“Leo’ Gamh” Khen Nihna (April 22, 2017)

Sim Ding Hi Lo, Geen Ding!

April 22                                                                                           Gabon Gam

“Leo’ Gamh”  Khen Nihna (Agen: Bienvevu)

        Bienvevu’ Ki-aapna:”Topa Pasian aw, hau nuam keng. Nong piak bangbang deih ing. Nangma’ gam aadingin mitampi ka phaakzawh nadingin hong huh in”.
        {Ciapteh Ding: Nung Sabbath ni-in Bienvevu in Pasian’ sawlna mangzaw ding maw, a nasep hoih seem suakzaw ding cih a teel nading thu hong gen hi. Tuni Sabbath ni-in Gabon gam ah a kiphut Seventh-day Adventist pawlpi’ nasepna a huh theih nadingin Pasian in nasep a hoihzaw a vaihawmsakna thu hong gen leuleu hi.}
Na khempeuh a thak in ka kipatkik ding kisam leuleu ta! Kei aadingin a hoihpen ahi dingin ka ngaihsut ka nasepna pan ka tawpta hi. A hoih ka nasep saangin Pasian’ thu man ding teelzaw kahih manin khial ka kisa kei hi.  Ahi zongin ka pa in hong sihsan baih ahih manin ka nu vaak ding masuan lianpi ka nei hi.
“Topa Pasian aw, nasep khat kisam leuleu ing. Nangma’na ka sep theih nadingin nasep khat hong vaihawmsak in,” ci-in thu ka ngen hi.
A Lamdang Mangh Khat
Zaan khat, thu ka nget khit ciangin kalum a, a lamdang mangh khat ka man hi. Biakinn sungah ka din laitakin papi khat in hong hopih hi. “Pawlpi mi nahi hiam?,”ci-in ka dot leh, “Hi keng”, ci-in hong dawngkik hi. Ama’n hong hopihpih aa, kei lah ka vai tuamtuam tawh buai kahih manin ama’ hong gen thute ka za meelmeel kei hi. Tua papi in a hong hopih khit ciangin paikhiat sawm hi. Tua khit phetin Lai Siangtho sung aa Jacob kiangah vantungmi khat a hawhna thu ka phawk hi.  Jacob in tua vantungmi in thupha a piak mateng a khah kei hi. Hong hawh papi pen vantungmi hi dingin ka um hi. “Hehpihna tawh hong paisan ken,” kap in ka kho hi
“Bang deih nahi hiam?” ci-in papi in hong dong hi. A liangko tung ka et leh sum lom lianpi khat leh a tamman mahmah mawtawte, innte leh puansilh niikteente ka mu hi. Tua ciangin, “Ka hau nuam hi,” ci-in ka dawngkik hi.
Tua papi in dah maai tawh hong en a, “Nang kong piak ding om mah hiven! A ngah dingin na kilawm naaikei hi,” hong ci hi.
“Bang hong pia ding nahi hiam?” ci aa ka dot leh hong dawnkikna ka za kha nawnkei hi. Banghanghiam cihleh kamanghmatna pan ka khanglo ta hi.
Thakhatthuin khukdin in, “Topa Pasian aw, ka hau nuam kei hi. Nong piak bangbang ka deih hi. Ka innkuanpihte leh kei hong hanthawn dingin ka vengpa uh nong sawl lungdam lua ing.  Tu-in kei zong midangte kiang va phaa nuam ing.  Nangma’ gam aadingin mi ka phaakzawh nadingin hong huh in,” ci-in thu ka ngen hi.

A Thak Hunphaa
Lunggulhna tak tawh thu ka nget khit a sawt loin, video lam leh maanzaihna lam sin ding ka kipan hi. Hih pilna/siamnate in pawlpi sung Pasian nasepna khangtosak ding hi cih pen ka tel mahmah hi. Ahi zongin tuni ciangdong tua siamnate kuamah in sin lo uh hi.
“Topa Pasian aw, nong hehpihna hangin hih ka siamna tawh pawlpi ka huh ding hi,” ci-in thu ka ngen hi.
Maanbu (camera) khat lei in pawlpi nasepnate leh kiteenna maante ka zaih hi. Ka ngah summeet tawh maanbute leithuah in mi ka cialbeh hi.
Pawlpi’ nasepnate leh lasaknate video ka zaih a, gamsung limh taang thei thuthang (TV) ah ka suaksak hi. Gabon gammite in pawlpi taangthu hong theih seemseem nadingun TV ah ka suahsak theih pen nasepna ah hong kipawl nuam uh hi. Ka lawp mahmah uh aa, ahi zongin, buaina lianpi khat ka nei uh hi.
Khangnote kikhop theih nadingin huang sungah inn lian ka neikei uh hi. Khenneu tuamtuam in ka kikhen uh a, a mimal in khangto hanhan ka hih manun ka inndeite vuah ka ta nawnkei uh hi.
Tu kuata Sabbath sawm leh thumna sumpi pawlkhat tawh khangnote kikhopna phualpi khat kilam ding hi. Tua ciangin ka veengte kiang uh leh saangpi huangsung aa saangnaupang Adventist a suak naailote a tam seemseem ka vaphaa thei ding uh hi.
Hehpihna tawh hih a kilam ding phualpi aadingin hong huh un. Tua baanah Topa Jesu hong itna leh hong paikik baih nading lungdamnathu ka genkhiatna uah Topa Pasian in ciimna leh thuakzawhna hong piak nadingin thu hong nget sak un. Lungdam lua!
@@@@@@@@@@@@+++++++++@@@@@@@@@@@@