Kumkikna Lamen Innkuan - Khen 11na (Azom)

THUKHEN 11

Tate—Khangno Koppihte

NU LEH PA PIAKDING PAHTAWINA

Nu leh pa tunga Tate Leeiba.—Neutung panin cingin, acinat uhciangin akem nu leh pate tungah tate in lungdam leei ihba hi. Amaute adingin nu leh pa in lungkhamna tampi athuakna tate in phawkding ahi hi. Tate lampi maanah akalsuan dingin nu leh pate in theineih pen hi. Tate khialhnate mu uha, tua in lungsim nasak mahmah hi. Nute khitui luangte leh Pasian’ tungah amaute adinga athungetnate muthei uh hileh nute khuisatna te zathei uh hileh, akhialhnate uh pulaakin mawhmaina ngen ding uh hi.1

Tate kum acin ciangin thumaan takin nasemin lungsim sia paailo in, zongsatna sia neilo in akem nu leh pa kipiakna manneisa ding uh hi.2

Mi Khempeuh akhih Thupiak Khat.—“Pasian hong piak leitungah nakhan uh asau nadingun nanu napa nazahtak un.” Hihin kamciamna tawh akipia thukham ahi hi. Neulai, khangno hun, khangham hun leh teekhun dongin ahong khih thukham ahi hi. Nu leh pa azahtak lodingin tate aki-awnghawh theih hun omlo hi. Hihin tanu tapa te akhih tavuan hi a, thumaante tungah Pasian in ahong piak hih leitangah khansau in ihnuntak theih nading kamciam ahi hi. Awlmawh thamlo thu hilo hi. Hih thu in thupi hi. Thumanna tungtawnin hih kamciam angahding ih hi hi. Thumangte in Pasianin ahong piak hih leitangah kumsawt nungta ding hi. Athumanglote ahileh, kumsawt nungta lo ding uh hi.3

Midangte tungah akipialo itna leh zahtakna pen nu leh pa tungah nakipia hi. Pasian mahmah inzong tate akemdingin nu leh pa nasawla, tate aneu hun lai-in Pasian’ tangin tate adinpih dingin kiap hi. Nu leh pa’ thuneihna anialte in Pasian’ thuneihna anial uh ahi hi. Thukham 5na in zahtakna pia dingin tate kikal beklo-in, itding, khoiding, vangik puakpih ding, avang uh kepsak ding, leh ateek uhciangin hehnem leh panpih ding uh hi.4 Ama’ kammal sungah acianmah mahin agen tavuan neu khat peuh alangpante Pasianin khangto sak theilo hi. Tate in nu leh pa tunga abawl ding uh tavuan ah hi. Leitunga anu apate azahtak theilotein amaute a it Piangsakpa zahtak lo ding uh hi.5

Tate in thu-umlo nu leh pa nei-in, amaute ngetna in Christ ie deihna tawh kilehngat hileh, tuaciangin ahaksa ahiphial zongin, Pasian muang zaw in, nungzui thupiang dingte Pasian tungah ap ding uh hi.6

Mitampi-in Thukham 5na Palsat.—Hun nunung sunga tate in amaute thumanlohna Pasianin theihsak a, leitungbei hun naita ahihna limdingin kizang hi. Khangnote lungsim Satanin abit phialin uksakta ahihna kilang hi. Akum tamte zong, kizahtak nawnlo hi.7

Thumaan thei akisa tate tampite in apiakding uh nu leh pa zahtakna leh ngaihna alah ding uh lak zolo leh amaute lungkhamna panin domkang ding nungngat uh hi. Christian akici tampite in “Nu leh pa zahtak un” acihin bang gennuam hiam, cih zong theilo uh hi. Tua hangin “Pasianin ahong piak leitangah nakhansau nadningun” acih zong tawmno bek theiding uh hi.8

Hih langpanna khangmite in kipattahna leh thuhilhna tam ngahlo uha, nu leh pa tungah atavuan neihlam uh zong theilo uh hi. Nu leh pa in tate tungah atamsem na sepsak napi-in, tate in lungdamna leh zahtakna pia theilo uh hi. Akingek leh akiphat tate in lamen tektek uha, alamet bangin angahloh uhciangin lungkia uh hi. Amaute nuntak sung tawntung tua lungsim mah paai ding uh hi. Cimawh ding uha, mi’ huhding bek lamen ding uh hi. Akilangpan ciangin, nupi papi asuak khin phial uhzongin, amaute mite in bawlsia hi, ci in ngaihsun ding uh hi. Aleitung nuntak hun khempeuh hibangin buai thapai ding uh hi. Amaute gikna amau mahin pua zolo dinga, thumin tauin, asep khempeuh uhah kilawmna ngah kisalo ding uh hi.9

Alungdamtheilo Tate ading Vantung Omlo.— Pasian’ kammal atheithei lodingin Satanin khangnote lungsim bum sak hi. Atheihtheihna sazangte mawlta a, sawltakpa thuhilhna sang theilo uh hi: “Tate aw, Topa sungah nanu napa’ thu namang un; tua-in kamciam tawh akithuah thukham masa hia, nang adingin thupha hiding, leitung (thak) ah nakhansau ding hi.”

