FSS Lesson 4: ZUMNAK THAWNGIH THIAM CONAK

ZIRLAI 4 October 21-27

ZUMNAK THAWNGIH THIAM CONAK

SABAT TLAI LAM: October 21

TUZARH SIAR DING: Rom 3:19-28.

BIBLE CANG KEN: “Curuangah daan thlunnak si loin minung cu zumnak thawngin Pathian in thiam a coter timi hi kan thunetnak a si” (Rom 3:28).

HIMI zirlai hi Rome cabu ih a tumtah mi a thu hrampi kan thleng. Khami thutak sunglawi ruangah zumnak thawngih thiam cotermi kan si. Thutak tampi hnakin Protestant pawlih remthatnak a thlengtertu a si. A sim mipawl kha a kalhzawng a si ko nan, Rome cabu ih himi zumnak hi hlanlai kum 1520 hrawngih Pope Leo in Luther le a thu zirhmi kha Pope thuneihnak in mawh a pek lai khalah pakhatte hman a thleng lo. Luther in himi thuzirhnak hi milai mithmai zohin pakhatte hman ka zirh lo ding. Zumnak thawngih thiamconak hi a si tiih ca a suahmi kha Pope in meisa in a ur. 

Himi catlang hi thukham sirhsan ih langtermi a si.  Daan buarmi cu daan ih thuthennak hmai ah a thleng dingih, a sualnak ruangah thihdan pek a si ding. Asinan ai-awhtu midang a ra ih daan bawhsia pa ih sualnak cu amai parah a suangih sualnak a tuahtu cu mithiang ah a cang. Ai-awhtu a pom ruangah a tu-ah thuthentui hmai ah a ding thei. Cumi cun a sualnak a thian lawng si loin zung a thlentertu sualnak kha ziangtik hmanah a tuah nawn lo. Ai-awhtui ruangah sual leiba cazin sungah mi famkim a si zo. Sual ngaithiamnak ruangah misual cu thukhaam thlun famkimtu ah phuan a si.

Rundam khawkhannak ah kan zaten misual kan sit heh. Kan ai-awhtu Jesuh kha a thu ngannak cabu ah mi famkim a si. Cule amah in thuthennak hmaiah kanmah ai-awh in a ding. Kan palhnak ah amah Jesui dingfelnak kha pomsak kan si ih miding ah in cohlang. Cuticun Pathian hmaiah thiamcoter kan si. Cumi cu kan tuah tuanmi ruangah si loin, Jesui ruangah a si. Zumnak in cumi kan pom tikah amai dingfelnak kha kan dingfelnak ah in pomsaknak thu reltlang uh. Khami hnakih a thami le a thar nan hmu lo ding.

THAWHSAL NI October 22

DAAN IH TUAHMI

Rom 3:19-20 siar aw. Paul in thukhaam thu ziangso a sim? Daan ih tuahmi ziangso a si? A tuah thei lomi teh ziangso a sim. Himi thu theihfiang hi Khrihfa hrangah ziangah so a poimawh. 

Judah-pawl in an theihfel zetmi thukhaam thupawl kha amai sanlai ih a theihdan in kau zetin a sim. Hebru tongih Torah timi daan thuih a fehpidan hi Pathian amah rori ih zirhmi Mosi cabu (5) le Thlung Hlun cabu an si tiah tuisan Judah miphunpawl khalin an pom. A ding le a thami ziaza ih thlun dingmi daan le thuthennak dan tuahtupawl ih an tuahmi kha a fiangter. Cule raithawinak daan khal a zirhmi sungah a tel thotho. Curuangah daan thu ti tikah Judah miphun ih sakhuanak le nunphung a si tiah ruah mai hi a ol zet.

Daan hnuai timi ih a sullam cu – Thuthensak tul tinak a si. Pathian hmaiah milai tontaihnak le sualnak hi daan in a langter. Thukhaam in sualnak a hloter thei lo. Misual kha a sualnak ruangah remnak tuahsaktu hawl dingin a hruai.

