LESSON 8: SILA PAN IN INNLUAH ZAA-AH

 

LESSON 8: SILA PAN IN INNLUAH ZAA-AH                       August 12 – 18

NIPI NI (SABBATH) NITAAK LAM

SIMDING TE: Gal. 3: 26 – 4: 20; Rom. 6: 1 – 11; Heb. 2: 14 – 18; 4: 14, 15; Rom. 9: 4, 5.

KAMNGAH: Tua ahih ciangin sila hi nawn lo in tapa na hi uh hi. Tapa na hih uh leh Pasian hangin innluah pa zong na hi uh hi (Gal. 4: 7, RSV)

Paul in Galati pawlpi mite tungah, amau te in sila bangin gamta nawn lo in, Pasian ta te leh tanu te hih theihna hanga hamphatna khempeuh a ngah theihna ding un a gamta dingin gen hi. Tua thuman a khangno Martin Luther in za kha lo hi. A mawhna tam lua ta cih a kitheihna hangin,a ma hanciam theih zahin sepkhiatna tawh mawhmai sakna leh lungnopna hong zong hi. RC phungzi no khat a hihna tawh kizui in a ma nuntakna sunga vangik khempeuh a kiphelh theihna dingin antan na te, ihmu lo in thunget na leh kibawlsiat gawpna tawh a gitloh na te hepkhiat sawm na pi in suahtak taktak ngah zo kisa tuan lo hi. Pasian mai ah maipha a ngah theihna ding leh a siangtho lungsim a neihtheih na dingin a ma I kipiak khiatna gimna khempeuh tungah lungkiat sawm vet lo hi. A nungciangin agen kikna ah, Biakna ah a citak Phungzi khat a hihna tungtawn pan in, tungsiah thukhun khempeuh citak takin a zui pa hi. A hi zongin tua sungah lungnop na mu tuan lo hi.” Phungzi khempeuh in ama phungzi nasep na tawh vantung a ki thalawh theih ding a hih leh, kei bel Vantung nak tung ding hing” ci hi. Ahi zongin tua nasep tawh ki thalawh thei lo hi.

Galati laikhak sungah a hong hilhcian mah bangin Zeisu sung bek ah Gupkhiatna thumaan om a hih zia, a nung theihtel tak ciangin bek, a ma kha lam nuntak nopsak theihna dingin kha lam suahtakna leh lam-etna hong ngah thei ta hi. Tua gah hangin, I Leitung hong ki lumlet hi.

NIMASA NI (SUNDAY) August 13
KHRIS SUNGAH EI TE DINMUN (Gal. 3: 26 – 29)

Gal. 3: 25 sung thu lungsim sungah ngaihsun kawm in, Gal. 3:26 sim in. Hih Laisiangtho mu sungah, Zeisu hangin tatkhiatna ngah khit nungah, ei te in a bang ci bangin, Thukham tawh I kizop cih hong telsak hiam? 

______________________________________________________________________________

A neu (26) sungah Paul in, “Tua ahih man in(For) cih kammal in,tua laigual sunga a deihna leh a tunga a gen thu te a kizop zia hong gen nuam ahi hi. To’ khat ii tapa in, ama sila pa(pedagogue)kiangah a om sung teng, a tapa in mi maimai (minor) hi lai hi. Tua mah bangin Paul in gen-nop nop thu in, Zeisu sungah Upmuanna tawh a hong pai mi peuhmah in, Thukham tawh a kizop na tungtawn pan in, mi maimai hi nawnlo hi. Amah kikheel ta a hih manin, Pasian ta cih theihna (Kangcin na)za ngah ta uh hi.

“Ta pa” cih kammal in, pasal lo siah kihel lo cihna hi lo a, Paul in tua sungah numei te zong na hel hi (Gal. 3: 28). A tawntungin “ta te”(children) cih sangin “tapa”(son)cih kammal a kizat tawntung na in, innkuan khat sungah khang kizom min ciaptehna dingin, tapa te’ tungtawn pan in in ki ciamteh hi a, Thuciam Lui sunga “Pasian tate” (sons of God) cih kammal in Isreal te tung Pasian in aituam minphat na dingin avawh a hi hi. (Thuhilk. 14: 1; Hos. 11: 1) Tua tawh kizui in, Paul in a lungsim sungah vong den ahih na tawh kizui in, tua kammal a zang a hi hi. Tu in, Gentile te in zong Zeisu hangin, Pasian tawh kizop theih nopsak na ngahta uh ahih manin, Isreal te’ nopsakna sungah kihel thei ta hi.

