Zomi Sabbath School LESSON 12: TOPA’ NI

LESSON 12: TOPA’ NI    JUNE 10-16

SABBATH (SATURDAY) NITAK LAM     June 10

SIM DING TE: 2 Pet. 3:1, 2; John 21:15-17; 2 Peter 3:3-13; Late 90:4; Matt. 24:43-51; 2 Peter 3:14-18.

Kamngah: “Hih bang zia in na khempeuh kisusia ding ahi khit nung sang, bangci mi na hi ding uh kilawm ahi hiam?” (2 Peter 3:11, ZIV)

A bei sa hun lai in Pasian om a umlo mite mimuanhuai lo te in ki ngaihsun aa, zong a lauhuai mi in kiseh hi. Bang hang? Thu tom pen in: Pasian om lam a umlo khat aa dingin mailam ah thukhenna cih omlo ding aa, a sep bangbang Pasian mai ah kisit ding leh a dawng kullo ding ahih man hi. Hih tawsawn thu omlo ahih manin, mite in a sia a sep ding uh baihsa uh hi.

Tua bang ngaihsutna te tu hun iin khanglui vai ahi phial zongin, tua bang ngaihsut theih ding aa ahang leh ngaihsutna te pen a om den mah ahihi. Mi khat peuh in ahoih a sepna dingin thukhenna a lau sese kullo hi. Ahi zongin Pasian mai ah gamtatna bang pulaak kulna in ahoih nuntak na ding hong tawsawn zaw hi.

Ih muhsa bang mah in, Lai Siangtho gen aom mah bangin Peter in siatna a bawl mite in Pasian mai ah thukhenna thuak ding hangsan takin hong vauhilh hi. Thukhenna thu a genna ah nitawpni, thukhenna, Jesu nihvei kumkikna leh leitung le a sung aa om na khempeuh a kihaltum mang na ding thu Peter in hemgenlo, langbai genlo in teltak in gen hi. Ih vekpi in mimawh ii hihna Peter in hong phawksak ban ah, tua bang in kisusia ding ahih khit nungsang “bang ci mi na hi ding uh kilawm ahi hiam? (2 Peter 3:11, ZIV) ci iin hong to hi.

NIKHAT NI (SUNDAY)      JUNE 11
THUNEIHNA GUI

Pawlpi’ tuah khak ding a lauhuai thuhilhna te Peter in hong vauhilh khinzo hi. Suahtakna kamciam napi Chris sung aa suahtakna kamciam tawh kileh bulh aa mawhna sila hihna ah a tunpih kik mite’ thuhilhna te ii kidop ding hong hilh hi. Dahhuai thu ah, pawlpi phut ding a lauhuai thuhilhna hi bek hilo hi. A dang alauhuai khat zong hong pai lai ding hi. Ahi zongin, tua vauhilhna thu hong gen ma in, Peter in thu dang khat hong gen masa phot hi.

“Kong it lawmte aw, tu in hih kong laikhak a nihveina ahi hi. A nih in ngaihsutna siangthotak tawh hong lawpsak kik dingin kong phawksakna ahi hi. A beisa hun a kamsang siangthote thugente le na sawltakpite uh tungtawn a i Honpa leh Topa in a thupiakte na phawk kik ding uh ka deih hi” (2 Peter 3:1,2). Hih tengah laisim te in a phawk dinguh Peter in a deih bang hiam? John 21:15-17 zong sim in. 

________________________________________________________________________________________________________________________

2 Peter 3:1,2 sungah a kamsang siangthote tungtawn in humop kammal te hong pai lam Peter in phawk ding deih hi. Tua hi aa, thukhun lui thuhilhte kawk kik hi. “a kicianzaw kamsang te thugen” (2 Peter 1:19) neih lam phawkkik sak nuam hi. Upna thute Pasian kammal bek ah akingak lam telsak nuam hi. Thukhun thak ah Thukhun lui a kisaplohna leh a thupi loh zawkna bangmah hilhna omlo hi. Tua sangsik in, Thukhun lui hilhna te in Thukhun thak kiciansak zaw aa, Jesu thu kitelsak zaw kan hi.

Thudang om lai aa, Thukhun lui kamsang siangthote bangmah in Peter zong Topa leh Honpa’ sawltak khat hihna tawh a thuneihna telgen hi. A nasep in Topa kiang pan sapna tawh asep ahihna ciantak in thei hi. Kisuanglo tak leh hangsan taka aa a thugen ngamna in a kammal te a paina gui/bul a tel mahmah man hi.

