MCS Vol 01, Issue 08: JESU' NASEPTE

Thupatna: Kum sawmthum aphak dong Nazareth khua ah Jesu hong om hi. Tua hun sungteng Lai Siangtho sungah tampi a kiciapteh loh hangin, Jesu pen a thumang naupang khat a hihna, le nasep a hanciam khangno khat ahih lam i thei hi. Tangpi laka na asep hun kum thum le alang sung bek ahih hangin, tua hun tomcik sungin tangthu a lumlet zo dingin Ama'n na hong sem a, mawhna pana mite a suahtak nading lampi hong bawlin, Satan mahmah a kisuksiatna ding lampi zong hong bawl hi.

1. Bang gamtatna, bang tangkona tawh Jesu a nasep hong kipan hiam? (Mark 1:9-11)

Theih ding: Ki baptiz-na in mawhna kisikkikna lim ahi hi. Jesu in mawhna a neih loh hangin, Ama thu a zuite' etteh dingin Amah in hih ngeina hong zui hi. Van pana Pasian' awging in, Jesu, Pasian ahih lam ahong tangko ahi hi.

2. Jesu in tangpi' lakah na koici sep hi-am? (Matthew 4:23)

Theih ding: Jesu in lungsim, pumpi le kha damsak hi.

3. Jesu in Ama nasep atom in koici gen hiam? (Luke 19:10)

Theih ding: Jesu in thu a hilhna le natna a damsakna ah, Pasian in mihingte ahong itna hong lak a, Satan' gam nusia-a Pasian' gam a zuan dingin mite ahong sam ahi hi.

4. Jesu in thu a hilh ciangin bangci hilh hiam? (Matthew 13:34)

Theih ding: Jesu' thugen a ngaite atam zaw mizawng le lai theilo khawng hizaw hi. Gentehna thu tuamtuam a zatna panin amaute in Jesu' gen kha lam thute telnop sa-in ciapteh nop sa uh hi.

5. Mi' lungsim a sukha mahmah Jesu' gentehna thunihte bang hiam? (Luke 15:3-7,11-24).

Theih ding: Amah a thei lote le Ama kiang pana a gam-mangte Pasian in lungsim takpi tawh a zonna, hih gentehna thute khat in hong lak hi. Gentehna adang khat in, Ama ki-ang a zuante Pasian in lungdam taka a sanna hong lak hi. Pasian tawh lo-a a om mite a cihmawh dan uh leh a lungkham huai dan uh hih gentehna nihte in hong hilh hi.

6. Jesu' minthanna in bang ciang dong zel hiam? (Matthew 4:24.25).

Theih ding: Mi tampi in a theih hangin, Jesu taktak khual gamlapi zin ngei lo hi. Laibu khat zong gelh ngei lo hi. Ama tunga kibaang puante longal neih le lam bangmah nei lo hi.

7. Jesu in Ama thugen a ngaite' tungah bang lungsim nei hiam? (Matthew 14:14).

Theih ding: Mi khempeuh a hehpihna lungsim in van panin lei tungah Jesu paisuk sak hi.

8. Jesu' kammalte in bangzahin mui bun hiam? (John 3:34; Mark 1:22).

Theih ding: Ama hun lai-a biakna makaite bangin tangpi' mai-ah Jesu Amah le Amah kitawisang lo hi. Dam tak, le kician takin Pasian' itna gen zaw hi. Ama thugen a ngaite' lungsim sungah Ama kammalte Pasian' Kha in thun hi.

9. Jesu tawh kisai-in gam makaite in bang gen uh hi-am? (John 11:47,48).

Theih ding: Tua mite in Jesu a minthanna a hazat uh hangin, A bawl na-lamdangte nial thei lo uh hi.

10. Jesu in bang na-lamdang khawng bawl hiam? (Matthew 11:4,5).

Theih ding: Mite in minthanna a ngahna dingin na-lamdang abawl uh hangin, midangte in gentheihna pan noptuamna a ngahna ding ahih kei ngal leh Jesu in Ama vangliatna zang khia lo hi.