Tua bangin vai thupi lian khat a pian theihna dingin, Tuiphum na in bang thu piang sak thei ahi hiam? Gal. 3: 27, 28; Rom. 6: 1 – 11; 1 Pet. 3: 21. 

______________________________________________________________________________

Paul in, Aneu (27) sungah, “Tua ahih manin” (For) cih kammal hong zang leuleu hi. A tunga

agen sa te tung tawn pan in, khantoh na ding a thu tawh kizui in sep ding om a hih zia a hong gen nuam ahi hi. Zeisu tawh kizom in nuntak theihna dingin khensat masak ding thukhat in, tuiphumna ahih zia Paul in mu hi. Rom. 6 sungah, Tui kiphum na in, Zeisu sihna leh thawh kikna tawh kizui in, kipawl khop theihna dingin hong ki ciaptehna ahi hi. Galati sungah bel Paul in, a deihna tuam khat tawh, Zeisu puan banga silhna ci hi. Tua Paul kammal in Thuciam lui sunga “hotkhiatna, puan bang silh”, cih hong phawksak hi (Isai. 61: 10; Job. 29 : 14). “Paul mitkha ah Tui kiphum na in, Zeisu pen silh theih puan banga, thu-um mite ahong tuam laitak dan in mu hi. Thuciam Lui sunga Dikna cih kammal a zat loh hangin, Thu-um mite tungah ki-aap a hih zia hong gelh hi”. Frank J. Matera, Galations, 1992, p. 145.

Ei te in Zeisu Khris tawh kipawl khopna I neih theihna dingin Tui kiphum na tawh, ki ciaptehna hi a, a khiatna in: Zeisu adingin amaan te eite a dingin zong maan hi, a cihna ahi hi. Bang hang hiam cih leh, Zeisu in “Abraham’ suan leh khak” (seed)a hih na hangin Zeisu tawh Abraham”gamhluah-theihna” a ngah thei te I hi hi. Tua ahih manin, Thu-um mite in, Abraham leh a suan leh akhak te tungah aki pia thuciamna, kamciamna thupha khempeuh a luah thei te I hi ta hi.

Koi ci bangin Zeisu a dingin thumaan te eite ading in thumaan hi thei ding hiam cih ngaihsun in. Hih a lamdang Pasian thumaan te in, eite’ nuntakna vai khempeuh ah, koi ci bangin huzapna hong nei thei sak hiam?

NINIH NI (MONDAY) August 14
LEITUNG VAI THUGUI TE TUNGA SILA SUAHNA

Mihing te leh Pasian kizopna pen tate leh gamhluah vai tawh kisai in agen khit ciangin, Paul in Gal. 4: 1 – 3 sungah gamhluah vai tawh kisai hong bang ci bangin a kicing zaw in hong genbeh hi. Paul kammal zat sungah, lo za pi anei pa khat hong sih ciangin, a vangil neih khempeuh a tapa upa pen pa kiangah aap gai hi. A hi zongin a tapa in, tua lai dinmun ah neulai lua a hih manin, sila pa khut sungah a om laitak ahi hi. Hih bang thupiang mah bangin, Pa’ in a sihma in a gamh luahna ding vai tawh kisai lem nai lo ahih manin, a picin masiah, amah a kem a cing dingin manager khat sungah ki aap phot hi. A tapa in a thu in, a pa neihsa khempeuh neih theihna aneih hangin, atak tak dinmun ah a  sila pa khat sangin thupit na nei zo nai lo hi. 

Hih a tunga Paul genteh thu tawh kisai in Gal. 3: 24 sunga sila pa (pedagogue)tawh a kibat pian hangin, hih a tunga thu ah, neihsa kempa leh manager pa’ ki mantheih zawkna leh thupitna kilang zaw hi. A mau te in a pu tapa’ khansuah theihna dingin mawhpuak aneih uh mah bangin, a pu neihsa sum leh paai gamh leh lo khempeuh tua a pu tapa’ a hong picin masiah leh na a septheih masiah, vai khempeuh thuzeek theihna khuan a ngah hi.

