LAIHILH NASEP (Sangsia te’ Mawkpuak)

LAIHILH NASEP (Sangsia te’ Mawkpuak)

Laihilh nasep ih cih pen nadang nasepte sangin thupi zaw-in, haksa zaw hi. A lunglut lo te’ aa dingin bang naupang laihilh pen thubaih hi dek khia suai lo hi. Tua ahihmanin in ih sang khatpeuh ah, sangsia leh siamah (teachers) asem te pen a lunglut ngiat te bek mah in sem leh hoih bel hi. Sang sia/siamah te in, amau mah tawh aki bang mihing a uk ding uh ahihman in ki pumpiakna lungsim leh deihsak takpi sangsia te’n nei thei leh ahoih pen khat hi. Sangsia te pen leitung a puahpha thei, a kikhelsak thei leh a sia sak thei te ahi uh hi.Tu khanghun ah sangsia te in, sang laibu bekah ki-nga lo-in, ih leitung khantohna te tawh ki dungzui-in, naupangte a pantah theih siam ding pen deih huai mah mah hi.

American Man of Letters a kici Henry Adam in, “Sangsia te’n mihing’ nuntakna ah thunei uh hi” ci hi. Bang hang hiam cih leh naupang khat nuntak khuasak theih nang pen sangsia te’ makaihna tawh kisai peuhmah mah tham ahih man hi. Tua leh sangsia/siamah te’n khasum ngah (khasum sang) na ding bek in sem lo-in ah, bangci makaih/ bang ci laihilh in naupang te pantah leng mi lawhcing ka suaksak thei diam cih ngaihsun bel in aneih ding uh kitang sam hi. Dr. E. A Pires bangin, “Sangsia te din mun (gamtat) bang lianin gam leh nam om hi” ci hi. A cih nopna ah, sangsia te a hoih leh gam leh minam zong hoih cihna hi pah hi. Naupang te in a etteh pipen uh in, a Nu leh Pa (Parents) te uh leh a Sangsia/siamah (Teachers) te hi pi pen den hi. Tua a hihman in nu leh pa leh sangsia te-in naupang te’ etteh taakin ka om hiam cih kisit det ding zong thupi hi.

Sangsia hoih om’ na pen sang hoih hi, kici thei pah lel hi. Tua mah bangin sanghoih lo Exam Result hoihlo cih khawng zong pen sangsia te kicin lah man hi ci’n, ka um hi. Sang hoih om’ na khua pen khangto hi. Bang hang hiam cih leh mihoih tampi tua sang pan in khangkhia sak uh hi. Tua banga khantoh na a omna khua pen teen na’ngin khua hoih (munhoih, gamhoih) ahi hi. Tua bang khua nuam a piang theih nangin sangsia te’n vaipuak (mawkpuak) nei cihna a hi pah hi.

Tu hun ciangin, result hoih pen sang hoih tehna in kizang hi. Leu leu ah, result hoih ih cih zong thupi sam na ve’n a hi zongin education in a tup pen result hoih bek hi khin lo leu leu hi. Sangsia te’n naupang te apat tah na uh ah a thupi pen khat in,  naupang te a pumpi uh a cidam na’ng, a lungsim uh a siangtho na’ng, a khalam uh a thahat na’ng, leh a kiim-le-pam, a lawm leh gual tawh akizop siam na’ng cih bang teng a kileek kimtak in khansuah toh na in apicing ki pattah na hoih khat ahi hi. Lai lam siam lua kisa in distinction in a pass phial uh zongin kham theih guih theih zangin hong om mawk leu uh zong tua pen khantohna hoih kici thei lo hi. Tua man-in, a neutung mah kipat un, naupangte lungsim sungah diktatna, thumanna leh midangte huhnopna lungsim te zong tuh ding ahi hi. A laisin sakna te bek bek hi lo, anuntakna sung amailam kalsuanna zia ding nangawn uh ah sang naupangte lampi man ah khak zawh ding thupi hi.

Sangsia te pen mial lak pan khuavak ah hong honkhia in khantoh na dingin lam hong lakte ahi uh hi. Zahtaak ding leh pahtawi dingin kilawm mah mah uh hi. A hizongin a mawhpuak na uh athupi zahkhat mah in na asem takpi uh hiam? Pawlkhat in na hoih sem nuam lo thei mawk uh hi. Ih gensa mah bangin, sangsia nasep pen nadang tawh kibang lo-in, haksa zaw ahih manin, veina leh deihsakna nei te bekin lunglut takin sem leh hoih hi. A lunglut lote adingin baih lo ding hi. A hizongin a lunglut leh veina a neite adingin lawphuai mah mah nasep hi leu leu hi. Sang sia/siamah asem te pen athanuam ding leh kuhkal ding kitangsam mah mah hi. Missionary nasep mah tawh aki bang (a kikim) ahi hi. Midangte’ aa dinga thupha suah theihna khat ahi hi.

Sang khatpeuh ahoih lam-in, akhantoh theih na’ngin sangsia/ siamah te-in mawhpuakna lianpi nei masa uh hi. A picing khinsa te sangin, sang naupang ahi laite tungah lam-etna tam zaw hi, cih pen sangsia te’n phawk det ding thupi hi. Tulai taka sang naupang te pen den cianga ih khua, ih pawl, ih gam leh minam makai dingte ahi uh hi. Tua ahih manin, sangsia sem te-in, sia hoih (deihsak na leh veina nei) ahih ding ih hoih bel ahi hi. Tua bang hi leh ih sang te pen sang hoih hong hi pah ding hi. Sang hoih omna khua pen mi hoih mi lawhcing pianna hong hi ding ahihmanin naakpi takin khantohna hong om ding hi, cih ka um hi.

A kuamah ciat tungah Sabbath Hun-nuam! Happy Sabbath!

Laikung,

PAU LAM DAL ( A Facebook ah na hawh sak un).

Tonzang

November 7, 2014

Etkak Laibu simte:

Alicia S. Bustos, Natividad I. Malolos, Angelina E. Ramirez. Introduction to Psychology (3rd Edition). Quezon City 1113, Philippines: Katha Publishing Co., Inc., 1999.

Benjamin M. Spock, M.D. A Better World for Our Children: Rebuilding American Family Values.Washington, D.C.: National Press Books, 1994.

Ellen G. White. The Fundamentals of Christian Education. Nashville, Tennessee: Southern Publishing Association, 1923.

George R. Knight. Philosophy and Education (2nd Edition). Barrien Springs, Michigan: Andrews University Press, 1989.

Prema Gaikwad, “The Artistry of Teaching with Multiple Modalities,” Flags (The Official AIIAS Magazine),October 2013.

Ted N. C. Wilson, “Being Transformed: Why Adventist Education Exists,” Adventist World, August 2013.