Eite ngeina ngaihsut tawm leh piaktawm hang tuamtuam te tungah hilo iin, Pasian’ kammal tung bek ah ii nuntak guipi a kingak ding banghangin thupi hiam? (A dangdang sangin, banghang in Pasian kammal gen ni sagih Sabbath keemcing in siangtho sak ii hiam?)

NINIH NI (MONDAY)      JUNE 12

MI ZAHPIHHATTE

Kamsang siangthote thugen leh i Honpa leh Topa in a thupiak te phawk ding hong gen khit ciangin (2 Peter 3:2), Peter in a gennop vauhilhna hong zom hi. Hih thuhilhna lauhuai lua hi kha ding hi ven, a at ding thu thuneihna bul a tel ding uh deih masa hi. 

2 Peter 3:3, 4 sung sim in. Chris kumkikna a muangmawh mite’ nialgen thu bang teng om hiam?

___________________________________________________________________________________________________________________________________

Suahtakna khial kamciam te leh Chris nihvei kumkikna muangmawh umlo te kibatna ciang om hi. A masa pawlte in “pianngei siangtholo lunggulhna zui” (2 Peter 2:10) uh aa, Chris nihvei kumkikna muangmawh aa nial te in “amau gilo lunggulhna zui” (2 Peter 3:3) uh hi. (Mawhdim lunggulhna in thuhilhna maanlo hong tun thei na hi gige mawk mate, ahi na le?). 

Mi zahpihhatte in, hong vauhilhna ah, “hong pai  kikna ding ama kamciam koi ah om hiam?” (2 Peter 3:4) ci in dong ding hi. Tua bang tawh, kum tampi sung Christian upna ahi a sawtlo aa Jesu nihvei hong kumkik ding thu to ding uh hi. Tua bek lo in, nial theihloh Christian tampi te sihkhitna thu tawh a pian ngei bangin na khempeuh a ngei in om toto ding ci uh hi. 

Hih dotna pen a dot huai khat hi veve hi. Ellen G. White gelhna ah, a siangtho Enoch na ngawn in “midik te leh migilo te si khawm ding uh aa, a nuntakna beina” (Tuanpupa te leh Kamsangte, laimai 85) mu aa, tua thu in a lungbuai sak hi. Tuiciin tun ma in Enoch nangawn tua tawh buai ahih leh kum tul tampi khit hun nunung aa nungta ei te buaipih mahmah kha ding hi hang. 

Ei Seventh-Day Adventists te ee? Ih pawlpi min mahmah Jesu nihvei kumkik lametna lak ngiat. Tu dong ciang lah hong pai kik nailo. Peter genkholh lian mah bangin, mi zahpihhatte tuak petpet hi hang.

Nangma upna tungtawn in Jesu nihvei hong kum nailohna bang ci ngaihsut na hiam? Na dawnna Sabbath ni ciangin class sungah hawmsawn in.

NITHUM NI (TUESDAY)     JUNE 13

KUM TULKHAT NIKHAT BANG

2 Peter 3:8-10 ah, mi zahppihhatte nialgen thu Peter in bang ci dawnkik hiam? Tu ciang dong Jesu hong paikik nailohna ii telna ding ama thugen in hong bang ci huh hiam?

___________________________________________________________________________________________________________________________________

A kikhello leitung pianngei thu ah Peter in dawng hi. Leitung pian khit bangmah kikhello a ngei bangin om cih adiklohna thu a thungai te phawksak hi. (Pasian kammal ah kinga aa a thuhilhna phawk in). Siatna a liat mahmah hun in Pasian in leitung tuitawh a suksiatna thu (2 Peter 3:6) gen hi. Tua tuiciin in tuni dong ii muhtheih kilamdanna te leitung ah hong puak tham hi. Suksiat kikna ding pen tui tawh hi nawnlo aa mei tawh ahih ding Peter in gen lai hi (2 Peter 3:10).

“Pasian aa ding ni khat pen kum tulkhat bang aa, kum tulkhat pen ni khat” (2 Peter 3:8) a bat na thu zong gen hi. Hih bangin a gen ciangin, Later 90:4 aa “Nang muhna ah kum tulkhat in a beisa ni khat ahikeh zan a vilkhat bang bek” ci langsak kik hi. Thu dang khat in, Pasian hun sim dan leh eite hun sim dan kibanglo ahih manin hun tawh kisai thukhenna ah kidop huai mahmah hi. 

Mihing te muhna ah Jesu hong kumkik pen a zekai tawh kibang hi. Ahi zongin mihing te muhna bek pan i et man hi zaw hi. Pasian a ding zekai cih om ngeilo hi. A taktak in Peter genna ah Pasian in hong thuak keeikaai aa hun hong piakbeh hi zaw lai hi. Kuamah ksiat ding Pasian in deihlo hi (2 Peter 3:9). Mi tampi te kisikkikna hunpha angahna ding Pasian in behlap hun hong pia hi zaw hi. 