Gal. 4: 1- 3 sim in. Eite in tulai takin Zeisu sungah I om laitak in, I nuntakna sungah Thukham tawh kisai bangci dinmun ah om cih Paul in I teltheih dingin hong gen hiam?

______________________________________________________________________________

Bang Leitung na mawkmawk vai tawh kisai sila sungah om ci a, Paul in hong gen pen bang  I bangin buaina piang hiam? (Gal. 4:3, 8). Greek kammal in, “stoicheia”a ki ci pen, leitunga thugui a kip den ngeina khat cih na ahi hi. Munkhat khat te ah “Universe a kici Vantung, leinuai na te khempeuh cihna in zang uh hi (2 Pet. 3: 10, 12), a hih kei leh “huihlak a ukte leh vangliatna a nei khempeuh” (Kol. 2: 15), cihna ahi zongin, Biakna pia zia adingin ABC ahi pan,( Antak nethei nailoin nawi bek a nethei lai) te (Heb. 5: 12), cih a hi zongin, Paul in bel Gal. 4: 1 – 3 sungah, Zeisu a hong pai masiah mihing te dinmun pen a a-ngek mahmah(minor) ahih zia hong hilh hi. Tua ahih man in hih hih thu ah Biakna lam ah I dimnun muanhuai loh zia ahong gen nuam ahi hi. Tua hi a, Paul in Thuciam Lui hun sunga Thukham te leh Gangawh Biakpiakna te in, Lungdamna thu ahi Gupkhiatna a hong piankhiat theih na dingin, thugui I letkip na nono te a hih zia hong lak hi. Tua hi a, Isreal te tungah Topa in, Zehtan thukham te a piakna in athupi mahmah leh Gupkhiatna thu ahong sin sak na hi hi. Tua te in, ahong tung takpi thu khat I, a limciinna/aliim bek mah a hi hi. Zeisu tang dingin cikmah hun in laih theih ding hi ngei lo hi.

Ngeina no khat Zeisu sangin, thupi seh luatna tawh kalsuan na in, a nungkik nuam, Upna lam ah a kiamsuk nuam zaw tawh kibang hi. Amau nuntakna sungah Zeisu hong pai khin na pi Galati mite in, tua bangin a neuno thunung zuihna in, gamh luah ding a kiging khin tapa gol ta khat in, sila bangin naupang suakkik nuam tawh kibang hi, a ci nuam ahi hi.

Naupangno te upna in siangtho hi (Mat. 18: 3)a ci I hih leh, kha lam khantohna ah zong amau bangin om na kul sese ding hiam? ahih kei leh kha lam ah khantoh semsem theihna dingin, na Upna zong naupang bang semsem ding a ci nuam ahi ding hiam? Naupang batna, “mawhneihlohna” leh na Upna sungah muantheihna a koi ci bang hi ding hiam?

NITHUM NI (TUESDAY) August 15
“PASIAN IN A TAPA HONG SAWL HI” (Gal. 4: 4)

“Ahi zongin a hun a cin ciangin, Pasian in a Tapa hong paisak a, tua Tapa pen leitung ngeina bangin numei sung panin hong suakin, Jew Thukham sungah hong nungta hi.” (Gal. 4: 4)

Paul in”a hun acin ciangin” cih kammal azatna sungah, Leitung mite a tatkhiat theihna dingin Pasian in a malak na hong kilang sak hi. Zeisu in ama ut hunhun a hong pai ding hi lo zaw in, a pa Pasian geelna hun lianlian tungtawn in ahong pai ding hizaw hi. Tangthu tungtawn pan in, tua hun pen Pax Romana a kici, Rome Empire, gamsungah kum zanih sung kilem na leh galdaihna a om laitak, a hi hi. Rome kumpi te in, Mediterranean kuampi sunga a lak zawh na hangun, gal vai veng mahmah in, kampau khat kizat khop theihna leh gam kizopna lampi te hoih mahmah na hangin khualzin gamvak lem mahmah a, ngeina te kizatpih theihna te hang tawh, Lungdamna thupuak manlang taka a kizelh theihna dingin a hoih mahmah hun laitak ahi hi. Laisiangtho tungtawn panin, Pasian in a kamciam Messiah a paisak ding hun tawh ki tuak lian hi (Dan. 9: 24 – 27).

Mihing te a tatkhiat theihna dingin, bang hangin Khris in leitung mi pianzia neih kul se hiam? (John 1: 4; Gal. 1: 4, 5; Rom. 8: 3, 4; 2 Cor. 5: 21; Filip. 2: 5 – 8; Heb. 2: 14 – 18; 4: 14, 15.

