Zo Phualva Thupuak - Volume 07, Issue 05: Makai Hoih Kisam by Dr Lian Muan Kim

Makai Hoih Kisam 

 Makai khat hangin na khempeuh kisiathei-a, na khempeuh hoih thei hi. Ama tungah gualzawh ding le guallelh ding, khantohna ding le kiamsukna ding kinga hi. Makai hoihlo pi-in nungzui hoih lam-et huai lo ahih manin makai hoih kisam hi.

Tua banah, makai hoih khat peuhpeuh hong khan hangin mihing nuntak huntom ahih manin sawtvei kimang zolo hi. Gama ding, khua le tui-a ding, pawlpi-a ding leh kipawlna khat peuhpeuha dingin makai kizong tawntung hi. A ginalote a ginasak ding, a haite a pilsak ding, a mawlte a tathiam ding, a thahatlote a tawsawn ding, lungkia mite a hanthawn ding, nungzui gina lote leh makai ginalote a ginasak dingin makai hoih kisam hi.

Mi khempeuh ih sep theihloh na khat peuhpeuh a sem ding leh maban a bing tawh a kibat laitak nangawna kongvang amu veve ding, mite lungkiain a dinkhawl laitak un ma a nawt veve ding, mite lungkiat laitaka ma a pang veve ding makai kisam hi. Mite’n: Hithei ken teh, acih laitak un, hi thei ding hi, ci-a gualzawh na ding lampi a zong teitei makai kisam hi.

Khatvei Asia gam nitumna lama om Phrygia gam pen Gordius in uk hi. Gamhoih gamnuam khat ahih manin hau mahmaha, a hauh bek hilo-in Gordius in a gam sungah kilemna tungsakin mipite’ phattuam na ding le mipite hoih zawk na dingin thukhun tuamtuam khungin pilvang takin uk hi.

Lametna A omloh lai tak Nangawn a, Lametna A pia thei ding Makai hoih Kisam.

Tawlkhat khit ciangin Gordius in Jupiter dawibiakna innpi pan khuasung a kimuhna mun khatah khauhualpi khat khihcip hi. Tua khauhual mong selcipin kuamah theisaklo hi. Kum tam simsim a uk khit ciangin Gordius si-a, ahih hangin a khauhual khih pen om lai hi. Mun tuamtuam le gam tuamtuam pan hong pai mite in tua khauhual kikhih dan lamdang sa-in paakta mahmah uh hi. Tua leh pawlkhat in: Mi lian mahmah khatbek in hibang bawl thei in teh, ci uh hi. Ahi zongin tua biakinnpi-a thugen pa in: Na cih bang mah un a maan hi. Ahi zongin hih khauhual a phel thei khat om leh tua pa pen lian zawlai ding hi, ci-in dawng hi. Tua ciangin khualzin mite in: Bang na cihna hiam, ci-in a dot uh leh: Hih khau a phel zo pa’n leitung uk ding hi, ci-in dawng kik hi. Tua khit ciangin gam tuamtuam pan kumpite’ le galkap mang tampite hong pai uha, tua khau kikhih pen velvel uh hi. Ahi zongin kuamah in khaumong mu zolo ahih manin tua khau kituaci nusiat hi.

Kum 100 tam simsim hong bei khit ciangin Gordius zong kitheikha nawnlo-a tua khau kikhih bek cian lai hi. Tua kawmkal ah nisuahna lam pan Phrygia gamah galkap mang khat hong tung hi. Tua pa’ min in Alexander hi-a, Greece gam khempeuh a lakkhit ciangin Asia gam lam a do dinga hong kipan ahi hi.

Tua leh Alexander in: Gordius khaukhih koi-ah om hiam, acih leh Jupiter biakinnpi ah kipai pih hi. Gordius’ khaukhih amuh ciangin: Hithu tawh kisai bang kigen hiam, ci-in a dot leh, hi khau a phelzo pa in leitung uk ding hi. Ahih hangin kuamah in phel zolo hi, ci-in kidawngkik hi. Alexander in zong tua khau hoihtakin a velvel hangin a mong amu zo peuhmah kei hi. Phamawh sa lo hi. A namsau dokin tua khauhual satnen manga: Khau mong mu lua kisa-in tum tampi suah ing, ci-in kiko hi. Tua khitphet teh Asia gam lamah galkuan vingveng hi. Lametna a om loh laitak nangawna, lametna a pia thei veve ding makai hoih kisam tawntung hi.

