Christmas hongpianna hamkalh ~ Kap Do Thang

Christmas hongpianna hamkalh ~ Kap Do Thang

Zeisu mihing bangin hong piang kei leh X’mas omin ka um kei hi. Zeisu’n mawhneite hong tatna mihing banga hongpian manin X’mas hongpiang ahi hi. Tua lungdamna zong kumsim December 25 hong tun sim bek a lungdam ding ih hikei hi. Atawntunga lungdam dingte ih hihi. Tuni in katelgaih loh hangin X’mas hong pianna hamkalh in konggen nuam hi.

“Chrismas”, kammal pen Greek kammal “ Christos”, cih leh “ Mas” cih kammal nih kigawm ahihi. “Christmas”, kammal pen, “Christes Messe”, pan hong kipan hi-a, akhiatna in “Khazih mihon” cihna ahi hi. “Christos” kammal pen “Sathau nilh” cihna hi-a, Mangkam in “Christ” naci uh hi. “Mas” pen “Siahpia” cihna in kizanga Mangkam in “Mass” tawh kilaih hi. “Mass” pen RCM te’n azatngei khat hi-a, a khiatna in “Khris phawkna Pawi” cihna ahi hi.

Tanglai Lawki mi ahi, Rome mi, Gaul mi leh Briton mite in phalbi hun sungin pawi kham hau mahmah uhhi. Leilu lam mite in “NI” pen “Nuntakna leh Khuavak hong pia hi”, ci-in bia uhhi. Tua “NI” abiak uh kum khat sungin “NI” atompen hun leh asauhun kipat hun December khasungin pawi hau mahmah uhhi. Hebrews mite’n hih hun sawng teng mahin “ Hanukkah” acihuh “Khuavak Pawi” kha’m uhhi.

Rome mite’n zong adang “Saturnalia Pawi” December 17 – 24 sungteng mahin nei uhhi. January ni 1 ni zong, “ Ka Lend Pawi”, ci-in nei uhhi. Hih hun sungin biakpiakna neilo in Letsong kipiakna in zang uhhi. Tua pawihun sungteng, inn zem zihziah uhhi. Rome mite, “NI” abiatepawlin akamsangpa uh “MITHRAS” suah ni, December 25 ni-in pawi lianpi kha’m uhhi. Kuama zawhlohpa “MATHRAS” suahni ci’n thupibawl mahmah uhhi.

Tuabang Lawki pawi bekbek tawh akidim ciangin, Constantinople khua Bishop aminthang mahmah St. Chrysostom inzong, “Lawkite in amau pawite khamin amanlah mahmah laitak un, Tapidawte’n zong kuama zawhloh Khazih suahni Pawi December 25 ni-in bawl nading hong hanciam uha Rome khua ah kum 336 AD in kipsak hi. Kum 300 dektak bang Zeisu suahni pawi kibawllo hi. Zeisu suahni pen Laisiangtho sungah kigelhlo in, laibu dangdangte ah zong omtuanlo hi.

Kum 361 ciangin Pope Julius in December 25 ni pen Zeisu suah ni hi ci-in hong tangko khia in kum 400AD ciangin pawlpi khempeuh ah December 25 ni Zeisusuah ni pawi zat dingin hong kizel ta hi. Zeisu suah ni a seh uh ki bang lo sawnsawn a, December 25, January 6, March 28, April 19,20, November 17, cih bang in seh uhhi. Greek Orthodoxte leh Armenian pawlpite in January 6, ni zang uha, RCM te’n December 25 ni zang uhhi. Abyssinia pawlpite leuleu in asandanuh kibang loin, kum khatin lungdambawl 11 vei bawl uhhi. March kha lobuang bawl uhhi.

Zeisu hongsuah lungdamna pen ni 365 sungin 1 veibek lungdam ding hilo a, nisim naisima lungdam dending ahihi. Topa hong itnapen lungdamkoh tawntungding ahihi. (I Thess.4:16). X’smass nopna thupha in mikim tungah hongtung tahen! Amen.

Kap Do Thang

Spicer Memorial College

Pune, INDIA

Src: ZomiDaily