ahikei aa, Pasian in, ‘Pai inla, Kei aadingin hih va seem in’ hong cih bangin ka sepna in ka lung hong nuamsak penpen hi,” Leticia in ci hi. “Eite pen Topa’ naseem salte ihi hi. Topa in ‘Sem in’ ci-in hong sawl hi. Ni khatni ciangin Topa in, ‘Na nasep hoih hi. A citak a thumaan naseem nu aw’ hong cihna aw khum ka za nuam hi,” ci-in maitak takin gen hi.

“Pasian in ngiimna khat tawh kei hong sap lam ka thei hi. Pawl pi ah ka sep zawh kum 43 phata aa, Topa’ hong itna pen ni khat khit ni khat a thuuk seemsem in khang hi,” ci-in Leticia in lawphuai tak in gen khia hi.

Belize gam aa Adventistte in 2015 kum in, Lungdamna Thu taangkona phualpi leh pawlpite zumpi lam nadingin kuata thumna sumpi pawlkhat ngah uh hi. Inter-American Division sungaa om Belize leh a dang gamte aadingin Sabbath School sumpi tawh nong huh uh lungdam mahmah ung. Topa Pasian in a zah tampi thupha hong piata hen!