Rome cabu ih Judah daanpawl hikan sanih hmanding ah a tulnak a um nawn lo. A ding le a  tha mi nun ziaza ih thlun mi daan hi a hleice ih kan ruah dingmi a si. Himi thukhaam in rundamnak in pe thei lo ih, Judah sakhuanak daanpawl tla cu santlaihnak a nei nawn lo.  A ding le a tha mi nun ziaza ih thlun ding mi dan hi misual rundamnak dingih tuahmi a si lo. Himi ngan mipawl hi Pathian ziaza a langter ih Pathian ziaza kan bang thei lonak hmun tarlangtu ih pekmi a si.

Daan timi dingfel thatnak ziaza daan, raithawinak daan, ram ukawknak daan, a dangdang a tampipawl, kan  thlun ruangah Pathian hmai ah mi dingfel ah in tuah thei lo. Daan thu ih a tumtah mi a si lo. Kan famkim lonak in kawhhmuhtu le Jesui hnen feh kan tulnak in theihtertu dingah in pekmi a si.

Natnak umdan a langmi in damnak in pek thei lo vekin, daan thlunnak in rundamnak in pe thei lo. Natnak ih a umdan a langmi in dam dingih tuamhlawm a tulnak a langter. Daan in sual a langter ve ih misual thianfaitulnak a langter mi in thiangfaitertu in panter. Daan thlun na zuamnak ah ziangtluk ih hlawhtlinnak so na ngah. Cumi ih a phi na ngahmi in daan thlunih rundam ngah tumnak ih a thathnem lonak ziangso a lo sim?

TLAWNGKAI NIKHAT October 23PATHIAN IH DINGFELNAK

A tu ahcun daan tel loin Pathian in a dingfelnak a phuang lang zo. Cucu daan thu le Profet ih nganmi thupawl in an theihpi (Rom 3:21). Himi Bible cangih a sullam ziangtin so kan theih thei ding? 

Himi dingfelnak thar hi daan thuih dingfelnak thawn zohthim sehla Judahpawl ih dingfelnak an timi kha kan theifiang ko ding. Dingfelnak thar kan timi hi Pathian dingfelnak a si. Pathian hnen ihsin a raih, Pathian pekmi a si. Cucu Pathian cohlan tlak dingfelnak umsun a si. Himi dingfelnak hi Jesuh in leitlun ih hringnun a hman laiah a nunih a tuahmi a si. Cui dingfelnak cu zumnak in ka ta a si tiah a pom . Cuvek in kannih khalin a lakih in pek mi dingfelnak kha ka ta a si tiah zumnak in kan pom ih kan phuang ding asi. An hlawhman ih pekmi a si lo. Zangfahnak ruangih pekmi laksawng a si. 

Thukhaam daan thu a um mi vekin nun zia ah a langmi kha dingfelnak kan ti. Daan in dingfel dingah in fial. Cumi cu misual in dan thu vekin leiba a si. Asinan cumi cu a famkim ih tuah dingah in tuahsak theimi a nei lo. Cumi dingfelnak thleng thei dingah lamzin umsun cu kan zumnak lawng a si. Cumi Khrih ih dingfelnak kan zumnak in Pathian hnenah in thlenpi. Zawnlung zetih Bawi Jesui thu a thluntupawl kha Pathian in a pom. Jesuh Khrih dingfelnak kha misual ih famkim lonak hmunah in pomsak ih Pathian ngaithiam mi, thiamcoter mi sual sirmi, zumnak nun neitu, midingfel ah in tuah. Cumi cu Pathian in a fapa neihsun a duhdawt vekih a duhdawtmi an si. E.G. White, Selected Messages book. 1. P. 367.

Himi a sunglawi zetmi thutak hi na hrangih napom thei dingah ziangtin so na zir ding? Jesuh kha rinhlelh ding um loin himi ah a ngan. Jesui parah na zumnak retaw. Khrihfa nun zingzoinak ah, kan thluak theinak ih kan pommi hnakin a tam sawn. Jesui nunnak thu le a thihnak thu tla kan theihthiam mi hnakih fiang sawnin theih thei a si. Aamahkhantu ah le a Bawipa ah a pom ding. A nun lamtluan Jesui nun cawng dingah a hril ding. A zumnak ruangah Jesuh rinsan in thukham thu a um mi vekin a nun a hmang ding.

TLAWNGKAI NIHNIH October 24A ZANGFAHNAK IN

Daan thu tampi ih kan zir zo mi kha hminsin aw. Daan in a tuah thei lomi ziangso a si? Rom 3:24 siar aw. Paul ih a simmi ziangso a si? Jesuh hnen ihsin rundamnak kan ngah timi a sullam ziangso a si?

