ZSS Lesson 6: ADAM LE ZEISU

LESSON 6: ADAM LEH ZEISU
November 4 - 10

NIPINI (SABBATH) NITAAK LAM November 4

SIMDING TE: Rom. 5 sung bup.

KAMNGAH: “Tu-in upna hangin Pasian tawh kipawl khinta ihih manin i Topa Jesuh Khrih hangin Pasian tawh a kilemkik ta ihi hi. Ama hangin upna tawh tu-a i omna Pasian hehpihna sungah a tung ihi a, Pasian tawh minthan’na ngahkhawm ding, ci-in lamen ihih manin i lung a dam hi.” (Rom. 5: 1, 2).

Diktansakna ahih kei leh Pasian in a hong santheihna pen Zeisu sung bek pan mah ahih zia pen Paul in a thupuak guipi ahi hi. Banghang hiam cih leh, Dikkisak theihna i ngah theih bekna limlim in zong Topa mai ah i dintheihna dingin kicing mahmah khin hi. Tua thuman thu laigil tungtawn in Paul in, a kician zaw leh a tangzai zaw in a hong theisak nuam ahi hi. Abraham banga “midikte” te nagawn tungah Gupkhiatn angah theihna dingin gamtatna hang hi peuhmah lo in, Upmuanna hang a hih ngiat a kul zia hong lak khia hi. A beisa hun in, bangin mawhna piangsak, bang hangin tuahsiatna leh, sihna te thuak cih te hi ta leh, a bang ci bangin Zeisu sungah tua vai khempeuh veng thei hi cih leh, hih leitung mihing khempeuhte a dingin bang hong vaihawmsak cih te i telcian theihna dingin a beisa thupiangte tawh hong telkheh suk hi. 

 Mikhat ahi, Adam pukna tungtawn hangin, leitung mihing khempeuh te in mawhsak thukhenna thuakin, a kithehthang gamdang mi suakin, sihna ciang dong hong tun hi. A hi zongin mikhat ahi, Zeisu tungtawn panin gualzawhna i ngah kik thei a, leitung mi khempeuhte in Pasian mai ah khawlmun luah theihna i ngahkik thei hi. Zeisu sungah upmuanna tungtawn pan in, a kiciamteh a mawhna khempeuh uh leh, amawhna hangun a thuak dinguh dantatna khempeuh kiphiatsiang ta a, maisak siangna leh tawntung mawhmai na hong ngah thei ta uh hi.

Paul in Adam leh Topa Zeisu tehkaak kawm in, Khris in Adam gamtat khialhna khempeuh bang ci bangin ahong leptuah kiksak zia hong lak hi. Tua bek thamlo in, Adam mawhna hangin a puk mite a dingin Zeisu sungah Upmuanna tawh suahtak kikna a kingah theih zia hong lak hi. Hih thu khempeuh a kingakna bul pi in Khris’ Singlamteh phung bekmah hi a, eite aitang dingin ahong sihna hangin, mihing khempeuh ahi, Jew mite tungah hi ta leh, Gentile mite tungah Zeisu min tawh suahtakna angah theihna dingun lampi kihong bek tham lo in, tua Zeisu sisan hangin Amah a-um/a-sang mikhempeuh tungah diktansak theihna puak zo a hih zia a hong theisak nuam ahi hi.

Atak tak in zong hih thu bekmah a gengen huai thu hi a, i lam-etna khempeuh kingakna bulpi zong ahi hi.

NIMASANI (SUNDAY) November 5
UPMUANNA TAWH DIKTANSAKNA

Rom. 5:1-5 sim in. Hih sungah Paul in a gennop thupuak tomkaih dih in. Tua sung pan in nang a dingin bang la thei ding nahi hiam?

