FSS ZIRLAI 12: THATNAK IN THAT LONAK A NEH

ZIRLAI 12: THATNAK IN THAT LONAK A NEH
 December 16-22  

SABAT TLAI LAM: December 16 

TUZARH SIAR DING: Rom 12,13. 

BIBLE CANG KEN: “Hi khawvel daan ah va kop nawn hlah uh. Cuhnakin nan thinlung tharthawh tahrat in thlengaw sawn uh. Cutin Pathian duhnak nan thei dingih, Pathian hmai ah ziangso a tha, ziangso a lungawi mi a si ti le ziangso a famkim mi a si ti nan thei ding” (Rom 12:2). 

ROME khua ih a ummi Khrihfapawl in a tha sawnih thu thlun dingin daan thu parih an ruahnak dik lomi sim ding a hawl. Hi thu thlunnak hi thinlung ruahnak a tharih thlenghnak ihsin a ra suak ih, cumi cu Pathian hnenih ap-awknakpawl kha Pathian thiltitheinak ih thlenghaw zotupawl an si.

A sim duhmi cu Khrihfa zumnak ah tuahsak mi a nei. Paul in tuahtuannak a soisel lo. Rome bung 13 in bung 15 tiangah zawnlung ih thuthlunnak kha nasa zetin a sim. Himi a sim ruangah hlan ih a sim mi zumnak ruangih dingfelnak a hnong cuang lo. Tuahtuannak hi zumnak dik nun a langnak a si. Mi pakhat ih a simmi cu Jesui rat hnuih thuphuan betmi ruangah Thlung Hlun ih fialmi hnakin Thlung Thar ih fialmi hi a khungkhai sawn a ti. Thlung Thar zumtupawl cu Jesui thinlung put le ziaza a taktak ih hmuhternak a si. Amah thluntu kan si ahcun a umdan vekih kan um a tul. Nan thinlung putdan cu Khrih Jesui thinlung putdan vek siseh (Fil. 2:5). Mi pakhat ih lungput in cawnter mi a si lo ih, Khrih lungput vek neither in duh a si.

Jesui umdan thinlung put vekih tha le sang a um lo.

THAWHSAL NI December 17
NA RENNAK SAN 

Rom 11 ah thurin thu a cemnetnak a si ih, Rom 12 in Rom 16 tiangah cun pumpak thuzirhnak le nunih tuahsuak ding thu a si. A neta bungpawl hi an thupi zet le khoh zet an si ih a san cu kan zumnak kha nun ih langternak ding a si. 

A hramthok in zumnak hi zawnlungnak ai-awhtu a si lo. Cuti sisehla Bawipai thu thlun dingah tuanvo kan neihmi ziang siar loin an um ding a si. Thinlung put le ziaza danpawl cu khoh zetih a fehpi mi hrilhfiahnak ah thlung thar in a khungkhaiter sin (Thu thlun ding a tamter sin) tiah an ti. Thinlung put le nun ziaza thupekpawl hi Khrihfapawl ih thlun ol deuh dingah hmuhsaknak in pekmi a si lo. Kanmah ih a ummi sual do hi a ol lo (I Pet. 4:1). Khrihfapawl cun neh tengteng dingah vanlam thiltitheinak pek dingin thu tiamkammi kan si. Leitlun ih kan um laiah kan ralpa ih tukforhnak neh rori dingin do ding kan si. Kan tlukih kan bah pang tla le Pa hnenah in simsaktu ding kan ai-awhtu puithiam bawibik Jesuh kan nei (Heb. 7:25).

Rom 12:1 siar aw. Khrihfapawl ziangvek in an nung ding timi ah thil bangaw zohthim ding ziangso 131 132 um? Rom 12:2 hi himi thuthawn ziangvek in so a remawk? 

Rom 12:1 sungah Paul in thlung hlun raithawinak a sawh duh. Hlanlai ah Pathian hnenih rannung ih raithawinak an pekmi vekin Khrihfapawl khal Pathian hnenih raithawinak nung le thianghlim rawngbawlnak ah pumpekaw ding kan si.