Tua ahih manin Pasian mahmah in zong Laisiangtho sungah makai ding na zong tawntung hi: Topa in Ama lungsim a tuak mi zong khin-a tua pa pen Israelte’ makai dingin ciamteh khin hi (Samuel masa 13:14).
Jerusalem khualu khuataw kileh in la khuadak kawikawi in. Leikiu khempeuh zong in la, citak taka a gamta, thumaan thutak a zong Khat beek na muh leh hi khua’ mawhna ka maisak ding hi (Jer 5:1).
Amau lak pan kuan kulhpi lamkik ding hiam cih ka en hi (Ezek 22:30).

A hunhunin Pasian in Amite’ A makaih ding mi Khangkhiasak hi.

Zakoh le a innkuan pihte ahi zongin mi tampi in kialpi tuak ding cih thei ahih manin Pasian in makai Joseph na khangkhiasak hi. Israelte in gimna tawlna, kolbulh khaukhihna, gilkial dangtaakna thuakin nisa khasa nuai ah nasem uh hi. Tua laitakin sila hihna pan a honkhia ding makai kisam ahih manin Pasian in Mawsi na khangkhiasak hi. Siampi gina a neih loh laitak un Samuel, kumpi hoih a kisaplaitak un David na khangkhia sak hi. Jerusalem biakinn puahphatkik hun lua mahmah napi makai ding a om loh laitakin Pasian in Zerubbabel na khangkhia sak hi. Thukham theilo lua uh ahih manin thukham hilh dingin Ezra khangkhia sak hi. Kulhpi ciangkik dinga a kipan ngam om lo-in a lungkiathuai mahmah laitak in Pasian in makai hoih Nehemiah na khangkhiasak hi.

Topa Zeisu leitungah a huntom mahmah ahih manin a nasep ban a zom ding mi kisam mahmah hi. Khuadak toa mipite a-et ciangin a cing ding omlo tuute tawh kibang uh ahih manin nungzuipite ahi zongin ama nasem ding mitampi na tel hi. Tua bangin Pasian in Ama mite’ a ding a kisap hun leh a kisapna uh tawh kizui-in makai na khangkhia sak hi.

Thu-um piangthakte genthei mahmah uha, hehpihhuai lua uh ahih manin Pasian in Constantine kumpi pa na khangkhiasak hi. Hih Constantine kumpi pa in AD 313 kumin Zawmah gambup tapidaw suaksak hi. Zeisu thu a maanlo-a a ki-up ding deihlo ahih manin Athanasius, Augustine le makai gina tampi a hun zui-in na khangkhiasak hi. Pawlpi in Laisiangtho theilo lua kisa-in Nungzui teng na ngawn theilo uh ahih manin Laisiangtho tei dingin William Tyndale na khangkhiasak hi.

Upna tawh gupna kingah ahih lam a thei om nawnlo phial ahih manin Martin Luther na khangkhia sak hi. Laisiangtho thu a thuk zawa a kitheih semsem na dingin John Calvin, Zwingli le Pasian thuthuk thei makai dang tampitak na khangkhia sak hi. Tua kawmkal ah gupkhiatna thugen mit pianpian ahih manin sangmang masa mahmahte ahi Moravian pawlpi phuan dingin Count Nikolous Ludwig von Zinzendorf na khangkhiasak hi. Pasian na naksep mahmah kawmkal ah a tapa in sihsana, tua zawh kum 4 ciangin a zi in zong sihsan mah taleh a sih dong mah sangmang nasep sem hi. America khanlawhna a tun na dingin Jonathan Edwards le Pasian nasem dang tampi na khangkhiasak hi. Gammial tam lua mahmaha, tua gamte ah khuavak a puak dingin David Brainerd kici pa American Indian-te’ kiangah, William Carey India ah, Adoniram Judson Kawlgam ah, Hudson Taylor Sengam ah, John Geddie Aneityum ah, David Livingstone Africa le gam tuamtuamte ah Pasian in Ama nasem ding makai tampitak na khangkhiasak hi.

Pasian in Makai hoih tampi Khangkhiasak Lai ding … Nang Na kiging nai hiam!