“Tate aw, nakhempeuhah nanu napa’ thu mang un. Banghang hiam, cihleh hihin Topa lungdam sak hi.” Nu leh pa pahtawi lo-in, thu amanglo tate, amaute thuhilhna asang nuamlote in leitung thakah mun ngahlo ding uh hi. Akisiangtho sak leitung thak ah langpanna lungsim aneite, athumanglo, alungdam theilo tanu tapate ading mun omlo hi. Tuabang mite in hih leitungah thumanna leh tualkhiatna asin thak kei uhleh bangmah sin thei nawnlo ding uh hi. Thumanlohna, langpanna, akiphasak, tatein gupna angahmite tawldamna nawngkai sak nawnlo ding hi. Thukham apalsat khat tabek zongin vantunggam luahlo ding hi.10

Itna Kilakding.—Nu leh pa tungah ngaihna lahding aneilo tate kamu ngei hi. Nu leh pa tungah aleeiba uh ahi itna leh kinaina pulaak ding leh iplah ding neilo hinapi, itna, ngaihna tampi kilak leh ut uh hi. Hih in Pasian deihdan ahimah hiam? Hikhelkhel lo hi. Maitaina, itna, leh ngaihna aom khempeuh innkuan sungah guang un. Na piak theih hih iplahna aneuneute nanu napa in mu nuam hi. Amaute vangik azangsak dingin nahanciamna, pangpatna leh lungkimlohnate nencipin, ngaihsutna aneilo ta hilo nahihna lakin. Note tungah nu leh pa in ahong lahkhiat itna leh kinnate na neutung panun ahong piaknate nuamna pulaak un.11

Tate aw, na nu in ahong itding kisam hi. Tua hikei leh nuam nasa kei ding hi. Tate in zong nu leh pa itding hilo hiam? Tua itnate maitaina, kamkhum, nuihmai, lawptaka amau tawh

kikopna, innpua ah pa tawh kithuahna, innsungah nu tawh

kithuahna ah lak khia un.12

Jesu tungah Bawlbangin Gamtangding.— Apiangthak taktak nahihleh, Jesu’ tate nahihleh, nu leh pa nazahtak ding hi; nang ahong kisawlte nasep bek thamlo in, amaute huh theih nading lampi nasial zonding hi. Hihbang nasepna tawh Jesu adinga asem nahi hi. Hih kinbawlna, ngaihsutna tawh sepnate in Jesu tungah akibawl ahi hi. Hihin zong athupi mission nasep namkhat mah ahi hi. Hih thu neuneu nasepte ah athumaante in amanpha tuahkhakna anei uh ahi hi.13

TATE THUHILHNA

Pasian Zongbaihin.—Naupang leh khangnote in Pasian zongbaih uh hen. Neu hunlaia zongsatnatein nuntakna leh gamtatnate huzaap hi. Samuel, John leh Christ tawh akibang nuamtein thuneu ah thumaan dinga, siatna angim lawm leh gualte, leitungah gualnop leh utut semdinga anungtate lakpanin kihemkhia hen. Mi tampiin innsunga nasep neuneute thupi salo a, kin ngaihsutlo hi. Alianzaw nasepte zong awlmawh tuanlo hi. Akician numei pasal nahih nangin siangtho, cidam, leh mipitang in. Hih nasep inn panin kipan ding hi. Nasep neuneu te semin, kiciantakin zo in. Tua thuneu ah thumaan takin nasep lam Topain amuh ciangin alianzaw nasep hong pia ding hi. Inn nalam ciangin bangci lama, bang vante zang nahiam, cih kidawmin. Tu-a nalamtoh nazia natongte in tawntung dongin akip suak ding ahi hi.