Israel sanlai ah raithawinak ih an ken mi hmuahhmuah fimkhur zetin an zoh fel theu. Rannung parah soisel ding an hmuh le hnonsak. Ziangahtile Pathian in raithawinak ih hmanmi ah soisel ding um lo mi si dingin thu a pek. Khrihfapawl tla raithawinak nung le thianghlim Pathian cohlan tlak ih pumpekawk dingah zirhmi kan si. Himi ah an thiltitheinak hmuahhmuah hmangin a thabik ih tuah ding a si. Soisel kai lo kan um lo. Soisel ding um loin rinum zet ih kan um theinak dingah kanmai famkim lonak kan hawl suak ding a si.

“Nan ruahnak thinlung tharternak in thlengaw sawn uh” (Rom 12:2). Tirhthlah in himi a ngan tikah Khrihfa pawl thansonak dingah a si. Khrihfa hi thansonak um loih cawl ringring ding kan si lo. A tha deuhnak hmun panin feh ding a si. Martin Luther Commentary on Romans Pp. 167,168. A tha deuhnak hmunih thawn timi Khrihfa nunah a sim duhmi ziangso a si? 

TLAWNGKAI NIKHAT December 18
FIMKHUR ZETIH RUAH DING 

Tu kuata sungah kumkhua ih a hmun ringringmi Pathian daan thukhaam (10) thusim dingah mawhphurhnak kan neihmi reltlang ding a si. Himi thu hi Paul in a helh kam zetih tu le tu a sim. Rom cabu ah thukhaam (10) hi zumnak ruangah a tul nawn lo, a hlo zo timi fate hman a tel lo.

Thukhaam ih nganmi capawl theih har a um lo, a phenih a um mi thlarau kha kan hngilh. Thlarau hi duhdawtnak a si…… Pathian duhdawtnak le pakhat le pakhat duhdawtawknak a si. Duhdawtnak ka nei a titu an um ko ding. Nitinten a nunah langter seh, thil ziangkim a zaten a danglam theh ding.

Rom 12:3-21, siar aw. Midang hnenah duhdawtnak ziangtin so kan langter thei ding. I Korin 12 le 13 ah Paul in thlarau laksawng a sim hnuah duhdawtnak kha nasa zetin a cawisang. Duhdawtnak hi Grik tongin agape timi a si ih a tha zet. Pathian hi duhdawtnak a si (I John 14:8). Curuangah duhdawtnak in Pathian ziaza a langter. Duhdawtnak timi hi midang parih tuahsuak dingmi a si. Pathian in anmah a tuamhlawmdan vekin midang parah tuah ve ding a si.

Paul in duhdawtnak hi tuahnak ih langter tengteng dingah a sim. A poimawh sawnmi cu tangdornak nunih thil tuahdan a si. Amah le amah sang zetah a ruataw loih (Rom 12:3), midang parah amai lung thoten a tuahsak. Pakhat le pakhat parah mai lung thoten upatnak a pek (Rom 12:10 NASB). Mai thinlung puaksuak ih tuah a duh lo ahcun, “Ka fim tiah a ruataw a si” (Rom 12:16 NKJV). Khrih in amai thu in simmi cu “Ka kawn hi phur hnik uh, kei cu nunnem le tangdornak thinlung neimi ka si, ka hnenah zir uh” (Matt. 11:29). A thupitnak kan kai ngah ko lo maw?

Khrihfapawl hi tangdor ding kan si theh. Cui hnuah bawmtu nei lo kan sinak kan hmu-aw ding. Ziangtluk in so kan palh, pakhat le pakhat ziangtlukih rinsanaw dingso kan si? Rundamnak ah lenglam ih kan dingfelnak ah a hngataw lo. Kan nun kan mahten kan thlengaw thei lo. Sunglam ih thiltitheinak in petu ih nun thlengsak tulmi kan si. Porhaw ding ziangso kan nei? Hngalnak ziangso kan neih mi a um? Kanmah ah ziangso kan neih ih tluang kan khawn rero? Neih mi zianghman kan nei lo. Himi bung le cangah Paul ih in zirhmi vekin pumpak cio ih kan nunah a hramthok tangdornak nun kha Pathian hmai lawngah si loin pakhat le pakhat par khalah a lang ding a si.

