Zo Phualva Thupuak Vol 07, Issue 15: PASTOR KHAT IN ADVENTIST LAIBU ZUAK CONVERT SAWM

Ki-Jo Moon, Kum 71, Kum 37 sung Sunday Tang Pastor sem hi.  (Andrew McChesney / Adventist Mission)

“Ka Lunggulh Adventist Topa’n hong puak”

Adventist Laibu Zuak nu in ka inn kongkhak ong kiuh aa kipan Seventh-day Adventist (A nung ah SDA ci in gelh) pawlpi ka lunglutna ong kipan sak hi.

Protestant (RC Langpang) Pastor lianpi khat ka hihna tawh  Biakna dang te muhdan tuamtuam te tel nuam in ka zongaa; Presbyterian, Methodist leh Adventist Pawlpi te Laigelhte ka saikak hi. Adventist te Laibu teng khempeuh Ellen G White ie gelh ding danin ka tuat hi. “Banghang in sawtpi aa si khisa hih numei nu nakpi in kinbawl mahmah uh hiam?” ci in lamdang kasa hi.

Tua bang laitak mahin, kei zong ka Pawlpi sungah banghiam khat akisam khat om tawntung ding danin ka lungsim ah om velval den hi. Keisang a Lianzaw Pastor te kiang ah “ Banghang in ih Bible Sangnaupang te Daniel leh Mangmuhna thute kisin sak ngeilo hiam?” ci in ka dong hi. “Daniel leh Mangmuhna thu tam tel khol lo ihhih ciang aa, kisin sak lo hi” ong cihsan hi.

Hih thu ka teltheihnop laitak in, Cult  (A Pharisee vaai) bang aa ka tuat te tawh ka kizom kha hi. South Korea ah Jehovah Witness, SDA leh New Heaven and New Earth cih pawlpi 3 tengpen Cult namte ci in ka ngaihsun uh hi. New Heaven and New Earth tangval khat bang ka va zol vial leh kizol zo dek lo hi. A zumpi uh ah pai in Laisiangtho thuhilhna ka va nei hi. Jehovah Witness te zong zolding ka hanciam hi. Tua teng khit teh Adventist te zong ka nial zawh nading in amau thu zong tawm mah sinzek kul in teh ci in ka khensat hi.

Tua zawh teh Adventist laibuzuak Hee Sook Kim ka inn uah ong pai hi. Adventist te Laibu zuak ahih lam ong kigen teh, tha khat thu in “Topa lungdam mah si’ng maw, Adventist te thu ka hilh nop laitak aa inn ah nong paisak” ci in Topa tung lungdam ka ko hi.

Ms Kim in laihawm pawlkhat ong pia aa, anidang inbel ka paai zel hi. Tutung taktak ciangin “Ka thunial nang khat peuh ka muh khak leh” ci in ka paai kei hi. Hih nu pen a kha thu ah kizom in convert ek ding cih kangaihsun hi.

CULT MAH A HI UH TAM?

Tua teng khitteh, Ms Kim te Biakinn ah va kikhawm leng; ka Pawlpi vua ong kihilh dan mah in SDA te Cult a hi takpi mah tam ci in ka kikhawm nuam hi. Ka va kikhop sin leh ka zi in amau hun geelna laidal kapuak na pan ka kikhop sim lam ong thei hi. Ka zi lah hehsak nuam lo, koi bang in ka kikhawm thei tam maw ci in ka lung buai simsim hi. Ms Kim in Cidamna lam thusinna khat ah ong zawn leuleu hi. “Ka zi zong lunglut kha ding ahih teh, na zotsak ve” ka cih leh Ms Kim in na zawn pah hi.

 Ka zi in bel Adventist te Sermon khawng va ngaih ding ong phal hetlo ding ka theihsa hi napi; Cidamna Lam thusinna in bel ka zi aa dingin Adventist Pawlpi tawh kizopna ding lampi hoih khat ong suak sak hi. Adventist te pawlnuam ahihlam ka zi ka musak nuam hi. An nekkhop khawng ciang a kikhawlh diamdiam dan khawng ka en sak nuam mahmah hi. Ko Sunday Pawlpi ah ahih leh bel, Pastor te pen amailam theithei ah Sabuai tungah limtak in kituam neksak hi. Ahizongin Adventist Pastor te ahih leh amau leh amau in kuang leh sikkeu ding kilak tawm uh aa, a tut nading uh zongtawm khiamkhiam lel uh hi.

Cidamna thupuak in ka Zi’ lungtang khoih neem mahmah napi, Sabbath ni kikhop pih ding bel kingah zo tuan nailo hi. Saturday ni pen Sunday ni aa ka sermon ding uh kiginna ni in kum 30 sung bang ka zat det khat uh ahih man in tua ka ngeina uh ka kheel pak ding uh hamsa lai hi. Adventist te Biakinn anai pen zong inn pan minute 55 bang Mawtaw kihawl veve tham, a Mawtaw koihna(Car park) te uh lah neuthei si, mi inn mai khawng peuh ah zong ih koih hun zong om ahih teh; ka zi in tua te paulap ngeingei ding cih ka patau sim hi. Ko Biakinn ah bel ka zi in Biakinn lutna kongpi mai-ah mawtaw khawlsak ziau, nasemte khat kiangah Mawtaw tawhtang piaphei ziau in, tua nasem te’n Mawtaw koihna ding mun ah na khoihphei sak ziau cih dan hi mawk hi.

Ms Kim in “tua ahih leh lah Adventist Pawlpi lianzaw khat ah Pasian thungai in vapai ni” ong ci leueu hi. Tua in ka lungsim ong linglawngsak mahmah hi. Ko Pawlpi dante ahih leh, pawlpi khat leh khat kizom cih bang om lo. Kalaisai “Wow… Adventists te pen aleitung bup kizop hi uh aive maw, Sabbath School Lesson leh a Biakpiak dan te uh zong kibang khin! Cih ka ngaih sun hi.”

