Kumkikna Lamen Innkuan - Khen Ngana

THUKHEN 5

Kiteenna Tau Panin

LIPKHAPHUAI KAMCIAM

 Pasal leh Zi adinga Pasian’ Deihna.—Pasianin pasal panin numei bawla, pasal adingin lawm leh huhna hisak hi. Amaute in pumkhat suakin, lungnop nading, tha ngah nading, thupha san nadingin leh numei ading huhpa asuak ding ahi hi. Asiangtho kiteenna ah pasal in numei itna siangtho angah ding, numei in pasal lungsim anem sakding, agamtatna asuih sakding leh apicing sak ding ahi hi. Tua in Pasian ngimna ahi hi.

Hih kiteenna asusia dingin Jesu hong pai hilo hi. Apatcil a asiangthona ah asanglap kik ding ahi hi. Mite sungah Pasian’ lim le meel sutna adimkik ding leh kiteen kizopna asianthosakna tawh

lei nasep hong kipan hi.1

Adam tungah Evua huhngah dinga apiapa mahin mopawi ah nalamdang masa honglak hi. Lawmte leh meeltheihte in pawi akhaamna Kana ah Jesu in mihon laka nasepna hong kipan hi. Tua hia, Amahin kiteenna bawla, Amah mahin aphuh kiteenna kipsak hi. Numei pasalte in asiangtho kiteenna tawh akipum khat dingin vaihawm hi. Innkuante punsuahin, innkuan mimalte pahtawina tawh tawisanga, Vantung innkuan ie mimalin saang hi.2

Jesu in Lungnop Huai Kiteenna Deih.—Christ kiang panin ahong pusuak Pasian’ itna in mite ki-itna suksiat saklo hi. Tua itna in mi’ itna siangtho sak, sanglap leh mipi tangsak hi. Mihingin Pasian tawh kipum khat in Vantung tawh kisai thu ah akhancin matengin hoihna gah theilo hi. Jesu in lungnophuai kiteenna leh innlum mu nuam hi.3

Mihingte akipia Pasian letsongte lakah kiteenna pen mawhna in susia pen hi. Ahizongin Lungdamnathu in tua kiteenna ie sianthona leh ahoihna lamkik sawm hi.

Kiteenna pen Pasian’ ngimna abat nadingin Christ ie hehpihna bekin bawlpha thei hi. Kiteenna in mihing thupha apiading leh asanglap ahi hi. Tua hia, leitunga aom innkuante’ kipum khatna, ki itna leh kilemna in Vantung innkuan lim aciing ding ahi hi.

Vantung ie innkuan deih pen leimite muhna ah dah huai mahmah hi. Ahihzongin thangpaihna leh dahna apiangsak kiteenna pen lawmneihna leh kipakna lametna in apia thei Christ bekin vaihawm thei hi.4

Kipaak Hun.—Cana mopawi ah nungzuite leh Jesu zong kisam hi. Tuabang lungdam mopawi bawlna ah eite kihel tuak kei, ci in Jesu in hong vaikhak lo hi. Tua mopawi ah Jesus apaina tawh alungdamte tawh akipaak khawm ding ahong hilhna ahi hi. Vantung’ thukhun tawh kituakin mawhbanglo kipaakna pawite Jesu in kham ngei lo hi. Jesu mahmahin mihon kikaihkhopna a uapna tawh eite zong akihel dingin hong deih hi. Hih mopawi a uap khit ciangin Christ in pawi dang tampi zong uap lai hi. Ama ompihna leh thuhilhna tawh siangthosak hi.5

Kisialhna, Lahna, leh Gualnopnate Mopawi ading Hilo.—Mopawite lahna, kisialhna, leh kigualnop sakna in kizang hi. Biakna upna leh kizekna tawh kituakin numei leh pasal lam akilungkim uhleh kisialhna leh lahna hikei peuhleh mopawi in Pasian dahsak lo hi.6

Akiteeng ding lawmtate kituak mahmah phialta leh, lamdungah lah akul hituanlo hi.7

