Zo Phualva Thupuak Vol 07, Issue 20: PAWL PI SUNG KIPUAH PHATNA

PAWL PI SUNG KIPUAH PHATNA

Kum zalom sawmnih leh sagih bang sawt ta-in kamsang Joel in Khasiangtho hilhna tawh tua Pasian ni ding na gen khol zo hi. “Zion ah pengkul tum un, Ka mual siangtho sungah patau tangko un, leitunga teng khempeuh linglawng sak un, Topa ni hong tun ding ahun nai ta hi. Khuamial lungkhamna leh asah meilom mial hong nai a, mual dawnte pan in zingsang khua-ki-seem silsel kigalmuh bang hi” ci hi. Joel 2:1,2.

Hih thu in Lai Siangtho lui hun a, Israel te a galte in azawh gawp ding ciang a thu om bang ahi hi. Ahih hang in a thu in leitung bei ding ciang a “Topa ni” a cih pen kawk hi. Tua in Khris hong paikik ni ding ni tak kawk hi. A thu in Zion ah pengkul tum un, ci hi. Tua pen pawlpi sung cihna hi a, Topa mual siangtho ah (Amite lakah) patau tangko ding hi.

Tua hi a, tu in zong Topa in kamsang hongs awl a, “Na lungsim khempeuh tawh Kei lam hong hong ki hei un la ann ngawl in kap un, thum un, na puanbek uh balkek lo-in na lungsim uh balkek un la, Topa Pasian lam zuan un, Zion ah pengkul tum unla manlang in kisiangtho sak uh hen, kikhoppi sam un, mite kaikhawm un, mipite kisiangtho sak hen, siampite sia te biakna tau leh biakna kikal ah kap hen, Na mite hong khawi lai in, Topa aw, ci sak un” (aneu 12-17)

Zinlingte khawng ih et ciangin, Topa ni-a apiang ding n ate hi. Pawlpi mite khanglo a patau a tangko ding uh, lungsim khempeuh tawh kikhel na takpi azon’ ding hun uh hi ta hi. Huna bei kuan a na-piang lianpipite nan’ zawh theih nading, pawlpi mite kigin’ kholh nading in khalam kipuahphatna taktak kisam ahi hi. Hun thupi penpen nitak tungta ih hih lam uplah nading om lo hi. Tua ahih ciangin kipuahphatna Zion a tangko ding pen ahun hi ta hi.Topa sawltaknu in hih anuai a thute a na gelh khiat pen kum tampi hi khin zo ta hi.

KIPUAH PHAT DING KI SAM

Eite laka amaan kipuahphatna neih ding thu in, ih kisapna lian pen ahi hi. Hih thu ih zon’ ding nasep masa pen ahi hi. Topa in thupha hong buahsuk nading in nakpi hanciam in zong ni. Bang hang hiam cih leh Pasian in Athupha hong buak nuamlo hilo a, eite in thupha sang thei dingin kiging khol nai lo ih hih man zaw ahihi. Vantung a ih Pa in atate A Khasiangtho apiak nop zia pen leitung ah pa-te in tate na hoih apiak nopna sangin lian zaw hi. Tua Pasian hong khap thupha ih ngahna dingin, eima sep ding pen: kipulaak ding, kiniamkhiat ding, kisik kik ding, nakpi in thu nget ding kisam hi. I SM 121.

“Pasian mite in kipuahphatna leh kibawl phatna aneih kei uh leh, tua ze-et nate a do zo kei ding uh hi. Amah leh amah akimuang mi khat peuh pen midikte bek om nading a kibawl inn sungah Topa in tua mi a lut sak kei ding hi.” 7T. 285. Pasian mite lakah kipuahphatna kisam a, siate lakah siansuah masak ding ahi hi. 1 T.489 "Pasian mite lakah kipuahphatna bawlsak un" MYP.317

“Khasiangtho makaih in kipuahphatna leh kibawlphatna om ding hi. Tua gel in adeihna thu nih mah a om ahi hi. Kipuahphatna cih pen khalam sihna pan khanlawhna, kithak sakna; lungsim sungah kha nuntakna thak sak cihna hi a, kibawl phatna cih pen din’ mun te khek a, lungsimte, upnate, gamtatna te zongsatnate khek cih na hi. Ki bawlphatna in khalam puah phatna a om kei leh thumaan gah agah tuan kei ding hi. Kipuahphatna leh kibawlphatna in amau panmun tuak sem in kikop ding hi” Ch S. 42.

“Zan a ahong kilak thu khat in ka lungsim nakpi in bun hi. Thu khat piang hi. Kipuahphat na ding ahi hi. Mun citeng ah zaam kawikawi hi. Ih mite kigual in Topa sapna dawng uh hi. Ute naute aw, Topa in hong hopih hi. Awlmawh lo in om ding ih hi hiam? Khua vak pua dinga hongs awl pen, sep tawh thuah pah ding hongs awl ahi hi”. 3TT. 441.