Thiam coternak himi Bible cangih kan hmuhmi ih pomdan ziangvek so a si. Grik tongah cun “dikaioo” ti a si ih “Thiamcoter” tiah an letling. A sawh duhmi ngaingai cu ‘midingfel ih tuah’ (or) midingfel ih phuannak (or) miding felih pom tinak a si. Himi tong a suahnak hrampi hi “dikaiosune” timi in a raih, dingfel thianghlimnak timi le “dikaioma” dingfel thianghlim tulnak a si. Curuangah thiamcoternak le dingfel thianghlimnak hi an karlak a nai-aw zetih pehzomaw mi an si. Himi pehzomawknak hi phun tampi ih lehlin a si dah lo. Thiam coter kan si ahcun midingfel tiah Pathian ih phuansak timi a si.

Himi thiam coter hlanah cun miding lo a si ko. Pathian cohlan lomi (pom lo mi) a si ko. Thiam coter a si hnu ahcun midingfel sinak a nei ih Pathian pom mi ah a cang.

Himi thil umdan hi Pathian zangfahnak lawng a si ih, zangfahnak hi duhsaknak (or) ngaihsakhlawhnak timi a si. Misual in a rundamnak ding hrangah Pathian a pan ahcun cuih milai cu miding tiih phuan theinak dingah ruahnak nei dingin zangfahnak in hna a tuansak. Himi hi thatnak nei lo cingih duhsaknak a si. Zumtupawl thiam coternak kha thatnak tel loin pekmi a si. Bawmtu nei lo rethei vansang a sinak Pathian hmai ah amah rori in a sual phuanawknak a si. Milai in Jesuh Khrih ih tlennak ruangah thiam coter mi kan si. Cuih tlennak cu kanmah ai-awh in a nunnak a pekmi ih aamahkhan mi kan si.

Rome cabu sungih thiam coternak ih a langter mi cu thil ziangkim ah tuanvo a lak thehnak a si. Can khatah hnonmi misual le zohman ih cohlan lo mi a si ding. Cuih hnuah thiam coternak ruangah ngaihsak mi cohlan mi le midingfel thianghlim ah pom a si. Jesuh Khrih ah a pumhlum a peawtu a si ahcun a umdan cu hlanih thil a tuahmi hmuahhmuah ah thiam a co tinak a si. Rom 5:1 ih thiam conak kha a taktak ih conak a si.

Thiam co zomi kha a tluksal a si ahcun Bawi Khrih hnenah a kirsal thei ih thiam coter sal thotho a si. Cumi cu nitin tonnun ih a um dingmi lung thlenghsalnak hrimhrim a si ih a tharin nitin thiam cotersal a si. 

A sunglawi zetmi rundamnak thuthangtha pom thei lo dingih kaihhngetmi ziangso na nei? Pathian ih a lo pekmi thukamnak le nahrang a nun a hlannak hmuahhmuah ah khan nangmai nunah khoh zetih na kaihmi ziangpawl so a um? Pathian thukam ngah thei lo dingah ziangin so lo kham.

TLAWNGKAI NITHUM October 25KHRIH IH DINGFEL THIANGHLIMNAK

Rom 3:25 sungah Paul in rundamnak thuthangtha hrilhfiahnak thasawnmi a tuah. Thinlung damnak tongkam a hmang theu. Grik tongin “hilasterion” timi ‘zangfahnak tohkham’ Hebru 9:5 tiah Thlung Thar sungah himi lawng a lang. Rom 3:25 sungih a hmanmi thiam coternak le rundamnak tiih a nganmi kha Jesuh Khrih hnen ihsin a si ih, khihhmuhnak le ai-awhnak hnatuan zangfahnak tohkham umnak puan biakinn hnatuannak pawl ai-awh in lungdaih hnangamternak hmuahhmuah a takih famkimtertu a si. Khami kha thawiawknak ih a thihnak a khihhmuh mi a si ih, a aiawh in lungdaih hnangamnak a rak tuahmipawl hmuahhmuah kha Jesui a tuahsuak mi rundamnak a si. A tawi zawngih sim cun rundamnak ih kan tulmi in tuahsaknak a si.