Mihing gualnopna, leh kineiha mopawi bawlna in kiteenna tawh kilawm kasakloh thu ahi hi. Hih kiteenna pen Pasian mahmahin lipkhapna takpi tawh etdinga ahong piak ahi hi. Lei ah akilam innkuan pen akiteengte in bang hi uh hiam, cih lahna hizenzen loa, Vantung innkuan pulaakna hizaw hi. Pasian’ vangliatna lah masak pen ding ahi hi.8

Mrs White Inna Kiteenna.—Ni nihni sun 11 in annek khan agol pen kiteenpawi bawl nadingin kibawl hi. Sanggampa B in akiteeng sakding hia, nuamtakin hun hong zawhpih hi. Kiteenna hun aman nadingin Mrs White thungen dingin kicial hi. Topa in atuam suahtakna lian khat hong pia hi. Pasian’ Khasiangtho in ka lungsim hong nipsak a, athanghuai ciamnuih kibawlnate zong omlo hi. Hun khempeuh lipkhap huai takin kibawl hi. Siangtho in lungsim sukha mahmah hi. Topa in hih kiteenna siangtho sak a, akiteeng tegel in amangthang mi azong mission nasep asemdingin hong ki-ap uh hi. Topa tawh kiniamkhiatsa in nungta in Ama kamciam muang uh hipeuhleh Topa in thupha pia ding hi.9

Nuntakna Nih Kipumkhatna.—Tua mi nihte tangthu sungah utna, hehpihna, itna, kha gupkhiatna asem dingin pumkhat asuah ni uhpen ni thupi khat ahi hi. Kiteen kizopna ah nuntakna nih pumkhat suahna in thupi mahmah hi. Pasian’ deihna tawh kituakin pasal leh zi in Ama’ nasepna ah kizomin picinna leh sianthona semdingin kalsuan uh hi. Tua in amaute septheih ahi hi.

Mi nih pumkhat asuahna Pasian thupha piakna inn in vantung ni atanna mun hi. Jesu Christ sungah numei pasal in asiangtho pumkhat suahna aneih ding uhpen Pasian vaihawmna ahi hi. Pasianin tua inn ukin makaih ding hi.

Innin leitunga lungnoppen namun ahidingin Pasian in deih hi. Vantung innpi alimcing ngiat ding ahi hi. Bangkua tavuante pua in, Jesu Christ sungah aut asawm khempeuh uh luangkhawmin, Topa kamciam leh Ama khutah kingamin, zi leh pasalin vantungmite phat pum khatna ah lungnopna akihawm ding uh ahi hi.

Kiteenna in amaute’ kimanna khiam lo hi. Kiteenna in gupkhiatna nasep nading ahi hi. Kei zong kum sawm thum leh kum guk ka phak ciangin ka pasal tawh kipumkhatin Topa in ahong sawlna peuhah kapai uh hi. Kiteenna pen Pasian’ pahtawina ngahna ahihlam ka thei hi. Hihsanah athupi thupha ngahna khat om hi.

Tu in, ama khut lenin, hihin ka sanggampa hi, ci in khut kilenin, zi leh pasal, Pasian’ na asemdingin kong hanthawn hi. Pasian pen na thuhilhpa dingin koih un. Ama sungah kipum khat un.10

Akiteengthakte Thuhilhna.—Ka sanggamnu leh ka sanggampa: Khantawn kitul dingin na kiciam uh hi. Kiteenna ah pilna asindingin akipan na hi uh hi. Na kum masa hun sungin tuahthak tampi nanei ding uh hi. Adiakdiakin na kilamdannate uh nasinkhiat ding hun uh ahi hi. Naupang bangin asinding nahi uh hi. Hih kum masa sungah ahong pai laiding na lungnopna uh amial sakding lai mai khat zong kinelhsiah sak kei un.

Sanggampa, na zi’ hun, tha leh lungnopnate nanga tawh kihuikhawm hi. Na huzaapna in anuntakna anamtui sak ahihkeileh sihna panin sihna azuan sak zong hithei hi. Anuntakna nasuksiat sakloh nadingin kidawm in.

Sanggamnu, Kiteenna bangkua nasep asemdingin akisin nahita hi. Nisim in kuhkal takin hih nasepte sin in. Angsungkhuatna khat zong na neihloh nadingin kivil in.