_______________________________________________________

“Diktansakna ah” a cihna in “diktanna ngah khinta” cihna ahi hi. (ei Zokam in, kipawl khinta ci ziau hi.- translator). Greek kammal sungah semkhin ta cih a khiatna nei hi. A cihnop na in, eite in diktan khinta hi ci in a pulaak khiatna (ahih kei leh), midik bangin ciamteh khin hi cihna hi a, amau te in a thukham khat peuhpeuh a zuihna hang uh hi lo in, Zeisu Khris a san’ man uh hi zaw hi.To Zeisu in hih Leitungah a picingin a nuntak dan mahin, a picing in thukham a zuihzaw dan mah in a nungta dingin hong aap khin zo hi.

A tua ci mah bangin, i mawhna khempeuh Zeisu tungah kiphuum khin ta ahih manin, Pasian in eite mawhna in tuat nawnlo in Zeisu’ in a palsat a mawhna bangin hong tuatsak ta hi. A hi ci bang thu hangin eite in eite tawh a kilawm mawhna daan pan in a suakta thei ihi hi. Tua mawhna daan khempeuh Zeisu Khris in eite ading in leh eite taang dingin Ama tungah a kingaksak khit ciangin eite in tua mawhna daan tawh kisai in cikmah hun in a thuak nawnlo dingin a hong bawl ahi hi. Mi mawhte a dingin hi kan a lungdamhuai/ minthan na/vangliatna om nawn mawk ding ahi hiam?

Rom. 5:3 sunga “glory (minthanna)” cih kammal a khiatna in Rom. 5:2 sunga “rejoice (lungdamna) cih tawh a khiatna a kibang ahi hi. A zenzen in Rom. 5:3 sungah “lungdamna” cih kammal na zang zaw bang hi leh, Rom. 5:2 leh Rom. 5:3 kikaal kizopna kitel siang zaw ding hi. (Ei Zokam in buaina om lo hi- Translator). Diktansakna angah khinte in haksat bawlsiatna athuak laitak nangawn un a lungdam veve thei dingte ahi uh hi. Bang hang hiam cih leh, amau te in amau upna leh muanna khempeuh Zeisu Khris sungah kinga khin uh ahih man ahi hi. Pasian in amaute tungah a hoihin sem veve ding hi cih kimuan na aneih  man uh zong ahi hi. Amau te in Zeisu Khris’ a dingin a thuakna te uh kipaak ngaihsut zaw lai ding uh hi. (1 Pet. 4:13).

Rom. 5:3-5 sunga a mainawt tohna te uh zong phawk bawl dih ni.

 1. Thuakzawhna (Patience): Greek lai in “hupomone” hi a akhiatna in, “kipkho bikbekna in do zawhna” ci hi. Hih thuakzawhna i cih in, khat veivei nuntakna khat sungah, haksat bawlsiatna a tuah khak ciangin a upna kemcing siam na leh, sitelna leh haksatna te nasia takin anawk khak hangin Khris sungah aneih a lam-etna te a beisak tuan lo te a cih nopna ahi hi.

2. Teci kilatsak na (Experience): Greek lai in, “dokime” cih hi a akhiatna in,” ahi ding bang liana lam-etna tungtawn a picin na” ahi hi. Tua in “a deih huai gamtat luhek anei te” cihna kawk hi. Tua a hih man in, haksat bawlsiatna leh sittel na mun te ah, a kipkho bikbek a thuakzawhna neihzawh na in a deihhuai zia leh tong kilang khia sak hi.

3. Lam-etna (Hope): A kipkho takin thuakzawhna anei mite leh a deihhuai gamtat luhek a nei te tungah lam-etna om thei bek hi. Tua lam-etna in Zeisu leh Ama sung beka om Gupkhiatna kamciam na sung bekah kimu thei hi. Eite in Zeisu sungah Upmuanna tawh i kibelh na ahi zongin, ki sikkik theihna leh thuman theihna i neih lai siah, eite in i lunggulh na khempeuh i lam-en thei ding hi.

Na nuntakna khempeuh sungah a dang na khempeuh sangin na lamet pen thu khatin bang ahi hiam? Tua na lam-et pen Zeisu sungah bang ci bangin picing sak thei ding na hi hiam? A hih kei leh, a picing thei mah ding a hi diam? A zenzen in a picing zo lo ding ahih leh tua tungtawn in lam-etna nei lua kha na hi ding hiam? 

