Kumkikna Lamen Innkuan - Khen Kuana

THUKHEN 9

Innkuan Khuituahpa

 

PA’ MUN LEH TAVUAN

Pa Kua hiam?—Pasianin innkuan phut hi. Innkuan ah pa, nu, leh tate om dinga leiah kipawlna khat ahi hi.1

Innkuan anuam sakding nasep pen nu tung bekah kinga lo hi. Pa in zong panmun nei hi. Pa in innsunga neihsate, innkuanpihte, leh nu leh pa pumkhatin akhauh penin akhihpa ahi hi.2

Pa’ minin “innkuan-khihna” ahi hi. Ahizongin pa tampite in amaute tavuan thei khollo uh hi.3

Innkuan Kipawlna Lutang.—Pasal leh pa in innkuan lutang ahi hi. Zi in itna, hehpihna leh tate pattahnaah ama tungpanin huhna lamen hi. Tate in pasal’ a ahih zahin numei’ a zong ahi hi. Zi tawh kibangin innkuan nopsak nading kin ngaihsut hi. Tate in ama’ tung panin huhna leh makaihna lamen uh hi. Amahin nuntakna amuhzia maan dinga, ama huzaapna leh kikholhna tawh innkuan umcih ding hi. Tuabanah amahin Pasian kihta leh itna tawh uk dinga, atate lam maan ah khading hi.

Inn nopsak nadingin pa in ama panmun panin dinpih ding hi. Akin leh anasepte in buaihuai hita phial leh, tua in innkuan khuhcip lo ding hi. Maitai sa leh kamkhum tawh innsung lut ding hi.4

Siampi, Thukhun Bawlpa.—Innkuanpih mimalte in pa’ tungah kingam uh hi. Amahin thukhun abawlpa hi a, pasal ahihna tawh zahtakna akip neidinga, tha, thumaanna, lungduaina, hansanna, belna, leh nisim nuntakna ah kizattelna nei tawntung ding hi. Thu khat panin pa in innkuan siampipa zong ahi hi. Zingsang, nitak sialin Topa biakna neiding hi. Tate leh nu in biakpiakna ah kipum khat leh phatna lasakna ah kipawl ding hi. Siampi ahihna tawh pa in zing leh nitak sialin amah leh a innkuanpihte mawhnate Pasian maiah pulaak ding hi. Aphawkpih mawhnate, Pasian bekin amuh theih atheihpih loh mawhnate, Pasian maiah pulaak ding hi. Beltakin pa in hih thukhun zui hileh nu aom a, aom kei zongin, innkuan sungah thupha hiding hi.5

Pa in innkuan sungah Thukham pia Pasian limcing hi. Pasian tawh kikop in nasem hia, Pasian’ hehpihna ngimnate semin, thukhun maan sungah tate kipsak hi. Asiangtho leh avangnei nuntakna anei dingin pantah hi. Nu leh pa tungah thumangding bek hilo, vantunga Pa thu zong amangdingin kha nasep sem ding hi.6

Pa in ama nasep siangtho zuaklo ding hi. Pa ahihna thuneihna zong khahsuah ngeilo ding hi.7

Pasian tawh Lamton.—Anungta upna tawh pa in atate leh Pasian khihkhawm ding hi. Ama’ tha muanglo- in bangmah abawl zawhlohna tawh Jesu tungah kinga dinga, Sangpenpa’ tha lending hi. Sanggamte, innah thungen un. Zing leh nitakin inndei sungah thungen un. Tuabang kawmin nisim nasepte sem unla, thungetna tawh nanuntakna uh Pa kiangah ap un. Tuabang mahin Enoch in Pasian tawh lam natonkhawm hi. Gamdai takin leh khauhtak a thungetna in Pasian’ tokhom maiah akihal paaknamtui bangin Pasian’ tokhom maiah kahto hi.

Biakbuk sungah biakpiakna akibawl bangin Pasianin thungetnate hongsang ding hi. Amah azong khempeuh Christ in tangsap hunin Huhpa suak hi. Nisim haksatnate ah thakhauh ding uh hi.8

Apicing Thuakna Kisam.—Pa in naupang bangin lungsim thuakna tawh gamtanglo ding hi. Pasianin amah asiangtho nasep ap hi.9

Innkuan sunga ama’ huzaapna pen Pasian leh Pasian hong sawl Jesu atheihna tawh kikhensat ding hi. Paul in agenbangin “Naupang kahihlaiin naupang bangin kam ka pau a, naupang bangin thu ka thei hi. Naupang bangin thu kangaihsun a, ka uham ciangin ka naupang tatnate ka paai hi.” Pa in innkuan lutang ahi hi. Khancin in aki-uklo bangin hilo-in pasal zia leh tong tawh amah leh amah kikhalin om ding hi. Amaan kha nuntakna ah pilna angah ding ahi hi. Innkuan sungah amah ie gamtatte-in Pasian’ kammal sunga thukhunte tawh kituak ding hi. Tua hileh Christ

sungah lawhcing ding hi.10

Pasian’ Deihna ah Kiap un.—Pa leh pasal ahipa in asiangtho nuntakna nei hen. Nisimin Christ’ thu sin un. Inn sungah ngoltol lungsim kilak ngeilo ding hi. Hih bang lungsim aneite in Satan tawh akipawl ahi uh hi. Na deihnate uh Pasian’ deihna ah ap un. Na zi’ nopsak ding leh lungnop nadingin nabawl theihzahin bawlin. Pasian’ kammal tawh hilhna sang in. Tua hileh biakinnah ahizongin sumzonna ah nakeng kawikawi thei hi. Inn sungah Pasian’ kammalte nungta khia in. Mi tawh na kizopnaah vantung thukhunte-in nama hong tangsak ding hi. Vantungmite inzong hong seppih dinga, leitungah Christ hong pulaak pih ding hi.11

Lungtom Pasal adinga Ahoih Thungetna.—Na sumzonna pan nahehnate inn sung amialsak dingin phal kei in. Kigitneih lohpi-in thu neu tampi apianciangin thuakzawhna, lungsauna, migitna, leh itna nalah zawh kei leh, nang adingin asi ngam, anuntakna ahong pia ngam, Pa tawh pumkhat asuak nailo nahi hi.