Na nuntakna sungah, khat leh khat ki-it kingaihna in na lungnop nading uha luitui hiangka bang nahih sak ding uh ahi hi. Khat leh khat lungnop nadingin na kithuk tangtang ding uh hi. Hihin no adinga Pasian’ deihna ahi hi. Pumkhat nasuah uhciangin mimal nahihna uh mansuah kei un. Topa kiangah ngen un: Bang maan hiam? Mihinga kapian bangci picin sak thei ka hiam?11

Vantung Tetcipangte Maiah Kiciamna.— Kiteenna sungah alutte in ki-itna leh ki aihualna ah aluangkhawm dingin Pasianin thupia hi. Mo leh pasal in Pasianin athupiakna tawh kituakin khat leh khat aki-it thuk dingin vantung leitung maiah kiciamna nala uh hi. Zi in pasal zahtak leh pibawl ding hia, pasal in azi pen it in manpha ngaihsut ding hi.12 Kiteen cilin numei pasalte in Pasian maiah ki-ap uh hen.13

Nakiteen kiciamna ah kahpasik bangin thukip in.

Ngaihsutna, kampauna, ahihkei leh gamtatna ah na tangthu susia kei in. Pasian akihta pasalte bangmahin Pasian thukham mangin.14

ANUAM, AGUALZO KIPAWLNA

Kipumkhatnain Khantawn Manding.—Kiteen kizopna ih theihtel nadingin nuntakna sung tawntung sinding ahi hi. A kiteeng khempeuhte in mong aneilo sinna sang akah uh ahi hi.1

Bangzahta-in pilna leh kidawpna tawh akiteen uh hangin kiteenna pawi amanciangin nupa kop tawmkhate bekin kipumkhatna taktak ngah uh hi. Minih kipum khat nading sepna in kiteenkhit kum tampi sunga akisem hizaw hi.2

Nupa kopte’ abuaihuai vangikte leh tangsapnate in akibang alunggulhna uh ahi kingaihnate mangthang sak hi. Akitheihpih zo nailo azia atong taktakte kimuh sakta uh hi. Hihin athupipen hun ahi hi. Hih tungtawna atelna- in leitunga alungnop nading leh akizeksiam nading uh khensat hi. Athanemna tuak uh kimuh sak uha, pumkhat asuaksak itna in bang hoihna masawt ding kitheizolo hi. Siatnate sangin hoihnate kimuh sakding ahi hi. Ei ahong umcih pen eimau’ lungsim mah hia, khat leh khat bang pulaak ding cih akhensatpen lungsim puak ahi hi.3

Itna-in Ze-et leh Sittel ding.—Kingaihna pen tui bangin siangtho in etlawm mah kha ding hi. Ahihangin sittelna omlo ahihmanin dai thei hi. Christ pen akhatna leh atawpna leh ahoihpenin na khempeuh ah koih in. Mitsuan tawntungin. Sittelna nathuakna tungtawnin Amah na itna in nisialin hong khauhzaw leh hong thuk zaw ding hi. Amah na itna akhan ciangin khat leh khat na kingaihna uh zong thukzaw in khauhpai zaw ding hi.4

Hatsakna, buaina, leh lungkiatnate aom hangin na kinupatna uh khial hi, ci in mawh sak kei un. Ahoihpen thu kin ngaihsut in khensat un. Vai khat peuhpeuh ah ki awlmawh ngaihsut un. Nuntakna gal simna ah khat leh khat tha kipia un. Khat lungdam nading sim in sin un. Ki itna, kithuakzawhna nei tuak un. Tua hileh kiteenna in ki itna ie abeina hilo zaw in, akipatna hi zaw ding hi. Ki lawmtatna ie nopsakna, itna ie kikhihna in vantung nopsakna ciapkholhna ahi hi.5

Lungduai nadingin lungduaina zat kisin un. Migitna leh thuakzawhna tawh lungsim sungah itna amaan kikem cing dinga, Vantungin dik asak zia le tongte kikhan suah ding hi.6