Ahi zongin, Pasian thuak keeikaaina pen utbang aa om na ding hunpha i hihsak loh ding thupi hi. Zan aa guta te a pai mah bangin upmawh loh in Topa’ Ni hong tung ding hi. Guta te simtham tak in zankim in hong pai uh hi. Topa’ Ni pen guta bangin hong tun ni ciangin, mi khempeuh in thei kim ding hi. Peter gen bangin, “aw ngaihpi tawh vante mangin, nate khempeuh tui mang ding hi” (2 Peter 3:10). Peter in Paul gen tawh ki bang lian hi, “En un, kong angvan hun hi tu hun hi aa, tu ni in hotkhiatna ni hi” (2 Cor. 6:2).

NILI NI (WEDNESDAY)     JUNE 14

TUA LEH BANG?

Tangvalno khat in a nu kiang teci pan ding hanciam hi. Jesu sihna leh kumkik ding kamciam te gen hi. Teltak in a nu kiang gen kisa in amah leh amah siam kisa in kipaak mahmah hi. Jesu leh a kumkikna ding thu a gen aman ciangin a nu in amah en kawmsa in, “tua leh tun, tua thu tawh kei bang ki sai ka hiam?” ci mawk hi. 

2 Peter 3:11-13 sung sim in. Peter in “tua leh tun, tua thu kei tawh bang ki sai” cih dotna bang ci dawn hiam? Matt. 24:43-51 zong sim in.

__________________________________________________________________________________________________________________________________

Ih gensa mah bangin, i pawlpi min Seventh-day  Adventist mahmah in Jesu hong kumkik takpi ding ci i upna hong langsak hi. Thuhilhna pen akipatna hi aa, Jesu hong kumkiklo hi leh i upna leh kamciam te khempeuh manneilo suak ding hi. 

Ahi zongin Matthew 24:43-51 sungaa nasem gilo bat ding lauhuai mun ah om samlo hi hang. Gentehna sung aa nasempa bang in siatna bel bawlkha lo mai thei, tua gennuam bel hi pah samlo (a thu in, gentehna hi lel sam). Hih gentehna hong vauhilh nop taktak pen in, ii nunzia niamsak khak ding, a diak in midang te kizoppihna ah leh ii Topa’ hong paikik ding ii upna kiam aa leitungmi te ii bat khak ding hi pipen hi.

Tuma hi ta leh tuhun hi ta leh, Chris hong kumkik ding nisehkholhna te ii tuak kha den hi. Seventh-day Adventist te aa dingin Chris kumkik ding nisehkholhna tua zahpi in lauhuai khollo zaw hi. Tua te sangin, ni le kum te hong bei zel aa kumkik ding kamciam te ii ngaihsutna ah mun tawm la semsem ahihna in lauhuai lua hi. 

Hih leitungah sauvei om semsem le hang, kumkikna ding tawh ki nai semsem hi hang. Thu dangkhat ah, leitungah sauvei om semsem le hang, hong kumkik ding a gamla semsem bangin ngaihsun ihih manin ii nisim nuntakna hong huzaapna tawm semsem thei hi. Lai Siangtho in hih bang aa hanciam nopna a khaktan thei ngaihsut khak ding hong vauhilh hi. Peter hong gen mah bangin, Zeisu hong kumkik ding aa eite in thukhenna thuak ngeingei ding ihih leh, Pasian zia le tong tawh kituak siangtho nuntakna nuntak ding Christian te kilawm hi (2 Peter 3:11). Ahun ding ki theilo hi mah tase leh, kumkikna thutak in eite tu laitak nunzia hong huzaap ding kisam hi.

Kumkikna thutak in na nisim nuntakna leh ngaihsutna ah koi bangin huzaap nei hiam? A om leh, na nuntakna leh na upna thu hong bangci telsak hiam? 

NINGA NI (THURSDAY)     JUNE 15

A NUNUNG NGETNA

Peter in a pat pan hong gen den ahi migilo te khialhna ah lampial loh ding kidop ding leh siangtho nuntakna tawh kalsuan ding thu tawh a laikhak mahial hi (2 Peter 3:17). 

2 Peter 3:14-18 sung sim in. Peter in kua tungah ngetna bawl aa, tua ngetna in hong hilh nop bang hiam?

__________________________________________________________________________________________________________________________________

Peter in a lai khak a mahialna ah ii sanggam it Paul laikhak bangin cih thu lunglut huai hilo hiam (2 Peter 3:15). Paul in zong siangtho nuntakna neih na ding hun manpha te zang aa, khamuang tak in kumkikna ngak ding a kisapna thu na gelh khinzo hi. (Rom 2:4; Rom 2:18; Phil. 2:12).