11. Bang na-lamdang tawh Jesu in leitunga a nasepna taltang sak hiam? (John 11:43,44).

Theih ding: Jesu in mi sisa ahin kik sakna hih bek hi lo hi. Ahi zongin hih in a kilangtangpen hi-a tangpi' lak a a nasep a zawh kuan a asep zong ahi hi. (Matthew 9:18, 23-25; Luke 7:11-15).

12. Bang hangin Lai Siangtho sungah, Jesu bawl na-lamdangte kiciamteh se hiam? (John 20:30, 31).

Theih ding: Christ in abawl na-lamdangte in Amah Pasian a hihna ahong lak bek hi lo-in, Ama zia-le-tong, le mihing khempeuh in athuak gimna le gentheihna zong hong lunghimawh ahih lam hong lak hi.

Thukhupna: John in, Jesu' nasepte le thuhilhte khempeuh ciamteh ni ci le'ng, leitungah laibu ta zo lo ding hi, ci hi (John 21:25). Tu-a i sinna teng zong Jesu' nasep teng a hong gen kim zo hi dek lo-a, a hiau tawm khat i theih na'ng hi bek hi. Jesu' nasep in itna lahkhiatna hi-a, eite in Lai Siangtho sung pan a nasepte i sim ciangin tua itna in i lungsim hong su kha mahmah hi. Lungdamna Thubu teng a diakdiakin sim ni, sim zelzel ni.

DONA LINGLING

(a) Dona lingling, Dona lingling e,

Gual in kum khua, dona lingling, dona lingling e.

(b) Gual in kum khua dona lingling e,

Dohan ah nau bang va kap tang, bang vakap tang e.

(a) Tukawl tawi kum khua ih khenna

Ningzukhum le aiisa aw e.

(b) Ningzukhum le aiisa aw ,

Khan kum sawt ciam lai leng aw e.

Phuak: Zogam Lalpu

CIDAMNA THU

Temperance (Kidek Kidamna): Ahoih nate ahoih bek a zat theihna le ahoih lo nate pelhna in ciim kilkelna hi a, zatsiam ding haksa kisa mahmah lai hi. Kidek kidamna in lei ahih keh thalawh theih hi a, ahi zongin Galati 5:22,23 sunga Kha Siangtho gah ahi Pasian hong piakkhongte in thupi zaw mahmah lai hi.

I pumpi gihna zong kepcing ding kisam a, annek tuidawn zong kidek kidam kul mahmah hi. Pumpi thatang-sanna nisim in ngeina neih ding zong thupi mahmah hi. I Cor. 3:16,17 sungah, “Note in Pasian biakinnpi nahi uh a, note sungah Pasian Kha a ten lam theilo na hi uh hiam? Mikhat peuh in Pasian biakinnpi anit sak leh Pasian in tua mi a susia ding hi” ci hi.

Eite in koi bangin pumpi susia ie hiam? Guihtheih khamtheih le an siangtho lote nekna dawnna tawh i susia thei hi. (Pro. 23:29-33, Lev. 11, Eccles 10: 16,17 sim in). EG White laigelhna sungah, “Aval lua khempeuh mawhna hi” ci hi. Gentehna in, antam nekluatna, sawt ih-mut luatna, tam dawn luatna, tam sim luatna, na sep luatna etc. Hoih mahmah taleh alua pen hoihlo bek lo in, mawh-na hi, na ci mawk ahih manin alua limlim kidop huai aa, ahoih bek a i zat theih ding hanciam ciat ni. ✍ Sianu Aye Cing

KHUADO PAWI

Zomite a dingin pawi thupi pen khat hi a, anlak khit cianga kibawl ahih manin anlak pawi zong kici thei hi. Tua ban-ah kum khen pawi in zong kingaihsun hi. Zomite a dingin kumkhen pawi ahihna a nuai a Khuado la in hong kiciansak hi.

(a) Lummei hong kai ciiciai e khua van nuai ah, tuuk le khal kidan nading aw e,

(b) Tuuk le khal kidan nading lummei hong kai, khu van theng leh khua dai lawm aw e.