Galpa-in Khenkham Nuam.—Kibat lohna aom sialin Satanin hun la-in zi leh pasal sunga aom suahpih zia le tongte zangin Pasian’ maiah pumkhat asuak khinte khenkham nuam hi. Kiteenna ah pumkhat ahidingin , zi in apasal thu mang leh a it dingin, pasal in zong azi it ding leh manphat bawldingin kamciam khin uh hi. Pasian’ thukham kizui hileh, kidemna inn sungpanin kihemkhia dinga, kikhen ding lungtup tangtung loding hi. Kingaihna khenkhap ding kiphal lo ding hi.7

Ngawngkhauh Nupate Hilhna.—Pasal ahia zi ahizongin thuneih nuamlo ding hi. Hih thu tawh kisai in Topa in thukhun hong pia khin hi. Christ in Pawlpi a it bangin pasal in zong azi thupi seh ding hi. Zi in apasal pen it in zahtak ding hi. A nih tuakun migitna kisin ding uha, kidahsak kinasak loding hi.

Nang’ deihna azuidingin khat leh khat kiaana sawl kei un. Hihbangin bawlna tawh itna kizek theilo hi. Khat deihna pulaakna in inn sunga kilemna leh lungnopna sia sak hi. Kiteenna pen kidem nadingin zang ngei kei in. Tuabangin nahihleh lungnopna nangah ngeikei ding hi. Na pau leh natatnate ziadam sakin. Na mimal deihna paai in. Na kampau kemcing in. Kampau in ahoih ding leh asia dingin huzaap hi. Na aw sangsak kei in. Aki gawm na nuntakun Christbatna namtui zel sak hen.8

Kampau, Tatna-in Itna Pulaak.—Mi pawlkhatte in itna pulaakna pen thanemna in ngaihsun uh hi. Vang khualna tawh midangte paaidap hi. Hihbang lungsimin hehpihtheihna dal hi. Kipawlna leh citna pulaaknate akisikcip ciangin lungsim vot in itna nei theilo hi. Hih khialhna ihpelh ding hi. Pulaakna omlo itna in sawtvei nungta theilo hi. Nang tawh akizom mi khat peuh tungah migitna leh hehpihna kial tungsak kei in.

Itna kipia unla itna kisiik kei un. Na sunga ahoihpen pung sak inla, midangte sunga hoihna zong muh sak in. Lungdam theihna in lungkimna leh thupha bawl nopna tha guan hi. Hehpihna leh kizahtakna in ahoihding kituh sak a, itna mahmah inzong tupna siangtho nei sak hi.9

Leitungah ngawngkhauh numei pasal tampi aom na ahangin kingaihna maan thanemna in kisang a, kingaih ding kikhamin kinencip hi. Mihing pianpih ahoih aom sunsun zong aneulai panin kisitcip sak hi. Amaute votna leh angsungkhuak ngawngkhauhnate Pasian’ nitangin atan zawh keileh lungnopna khempeuh kivukcip suak ding hi. Jesu leitungah aomlai-a alungsimnem anei hilengh, vantungmitein mimawhte ahong cizat bangin naupangte ihhehpih theidinga, tua in mawl taka nuntakna ahi hi. Tuapanin eite-in hahsiangna, sanglapna, leh vantung thukhunte tawh makaihna ihngah ding hi.10

Kin leh vangik tampi innkuan sungah hong lut a, pianpih mawltaka nuntakna, tawldamna leh lungnopna tawm bek ihnei hi. Kim leh paamin banggen cih awlmawhlo zawin, innkuanpih mimalte ihkin ngaihsut zaw ding hi. Leitung kisialhnate leh leimite kamsiam lunggulhna khiamin, Christian thusiamna, ziadam leh itna, maitainate innkuan sungah ih pulaak zaw ding hi. Mitampite in innsung bangci nop sakding, cih asin kul uh hi. Inn pen nopsakna mun hiding hi. Alungdam thei lungsim, thumawl takte ah lungkim theihna in itna aom laitengin inn sungah lungnopna om sak hi.11