NINIHNI (MONDAY) Novembner 6
MAWHNEI I HIH LAITAK MAH-IN

Rom. 5:6-8 sim in. Hih Laisiangtho mun in Pasian’ zia leh tong hong bang ci gen hiam? Tua te in eite a dingin bang hangin lam-etna a dim in om thei hiam?

_______________________________________________________

Adam leh Eve te in Pasian’ kalh a thukham te zumhuai takin leh maisak theihloh zah dingin hong palsat khit uh ciangin kilem kik theihna dingin Pasian in kalsuan masa pen hong semkhia hi. Tua hun a kipan in, Pasian in Gupkhiat theihna dingin lampi hong pankhia/duang pah a, mihing khempeuhte in tua sapna a sangthei dingin hong hong lam-en hi. Tua ci bangin “a hun a cin ciangin . . . amite a hong tankhia dingin Pasian in a Tapa hong paisak hi (Gal. 4:4).

Rom. 5:9 sungah, Pasian hehna hangin gimna panin, Zeisu hangin honkhiatna i ngah theih zia hong gen hi. Tua thu a khiatna eite in bang ci teltheih ding i hi hiam?

_______________________________________________________

Salsuahna Egypt gam pan in a paikhiat dinguh zan laitak in, Baang tungzawlah a kizuut sisan hangin Pasian hehna ahi Egypt tacil khempeuh vatlup na pan in, Israel mite in suahtakna hong ngah thei uh hi. Tua mah bangin, Zeisu Khris sisan in eite diktanna ngah thei tham lo in, nitawp hun ciangin Pasian’ hehna in mawhna a suksiat tak ciangin, tua sisan mahin amau te a dal/hu ding hi. 

Mi tampi tak te in telhak asak thu khatin, Itna Pasian in bang hangin hehna nei hiam cih thu ahi hi. A hi zongin i theih dingah, Amah in Itna a hong neih hang mahin Ama hehna zong a hong om thei ahi hi. Bang hang haim cih leh Leitung ahong it Pasian in, mawhna tungah heh lo in om thei mawk ding hiam? Topa in eite pen hong thusim lo in om thei lo ahih manin, hih Leitunga thupiangte hangin awlmawh lo in om thei lo hi. Ama piansak ngiat Leitungah mawhna in bang teng hihkhin hiam cih ahong en den ahi hi. Tua mawh bawlna hangin a hong piang gamtat hoihlohna te leh siatgawpna hangin, Pasian bang ci bangin hehlo in om thei mawk ding hiam?

I lungdam theihna dingin bang thu adang om lai hiam? (Rom. 5:10,11).
____________________________________________________________

Rom. 5:10 tawh kisai in Laisiangtho siamte in, Leitungah a hong om laitak in Khris’ nuntak zia te in, a picing zia leh tong tawh a hong sep sakna te hangin, tu in eite a dingin phattuam na a hong piang thei suak hi. Tua ci bangin a picing nuntakna tawh Khris in a hong gamtat hangin, a hong sih veve na hangin leh, nuntak tawntung theihna tawh a hong thokik hi (Heb. 7:25). Tua hong nuntak kikna hangin ei te in suahtakna a ngah thei ihi hi. Han sungah a om suak bang hi leh, i lam-etna te zong Amah tawh beimang khawm ding ahi hi. Tua ahih man in, Rom. 5:11 sungah, Topa sungah i lungdam mahmah na thu in, eite a dingin Zeisu in a hong sepsak na tungtawn hang’ ahi hi, ci hi.

NITHUMNI (TUESDAY) November 7
MAWHNA HANGIN SIHNA

Sihna in a tawpkhakna i gal ahi hi. Pasian in mihing innkuan a piansak tungin, a innkuan mibup un a nungta tawntung dingin geelna nei hi. Mi a tawm zaw (amau leh amau sih ding a ut te) simloh, mihingte in kisi nuam lo hi. Tua bangin a ki sisak nuamte in zong amau aituam a nasia mahmah gimna leh haksatna te thuak kawm khit ciang bek mahin si pan lai uh hi. Sihna i cih pen, eite a dingin a kigeel sa pianzia ding tawh ki lehbulh mahmah hi.Bang hang hiam cih leh, eite ahong kipiansak kipat ciil tungin a tawntungin a nungta dingin a hong kibawl ahi hi. Sihna i cih pen, i theih hetloh thu khat ahi hi.