Na lungsim, nalungtang, leh nangaihnate Jesu uksak in. Christ ie sepbangin nasem inla, deihsakna tawh inn na sem in. Migitna tawh semin, nang’ deihna zong nial in. Nahun neihte beltakin zanginla, mawhna neuneute vil in, nangah thuphate-ah lungdam in. Tua hileh atawpnaah Samuel leh John bangin Christ adingin tetci napang ding hi: “Jesu in pilna leh a pumpi khangto a, mite leh Pasian’ maiah maipha angah hi, ci hi.1

“Nalungtang pia in.—Khangnote kiangah Topa in “Kata aw, nalungtang hong pia in,” ci hi. Leitung’ Honpa in naupang leh khangnote in alungtang uh Ama’ tungah apiakding deih hi. Topa tungah thumaan galkap honpi omhen la, Christ in khuavak ahihbangin amau zong khuavak ah kalsuan hen. Amaute in Jesu itding uha, Amah lungdam sakna pen amaute nopsakna hiding hi. Amaute akitai hangin hehlo ding uha, amaute migitna, lungduaina hangin nu leh pa lungdam dinga, nisim nu leh pa vangikte apuakpih nuam ding uh hi. Neulai leh khangno hunin Topa nungzui thumaante hiding uh hi.2

Mimalin Khensatna Bawlding.—Pasian’ thu ah vilin, thungenin, sin un. Nu leh pa in hong hilhin, lampi maanah hong khadinig uh hi. Ahizongin nalungsim khel theilo uh hi. Jesu nalungtang napiak ding hia, nangmah ahong piaksa thumaan khuavakah pai in. Inn nasep sem inla, Pasian’ hehpihna tawh Ama sungah nakhantoh dingzah nakhangkhia ding hi. Nanu napa in Sabbath atanna, thumaan azuihna un nang gupkhiatna hong kepciansak theilo hi. Noe, Job leh Daniel te in leitungah aom uhhangin “Kei kanuntak bangin, tanu tapa anei keiding uh hi; amaute dikna tawh anuntakna uh akipia ding uh hi, Topa in ci hi.”

Naneu lai leh nakhangno lai-in Pasian’ na nasem khading hi. Amaan nasakte semkhia in. Nanu napa thumang in. Amaute thuhilhna zui in. Amaute in Pasian akihta uh ahihleh, tawntung nuntakna nangah nadingun tate pilna piakna, ukna, leh pattahna Pasian in tavuan pia ding hi. Amaute in ahong piaknop huhna zong lungdam takin saang inla, pilna tawh nang adinga athukhensatnate maitai takin pom in.Hihbang tawh nu leh pa nazahtakin, Pasian minthangsakin, leh nakithuahpihte adingin nangmahin thupha nahiding hi.3

Tate aw, galdo un; gualzawhna khatsialin galpa tungah hong lamto hi.4

Tate in Huhna adingin Thungen.—Ahong paiding zeetna anan zawh nadingin tate in hehpihna ngen ding hi. Angsung gualnopna leh amau tup bangin sepnopna ze-etna hong pai kinken hi. Thumaan ding, migi ding, thumang ding, leh innkuan nasepte asem dingin Jesu kiangah huhna ngen un. Note thungetnate hong zaksak ding hi.5

Anu leh pa tungah aneih uh muanna nam tawh naupang leh khangnote ahong paidingin Jesu in hong deih hi. Agil uh akialciangin nu leh pa kiangah anget banglian un Topa in zong Ama kiangah angendingin hong lamen hi.

Tate tangsapna khempeuh Jesu in theikhin hi. Tate’ thungetna Amahin za nuam hi.Pasian kiangpanin ahong kigamla sakding nakhempeuhte panin kikalhnelhin leitung’ lunggulhnate panin kihemkhia in, Pasian bek tawh kizom uh hen. Topa’ mittangin amaute sungtawng lungsim simsakin, Pasian tawh akiho thei ding uh hi.

Tuaciangin, nangmahin nang leh nang adding nasep theihlohte Pasian kiangah ngen un. Navai khempeuh Jesu gen un. Nalungsim’ thusimte Amah ko un. Amahin lungsim tawng sim theia, laibu asim bangin nalungsim hong sim sak thei hi. Nakha nuntak nadingin ahoih nate nanget ciangin, ngah ning, ci in um lecin, nangah takpi ding hi.6

Maitaitakin Inn Na Semun.—Mikhat veve in tawma asepding inn nasep sepna in naupangte leh khangnote adingin inna mission nasep ahi hi. Nang adingin athupi hetlo thuneu nasep khat nasepna in mission lungsim paai nahihna alak nahi hi. Na lampi ah aom nasepte tawmin na sepnopna-in nang tawh akituak nasep alianzaw piakding kilawm nahihna gen hi. Kuangsawp nasepin anuam zong hilo mah hi, ahihhangin tua kuangte tungah anlimte kithukin tuate nekna pen nuam nasa hi. Nangsangin nanu in tua sem leh kilawm asazaw nahi hiam? Agim nanu kuang sawpding nang sawplo-in nungak heldingin anusia nuam nahi hiam? Inn phiat kula, khenulte tawmin sinkhiat ding oma, khante zong lepkik kula, tuate semlopi in nasep lianpi tawh kituak akisa zaw nahi hiam? Nang sangkahin, gualnopna zongin naom laitakin nanu in tua innkuan nasep teng aseppen nangaihsun ngei hiam?7