Bible cangih a simmi tla sual thlahnak thu a si. Kan sualnak in Pathian ih pom thei lomi ah in tuah. Asinan sual ngaihthiamnak dingih a luangmi Jesui thisen zumnak thawngin rundamnak lampi Pathian in in tuahsak. Sual thlahnak hi Grik tongin ‘Paresis” ti a si ih, a sullam ngaingai cu ‘Lantak’ (or) ‘tantami’ tinak a si. “Passing over” ‘sualnak ruahsak nawn lo’ (or) theihsak nawn lo tinak a si. Ziangahtile Jesui thihnak in mi hmuahhmuah leiba a kuansak theh ruangah Pathian in sualnak a hngilhsak theh. Curuangah a thisen a zumtu hmuahhmuah Jesuh an hrangih a thih zo ruangah an sual thlahsaknak an ngah (I Korin 15:3).

Rom 3:26,27 siar aw. Paul ih a tarlang duhmi ziangso a si?

Kan tuah tuanmi le kan thatnak um loin Jesui in tuahsak mi zumnak ruangah Pathian dingfel thianghlim-nak ngah dingin mi hmuahhmuah hnenah Paul in a ngai duhtui hnenah sim dingah a hiar zet. 

Kalvary Cross ruangah misual kha Pathian in midingfel ah a phuangih lei le van hmai ah cohlantlak mitha le miding ih pom a si. Cungnungbik Pathian ih tuah- mi raithawinak kha Setan in Pathian soisel ngam lonak a si. Setan in Pathian a dodalnak kha milaipawl ih dilmi hmuahhmuah Pathian hnakin amah ih pekmi sawn vekin a sim. Cuih a simmi cu Cross in a hnong a si. Setan ih ruahmi cu sual an tuah zo hnu ahcun leilungpi hi Pathian in a siatsuah theh ding tiah a beisei. Pathian in leilungpi siatsuah loin a fapa a run thlah ih a rundam sawn. Pathian ih ziaza thu himi in ziangso in sim? Pathian ziaza kan theihmi in ziangvek ih nung ding kan sinak thu ziangtin so in sim. 

TLAWNGKAI NILI October 26

DAAN THIL TINAK A TEL LO

Daan thil tinak tel lo zumnak ruangin minung cu Pathian in thiam a coter ti mi hi kan thunetnak a si (Rom 3:28). Rundamnak in tuahsak thei lo ruangah daan thlun a tul lo tiih a sim duhnak a si maw? A phi na ngah mi hrilhfiahaw.

Rom 3:28 sung thu hi Paul in fimnak sang le mithiam a sinak ihsin Judah sakhua ih thil umdan thawn pehparin a sim. Judah-pawl cun tha zet le ralring zetin khami daan tangih feh an tum rero. Zokhal siseh Jesuh kha Messiah a si tiah a pom lotu cu thiam coter thei a si lo. Rom 3:28 hi Paul in daan thiltinak tel lo zumnak thawngih thil ummi kha uar zetin thunetnak a tuah. Zokhal in amai tuah that ruangih thiam conak a ngah ahcun a porhawk ding a um thei. Mi in thiam an co theinak dingah cun an zummi Jesuh a si ruangah misual ih thiam a conak kha Pathian tuahsak mi a sinak fiangten a lang.

Thiam coternak hi ziangso a si? Himi thusuhnak E.G. White in a phi a pekmi uar a um zet. A ngan mi cu: “Himi hi Pathian ih tuahmi a si ih milai sunloihnak kha leidip lakah a ril zo ih, amai hrangah tuah theimi zianghman a nein awn lo”. E.G White, Testimonies to Ministers and Gospel Workers. P. 456.

Dan in sualnak kan tuah zomi ah remnak in tuahsak thei lo. Thiam coternak hi hlawhman a si lo. Jesui remnak tuahmi kan zum ruangih ngahmi a si. Curuangah thiam conak dingah daan in tuah thei mi a nei ve lo. Tuahnak tel lo thiamcoternak hi kan ziaza thatnak dingah tuah theimi kan nei lo tinak a si.