______________________________________________________________________________

Gal. 4: 4, 5 sungin, Laisiangtho sungah Lungdamna thupuak a kigelh lak ah a tomcing pen mun khat ahi hi. Leitung mihing tangthu sungah Zeisu a hong kilat khiatna in, ginkholh loh pi in, a hong piang vat thu hi lo hi. “A Tapa hong paisak hi” cih kammal in mihing te a ding Gupkhiatna sungah Paisian geelna hong neihsak thu phuankhiatna ahi hi.

Tua bek tham lo in, a tunga kammal in, Christiante’ Upna Zungpi sunga kihel ahi, Khris in Pasian ahihna a hong kilat na zong ahi hi (John 1:1 – 3, 18; Fil. 2: 5 – 9; Kol. 1: 15 – 17). Pasian in van sawltak te ahi vangtungmi te sawl suk se lo in, amahmah hong pai zaw hi. 

A tung’ pek panin a om khol khin, Pumkhat Pasian sungah Tapa za tawh a om tawn tung  khat hi a, “numei sung pan in a hong suak” khat zong ahi hi. A siangtho nungak sung panin suak cihna in, a Mihing pianzia hong lakna ahi hi. “Thukha nuai sung pan in” Zeisu in, Jewish ngeina sung pan in a hong piang hi cih na hi bek tham lo in, Leitung mawhna khempeuh zong a pua cihna zong ahi hi.

Khris in Leitung mihing hihna a neih ding hong kul hi. Banghang hiam cih leh mihing leh mihing ki honkhia thei lo hi. Pasian a hihna leh a puk leitung mi te pianzia hihna a gawmtuah khit ciang bek in, eite a dingin, Gumkhia pa, Ai-awhpa, Siampi lianp suak thei bek hi. Adam masa thuman lohna hangin a hong om supna khempeuh Adam nihna ahong suahna tawh a ki ngahkik theihna dingin a hong pai ahi hi (Rom. 5: 12 – 21). Thukham kalhna khempeuh, Ama thumanna leh picin na tawh hong dimkik na hangin, a lungsia huai Adam kiatna pan in hong tankhia kik thei ahi hi. Singlamteh tungah ahong sihna hangin a mawhna thaman sihna tun na ding pan in Thukham thu ah dikna hong ngahsak thei hi. Tua ahih manin Upna maan tawh a ki aap mi khempeuh te tungah a hong tatkhiatna hangin phattuamna a ngah thei I hi hi.

NILI NI (WEDNESDAY) August 16
TAPA ZA’ NGAH THEIHNA (Gal. 4: 5 – 7)

Gal. 4: 5 – 7 sungah Paul in, Khris a bulphuhna tawh kizui in, ama ngaihsutna a zai zaw in ahong genna ah, “Thukham nuai-ah a om mite a hong tankhia dingin” (aneu 4, 5)ci hi. “Tankhia” cih ciangin “lei kik” cihna zong ahi hi. Tua kammal in, sila ahih kei leh gal te mat khat a suahtak kik theihna dingin mankhat tawh tankhia cihna a hi hi. A tunga kammal tawh kizui in tatkhiatna pen, thusia khat hangin a hong om cih a khiatna nei a, Mi khat peuhpeuhin atan na sal sung pan in suahtakna a kisap zia hong lak hi.

Eite in bang saltanna pan in suahtak ding kisam mawk hiam? Thuciam Thak in, suahtak theihna ding mun 4 hong gen hi. (1). Ngian ahau Dawimangpa hong sukgawp theihna dingin pan in (Heb. 2:14, 15), (2). Sihna pan suahtak theihna (1 cor. 15: 56, 57), (3). Pianpih pianzia hangin mawh bawlnopna panin (Rom. 6: 22), (4). Thukham zuihlahna hangin mawhsak thukhenna, leh samsiatna panin (Rom. 3: 19 – 24; Gal. 3: 13; 4: 5) suahtak theihna, cih te ahi hi. 

Ama sungah I om na tungtawn pan in, Khris-in ahong ngahsak tatkhiatna hangin ei a dingin bang’ phattuam na apha ngah lawh hiam? Gal. 4: 5 -7; Eph. 1: 5; Rom. 8: 15, 16, 23; 9: 4, 5.