“Pasian thukhenna lian atun’ ma a, Topa mite lakah hih puahphatna a om bang pen sawltakte khang a kipan in om ngei nai lo hi. Pasian Kha Siangtho leh vangliatna, Amite tung ah a buak ding hi.” GC. 464. Ref: Nitawpni Ading Kiginkholhna, Khawkpi 1

Khamtung ah Lungdamna Thu:

1. September 19, 1811 ni-in American Board of Commissioners for Foreign Mission kipawlna in Adoniram Judson pen Nisuahna lam ah gammial phu ding in teelkhia hi. Tua bek hilo in Congregational Church in zong sawl hi.

2. February 5, 1812 ni-in Ann Hasseltine @Nancy tawh kiteeng uh hi. February 6, 1812 ni-in Salem khua om Tabernacle Church panin siangtho khutngakna kipia hi. February 19, 1812 ni-in Judson leh Nancy te Caravan tembaw tawh hong zinkhia uh hi.

3. June 17, 1812 ni-in Judson te nupa Calcutta (tun Kolkata) ah hong tung uh hi. India manawh in tembaw tungah hong zin laitak un, ‘Tuiphumna Thu’ tawh kisai nakpi takin na kantel hi. Matt 28:19-20 sunga Zeisu gen ahi Tuiphumna pen thu-um mi khat adingin zuih ding leh sep ding ahih lam hong tel hi.

4. September 6, 1812 ni in Tuiphum Pawlpi ah ki-ap in Calcutta ah William Carey ie naseppih William Ward  in a nupa un tuiphum hi.

5. Bagyidaw(1819-1837) kumpi sep sung July 13, 1813 ni in kawlgam leitang hong sik uh hi.

6. Hotkhiatna thu a tangkona dingin Zayat kici Kawlte thugenna inn neute  khat lam hi. 1819 April kha caingin a thugen ngai ding mi 15 hong pai uh hi. Tua zawh kha 2 khit ciangin Tawpidaw hong suak masa pen ahi dingin U Naw hong kikhel hi.

7. Kawlgam ah kum 9 hong om khit 1822 ciangin Tapidaw 18 hong pha uh hi.

8. Mangkang-Kawlte kikal galpi masa(Anglo-Burmese War, 1824-26)  sungin Judson kha 17 sung Ava( tun Innwa), leh Aung Pinle te ah thong kia hi. Ref: Suanzanang, Kenneth Htang, “Judson Lands Burma” in Highlights of chin Hills Mission, 2013, Unpublished, pp. 2,3

Cidamna

Naupan laia ihmut khamlo ten Guihtheih zangnuam diak cih ki mu khia hi. Idaho State University-a scientist ten sinna a neihna pan un hih thu mukhia uh hi.Hih tawh kisai in naupang high risk 400 te tung pan sinna ki nei hi.Hih a etkhiat uh naupangte pen zansawt pipi TV en leh Video game ki mawl thei te hi uh hi.Naupang ihmut kham lo te nungakno/tangvalno hong hih ucianga zu dawn tam se uh hi.A picing dawng uh banzawm zawmah lai uh hi.Tuamah bangin zatui lam a hih zong tam diak uh hi.

A diakin naupang te pen ihmut khamsak ding kitangsam mah mah hi.Kum tawh kituak a ihmut hun kitangsam zah:

0 – 2 months te adingin nai 18-20

2 – 12 months te adingin nai 14 – 16

1 – 2 years te adingin nai 12 – 14

3 – 5 years te adingin nai 13

5 – 12 years te adingin nai 10 -11

12 – 18 years te adingin nai 8 – 9

Picing te adingin nai 7 – 8

Upa kum 60 tungsiah te adingin nai 6 – 7

Src: Zogamaksi.net

English Laimal ah a kikhial thei te(3)

Flounder Founder	Naakpi taka thasan, suahtaak nang in kipeek. Amukhia mi, aphuankhia mi, apankhia mi
forbear forebear	Kidaam, pelh, nial I pianna ih pu ih pate, pusawnte.
foreword forward	Laibu khat ie thu mapi, Thu masa Mainawt, kalsuan zom.
freeze frieze	Khal sak, keucip sak. Kawmzawl ah a phei lama kigual paak, zepna
loose lose	Kikol sak, kiam sak, khiam Man suah, mang sak, mu zolo
meter metre	Vanh, na khat tehna dia kizang vanh Meter zang a tehna, a aw kituak a kiphuak la
militate mitigate	Galkap lut, galkap tum Kiam sak, khiap sak, khahkol deuh
palate palette	Dangtawng, kam tung Lim zemna za koihna kuang,
pedal peddle	Khe tawh sikna ding a pek,  Van neng zuaka, mun khat pan mun khat pai
pole poll	Khuam, gua pum, siik pum Vote khiatna, vote kikhia zah
pour pore	Buak, luang sak En gega, limtakin sin
practice practise	Zat ngeina, ciindan, Siam mateng a sin, upna bang nungta

Zo Phualva Thupuak - Vol 07, Issue 20 by DavidLian on Scribd