Rom. 5: 12 sim in. Paul in bang thu hong gen hiam? Bang ci bangin hong hilhcian hiam?

_________________________________________________________________________________________________________________

Laisiangtho hilhcianna a gelhte in, amun dang Laisiangtho munte sangin, hih a tunga Laisiangtho mun tawh kisai in, a ngaihsutna te uh ki tukalh zaw hi. A hang’ a piangthei thukhat in, The SDA Bible Commentary, Vol. 6, p. 529 tungtawn pan in i et ciangin, tua Laisiangtho hilhcianna a gelhte in, “Paul in a ngimna dan hi lo zaw in, amau’ lunggulhna tawh kizui in, a a hanciam na uh tawh a deihkaihna man uh ahi hi” ci hi.

Amaute kinial theihna thu khat in: Bang ci bang lampi tawh Adam’ mawhna in, ama khanggui, tusawn tasawn tungah kilawh suk thei hiam cih ahi hi. Adam’ suan leh khak te in ama mawhna thaman in thuakpih mah uh a hi diam? A hih kei leh, amau te in amau’ aituam

mawhna hangin Pasian mai ah mawh hi cih theih ding bek mah ahi diam? Hih dotna khempeuh tawh kizui in, amau te in a tunga Laisiangtho mun tungtawn pan in, a khiatna kankhiat a sawm uh hi. A hi zongin hih thu te tawh kisai in Paul in a gennop buaina tawh a kisai kha kei hi. Paul lungsim ah a thudang buaina lianpi khat a om zaw hi. Ama in atungin agensa ahi, “Mi khempeuh amawh khin” (Rom. 3: 23) cih thu a bulphuh na hi zaw hi. Eite in

mimawh i hih lam i kitheih/ i kiciat mahmah kul hi. Tua bangin ki theihcian na bekin Gumpa kisam hi cih hong kitel sak thei bek ding hi. Hih laimun ah Paul in laisim mite ahong theihsak nop thu in, Adam mawhna hangin hih Leitungah siatna in bangzah takin hong tuam hiam cih thu ahi hi. Tua khit ciangin Adam mawhna hangin i Leitungin bang zahtakin khasiat huai dinmun tungkhin ta mah leh, i damkik theihna dingin, Zeisu tungtawn pan in Pasian in ahong piak damna thu mah hong lakkhia nuam zaw ahi hi.

A hi zongin hih Laisiangtho mun in, Adam hangin ahong piang sihna cih buaina thu bek a hong gen hi pan a, Zeisu sungah nuntakna tawh kisai, vai ven theihna thu a hong gennai kei hi. Lungdamna thupuakna tungtawn pan in, a thupi penpen thukhat in, sihna pen nuntakna in valhtum khin hi cih thu ahi hi. Topa Zeisu in hankhuk sungah sihna tawh kisai in, a guampi sung a hong nawksakna hangin, tua kihencipna khempeuh hong suutkhiatsak khin ta hi. Amah in, “A nungta mipa zong ka hi hi. Kei ka si ngei hi. Ahi zongin tu-in hong en in, a nungta tawntung kahi hi. Sihna leh misite omna gam keima khutnuai ahi uh hi” (Rev. 1: 18) ci hi. Bang hang hiam cih leh, Zeisu in vangliatna tawhtang nei ahih manin, galpa in sihna hangin hankhuk sunga om mite tungah ukzawhna/ gualzawhna a nei zo nawn kei hi.

A hong khasia sak thei Sihna hangin nangma nuntakna sungah bang ci bangin thuak kha ngei na hi hiam? Tua bangin hehpihna a nei ngiatlo i galpa tawh i kiphutna ah, hih Leitungin a hong piak theihloh, ahih kei leh, eite sangin a vanglian zaw Pa tungah bang hangin lametna neih huai zaw ahi hiam?