Rom 12:18 kha siar aw. A tui na nunah himi zirhnak ziangtluk ih tha in so na tuah zo? In simmi thu vekin nun ziaza le thinlung rem ding kan nei ko lo maw? 

TLAWNGKAI NIHNIH December 19
KHRIHFA LE UKTU COZAH 

Rom 13:1-7 siar aw. Uktu acozah pawlih thuneihnak thawn pehparaw in ziangvek daan pawl so kan hmuh thei? 

Paul in amai sanih leitlun uktu milem bia siangpahrangpawl in thiltha zet ca a nganmi an nei. Uktupawl kha a cancan ahcun zum ban loih mi tha lo, sualnak cikim tuahtu, a dikmi Pathian thei lotupawl an si. Anmah in Pathian betupawl kha nasa zetin an hrem. Cuvek cozah kutin Paul tla a thi ve a si. Kha vek uktupawl ih kut tangah Khrihfapawl kha ram mi tha si dingin a forh.

Bible pomdan ah ram uktu hi Pathian ih hriak culhih fialmi an si. Minung hi pawlkomawknak thawn uk aw kan tul. Thlun ding daanpawl a um a tul. Uktu neih lo le dan neih lo hi Bible in a pom lo.

Acozah pawlih daan a tuahmi hmuahhmuah kha Pathian in a theihpi thehmi a si lo. Thuanthu ah ruatnak saupi nei lo cozah uknak tha lo zet thu kan hmu ih tui kan san khalah hmuh ding tampi a um lai a si. Hivek dinhmun khalah Khrihfapawl hi a cang theitawk ih ram dan thlun ding a si. Ram uktupawl in Pathian thu an dodal lonak dingah Khrihfapawl in ram uktupawl kha rinum zetin kan dinpi ding a si. Thuneitu dokalh tumtu an um ahcun fimkhur zet le thlacamnak thawn a tuahsuak hlanah ralrin pek ding a si. Simsung thu ah kan theih zo vekin nikhat ni ah Pathian lamih mi rinum zetpawl kha leitlun thuneihnak tangah nehtu an si leh ding (Thup. 13). Ziangvek ramih kan um khalah kan tuah thei tawkin Pathian hmai le ram hrangah mi tha kan si a tul.

Cozah uknak hi Pathian in an hnenah thuneihnak a pek mi a si ti kan theih a tul. Pathian kan rian vekin an thuneih sung hmuahhmuah ah an dan thlun dingin zirhmi kan si. Pathian thusuak an dodal ahcun milai thu hnakin Pathian thu kan thlun sawn ding a si timi kan pom a tul.

An thuneihnak dokalh zawngin kan um lo ding. Kan tong mi le kan canganmi pawl ah fimkhur zetih ruat ding kan si. An thu suahmi le an dan tuahmipawl duh lo le sawiseltu ding kan si lo. Kan lam in donkham theitu zianghman kan tong ding a si lo ih, kan tuah ding khal a si lo. 

TLAWNGKAI NITHUM December 20
PAKHAT LE PAKHAT DUHDAWTAWKNAK 

Pakhat le pakhat duhdawtnak siar lo zo hnen hman leiba nei hlah uh. Ziangahtile midang a duhdawtu cun Daan a famkimter (Rom 13:8). Himi Bible cang ziangtin so kan theihthiam ding? Midang kan duhdawt ahcun Pathian thukhaam thlun kan tul nawn lo tinak a si maw? 

Duhdawtnak ih kan langter timi hi kan tuahmi hmuahhmuah phenih a um mi kan thinlung sungih a suakmi cangvaihnak a si. Himi hi Jesuh in tlangpar ih thuzirhmi kha Paul in a hrilhfiah. Ziangahtile daan thu hi Pathian ziaza a si. Pathian hi duhdawtnak a si ih, midang duhdawt hi daan thu famkimtei thlun nak a si. Paul in hmuh thei lo mi duhdawtnak kha a sim lo, daan thu ih a um mi vekin a sim tiah Khrihfa tampi in an ti. Thukhaam (10) in sualnak hi ziang a si ti a langter ih sualnak a tuah duhtu zohman an um cuang lo timi langtertu dingah a um ringring a si. Daan thu hi duhdawtnak thawn lawngih tuah theimi a si. Mi tampi in Jesuh Khrih Cross ah an tawpter ruangah daan thu vekih thlun ding a tul nawn lo an ti.