KHA AN SO VITVIT

Daniel leh Mangnuhna thusinna ah ka kihel uh hi. Kei theih tawh kilamdang kasa peuhmah hi. Ko Pawlpi ah zong thucin thutang tampi mah nei napi ung, hih Adventist Pastor pa kha an onglui bel sa vitvit mawk hi.

Thusinna atawp teh tui kiphum dingin ngaihsut piak ong nei uh hi. Ahi zongin ka zi in “Mawkmawk …Nang pen Pastor maimai bek hi lo, pawlpi makaipi hilai” ong ci hi.

A Sabbath kik teh ka tui kiphum ding vai sotto phot in, ka zi zong tua ni ong ngap pha lo in kikhawm zo lo hi. Tua nitak lam mahin, Pawlpi mi pawlkhat inn ah ong pai uh aa ka zi hanthawn uh hi. Tui kiphum ta un ci in ong gen uh teh……

Patau kawmsa in ka zi en phei kawm sa-in, “Tua vai pen thu na ngenngen phot ning in Pasian in lem a cih leh lah ki tuiphum lo dia” Ka cih leh…..

Ka zi in Calendar kisuanna lam en kawmsa in, “ February, ni 4 ni in kiphum leng hoihpen in teh mate” ong cih seisai tak ciang…….

Ka bil nangawn um zo lo phial. A bang a ci aa, tuma kaal 1 lai in zong ki tuiphum ding ong khaamkhaam khat….Tu’n..! Lamdang si..

2017 February kha in ka ki tuiphum uh aa, tua khit teh lungnopna tawh ka kidim hi. Sabbath sim in Sermon te zong ka ngai denden thei ta hi.

Adventist Laibu zuak Pasian nasem nu ka Convert sawm vial leh, atawpna taktak ah a ma’n ong convert zawsop mawk hi. Zoplai ding, Trans.  James Mamang

Khalam Kilamzia (Spritual Formation)

Nungzui hihna ah mipi mai ih tun ma in khalam kisekna neih masak kisam hi. “Pasian aw, keima sungah lungsim siangtho hong piangsak in la, a thak a man ngaihsutna ka sungah hong guan' in” (Late 51:10) cih Kha lam thubul let ih zat kei leh ih nasepna te leitung kipawlna, kihanthotna sangin niamzaw kha ding hi. Christ in, “Kei hong kilapsang leh mi khempeuh ka kiang ka kai ding hi” (John 12:32) na ci hi. Amah lapsang ding a masa pen ahi hi.

Kha lam kalsuanna a dongkhakte:

Mihing gelna leh sepnate ah ih kingak ciang lauhuai a, thungetna leh upna lam ah kiamsak hi. Mikim in hun kikim kinei ciat hi. Ki-ap nang, Lai Siangtho sim nang,  cihte ih tuamsehna in Pasian nasepna tawh kikim a, eima khalam nuntakna ading in thupi hi. Tua hih manin thungetna leh LST sinna hun ding sehtuam kisam hi. “Pasian hilhna nuaia om khempeuh in Pasian tawh lungsim takpi tawh kizopna nei leng, Ama hong hopihna ih za ding hi. Dai taka omna tawh Ama aw siang ih tel zak thei ding hi” MH p. 58)

Ki-ap zia

Lai simna in Pasian tawh kizopna thak suaksak hi. Lai sim ciangin Mrs White gelhte zong nawlkhin ding hilo a, Christian thu laigil kigelhte le zat pah theih ding thu manphate sim ding kisam hi. Thungetna leh Ama thu lungngaih dide-na hanciam ding hi. “Khazih in Ama hun bei kuana a thuakna te, ih mitkha ah suaksak in khat khit khat lungngai ding hi hang. Eite ading in Ama nunna hong pia a, tua in Ama sungah hong lungkip sak in, itna kho sak in, Kha Siangtho tawh kip takin hong khih khawm hi.” DA p.83

Thungetna pen phatna tawh pan ding hi. Zeisu in zingsang tungin thungen (Mark 1:35), zan khua in thungen(Luke 6:12) hi. Ama nasepna ah vangliatna pen thungetna pan ngah hi(Luke 3:21,22). A mailam ading khuamial a sah pen hun in thungetna in lamlak hi(Matt 26:36-46). Minister’s Handbook, Chapter 2 tomlak

Thupilte:

A si theilo om sunsun in laibu ahi hi. Rufu Choate

Pawlpi khat in leitung bup lungdamna thupuak tangkona ah thuk taka leh lawp takin a kihel kei leh hotkhiatna thu a tel taktak lo ahi hi. Ted Engstrom

Pasian in Ama tungah a kinga den thei ding athazawm leh ahatlo te zang hi. Hudson Taylor

Christ Lungdam thu tangkona ah a kihello pawlpi in Lai Siangtho bangin a nungta kei hi. Oswald J Smith

Pasian in a piangthei te a gawm tuah ding hong deih hilo a, a piangtheilo te a mancip bikbek dingin hong deih hi. C.T. Studd

Leitungin a ki-ap missionary te kisam hi. Vantung laibu sungah Missionary lungsim a neilo Christiante kiciamteh lo ding hi. RH, Aug 23, 1892.

Thungetna lo tawh Lai Saingtho sim ding hilo a, A laidalte ih lem ma in Kha Siangtho makaihna ih ngen masa ding hi. Ellen White.

Zo Phualva Thupuak - Vol 07, Issue 15 by DavidLian on Scribd