Nidang in kawlgam ah sum kum (budget year) zong hih ih Khuado Pawi hunin kikhen hi. Hih khuado pawi pen khuado kha (October) in kibawl hi. Nidangin Kawl-gam ah Budget year bei hun pen September kha hi in October kha pen Budget kum thak in kizang hi. 1972 kum ciang hih Budget year kizang hi.

Zomite in pawi lian nih ih neihna ah Khuado pawi pen nop a kisa pen khat ahi hi. Lawm Annek pawi-in dawite khua siam dingin kisam a Khuado pawi ciangin dawi le kau kihawl khia leuleu hi. Khuado pawipi ni-in Zam, Khuang, Daaktal aging thei khempeuh tumin kilaam a, zan tawntung kilaam in nuam kisam mahmah hi. Zingsang khuavak ciangin dawi hawlkhiatna kinei hi. Dawi hawlkhiatna la a nuai aa bang ahi hi:

(a) Kum kikhen a, solkha dang e, ziin in vangkhua zong hen aw;

(b) Ziin in vangkhua lam zong hen aw, Siansung tui bang siang hen aw.

Nidang hunin ihpu ihpate’n dawi bia zel, Pasian na muang zel uh hi. Dawibia uh hi napi Khuado pawi ciangin, innsung innpua ah dawi hawlkhiatna nei-in ki awng ziahziah a khuasung zong dawi hawlkhiatna, khua siansuahna kinei hi.

Khuado bawl sungin a nuai a gualnop bawl sepnate kinei hi.

(i) Khuai laak:- Khuado pawi cianga hal dingin gam lakah khuai kila hi. Tua khuai kilate sawm’ omna munah kisuang (kikhawi) hi. Tua banga kila khuai namte in tunpi, ngalthen, ngaltun, khuaithum, zanta cihte ahi hi. Khuai a kilak ciangin, a kihawisa khuai, zanin gamlak ah va kila a, khuaila a pai sawm tangval khempeuh in meilah ken ciat de uh hi. A pai khempeuh in khau zang khat zawngin len dim-diam uh hi. Khuai a kilak hun pen Tang kha, Phal kha (August, September) sung bang hi thei zawdeuh hi. Khuado ven ciangin khuai kihal a khuado pawi bawlna mun, innteekte khuai ki ai-sak a zunun pawi nam khat mah ahi hi.

(ii) Mual hah:- Nidang hunin mual kinei ciat a Khuadopi ni-in sawm’ tangval le naupangteng mual hah dingin pai uh hi. Mual hah dingin apai khempeuh in daaktal neih zahzah kengin khatkhat in kizui in pai uh a, daaktal tum kawm uh hi. Mualsuang le mual phuhna kimteng hahsiang uh hi. Ref: Zomite’ Zia, Zat leh Kam Hau Upadi, pp 13-14.

COOLIDGE HANSANNA

Palikte in America a state lian khat vatmai dingin a khensat lai un Calvin Coolidge pen tua state ukpipa ahi hi. Palikte a susia dingin a pai sim in mipi gamlumna le buluh-na hong om zel hi. Coolidge in, “kua in ahi a, banghun banghun ahi a, bangmun bangmun ahi zongin mipi ngaihmuanna a susia dingin thuneihna khat zong om lo hi. Amah in mipi huut nadingin National Guard ka sam ding hi,” ci hi. Palikte lak pan khat in, “National Guard sam in nong nawngkai sak leh, kong susia ding uh hi. Na maimang ding hi,” ci hi.

Coolidge in palikte mitsal in, “phamawh lo hi,” ci hi. Ama a ding in mite ngaihmuanna in a nuntak zonna nasep sang in thupisa zaw hi.

Tua zan in Coolidge in a pa kiangah laikhak at in, “ka gamvai nasep ka tan ding lam ka thei hi; ahih zongin a maan ka sep kul hi,” ci hi.

Palikte a susia in kipan hi. Coolidge in thukhun akem cing ding in National Guard sam hi. Gam sung mun tuam tuam a thuthangte ah ama hangsanna lai malgol in kigelh hi. Mite in a ma hangsanna zahtak uh hi. Kum tawmvei khit ciangin America kumpi suak hi. Ref: Building A Better Cambodia

Volume 01 Issue 08 by DavidLian on Scribd