Thuneu Kinna-in Mannei.—Thupiang maimaite tungtawnin Pasian in eite hong sittel hi. Hih thu te in eite lungtang sungah aom laimaite pulaak hi. Kinna aneute, thupiang neucikte, leh thusiamna neucikte in lungnopna bucing piangsak hi. Hihthu neucikte nelhsiahna in abucing siatna hong vaitut hi. Kim leh paam mite hoih nading a ei leh ei kimangngilhna in atawpna ah vantung laibupi ciaptehna kicing sak hi. Midangte hoih nading nusia in, ei leh ei ih kikinbawlnate Pasian in kimuhmawh bawl hetlo hi.12

Kingaihna Apulaak Lah Pasal.—Itna adimna inn ah kam leh tatna tawh itna akipulaakna, vantungmite akihilna mun hia, minthana nizangte tawh akisiangtho sak mun zong ahi hi. Bangkua sung nasepnate in nopsakna zong ahi hi. Tuabang munah na zi in innsung nasep nuamsa lo, cih omlo ding hi. Maitaina tawh inn na sem dinga akim apamah anuihmai thei kawikawi ding hi. Alungsim sungah Topa phatna lasa ding hi. Tu laitakin na zi in na ngaihna thuak khalo hi. Khatveivei na pulaak sam hi. Akisam nasepte zong innsungah nasem hi. Ahizongin akisam khat omlai hi. Itna ie huzaapna omlo a, kikinna omlo hi. Itna pen ki-etna, omdan leh awgingte panin kimu ding hi.13

Adahhuai Angsung En Zi.—Akiteengte lungsim siangtho pen akithuahpihte hangin hoih zaw ahihkei leh sia zaw hi. Kiteen khit asawtlo in, aniam, akhem, angsunggen, aki-uktheilo khat ie nasepna hangin siat kipan ta hi. Khangmoi apasal in ciim takin khensat hileh nuntakna ie vangikte apuakpih nuamding mi, adinpih khop theihding ngah dinga, anuntakna pi sak zaw, siangtho sak zaw, leh a itna tawh alungnuam sak zaw numei khat ngah ding hi. Ahihhangin azi in kitom thei-a, itna siik thei a, aki khallo ama lungsim tawh apasal’ lungsim tawngte leh thuaknate mawhsak hi. A pasal itna leh khensatnate pakta thei hileh ahoih ding ahi hi. Tua hilo in pasal in ama lunggulh bangin bangmah thuzeklo ahihmanin azi in itna neilo leh a kinlo in mawh sak hi.14

Kithuahpih Theih Zi leh Nu.—Acimhuai innsung nasepte tawh kidiah cip beklo-in nu leh zi in laisim hun zong la hen. A pasal tawh akilawm tak theih nading leh akhangto tate lungsim tawh aki cisa neh theih nadingin thusut in. Dinmun asangzaw innkuan alampih theih nadingin ahun ngahte zangsiam hen. Ahonpa tawh hunla in kizom hen. Pasian’ kammalte simin, tate tawh lopa singkung lakah vakkhia hen. Amuh uh ahoih nate panin Pasian zong uh hen.

Zi in maitai in, tangzang hen. Tatsat lo-in puankhui lo zawin, nitak hun zong kikhawlh hun nuam bawl hen. Nisim nasepnate panin innkuan in kithuahna nei hen. Tua hileh pasal tampite in nitak nunekna leh laam innte ah apai sangun innah om nuam zaw ding uh hi. Naupang tampite zong lamlak leh saipite ah hun beisak lo ding uh hi. Numeino tampite zong thentholna leh lawm hoihlote tawh kithuahlo pah ding hi. Innsung huzaapna in nu leh pa leh tate ading hia, khang tawntung thupha ahidingin Pasianin ageelsa ahi hi.15

Kiteenna in zawhtholhna hikhin lo hi. Dongtuahna tampi aom bangin thu neuneu kinding tampi zong om hi. Zi in amah leh amah pen milim bangin kingaihsun kei hen. Amahin nupi hia, lungsim ngaihsutna pan hilo-in, atattakin vangikte apua ding ahi hi. Innkuan theisiam dinga, amah sangin kinzawk ding om ahihlam zong kithei ding hi. Ataktak nuntakna in khuamial leh dahna zong nei veve hi. Mi khat sial tungah buaina tung hamtang ding hi. Satan in upna hansanna leh lametna susia nuamin atawntungin nasem hi.16

Alungnuamlo Nupate Thuhilhna.—Na nuntakna uhin sehnel gam tawh kibang hi. Nunghei lecin lono leh singnosel om hi. Keu tak-a nuntak ding hituanlo hi.