I Zogam ah zong gupkhiatna thu hong puak dingin Carson topa, Cope topa leh sangmang pawlkhat khangkhia sak hi. Amau om nawn loh khit ciangin kitagah suah simtham ahih manin makai tuamtuamte Pasian in a hunhun in hong khangkhiasak hi. Upna hanga hehpihna tawh gupna a kingah lam kithei hetlo ahih manin Pasian in Sia Hau Lian Kham le makai dang tampite zangin gupkhiatna bucing kizel sak hi. Tua banah, a kisam bangin tuni ciang dong Pasian in makai hong khang saksak lai hi. Banghang hiam cih leh makai hoih kisam tawntunga, a kisapna dung zui-in mailamah Pasian in makai hoih tampi hong khangkhiasak nuam lai hi. Nang na kiging nai hiam.

Endnotes:

1) Alexander the Great pen Macedon gam mi ahi galkap mang, kumpi Philip II tapa hi-a, July 20, 356 BC in Macedon khua Pella ah suak hi. Great kici minphatna a ngah khempeuh lak ah a ngah masa pen leh a kipakta pen, thupi a kisa pen khat ahi hi. Kum 16 a phak in galkuan kipanta-a, kum 20 a phak ciangin a kisuamlum a pa‘ za laih in kumpi suak hi. Daniel mangmuhna sungah zong hih Alexander hong khankhiat ding pen kigenkhol khin hi. BC 323 June 10 in Babylon ah si hi. A tapa neulai lua ahih manin a thakhek ding om paklo-a, a galkap mang 4 tengin a gam phel 4 suahin hawm uh hi. Galhat mawkmawk bek hilo in pil tawh thuah lai hi. A laksa gam khempeuh ah Greek lai sinsak ahih manin i Topa Zeisu hun ciang dong mun tuamtuam ah Greek kam kinakzat mahmah hi.

2) Constantine the Great (ca.274/280-337) pen Zawmah kumpi tapidaw suak masa pen hi a, AD 325 kum a kinei Nicene Council ah makaipi ahi hi. Zeisu pen Pasian tawh kikim maw, Pasian sang neu zawdeuh, cih thu tawh kisai Arius le Athanasius a kinialna uah Constantine in Athanasius panpih hi. Ahi zongin Nicene Council a, ama gei-a tu ahi Eusebius kici tangthu siam pa thuzawhna hangin Constantine in tawlkhat khit ciangin Athanasius thongkia sak hi.

3) Athanasius (ca. 296 – May 2, 373) pen Nicene Council (AD 325) ah omlo hi leh Topa Zeisu in Pasian taktak hilo hi ci-in tuni ciang dong ki-um khaphial ding hi. Arius in Zeisu pen Pasian sanga neu zaw deuhin Pasian tawh kibang lo (heteroousios) hici-a, midang pawl khat leuleu in Pasian tawh kisun (homoiousios) acih laitakin Athanasius in Zeisu pen Pasian tawh kibang sitset (homoousios), Pasian mah ahi hi, na ci hi. Laisiangtho bul theih mahmah ahih manin a upna zong Laisiangtho tawh kituak pah hi. Nicea Council khit ciangin kum 33 bek a phakpat hangin Bishop Alexander laiha, Alexandria khua ah kum 50 sung bishop sem hi. Bishop a sep sung 5 vei bang a pawlpi sung panin kihawlkhia hi. Pawl neilo kisa lua ahih manin: Leitung in kei hong langpan ta, ci ngei hi. Ahih hangin gualzawhna ngah veve hi. Alexandria khua ah bishop a sep laitak in si hi.

4) John Calvin pen July 10, 1509 ni in France gam Noyon ah suak hi. Kum 14 a phak ciangin University of Paris ah sangkaha, Hebia, Greek le Latin laite siam mahmah hi. Kum 23 a phak ciangin Doctor of Laws ngah a, kum 26 a phakin tuni donga laibu minthang pen khat ahi, The Institutes of the Christian Religion pen Basel khua panin gelh hi. 1539 kumin nupi sa khat ahi Idelette de Bure tenpih hi. Calvin pen tuni dong Laisiangtho siam pen khatin kiciamteh a, a khan sungin laibu tampi a gelh banah, Reformed Pawlpi phuana, Laisiangtho bu 66 lakah bu 49 tang bang hilhcianna gelh hi. May 27, 1564 kumin si hi.

5) Huldreich Zwingli pen January 1, 1484 in Switzerland gamah suak hi. Einsiedeln ah 1516 kumin mipite’ siampiza ngah hi. 1519 kum ciangin Zurich khua-a Great Minster pawlpi ah siampi sem leuleu hi. Gupna thu lian ah Luther tawh a kithutuah uh hangin nekkhawm thu-ah kithutuak lo uh hi. Zwingli upna maan zaw hi. Zurich khua-a Prostestant-te leh a geinai-a Roman Catholicte kisiatna hangin tualgal dan khat hong om a, tua gal kidona ah Zwingli October 11, 1531 in si hi.

