Zii A Vua Pa

July 08                                           India Gam A Laizang

Zii A Vua Pa,  (Khen khatna)

Agen: Chadamla

Chadamla in ama’ teenna khuapi ah Sabbath ni  zingsang in Adventist biakinn pualam ah khawl hi. A nuntak khuasakna deihbang lo hi. Pei thum nei taxi hawl a, sum khol thei hi.  Ahi zongin a zi tawh a kikhen khaak ding patau hi. Kha khat sungin a zi tam veipi vua in, a khawl thei nawnlo ding tawh kibang liangh hi.

Biakinn pua ah a khawl sungin biakinn sungpan Pastorpa aw za a, tawlkhat sung ngai khikhe hi.  Pastorpa in Sabbath School lesson hilh a, Jacob thu a gen laitak ahi hi. Pastorpa in Jacob’ mang sungah van dawn dong a kidawh vantungmite kahlei thu leh a lungdam kohna in a ngah vekpi sung pan-in sawm aa khat piak ding a kiciamna thu gen hi.

Sabbath School khaan a man ciangin, Chadamla pen biakinn sungah hong pai in, “Pastorpa’ aw, na thugen pen koilai pan na ngah hiam? ci-in dong hi. Pastorpa in zong Khangcingkhinte kuata Sabbath School lesson khat leh Lai SIangtho khat pia pah hi. Chadamla zong Pastorpa tungah lungdam ko in, a inn lam hong zuaan ta hi.

Chadamla’ Buaina

Tua ni, nikailam ciangin, Chadamla in biakinn pan a zak thu hong ngaihsun phakik hi. Bangci in ka zi tungah pasal gilo suak thei kahi hiam cih thu hong ngaihsun hi.

Kum 22 a pha Chadamla in kum 18 a pha a zi tawh a kiteen zawh uh kha thum a phak ciangin a zi vuak kipan hi.  A nih tuak un Hindu biakna pan khangkhia uh hi. Chadamla’ min pen Hindu te huih pasian a zahtakna un a phuah uh ahi hi. A zi’ min pen Hindu nusiante min tamsak uh hi.

A kiteenma nangawn un, Chadamla’ zi in khate’n amah a teel lam thei khin hi. Biakpiakna a neih uh ciangin a zi pen khate’n mancip a, ama’ pumpi kikeem thei nawn lo hi. Khate deihna bangin laam in a puante balkeek gawp hi. Khuapihte in kha sapna a neih uh ciangin amah sam uh hi. Amah in mang a muh ciangin khate thuhilhna dong uh a, ama’n genkhiat sak hi.

Amah Hindu biakna um khat ahih hangin, Chadamla in khaniin vai ah a zi a kihel pen deih vetlo hi. Kha sapna a bawl uh ciangin a tawpna lam pen Chadamla in nawngkai sa phadiak hi. A zi pen kha sapna ah a pai ciangin dawi biakna mun a tun dong laam leh dian thuah a, amah in tua dawi biakna mun ah aklui khat ahih keileh keelno khat go hi. Gan a gawh cianginn ama’ maitang leh a puan tung tengah a sii kitheh zeekzaak hi. Tua khit ciang bekin khua phawkkik in a inn vuah ciah hi.

Chadamla in, “Tua bang ngeinate deih hetkeng. Ka zi sungah dawi a luut zong deih hetkeng. Ka heh suak lua in ka awng gawp a, ka vuak kawm in, ‘Tua mun ah pai nawn peuhmah ken maw’ ci-in haan gawp ing” ci hi.  

Dawi’ Huzaap

Chadamla in a zi a vuak khit ciangin a lung nuam hetlo himah leh khawl thei lo hi. A sawtlam ciangin a zi sungah dawi lut a hihlam leh a heh nadingin a tawnggawp zong dawi a hihlam hong nung theih phiing hi.

“Ka zi a vua dingin hong tawnggawp pen dawi a hihlam ka thei kha kei hi. Ahi zongin Laisiangtho tawlkhat ka sim khit ciangin a gilo mahmah dawi pen Satan kiang pan a hihlam ka tel ta hi” ci-in maikhing takin Chadamla in gen hi.

A zi a vuakgawp sungin a zi in amah mit gau lela sa in en a, “Hih bang a nong vuakgawp, kei kua hongsa nahi hiam?” ci-in hawk gawp hi. Khat veivei, a pasal Chadamla a sinsona a ven dong a nu leh a pate kiangah va galtaai hi. A pasal hehna a ven ciangin hong ciaahkik in  khasapna ah hong kihelkik hi. Nihvei tak khasapna sungah a nau sia hi.

Tua bang kawmkaal ah, ni khat, a inn naai aa om Adventist biakinn ah Chadamla hong pai hi. Pastorpa in Jacob thu a hilhna za a, tua thu theih beh nuamlai hi. Chadamla in bel, tua kikhopna in a  nuntakna a kheel ding lamtak ngaihsun kha lo hi.

Tu kuata Sabbath sawm leh thumna sumpi khen khat in  India gam laizang ah a teeng Chadamla’ inn panin tai 20 a gamlaatna mun ah a kilamsaan phualpi lam khit zawh nadingin hong huh ding hi. Hih phualpi pen Southern Asia Division bup ah amasa pen thusinna leh kikhopna phualpi hi ding hi. Hih phualpi pen Chadamla bang pawlpimite leh pastorte  leh division bup aa om Pasian’ nasemte in deih bangin zang thei ding uh hi.

Hehpihna tawh India gam a laizang mun ah a kilam ding phualpi aading leh Pasian’ nasepna a taangzai nadingin thungetna leh na sumpi uh tawh hong huh ciat un.

Ciapteh ding:

· India gam ah mi mak za khat leh sawmthum teeng uh hi. Adventist pawlpi bup ah pawlpimi vekpi awn 1 leh saang 6 (teng 16)  pha hi. Adventist mimal 1 ciangin India mi 870 tawh kikim hi.

Theih Ding: Mai Sabbathni ciangin a zom ngai ni maw.

@@@@@@@@@###############@@@@@@@@@