NILINI (WEDNESDAY) November 8
ADAM HUN PAN-IN MOSES HUN DONG

Rom. 5: 13, 14 sim in. Thukham tawh kisai in Paul in eite hong bang ci hilh hiam?

___________________________________________________________________________________

Hih Laisiangtho mun sungah Paul in bang thu a gennuam hi ding hiam? “Thukham a omma pekin” cih kammal leh, “Adam hun pan in Moses hun dong” cih kammal tegel a tonkhawm hilhel (paralleled) tuak ahi hi. Paul in a gennop thu in, Leitung piancil pan Sinai mual kikaal sunga, zuih dingin a kipia kingakna thukhun leh, Isreal te tunga zuih dingin kician takin apiak, Thukham Sawm a kipan, ngeina thukham khempeuhte hun sung teng kikaal ahuam nuam ahi hi.

“Thukham a omma pek” a cih ciangin Sinai mual tung pan in, Israel mite tungah a kipia, a tuamtuam Thukham khempeuh a zuihna dingun Pasian in a ngetna hun ciang dong a gennuam ahi hi. Sinai mual tun ma in zong mawhna na om khin zo hi. Bang hangin om lo zenzen ding? Amau a dingin, zuaukhemna, kithahna, nu leh pa mawhna, leh milim biakna te mawhna na hi nai tuan lo hiam? Ataktak in mawhna in ki ciamteh khin zo hi.

Sinai mual tun ma in, apongpi in mihingte tungah Pasian’ hopihna in, ki ciangtan mahmah lai phot hi. Thukham tawh kisai kipulak khiatna a om nai loh hangin, amau te in a kituak, a kilawm gamtat zia ding tawh kisai thei mahmah lel uh hi. Pasian’ pen a thuman ahih manin,

a kilawm lo pi in kuamah tungah thu a khen ngei kei hi. Sinai mual-ma a om mite a zong ana sihna thu uh, Paul in a gen nopna ah, Mi khempeuh tungah sihna tung hi, ci hi. Amau te tungah thukham tawh kisai in, mawh uh hi cih, a kician takin pulaak khiatna a om loh hangin, amau te in mawh veve ahih na uh kilang veve hi. Amau te adingin piansak nate tungtawn pan in, Pasian in a ompihna/ kipulaakna nei thei hi. A hi zongin amau te in tua hopihna te na thusim kha lo uh ahih man in mawhna sungah na lut veve uh hi. “Pasian in leitung a pian’ sak cila kipanin a kimu theilo ama pianzia ahi tawntung vanglianpa leh Pasian ahihna thute Ama’ bawlsa nate tung panin teltakin hong kilang hi. Tua ahih manin, “Thei kei ing,” ci-in paulap a zon’ theihna ding uh omlo hi (Rom. 1:20) naci hi.

Bang deihna tawh Pasian in, Thukham tungtawn pan in, kician takin amah leh amah ki pulaak se hiam? (Rom. 5: 20, 21).

____________________________________________________________________________________

Gamtat hoihna tawh kisai zuih dingte Sinai mual pan in, Pasian in apiak sungah Thukham Sawm ana pia hi. Ahi zongin tua Thukham Sawm in tua ma in a om khin zo hi. Laisiangtho tungtawn pan in i muh theih thu in, Tua Thukham te a kigelh kipatna leh, tangzai takin a kipulaak khiatna ahi hi.

Israel mite in, Pasian in hih dingin a sawl te tungtawn pan in, amau leh amau ahong ki sittel tak uh ciangun, amau te in kicing zolo ahih zia uh hong kimu khia mahmah uh hi. Kammal dang zang ding ci len’g amau te in, “langpanna” tawh a kidim te nahi uh hi. Amau te in amawhna bangzah takin lian uh hiam cih thakhat thu in hong kithei khia ta uh hi. Tua bangin Pasian in a theihsak nopna ahangin, amau te in, Gumpa a kisap zia uh a theihna ding uh ahi hi. Tua tungtawn pan in, Pasian in a khawnkhawngin a piak ama hehpihna a san theihna dingun, a hei nop man ahi hi. A tung kipat pek pan in i bulphuh mahmah ahi, Laisiangtho Lui bu sunga Upmuanna i cih pen, Thukham zuihna hang hi dek lo hi.