6) Nikolaus Ludwig von Zinzendorf (May, 1700- May 26, 1760) pen a suah zawh kalguk khit ciangin a pa in sih sana, kum 4 a phak ciangin a nu in pasal neihsan ahih manin api’ khutsung pana khangkhia ahi hi. Wittenburg ah kum 3 sung Law sin hi. Pasian lamlahna tawh kizui in Moravian Pawlpi phut hi. Hih Moravian pawlpi pen sang- mang nasep hat mahmah ahih manin amau kipatkhiatna pawlpite sangin gamdang mun tuamtuamah pawlpi mi a zah thumin tam zaw hi. Moravian pawlpi mi 93 ah khat peuhmah in sangmang na sem hi.

7) John Geddie pen Scotland gam Banff khua ah April 10, 1815 in suak hi. 1816 ciangin Canada ah lal uha, 1839 kumin Charlotte Mcdonald tenpih hi. 1848 kumin New Hebrides gam Aneityum khua ah pai-a kum 24 sung Pasian’ na sem hi. A laibu ciaptehna sungah bang om hiam cih leh Aneityum khua atun kum 1848 in Christian khat zong om nai lo hi. Amah a ciah kum 1872 in lawki khat zong om nawn lo hi, cih kigelh hi.

8) Jonathan Edwards (October 5, 1703 – March 12, 1758) pen unau 11 lakah a ngana hi-a, amah bek pasal ahi hi. Aman zong tapa 3 le tanu 8 nei hi. Laipil mahmaha, kum 11 a phak ciangin lai tuamtuam gelh kipan ta hi. Kum 13 a phak ciangin Yale College kaha, sangnaupang lakah thugen siam pen leh makai dingin kitel hi. Kum 17 in college mana, tua khit zawh New Haven ah Pasian thu kum 2 sinbeh lai hi. America tualsuakngeite’ lak ah Philosophertheologian lian pen khatin kiciamteh hi. A pu Solomon Stoddard’ nasep laih in pastor sem hi. 1758 kum in Princeton University ah president thumna suak hi. A tupa Timothy Dwight in Yale University ah (1795-1817) president giatna sem hi. Dwight ih tupa zong Yale University ah 1886 kum in president suaka kizahtak mahmahin Father of the University kici zawzen hi.

B.B. Warfield in Jonathan Edwards ih tu le ta kigawm 1394-te’ tangthu a kanna ah hibang in mu hi: College siapi 13; College sia 65; thukhen- mang 30, sitni 100; siawanpi 60; galkapbu 75; pawlpisia 100; laigelh minthang 60; US senator 3; kumpi nasem tuamtuam 80 ahi uh hi.

?  Dr Lian Muan Kim
Makaih Pilna

Thupilte:

A Bangci sep ding cih hilh kei inla, bang sem ding cih hilh in. A sepna gahte in nang lamdang hongs a sak ta hen. George Patton

A Na zawhnop nasep khat pen a sem nuam mi khat na sepsak theihna pen makaihna hi. Dwight D Eisenhower

A    Makaite in khat leh khat kizopna ah ong nai om mahmah henla, Nasepna ah ong lawpsak theih nadingin gamla ah om hen. John C Maxwell

A    Amah le amah a kimaih zolo khat in, midangte makaih ding cih bel um ngam keng. Robert E Lee

A    A kuama peuh in tuihual a daih laitak in sik lukhu a khu zo tek uh hi lel e. Publilius Syrus

A    Na meivaak a tangphat zawhloh manin midangte meivak mut mit kei in. Jaachynma N.E. Agu

A    Biakna(Religion) ih cih pen eite kantheihna zah khengval thu ahi hi. Emile Durkheim

A   Nang le nang na ki-makaih dingleh na khua(lutang) zang inla, midang na makaih dingleh ka lungtang zangin. Eleanor Roosevelt

A   Na launate nangmah le nangmah in kem lel inla, na hangsanna midang te hawmsawn in. Robert Louis Stevenson

A  Eite ie kisap lianpen in eite koici bang hi ding cih hong lamlak ding ahi hi. Ralp Waldo Emerson

A Makaihna cih pen min le za, panmun leh hihna kigual diudeu hi masa lo hi. Khat nuntakna in adang khat va huzapna hi zaw hi. John C Maxwell