Khuamial Sungpan Awging (May 13, 2017)

Sim Ding Hi Lo, Geen Ding!

May 13                                                              Gabon Gam

Khuamial Sungpan Awging (Agen: Abraham)

          Kum (40) sung si dektak zahdong in zuu ka dawn hi. Ka kipatna a hang thei keng, ahi zongin zuu ka ngawlh dingpen lamen zo het keng. Mi hoih suak thei nawnlo dingin ka kingaihsun ta hi.
          Ka zii pen Tapidaw hi a, a sih dongin ka kikheel nadingin thu hong ngetsak den hi. Amah in Topa Jesu in kei hong itna leh a cidam dingin hong deihna hong genpih hi. Ahi zongin ka zuu  thawl ka khauh let seemseem a, Topa Jesu leh ka zii ka sawn paai hi.
          Nitaak khat, khua hong zaan ta in, ka lupna ah khukdin in thu ka ngen hi. “Topa Jesu aw, nong huh dingin kilawmna ka nei vet kei hi. Ahi zongin, ka zuu lunggulhna pan nong suahtaak sak nadingin hong thuum ing,” ci-in khitui luang ziahziah in ka kap hi.
          Thu ka nget mahbangin ka lungsim sungah aw khat ka zaa hi. “Kithawi inla, Ka nung hong zui in,” hong ci hi. Kei zong khedap thuah pahin ka pusuak aa, tua aw in hong makaihna bangin lampi ah ka pai hi. Tua aw in hong khawlsak mateng ka paipai hi. “Na mailam en in,” ci-in hong sawl hi. Kei zong ka mailam ka et leh, Seventh-day Adventist Pawlpi cih lai kisuang ka mu hi. “Hih pawlpi pen na thunget nading mun ahi hi,” ci-in hong geen hi.
          Tua inn sungah a kikhawmte ka mu a, a nunggual tutna ah ka tuu hi. Pasal khat in Topa Pasian’ kammal panin lametna thu a geenna limtakin ka ngaai hi. Thaa ka ngah mahmah aa, a  zingsang leh kiginni (Friday) nitaak ciangin zong ka kikhawm hi.
         Tua khit ciangin aw khat ka zaa leeuleeu hi. “Bangmah seem loin om ken maw. Topa Jesu aadingin na seem in,” hong ci a, ken bang seem thei peuhmah ding cih tawh lamdangsa in ka om hi. Kei haam ta in ka thaa haat nawnlo hi. Bang seem ding cih hong hilh dingin ka ngaak aa, ahi zong in ka zaak zeel aw peen hong daai ta hi.

Biakinn Cingpaa
           Ni tampi khit ciangin ngaihsutna thak ka nei hi. Van pawlkhat pua in Friday (kiginni) nitaaklam biakinn ah pai in ka hah hi. Padenpauhte nuulsiang in, sual ka phiat a, tutphah saaute zong ka nuul siang hi. Tutnate tungah labute ka koih aa, kikhawm aa biakinn hong paite a khut uh leen in ka hopih hi. Kei hong en uh aa, biakinn kep ka kipat hun hong dong uh hi. “Topa Pasian in hih nasep pen ka nasep ding ahih thu hong geen ni aa kipan hi,” ci-in ka dawngkik hi.
           Nipikaal khat khit ciangin, sum pawlkhat ka ngah theih nadingin khua sungah nasep neeu khat ka seem hi. Aw khat hong pau leuleu hi. “Sum ngah nadingin banghangin hihsan takah na seem nahi hiam? Ka innkiim ah lopaa leh kiakte a phat lam theilo nahi hiam?” ci-in hong taai hi.  Kei zong ciahpah in ka temtawng tawh biakinn kiim aa lopa leh kiakte ka vaat siang hi. Ka masuan hong tam seemseem hi.

Itna Tawh Nasep Khat
Galkap nasep pan ka tawp aa, pensen tawmno khat saang ka hih manin thaman piak kuul loin biakinn ka keem thei hi. Itna tawh ka sep hi a, ka lung zong hong nuamsak hi.
Ka zuu dawn kum (40) sung ka cidam nadingin a kikeem thei hileng ka uut hi. Khua ka mu nawn phakei aa, khua ka za nawn pha kei hi. Na ka sep ciangin zong ka gim baih hi. Ahi zongin, nisim aa Topa Pasian’ hong piak thuphate haangin Topa tungah ka lungdam hi. Topa in kei a lamdang mahmah khuavak sungah hong zol aa, ni khatni ciangin a si thei nawnlo dingin hong bawl ding hi. Tua ni dongin Topa in hong piak ka thatang tawh Amaa’ naka seem ding hi.

A Lamdang Mahmah Thu
Tuma kum khat laai-in Topa Jesu ka Gumpa in ka saang aa, ka hih theih bangin midangte tungah mawhna pan hong gumkhia Topa’ thu ka geensawn hi. Atuam vilvelin, zuu dawndawn in a cimawhte ka zong kawikawi hi. Topa Pasian in amaute zong a itna thu ka geenpih hi. Topa Pasian’ Kammal bangin zui le uh Amah in lamdang takin amaute huh ding ahihna zong ka geenpih hi. Tuni ciang dong Topa Jesu kiangah khaa khat nangawn ka tonpih zo naaikei hi. Ka sih mateng ka hanciam toto laai ding hi.
        Na nuntaakna kheel ding leh Topa Jesu aadingin hih khat peuh neih ding zekaai lua ta cih na ngaihsut khaak leh, thaa saan in. Ka biakinn padenpauh uh ka nuulsiang hun in kum (83) pha ta ing. Topa Pasian in na nuntaakna ah a hoih in hong zuun ding hi. Topa Jesu aadingin innpi hong zuatpih dingin zekaai lualo a, zong haksa lualo hi.
Tu kuata Sabbath sawm leh thumna sumpi pawlkhat tawh Gabon gam ah taan (12) saanginnpi thak khat kilam ding hi. Ka gam vuah, khangno tampi tak guihtheih khamtheihte leh zuu dawn zongsangh uh hi.  Hehpihna tawh deihsak takin sumpi hong pia un. Tua hileh, amaute’n zong suahtaakna ngah in Topa Jesu sungah nuamsa ding uh hi.

*******************