Na Gam ki-ukna thukhun te in, mihing te a dingin a khial leh a maan ki theihtelna ahih zia bang ci bangin kilang thei hiam? Mihing te’ thukhun ciangciangin zong thuman a ding ahih leh, Pasian Thukham te in hi zaw kan lai mawk lo ding hiam?

NANGANI (THURSDAY) November 9
ZEISU, ADAM NIHNA

“Tua hi a, khialhna khat in mi khempeuh tungah thukhenna tungsak ahih mah bangin gamtatna hoih khat mah in mi khempeuh khahin nungtasak hi. Mi khat in thu a man’loh manin mi tampi mimawh a suahsak mah bangin mi khat in thu a man’na hangin mi tampi in

Pasian tawh kipawl theihna a ngah ding uh ahi hi (Rom. 5:18,19). Hih Laisiangtho mun pan in eite a ding’ aki banglo tehkak ding bang om ahi hiam? Zeisu sungah bang lam-etna hong guan ahi hiam?

_______________________________________________________

Mihing i hihna tungtawn pan in, eite in Adam tungtawn pan in sihna dantatna cih loh bangmah i konlawh kha kei hi. A hi zongin Zeisu in, Adam kiatna munphual pan in hong kantan khiat pih in, mihingte aitang dingin ze-et sittelna khempeuh a hong thuak sak hi. Amah in a zumhuai Adam’ kiatna leh a tangtun lohna mun ah hong honkhia hi. Tua a hih manin, eite aitanga om dingin a hong dinna tungtawn pan in, ei te in Pasian tawh a kilem kik thei/ noptuamna a ngah kik thei te ihi hi. Tua ahih manin, Zeisu in, Adam nihna a kici ahi hi.

“Adam nihna ahih leh, eite aitanga ding zia leh tong a picing khat a hih man in, Ama sepkhiat khempeuh tungah tavuan ala zo ding pa ahi hi. I kiim leh i paamte ah siat theihna a tuamtuam, lampial theihna a tuamtuam te in hong huzap mah ta leh, Amah in Adam masa sangin nuntak siangtho a nungta dingin aituam deihsakna a ngah zong hi tuan lo hi. Mawhni te tawh omkhopna lak mah ah, mawhtheihna ding ze-etna te Amah in a nang zoa, ama sianthona a keem cing thei hi. Amah in a tawntungin mawhna a bawl ngei kei hi.”- Ellen G. White, The SDA Bible Commentary, Vol. 6, p. 1074.

Rom. 5:15-19 sung tungtawn pan in, Adam leh Khris a sepkhiatna uh tawh kisai in, a kilamdan na uh bang ci bangte hiam?

_______________________________________________________

Hih a nuai a thu te ah a ki lehngat thu te en dih in: Sihna leh nuntakna, thumanlohna leh thumanna, mawhsakna leh diktan theihna, mawhna leh dikkisak theihna. Zeisu a hong kilatna hangin, Adam khialhna khempeuh hong sukmai sak hi.

A lamdang thu khatah, Rom. 5: 15 -17 sung bekbek ah, “letsong” cih kammal nga vei bang kidawk hi. (Zokam in a neu 17 na sungah kidawk lo ahih manin, 4 vei cih theih hi - translator). A cih nopna in, Diktan theihna i cih pen thalawh theih hi lo a, a hong kipia khong letsong ngiat ahi hi cihna hi. Eite in kilawm kituak i hih manin i ngah a hih loh zia leh, i hoihna citna te’ hangin a hong kipia ahih loh zia kilang hi. A dang atuamtuam letsong te ahih leh bel laktheih ngah thei hi ziau na pi in, hih tungtang ah bel hi a hong kipia letsong pen, Upmuanna tawh ngetna tungtawn pan in a kingah thei bek ahi hi.