Paul in thuthimnak hmangin daan thlunnak a hrilhfiahnak ah duhdawtnak daan hrampi cu thukham thlunnak a si a ti ih khui mi thukhaam so a si ding (Rom 13:9-10). 

Duhdawtnak hi a tharih tuahmi daan a si lo. Himi thu hi Puithiam Hnatuan 19:18 sungih ta a lak sinmi a si. Paul in himi daan hrampi a langter mi hi thu thlung hlun ih dan a famkimnak a si. Paul in thuthangtha a simmi bawmtu dingah thlung hlun kha a hmang. Mi hrekkhat in Paul in a tulmi thukhaam malte lawng a langter mi a si tiah an ti theu. Cuvek ih a sim duhmi a si ahcun Khrihfapawl in nu le pa upat lo ding tinak a si. Milem biak men ding, Bawipai hmaika ah milem pathian dang neih a poi lo ding a tinak a si.

Hitawk ih thu a fehpidanpawl zoh hnik. Paul ih a simmi cu pakhat le pakhat ziangtin so kan pehtlaihawk ding timi sawn a si. Pumpak pehtlaihawknak a sim ih thukhaam (10) hi kan pehtlaihawknak ih thuhrampi a si timi cipciar zetin a sim. A thu fehpi mi hi daan thu a tul nawn lo tiih a hnonnak thu a um lo (Tirh. 15:20, I Thess. 1:9; I John 5:21). Thu Thlung Thar ngantupawl ih an langter mi cu Pathian kan duhdawt vekin pakhat le pakhat duhdawtaw ding thu an langter mi a si (Matt. 25:40, I John 4:20,21).

Pathian thawn nan pehzomawknak ruat aw. Midang thawn nan pehzomawknak ah ziangvek in so na langter ve? Nan pehzomawknak ah duhdawtnak hi ziangtluk ih thupi so a si? Pathian ih in duhdawt vekin midang duhdawt ding hi ziangtluk in so a zir thei? 

TLAWNGKAI NILI December 21
TU IH KAN RUNDAMNAK 

Tulai thil umdan nan theih ruangah ihthahnak ihsin thangharh a cu zo ruangah cumi cu tuah uh. Ziangahtile a tu ahcun kan zumtir lai hnakin kan rundamnak cu a nai sawn a si (Rom 13:11). 

Tu kuata sungih kan hmuhmi vekin Rome kawhhran hmuitin in Paul in a nganih a tumtahbik mi cu cutawk ih a ummi zumtu Judah miphunpawl in Thukam Thar zumnak le tuahnak pehzomawkdan theihternak a si. A tumtah mi cu rundamnak a si ih, misual in Bawipai hmaiah dingfel thianghlimnak ziangtin so a ngah timi 137 138 theithiam dingah a duh. A hmuitin mi hmuahhmuah bawmtu dingah daan thu hi a hmang a si. Paul in daan thuthawn a pehtlaihawknak le a fehdan taktak kha a sim. Thlung Hlun sanih Judah sakhuanak kha zangfahnak hmuitin mi a si. Cuih daan urhsun zetih a thluntupawl in tampi an siatsuah ih anmah vekih kan palh sual lonak dingah kawhhran in kan ralrin a tul.

Zumtupawl hnenah Paul ih thu a simmi hi ziangtluk ih duhnung mi so a si? Jesuh a rasal cing ding ruangah thangharh dingah a sim. Himi thu a ngannak hi kum 2000 a kim zik thlang. Jesui ratsalnak a naih zo mi canah kan umih khami kha rak ruat cia in kan nung ding a si. A rei tuk tiah kan zaten kan ruat ko ding. Pumpak kan tonnun khalah a rei tuk zo. Kan thih ding a naih tlukin Jesui ratsalnak hi a nai zet. Hmaizarh ah maw, hmailam kum 40 ah maw thihnak cu kan ton dingmi a si. Nili bawrh vel maw, kum 400 hrawng so kan itthat ding ti kan thei lo. Kha mi hnu ah kan theih dingmi cu Jesui ratnak a si. Kan parah thihnak a thlen thei ringring mi kiltin ah a um. Can a nai zetih kan rundamnak tla kan rintir hnakin a nai zet zo a si.