______________________________________________________________________________

Khris in eite a dingin hoihtak in ahong tangtung pih pen, “Gupkhiatna” ci in I gen zelzel hi. A

man mahmah bel hi mah hi, ahi zongin tua sangin a tumdang leh a kician mahmah Paul in azat kammal khat in “huiothesia” hi a, “tapa za’ ngahna”ci in agen na ahi hi. Thuciam Thak bu sungah hih kammal a zangkhia Paul bek mah a om hangin, Greek leh Rome gam te ngeina sungah sungsuak ta ahih loh hangin, hamphatna khempeuh “a ki keem innlak ta”in ngah theihna pen mikim theih thukhun hi bilbel hi. Paul hun lai in, Rome kumpi te in zong ama suan leh khak sung pan in, kumpi zalaih ding, gamh luah ding a om loh ciangin “innlak ta” mah na teel uh hi. Hih bangin innlak ta khat in innluah za a ngah ding ciangin phattuamna tampi mah ngah lawh uh hi. (1). Tua Innlak ta in, a la te ta taktak suahtheih na. (2). Tua ta ala ding pa in, a lak ding naupang kisap na khempeuh a hi, a khankhiat theihna dingin pilna siamna, silh leh teen, neek leh dawn khempeuh sik ding. (3). Innlak ta pen, kep leh khoi dingin a lak khit nak leh, hemkhia (taisan) kik nawn lo ding. (4). Tua innlak ta pen, sila suak sak lo ding. (5). Tua naupang nu leh pa taktak te in lungkim in apiak khit uh ahih nak leh, la kik thei nawn lo ding. (6). Ta dingin la khin ahih manin, luah ding a kilawm a gamh khempeuh kiptak/kician tak in pia ding cih te ahi hi. –Derek R. Moore-Crispin, “Galatians 4: 1 – 9: The Use and Abuse of Parallels”. The Evangelical Quarterly, Vol.  LXI/No. 3 (1989), p. 216.

Hi Leitung nangawn ah Innlak ta khat in, hih zah takin hamphatna ngah thei ahih leh, Pasian Ta te suahtheihna sungah bangzah takin hamphatna lian om ding hiam cih ngaihsun dih sin. 

Gal. 4: 6 sim in. Hebrew lai sungah “Abba” cih kammal khat na om hi. Tua in, tu lai naupang no te in a pa te uh asap ciangun, “Pa aw”, “Pa pa aw”cihna ahi hi. Zeisu in zong (Mark. 14: 36) sungah na sam a, ei te in zong tua “Abba”cih kammal tawh I Topa Pasian tungah saptheih na ding khuan angah khin I hi hi. Na nuntakna ah tua bangin kinai takin Pasian tawh kizopna na nei nai hiam? Na neih nai kei leh, tua bangin kinai theihna na neihna dingin bang ci bangin kikheel kul ding ahi hiam?

NINGA NI (THURSDAY) July 17
BANG HANG IN SILA SUAHNA AH KILEH KIK NUAM? (Gal. 4: 8 – 20)

Gal. 4: 8 – 20 sim in. Paul in in bang teng a gen nuam hiam cih tomkaih in. Galati mite sunga amaan lo thuhilhna te tawh kisai bangzah tak in thupi seh hiam?

______________________________________________________________________________

Galati mite in bang ci bangin Biakna sungah kalsuan uh cih Paul in, agen siang loh hangin, a

biakpiak kalsuan zia uh a maan loh hangin kha lam dinmun sila suah zia buaisak tuam ding hi cih thei hi. A taktak in zong a lauhuai mahmah siatna lam manawh cih a theihna tawh kizui in, lung himawh takin, hih lai hong gelh ahi hi. Ta hihna pan in, Galati mite in, sila suahna ah kihei mangta uh cih thei ahih man in, vauna a pia ahi hi.