A khawnkhongin a ngahngei khempeuh sung panin bang letsong hoih sa pen nahi hiam? Bang hangin hoih sa pen, thupi sa pen nahi hiam? Nangma thalawhna tungtawn pan in hi lo napi in, amawkna in na ngah tua letsong bang hangin lungkimhuai sa veve thei nahi hiam? Tua thupi na sak letsong leh, Zeisu tungtawn pan in na ngah te tawh bang ci bangin tehkaak thei ding na hi hiam?

KIGINNI (FRIDAY) November 10

SINBEH DING: “Mi tampi tak te in, amau lungsim ngaihsutna te tawh kizui in kheemsa in om khin uh hi. Pianpih lungsim in na khempeuh lak pan in a khemhat pen ahih zia phawk kha lo in, a gilo ngongtat mahmah thei a hih zia zong a thei kei uh hi. Amau te in amau leh

amau dikki tansak tawmna tawh ki tunbawl uh a, amau te zia le tong in a ciangtan uh picinna ciang khat tung khin kisa uh ahih man un ki lungkim sak mahmah uh hi.” - Ellen G. White: Selected Message, book 1, p. 320.

Khris bek mah in i kitangsap pen ahih zia leh, Ama tung bekah lam-etna leh Gupkhiatna om ahih zia i genkhia tawntung ding hi. Eite in i thugui let ahi, Upmuanna bek mah tawh Diktan theihna ngah i hih zia i genkhiat nak leh..., a dangtak khualzin pa tungah tui a kipiak dan mah bangin, tua thu in mi tampi te kiangah tung thei ding hi. Eite in i kilawm kituakna hang tawh hi lo in, Pasian kiang pan in letsong a hi Khris’ diktanna in eite sungah hong om ding ahih manin, a manpha ngaihsut theihna ahi hi. - p. 360.

“A nung ciangin a hong pai lai ding mipa’ lim ahi hi a cih in kua hi ding hiam?(Rom. 5: 14). A koi ci bangin Adam in Khris lim’ pua thei hiam. Adam hangin a suan leh akhak te in a kikham singgah a nei loh uh hangin sihna sungah lut veve uh hi. Tua ahih manin, Khris in Ama sunga om mite khempeuh in dikna aneih loh uh hangun, Singlamteh tungtawn pan in kimuan theihna a om theihna dingin, dikkitan sakna a pia khia ahi hi. Adam lim’ ahi mawhnopna in i sungah hong om ahih manin, eite in Adam mah bangin mawhna i bawlkhakna hangin tua thaman tawh a si ding ihi hi. A hi zongin Khris lim’ ahi nuntakna in eite sungah a hong om tak ciangin, Ama dikna a kicinna tungtawn pan in, eite in zong dikkisak theihna kicing takin a ngah thei ihi hi.” - Martin Luther, Commentary on Romans, pp. 96, 97.

KIKUP DINGTE: 

1. Sihna tawh kisai ngaihsun dih in. Nuntakna sungah bang zah in thupi hiam? Mi pil misiam tampi tak te in, nuntakna i cih pen a mawkna ahih zia lim gen mahmah uh hi, bang hang hiam cih leh a tawpna ah sihna tawh a tawp man ahi hi. A hi zongin ei Christian te in bang ci bangin dawng kik ding ihi hiam? Nuntakna in bang mah kimanna nei kei phial zongin Zeisu sungah lametna bang hangin nei thei ihi hiam?

2. Adam khialhna hangin, Leitungah siatna vive hong tung hi. Upmuanna tawh Zeisu i san ciangin nuntak tawntung theihna kamciam a ngahte ihi hi. Ahi zongin bang te in mite amau leh amau kimuan na tawh maipha ngah sawm mawk uh ahi hiam? Bang ci bangin Khris a hong kipiakna leh Ama hong sepsak na te tungtawn ah, amau te teltheih dingin bang ci bangin huh thei ding ihi hiam?