Asinan a voi hnih ratsalnak hi Paul in Rome cabu sungah a tarlang lem lo. Thessalon cakuat le Korin cakuat sungah cipciar zetin a tarlang. Khami kha Bible ih a tumtah mi a sinan a hleice in thlung thar sungah a ratsal ding thu ruahsan ding in pek hlah sehla kan zumnak hi san nei lo a si ding. A mak zetmi thutak kha tlamtling zetih rahsuah ding a si ruangah a ratsalnak um hlah sehla zumnak ih thiam conak in san a nei pei maw?

Hmai thla hrawngah Jesuh a ra ding ti thei sehla na nun ahthlengh a tulmi ziangso na thlengh aw ding? Ziangah so? Himi thilpawl hi Jesui rat hlan thlakhat duhah thleng theh ding tul tiih na zummi sisehla a tu ah ziangah so na thlengh duh lo? Ziangso a danglamnak a si? 

TLAWNGKAI NINGA December 22
RUAH BET DING: Bible sungah Pathian duhdan cu a um theh. Pathian thusuak kan timipawl cu cungnungbik Pathian ih phuansuah mi an si. Siamthar mipawl nunih thutak umtertu cu Pathian a si. Thiltitheinak thinlung thar a pek mipawl anmah phentu sum zingpi a hlonhlosak a si. Thinlung thar pek nan si ding timi thu kha ngaihvennak a tharih pek ding timi sullam a nei. Lung thlengnak kha Khrihfa mi piangthar in thutak theih theinak a nei ding a si. Bible thawn naihaw theinak a pekih sia le tha thleidan thiamnak dik le fel a neih theinak dingah thlacam nun a nei. Cumi cu cungnungbik Pathian ih tumtahmi theih theinak dingah a si. E.G. White, My Life Today. P. 24.

Bawipa cu … a racing ding, tiaraw cia ih kan hngak ve a tul. Amai in runsuah zomi kan si vekin a hmel hmuh ding hi ziangtluk ih lungawi um so a si. Reipi kan hngak hmanah kan ruahsannak cu a kel ringring ding a si. Siangpahrang a sinak le a sunlawi ropitnak kan hmuh tikah a kumkhua in milungawi kan si ding. Ka ausuah dingmi cu “Khir rero phahih inn tlung ding vek ka si ding”. Kumkhua inn ah lakso dingin Khrih kha huham nei zet le sunlawi ropitnak thawn a rat can a naih tuk zo a si. E.G. White, Testimonies for the Churh vol. p. 253. 

RELTLANG DING: 

1. Tlawngkai Nili ni zirlai thusuhnak netabik kha reltlang uh. Mipipawl in ziangso a phi an pek? Ziangvekih thiam coter mi so an si. 139 140 

2. A buainak canah Khrihfapawl in ziangvek in so ramsung mi tha le Khrihfa tha kan si thei ding? Cozah dodaltu ka si ih Pathian duhnak tuah hi ziangtin so na ruahdan tiah lo sut hai sehla, ziangtin so na sim ding? Ruahnak na pekmi ziangso a si ding? Daan hrampi ziangso na thlun mi a si? Ziangah so himi thil hi thupi zetih ruatin thlacamnak thawn kan tuah a tulnak hi? 

3. A har zet tiih na ruahmi ziangso a si? Daan ih a nganmi vekin Pathian duhdawt ding le midang duhdawt ding timi hi buainak can khalah khoh zetih a pomtu kan si maw? (or) Himi thusuhnak hi a dik lo tiah na hnong sawn? Ziangruangah so a si? 

4. Tu kuata a netnak lam kan thleng vivo vekin Rome cabu sungih na hmuhsuahmi ziangso um reltlang uh. Rem thatnak thupitzia theithiam dingah in bawm. Kan zummi ziangso a si ih, ziangruangah so kan zum timi Rome cabu in ziangso in zirh?