Christian pawlpi masa lai in Paul lai at te a ki thupi ngaihsut mahmah na thu Peter lai at na pan in kimu thei hi. Peter in thukhun thak sung aa ii neih Paul laikhak khempeuh gen maw, pawlkhat bek gen cih ii thei kei hi. Bangbang hi tase leh, Paul lai at te a kithupi ngaihsutna Peter in hong lak hi.

A tawpna ah, Paul lai at te Lai Siangtho dang tem ah bangin ki lehkhaih thei ahihna hong gen hi. Greek kammal grapha a khiatna in “lai at” hi aa, ahi zongin hih teng aa a zatna ah Moses leh kamsang dangte at bang mah in “a siangtho lai at” ahihna thu zong kimu thei hi. Paul laikhak te thukhun lui Lai Siangtho mah bangin a muanhuai ahi hi.

uahtakna kamciam sia maanlo te thu ii kupsa a om mah bangin, suahtakna leh hehpihna thu Paul lai at te mawhna gamtatna dingin a kizatkhialh pen ahi thei thu hi. Upna hang aa dikngahna thu Paul in nak limgen pha diak hi (Rom 3:21,22), ahi zongin a lai at te in mawhna bawlna ding phalna (license) pia hetlo hi (Rom 6:1-14). Paul mahmah in hih upna tawh dikngahna thu a gen ahilhna hangin a telkhial te nakpi takin na buaipih hi. Tua hi aa, “amau mah a kisia sak tawm” dingin tua bang aa thu lehlak thei te lauhuai zia hong vauhilh hi (2 Peter 3:16).

Tu laitak in, Zeisu Chris in nei ding aa hong sap nuntakna bang na neih theihna dingin hong huh thei bang teelna, khentatna te na bawl thei diam? 

KIGIN NI (FRIDAY)      June 16

NGAIHSUT BEH DING: Eite ngaihsutna ah kumkikna pen zekai lua khinzo tawh ki bang hi. Hih bang ii ngaihsut khak ding Zeisu in na thei khol khin lua ahih manin, kidawm taka a kiging den kei leng bang teng piang thei cih gentehna tawh hong vauhilh khinzo hi. (Wednesday ni aa sinna pan) Matthew 24:45-51 sung aa nasem minih te gentehna en in. Nasem tegel in a topa ciahkik ding lam en tuak uh hi. Ahi zongin a ciahkik ding thu ah a ngaihsutna uh ki bangle hi. A topa bang hun in tung ding theilo ahih manin khat a kigingsa in om den hi. Akhat zaw in a topa kai lai dingin ummawh ahih manin siat gamtatna ding hunpha ngahna in zang hi. “Eite in Ama hong kumkik hun ding theilo ii hih manin vilngak ding hong kisawl ahi hi. ‘A topa uh a pai ciangin tua bang a a ngak laitak a tuah nasemte hampha ding uh hi’ (Luke 12:37). Topa’ kumkik ding a vilngak te in awltak (bangmah semlo) aa ngak ding hilo hi. Chris kumkik ding a ngak te in Topa zahtak sak ding aa, mawhna thu ah thukhenna lausak ding ahi hi. Ama hehpihna nialna tawh mahna bawlna te hilh ding ahi hi. Topa angak mite in thumanna tawh a kha te uh siansuah ding ahi hi.– Ellen G. White, Khangcin Lungdeih, laimai 634.

KIKUP DINGTE:

1. Class sungah Kumkikna tawh kisai Monday ni dotna kikum in. Bangthu hangin Chris hong kumkik nailo hiam? Khat le khat dawnna pan bang na sin kha hiam?

2. Ngeina, paulap, leh nuntakzia te pan hilo in Lai Siangtho tung bek ah kinga Seventh-day Adventist te ii upna, thuhhilhna leh paizia te bang te hiam?

3. Albert Einstein in hun pen a kikhel ngeilo ahihna thupi khat leitung ah thei khia hi. Tua in, nang koi ah om cih leh bang zah manlang aa gamtang cih tung aa kinga aa, nang hunhuam in midang khat hunhuam tawh kilamdang kha ding hi. Hun thu pen telzawhloh zah in lamdang mahmah hi. Tua thu in Pasian aa ding hun leh ni te eite hun leh ni tawh a kibat loh zia, adiak in Chris hong kumkik nailoh na thu ah hong koici telsak hiam?