A thubuai te aneng atawngin aki gelh loh hangin, abang ci bangin a gamtatna hang un Paul in Galati mite nial gawp hiam?(Gal. 4: 9 – 11)

______________________________________________________________________________

Mi tampi tak te’ upna ah Paul in, “nite, khate, hunte, kumte-a kipan pawi tuamtuamte” cih tawh a genna tungtawn panin, Zehtan thukham te bek ahi lo, Sabbath thu tawh kisai nangawn zuih ding hi nawn lo ci in, phenkhia uh hi. Tua bangin akhiatna a lehna uh in, a thu paizia tawh ki gamla sak hi. A diakdiak in Paul in, thu-um mithak te a dingin, Jew te ngeina thukhun zuih dingte leh, Sabbath ni mahmah a phiatsiang nuam hi leh, Kol. 2: 16 sungah a min tawh a genkhia ciatciat ding hi. A nihna ah, Galati mite in bang bang ahih zongun, tua in Zeisu Khris sunga aneih uh suahtakna panin, sila sung mah ah manawh uh hi, cih Paul in tel sitset hi. A zenzen in, ni sagih ni Sabbath zuihna in, mikhat tungah sila suahna bang hi kik a hih leh, piangsak pa mahmah in Leitung a dingin amasa pen Sabbath a zuihna hangin tua sila suahna sungah a lut hi ding hi. - The SDA Bible Commentary, Vol. 6, p. 967. 

A zenzen in Sabbath citak taka zuihna in, Zeisu sunga om amau suahtakna a khaktan bang hi leh, bang hangin Zeisu mahmah in Sabbath ni a tan bek tham lo in, midangte in zong atan theihna dingin hilh mawk ding a hi hiam? (Mar. 2: 27, 28; Luke 13: 10 – 16).

Zeisu sungah I neih suahtakna pan in ahong hemkhia thei dingin, SDA thukhun, upna sungah in I zuih khak a om kha hiam? A hih kei leh, tua bangin buaina apiang sak thei thuzuihna leh, tua thuzuihna sangin, tua zuihna tungtawn pan in, bang lungsim pua zaw I hia leh? Paul in nasia takin a tai gawp theihna dingin Galati mite sungah bang lungsim te in sila suah theihna dingin makaih hiam?

KIGIN NI (FRIDAY) August 18

SINBEH DING: “Vantung kikup na sungah, geelkholhna khat ki nei a, a mawh mikhat in, Zeisu Khris pen amau aitang dingin kician taka Upmuan na tawh a zuatna tungtawn pan un, Khris’ ta te a suah theih na dingun Pasian in a geel khol sa teeltuam mite ahi thei dingin, lungkim tak in Pasian in sehkholh na khat a na bawl hi. Pasian ngimna in zong mi khempeuh hotkhiatna a ngah ding uh a hi hi. Tua a kicing geelkholhna tungtawn panin, mihing te’ hotkhiatna dingin a tapa neih sun hong pia hi. Mi honkhat te in kisiatna thuak ding uh hi. Bang hang hiam cih leh amau te in, Zeisu Khris hangin Pasian ta’ suahtheih na a nialna hang uh ahi hi. A mau te kiphatsak na in Pasian geelkhol sak Gupkhiatna a san  theihna dingun daltan sak hi. A hi zongin mihing te’ thupha bawlna in, Pasian maipha ngah sak zo tuan lo hi. Mikhat in Zesu Khri Upmuanna a neihna tung tawn pan in, hehpihna sung a tum na hang bek tawh, Pasian maipha a ngah zawhna ding lampi a om thei bek ahi hi. Gamtat na pan ahi zongin Pasian teelsa hi tangh cih lungmuan na ciang lel kingak na tawh kingah thei lo a, teeltuam mite I cih te in, Khris hang bek in teelna angah mi te bek hi ding hi. – Ellen G. White, “Chosen in Christ,” Signs of the Times, Jan. 2, 1893.

KIKUP DINGTE:

1. Pasia tawh kalsuan khopna tungtawn panin, amah tawh omkhop zaw theihna in bang hi a, bangin hong omkhawm sak lo hiam? Pasian tawh I kizop tawntung theihna dingin leh Up theih tawntung na dingin bang ci bang nuntak zia tawh kalsuan ding I hi hiam? Tua mah bangin bang ci mun pan in Pasian tawh ki gamla kha thei I hi hiam?

2. Gupna ngah theihna dingin Upmuan na bek cih leh Hehpihna bek cih san na in bang ci bangin lauthawn na hong om sak thei hiam? Bang hangin mi tampi tak te in amau deih lam pi ahi gamtatna bulphuh in hanciam zaw uh a, a piang thei ding mah hiam?

3. SDA te in I salsuahna pan in a bang dan suahtakna tawh kalsuan I hi hiam? A koi ci  bangin suak ta ki ci thei I hi hiam?