Tate tampite in inn nasepte amaute sepding hikei, ci napi-in amaitang puak un hisalo veve hi. Mawhna zongin thum uha, deihsakna takpi tawh bangmah semkhialo uh hi. Tuain Jesu’ dan hilo hi; Satan’ dan ahi hi. Tuabang lungsim naiplah leh Satan tawh nakibang hi. Nang leh nang agenthei dingin akibawl nahia, nang tawh akisai khempeuh agentheisak nahi hi. Bangzah semding, kimawlhun tawm nei ing, ci-in phunse ken. Ngaihsunin thukhual in. Amannei nasepna tawh hun nabeisak pen Satan’ zeetna adingin kong akhak nahi hi. Jesu in Amah leh Amah anopsak nadingin semlo hi. Nangzong Amah tawh akibang ding nahi hi. Hih thupipen biakna thukhun khatin zangin. Nahihzawh nangin Jesu ngenin. Hih thu lamah nalungsim zang hilecin innkuan sungah nasep navaivan bangin Pasian’ nasepnaah zong vangik pua khat nasuak ding hi. Midangte tungah huzaap hoih nanei dinga, Christ ie na asemdingin amaute huai ding hi.8

Nute Tawlngakhun leh Hunpia in.—Nasep huh ding lungkimna aneilo, paupen azong tate kiangah huhna ngetna pen itna anei nute adingin haksa mahmah hi. Naupangte leh khangnote aw, Jesu in note hong zong hi, Topa-in note khut sungah ahong ap nasepte awlmawhlo- in omding nahi uh hiam? Kimanna anei nuam nahih leh hunpha hong kipia hi. Nang adingin natampi ahong sepsak nanu huhnain nang hamphatna ahi hi. Avangikte puaksakin. Khawl hunnuam piain. Khawlhun tawmbek neia, atuamtuam sepding neilo hi. Anop leh gualnopna nang leh nangmah nakipiak bangin inn sung ah ni taangsakin. Na tavuan la inla, sep kipan in. Nang’ deihna nialin nanu nopsak ding leh tawlngak ding hun pia in.9

Tuhuna Danielte Pasianin Thamanpia.—Daniel abang hangtakin na asemngam mi tuni in kisam mahmah hi. Lungsim siangtho, pumpi thahat, alaulo khutte tuni leitungin kisam hi. Pasianin nisimin akipuahpha to zeldingin hong deihsak a, hoihna tuktehna ah asangzaw atungto dingin hong deih hi. Huhna ihzon leh Amahin hong huhding hi. Leitung nihte ah eite lungnop nading pen ihkhantohna tungtawnin hong piang ding hi.

Khangnote aw, Ama’ hehpihna tawh apha nabawlzo ding uh hi. “Pasian maiah asaantham, asiangtho, biak piakna dingin napumpite pia un. Tua-in ahoih nasepna ahi hi.” Pasian’ hong piak numei hihna leh pasal hihna tawh dingkhia un. Asiangtho anamtui lungsim puak nei unla, Daniel’ lunggulhna leh duh leh dahnate pua un. Pasianin adaai sazang, khuak siangtho, amaan thukhenna, leh theihsiamna tawh hong guaiding hi. Lampiallo, akip thukhun anei tulai khangnote Pasianin pumpi, lungsim, leh kha damna piading hi.10

Abeisa Nite Kaihkik Kipanin.—Khangnote in tuni amaute tawntung thaman ding akhensat uh ahi hi. Tu-in Topa in kamciam tawh ahong piak thukham angaihsun kik dingin kong thum hi. “Pasianin ahongpiak leitangah nakhan uh asau nadingin” ci hi. Naupangte aw, tawntung nuntakna deihlo nahi uh hiam? Nu leh pa zahtakin pahtawi un. Amaute lungsim nasak kei un. Zankim zankhang aihmu theilo dingin lungkham sak leh lungkia sak kei un. Itna leh thumanna pialo in mawhna apalsat nahih uhleh abeisa hunte akaikik dingin kipan ta un. Lampidang omlo hi, nakikhel kei uhleh tawntung nuntakna nakhahsuah ding uh hi.11

(Khen 11na zo ta hang ei, zom lai ni maw).