Singkhuah omlopi in mei akuanloh mahbangin kam leh tatna tawh pulaakna aomlohna ah itna om theilo hi. Sanggam C in migittatna leh ziadam kam khum tawh zite tungah ngaihna pulaak dingpen vang kiamhuai sa hi. Nang pen nakim napam ie huzaap nahangin nalungsim kikhel mun mahmah hi. Sum nabawlna ah nabuainate, nakin thute, nahehnate na nasep phual ah nusia in. Maitai tak leh hehpihna, ziadamna, leh itna tawh inn masuan in. Tua-in na zi adingin siavuan muh man, zatui leimante sangin hoih zaw pek hi. Tua in pumpi ading leh kha cidam nadingin hoih hi. Na nuntakna in genthei lua hi. Nangaihna leh natatna kitum kak lua hi. Na gentheihna hangin Pasian lungdam hetlo hi. Hih pen nang leh nang nakikhal zawhloh mana apiang thu ahi hi.

Nalungsim’ thuaknate nazui lua hi. Itna pulaakna pen vangkiam huai nasa hi. Migi tak leh ngaihna tak tawh na pau ding pen thanemna nasa hi. Tua hilo hi. Tuabang awnemte munah pumphatna, kilemlohna kam, kiselna kam, leh kimawhsakna kam napau khia zaw hi.

Nang sungah lungkimna mal khat zong omlo hi. Na buainate namitsuan hi. Na maitangin nalunggulhnate, na zawnate pulaak hi. Hong kibawl sia bangin na kingaihsun a, lunggim in nakhuisa hi. Na khuak zong mei akuang nasa hi. Na lungsim zong gik nasa hi. Pasian itna leh Vantung Pasian kiangpana nangah thuphate hangin lungdamna na pulaak kei hi. Nuntak sunga anuamlo teng naphawk hi. Leitung’ haina ahi khuamialpi in nang hong khuhcip hi. Tawldamna leh lungnopna nang ading hitheilua hinapi in naniala, Satan kipaak mahmah hi.17

Ki-it leh kithuakkimna Thaman Kipia.—Kithuak leh ki-it kimna omlo in leitung vangliatna khat mah inzong nang leh na pasal Christian pumkhatna tawh hong khih zolo ding hi. Na kithuahna uhpen kinai ding, migi, siangtho, kitawisang ding, na nuntakna uhah Kha vangliatna naneiding uh hi. Tua hileh Pasianin note ahong ngetna tawh kituakin khat leh khat tungah na khempeuh napicing thei ding uh hi. Pasianin natun nadinguh dinmun natun uhciangin vantung pen na nuai uhah om na muding uha, Pasian pen na sungah namu ding uh hi.18

Sanggamnu sanggampa, phawk un. Pasian in itna hia, kamciam nakipiak bangmah un, Ama’ hehpihna tawh khat leh khat na kilungnuam sak zo ding uh hi.19

Numei leh pasalte in Jesu Christ Huhpa in nei hile uh, Pasian ngimsakna mun tungzo ding uh hi. Mihing’ pilna in asep zawhloh, muanna tawh Pasian azongte adingin Pasian’ hehpihna in gualzawhna ahi ding hi. Ama hong khualna in vantung panin khau tawh eite hong khih khawm ding hi. Itna in kiphatna leh kamciam kipaih maimai tawh kibang lo hi. Vantung siamgatna in kiptak ngat takin agat puan pen leitungah siambu in gan theilo hi. Tua siambu panin akingah puante in ze-etna leh sittelnate tawh kikeklo ding hi. Lungsim leh lungsim kimaingat dinga, ki-itna kham-khau tawh akip tawntung dingin kikhihcip ding hi.20

(zop lai ding)