Zo Phualva Thupuak - Vol 07, Issue 09: Will Satan Acknowledge his Sins?

Satan in a mawhnate a theikik kha ding hiam?

Amaute a kisuksiat ma-in Satan leh a nungzuite in a mawhna te uh a theikik kha ding uh hi cih Lai Siangtho in genna a nei kha hiam?

Lai Siangtho kammalte ih kancian ciangin a laimal ahi a, tua thu tawh kisai genna ahi zong om leh, siang takin lak sensen thei ding hi hang. Tua banga laimal kician sinsen a om kei leh zong, laimal pawlkhat kaikhawm in, a laimal paizia leh a thu luanzia tawh gen kop leng, ih lunggulh thu bultut ngah thei ding hi hang.

Hih tawh kisai in Lai Siangtho mun ih muh theih khat om a, “tua Jesu min ah vantung, leitung le leinuai-a om khempeuh khukdinin, leii peuhmah in, ‘Jesu Christ, Topa hi,’ ci-in pulak dinga, Pa Pasian minthanna ahi ding hi." Php 2:10,11. Hih tawh kisai a thu luanzia en suk ni.

1. Hun tawp ah piang ding: Philippi 2:6-11 sung ih et ciangin Zeisu mihing in hong suak ma(Php 2:6), mihing in hong suak laitak(aneu 7 le 8), Singlamteh tung A sihna(aneu 8), Pa in Amah a lapsangna(aneu 9) le na khempeuh Ama nuaiah ong tunkimna thute ahi hi. Hih hun tawp vai pen Ama ie hotkhiatna nasep kizawh siang hun leh khuavan nuai khempeuh a kidamsakna tawh kizom hi.

2. Vantung a mite kihel: Vantungmite leh vantung a om a nungta khempeuh in Pasian thokhom mai-ah kun in, Ama ciimna leh minthanna dim lampi tawh Ama mite a kihotkhiatnate hangin Pasian a phatna uh John kilak hi. (Kil. 7:11,12). Amaute in vantung thukhenna ah teci pang uh a, siatna tungah Pasian thukhenna dik hi cih pulaak uh hi.(Dan. 7:10; Kil. 16:5; 19:1-10).

3. Mihingte kihel: Khazih in Topa ahihna leh Pasian min phatna ah mihingte zong kihel hi cih Paul in gen hi. Hun nunung thu hilhkholhna en leng, Pasian in Ama mite in Amah bia in pahtawi ding a lunggulh thu kilangh a (Late 95:6,7), leitung gam khempeuh le minam khemepuhte kumpite in Amah phat dingin kisam uh hi (Late 148:11). Tua bek hilo in, piansak nate khempeuh in Piangsakpa leh Honpa phatna lasakna ah kihel ding hi( Late 148:7-10).

4. Dawite kihel: “Leinuai-a om” cih laimal pen tu khangthakte bil ah tuamdang kha ding hi, himah leh tanglai in dawite gam, zinmang tual lenna genna in kizang hi. A tawpna taktak ah dawi gilo te in zong Pasian leh Zeisu bekmah phat thamcing leh pahtawi thamcing hi cih hong thei ding uh hi cih Paul in a gen pha nuam ahi hi.

Paul in dawite thu a gen tawh kizawitawn in Israel tangthu sungah a lunglut huai tangthu khat om hi. Johua 7 sungah Achan in Pasian mai leh Israel mipi mai panin a mawhna te a sel sim thu kigelh hi. Limtakin a kikancian khit ciangin, mawhnei pa kithei a, a mawhna leh a thuak ding thaman te maingat in om hi. Kha le lungsim a suahtak theihna ding in sihdan a kipiak madiak in Joshua in, “Ka tapa aw, Israel Pasian TOPA minthangsak inla, amah phatna puak in. Na hihsa hong gen in, kei tungah hong im kei in,” (aneu 9) na ci hi.

Hih lai-ah, phatna le pahtawina Topa puak ding cih ciangin Achan in amawhna te kitel a, Topa thukhenna in dik in, thuman hi cih a pulakna hi. Hih thu ah mawhmaisakna ngah nading a mawhna pulakna hi lo in, a mawh mi-in tua thukhenna dik hi cih a pom nading ahi hi. Mawhnei mipa tungah sihdan a kipiak ma-in Pasian’ min kisiangtho sak masa hi.

Hun nunung a dawi gilote omdan ding pen Achan gamtat dan tawh kigenteh thei hi.  Hih dawi gilote in Pa Pasian, Tapa Pasian le Kha Siangtho Pasian bek biak thamcing le phat thamcing hi cih a pulak hun ciangin thukham tawh kisai nasepna kikhak ding hi. Amaute in amaute tunga thukhenna in dik hi ci ding uh hi.

Ama gal lianpen ahi Satan ngiat in, Amah pen itna leh thumanna Pasian hi cih a theihsak ding pen Pasian lunggulh mahmah khat ahi hi. A ciim piansakte in Amah pen Pasian hilo hi ci ngei nawn lo ding uh hi. Amaute khempeuh in a hudik nunung pen a beima in Ama tungah pahtawina pia ding uh hi.

? David Lian, Ref: Biblical Research Institute; Lai Siangtho: Zokam International Version(ZIV)

Thupilte:

S Huih khempeuh kumpipa in a thahatna khempeuh thungetna ie vangliatna do nadingin zang leh kilawm ei! Andre Bonar

S Hih khuavan nuai ah letmat khat kiuli sung, Second khat a kikhin sung nangawn in panpih neilo(neutral) khat beek om lo a, Pasian in Keima a acih khit lim in Satan in keima a hi ci-khem pah lian hi. C S Lewis

S Na tate in thuman lampi a totna ding un na hilh ding pen na thudon loh laitak in, Satan in  thudon lo in na um hiam?  Hilo; thunget ding na hilh kei leh, samsiatna te gen in, zuau hong gen ding hi. Khaici na tuh kei leh tanghum hong po ding hi. John Flavel

S Pawlpi sungah Sa lah sa lo, vot lah vot lo a om pawlpi mite leh siate a om lel leh pawlpi bang zah phut khin na hiam cih Satan in ong awlmawh ding ka lamen kei hi. Charles Spurgeon

S Pasian ading a zat taak ih hih semsem leh, galpa do nop pen ih hi semsem ding hi. Zac Poonen

S Satann in zong na lamdangte nei hi cih phawk ni. John Calvin

S Pasian le Lai Siangtho lo in leitungah thukhenna man om thei lo hi. George Washington