Himi Bible cang hi Khrihfa tampi in an theihsual ruangah hrilhfiahnak an tuahmi an palh. An simmi cu Jesuh in kan tuah ding mipawl in tuahsak theh zo ih kan zum lawng a tul. Thuthlunnak le tuahnak a tul lo an ti ih, Thukham (10) tla an thlun duh lo. Hivek ih an tuahnak ruangah Paul ih cangan mi kha a ping a pengin an siar.

Paul in thukham (10) thlun a tulnak kha Rome cabu sung lawngah si loin hmundang khalah thupi zetin a sim. Jesuh khalin a tuah ih, John le James khalin an tuah (Matt. 19:17; Rom 2:13; James 2:10,11; Rev. 14:12). Paul ih a sim duhmi cu thiam conak hi thukham thlun ruangah a si lo timi asi. Zumnak ruangah thiam conak a ngahtupawl lawngin Pathian thukham an thlun thei. Pathian ih tuahtharsalnak a ngah lotu cu thiam co an si loih thukham an thlun thei dah lo.

aan in in run thei loih daan thlun a tul lo timi thang sungih awk tang hi ziangah so a ol zet? Ziangah so cumicu tihnung zet dinhmun a si thei? Zumnak ih thiam co kan si ti na phuangawknak in remthatawk ih sualnak tlansan na tum maw? Rundamnak thukam mi um hlah sehla sual tuah dingih lemnak a um kem?

TLAWNGKAI NINGA October 27

RUAHBET DING: Daan in sualnak thaman leiba in rulhsak thei lo. Bawi Khrih in sual sirtupawl an sual thlahsak dingih thukam sunglawi a tuahmi a zangfahnak a zumtupawl kha an sualman leiba hmuahhmuah a peksak theh. Pathian duhdawtnak hi amah zumtu sual sirtui thinlung sungah hnianghnar zetin a pek. Pa Pathian thawn remnak tuah dingin raithawinak thisen ruangah misual thinlung sungah hmasi vekih a ummi sualnak kha a hnawtfaisak theh a si. Jesuh in a nun ih hna a tuannak, a mualphonak, a thihnak le remnak palai hna a tuannak in daan ih sunlawinak milai ih hlohter zomi kha tharsuah salin a sunglawiter sal. E.G. White, Selected Messages book I. p. 371.

A tu-ahcun sualnak na nein awn lo, Jesui ziazakha na ziaza ah pek na si zo ih Pathian cohlan mi na si zo (E.G. White Step to Christ p. 62).

Tirhthlah in daan thlunnak in thiam kan co lo a ti tikah zumnak le zangfahnak ih hnatuan kha a sim lo. Daan thlun le thlun lo ruangih thiam conak a si lonak kha a zumnak asi. Zumtupawl in zumnak ruangih thiam tuahtharsalnak a ngah lotu cu thiam co an si loih thukham an thlun thei dah lo. conak kha an hawlmi a si. Tirhthlah in thukham thlunnak hi mai dingfelnak rinsannak a si tiah a ti. Zumtupawl ih thiltha tuahnak hi dingfel duhnak ruangih tuahmi a si lo. Pathian ih pek cia mi dingfelnak anmah ih a um mi ih an tuahmi sawn. Porhawknak ih an hman lonak dingah hivek ih tuahmi a si. Martin Luther Commentary on Roman, p. 80.

RELTLANG DING:

(1) Tuzarh sung Bible cang siar dingmi Rom 3:19-28 tiang siar awla tawite in na theihdan ngan aw. Na zirpipawl na nganmi sim ve aw.

(2) A tlunih Luther ca nganmi siar aw. Himi tuahsak dingah khami thutak in ziangtin so thinlung tha thonak a suahter. A thupi zetmi a thu simmi kan theihmi in ziangruangah so tuini tiangah kan hrang

khalah a si thei?

(3) Adventist-pawl in zumnak thawngin zangfahnak ruangah thiam conak a si timi thuzirhnak ro cotu le zirhtu kan si tiah kan ruataw. Tirhthlah-pawl ih thuthangtha an sim mipawl kha a sullam langter ih bawmtu le an simmi thuthangtha a neitu le famkim teih fiangtertu kan si an tiaw. Ivan T. Blazen “Salvation” Handbook of Seventh-day Adventist Theology (Heger Stown, Md: Review and Herald, Publishing Association 2000). P. 307. A nganmi vekinkhami thu zum dingah thuhla ziangso kan nei?