Ka Suunmangh (June 3, 2017)

Sim Ding Hi Lo, Geen Ding!

June 03                                                                 Nigeria Gam

Ka Suunmangh (Agen: Jemimah)

Law (gam thukhun) ka sinna Babcock University (saangpi) ah ka upna ka geenkhiat peen nuam kasa hi.  Hih saangpi ah hong kah saangnaupang tampitak pen Tapidaw suak naailo uhaa, amaute kiangah Topa Jesu’ thu geentheihna hunphaa ka ngah hi. Thu ka nget sak ka lawm it khat kiangah zong nungdeuh in Topa Jesu’ thu ka geen hi.
An ne dingin anneekna phual ah ka pai ciangin ka lawm Confidence in zong ka nung pan hong delh hi.
A laiatna kung tawh hong sun in, “Nang bel, Adventist khat na hih pen na paina peuhah lungkim tuak peuhmah veteh aw,” hong ci hi.
“Lawm aw, Adventist khat ka hihpen ka lungkim takpi mah hi,” ci-in ka dawngkik hi. “Banghangin maw, hong gen dihve,” hong ci hi.
“Sabbath maan ka saa aa, zuih nuam kasa hi,” ka cih leh, “Banghangin Sabbath zuih nuamsa na hi hiam?” ci-in hong dong leuleu hi.
Ka dawnzia ding ka lungngaih laitak in hong ngaklah ta ahih manin Confidence in lei tuanngawh in, “Sawt lua ta, Jemimah aw. Hong geen meengmeeng in,” hong ci hi.
“Topa Jesu in Sabbath ni-in Pasian bia ahihna thu Lai Siangtho in hong hilh hi. Ei Tapidawte inzong na kheempeuh ah Topa Jesu ih etteh ding ahi hi,” ka ci hi.
Confidence in zong hong etkawm in, “Lawphuai sii e! Ngaihsun phalaai ning ei,” hong ci hi.
Tua zawh a sawt loin, Confidence tawh “Topa Jesu Nuntaakna leh A Thuhilhnate” cih sinna khaan sungah ka tukhawm uh hi. Siapa in Sabbath thu hong geen ciangin Confidence hong lawp mahmah hi. Amah zong thu kikupna ah hong kihel in, Sabbath ka upna thu hong telpih seemseem ta hi.  Khaal sung sangkhakpi ding nipi kaal nih bek kisap hunin, Confidence in a kituiphuum nopna thu leh Adventist a suah nopna thu hong geen hi. Um lo lua kahih manin ka nuihsan aa, “Piang thei ken teh!” ka cihsan hi.
“Piang thei ee, deksuai,” ci-in hong dawngkik hi. “Hih bangin ka khensatna pen nong geenpih man ahi hi. Nang na up thu pen a thu in thei nahih manin na geenkhiat ding na lau vetkei hi,” hong cithuah hi.
Confidence’ lungsim a lawng dingin Topa Psian in kei hong zatpen ka lungdam lua hi.
Adventist khat kahih hangin Topa Jesu tawh ka kizopna ka thupi ngaihsut khakei hi. Babcock saangpi ah Adventist Khangnote Pasian’ nasepna ah ka kihel ciangin ka upna hong khang hi. Ka nuntaak sungin a masa bel nisim Lai Siangtho simmna leh thungetna ka zangpah hi.
Nung kum in Khangnote Pasian’ nasepna ah a kihel Sia khat in Khangnote’ nipi kaal khat sung thunget kikhopna ah thu hilh hi. A geen thu ka phawk nawnkei aa, ahi zongin ka lungsim hong sukha mahmah hi. Kuun in ka kap hi. “Tu nitaak in eite lakah a piangthak nuam mahmah khat om hi,” ci-in Siapa in geenkhia aa, ka lunggulhna bangin, “Na nuntakna Amah na piak ding Topa Jesu in hong kun hi,” ci-in hong sam hi. Tua ni mahin Topa Jesu tungah ka lungtang ka aap aa, ka nuntaakna ah geentheih loh a lamdang kikheelna ka nei hi.
Hih bangin Topa Jesu tungah ka nuntaakna ka aap theihna lam khat pen Adventist khangnote Pasian’ nasep khopna hang ahi hi. Hih Pasian’ nasep khopna in saang huang sung leh veeng leh paam ah Pasian hong itna thu ka geenkhiat theih nading hunphaa zong hong pia hi.
Tu kuata sung Sabbath sawm leh thumna sumpi pawlkhat tawh Babcock saangpi huang sungah Khangnote kikhopna phualpi khat lam nadingin hong kihuh ding ahih manin ka lawp mahmah hi.
Adventist khangnote Pasian’ nasepna kipawlkhopna in Sabbath School bawl theih nading mun kip ka neikei uh hi. Mun a awn leh inndei neu sungah ka kikhawm uh hi. Mun a awn loh ciangin singliim nuaiah ka kikhawm uh aa, guah hong zuk ciangin ka buai mahmah uh hi. Khua sungah a teeng khangnote kiangah Adventist upna ka hilh khin uh a, Sabbath School hun sungah ka sam nuam uh hi. Ahi zongin amau aading tawh mun kicing zolo hi. Khangnote kikhopna phualpi thak pen nasep khantoh nading thusinna leh a pualam vaphaakna nasep thusin nading kizang ding hi. Veeng leh paam pan lawmte zong hong kikhawm theita ding uh a, ni dang saangin kha tampi Topa Jesu kiangah ka tunpih thei ding uh hi.
         Ni khatni ciangin hih khua sungah a teeng khangnote biakinn thak ah hong pai in amau tawh Pasian bia thei ding cihpen ka suunmangh ahi hi. “Amau hong thuhilhte a maan himawk mahveh e! Biakinn ah hong kikhawmte in a geen thu uh nuntaakpih mah ei,” ci ding uh hi. Phaltak in khangnote Pasian nasep phualpi a kilam zawh nadingin hehpihna tawh sumpi a tam theithei hong pia un. Ka suunmangh a taangtun ni, a kilam thak khangnote Pasian nasepna phualpi ka muh ni ciangin ka lungdam zensiin cia maw.

 @@@@@@@@@@+++++++++@@@@@@@@@@