Nisim nuntakna ah kilatna, lungkiatna leh ze-etna tawh na kituak thei hi. Topa’ kammalin bang gen hiam? Topa’ tha tawh “Siatna nialun, tua hileh amahin note kiang panin apaikhia ding hi. Pasian kiang zuan un, tua hileh Amahin note kiang hong nai ding hi.” “Ka tha len in, tua hileh Kei tawh na kilem ding hi; amahin zong Kei tawh kilem ding hi.” Mun leh hun khempeuhah Amah mitsuan un. Lungsim takpi panin daaitakin thungen un. Tua hileh Ama’ deihna sepdan ding nathei ding uh hi. Tuikhang bang gal hong paiciangin Pasian Khasiangtho in note ading kidalna hong pia ding hi. Ze-etna nung nazuih dinguh ciangin, lungkia in, kikhallo-in, Amah nanial sawm ciangin, mawhna nazon ciang, vantung lam nga in thu nanget ding ahi hi. “Hong huhin, Topa, ze- etna hong nialzo sakin, hehna, thangpaihna leh kamsiate ka lungsim panin hong lakkhiat sakin. Na lungnemna, na lungduaina leh lungsauna kei hong pia in. Ka Honpa azahpih dingin hong nusia kei in. Ka zi, ka tate, upna sunga ka sanggam numei pasalte kammal leh lungsimte hong telkhialsak kei-in. Alungduai ding, ahehpih ding, lungsim anemding, mawhna amaisak theidingin hong huh in. Innkuan papi kahih nadingin leh Christ ie zia leh tong apulaak dingin hong huh in.”12

Kiniamkhiatna tawh Thuneihna zangin.— Innkuan lutang hihna bek ngaihsutnain pasal hihna hituanlo hi. Laisiangtho munkhat nasimna tawh thu nanei tuan keiding hi. Naupangte’ nu ahi nazi tungah akhial ngeilo bangin deih khempeuh ngetnain zong hong pasal sakzaw tuanlo hi. Innkuan lutang nahihna tawh nazi adal dingin Pasianin geel hi. Pasal in innkuan akhihpa hia, Christ in pawlpi lutang ahihna tawh leh Honpa ahihna tawh pumpi tungah khut leh khete tungah aomte akhih khawm ding ahi hi. Pasal in Pasian’ deihna kantelin, ama panmun ading sepdingte sin hen. Christ ie thuneihna pen pilna, migitna, leh ziadamna tawh zat ding ahi hi. Pasalte in thuneihna azat uhciangin pawlpi Lutang zatdanin ciingkik uh hen.13

VANGIK PUAKHAWM

Pa’ Nasep Midang Kisuan Theilo.—Tate adinga pa’ nasep pen nu tungah ki-ap theilo hi. Nu in puakkhop nasep neikhin hi. Nu leh pa akikopna bek tawh Pasian’ piak nasep tangtun zo bek ding uh hi.1

Tu tawm leh tawntung nuntakna adinga tate pattah ding nasepna panin pa in ki-awnghon theilo hi. Nu leh pa in sepding neituak uh hi. Tate’ gamtatna kilamtohna ah khantohna aomding ahihleh nu leh pa in khat leh khat itna leh zahtakna akipia tuak ding uh hi.2

Pahtawina maipuak leh migi kammalte tawh pa in nu nasepte tha pia ding hi.3

Nute masuanah aom buainate dinpih in. Na kampau kidawmin. Omdan tatdan, migitna, thukhualna nei in. Thaman hong kipia ding hi.4

Ziadam Panpihna in Nu’ Vangik Zangsak hi.— Bangbang semin, buaina om tase leh pa in leenglate maiah anuihmai leh awkhum mah tawh inn ahong ciahding ahi hi. Pasal tungah kingam zi in amah tha apiading ahi hi. Pasal huzaapna in zi’ vangikte azang sakding ahi hi. Banghang hiam cihleh tate in azi leh ama a ahi hi.5

Apasal mahbangin zi in zong pasal ahuh sangin thupi zaw asak vangikte kaikhawmin pua kha ding hi. Khat leh khat kitheihneiha kihuhna in thupi hi. Innkuan khihkimlo-in zan-giak bangin asungtum pusuak lel pasal bangin kiom thei hi.6

Bangkua nasepna in siangtho a thupi hi. Ahizongin khatvei vei cimtakhuai takin kisem hi. Kinding leh buaipih ding tampite hangin kilungtom thei hi. Cimthoih nadingin nadang sepkak ding hi. Tawlngak hun akingah nadingin pasal ahihkei leh zi in hun azek theihding kisam hi. Innsung silbawlna in nute’ kiniamkhiat taka tualbialna hia, atawntungin piakkhiatna vive ahi hi. Pasal in telsiam in pahtawi bawlin panpihlo hileh vangik taktak ahi hi.7

Athanem Zi ading Ngaihsut Siamna.—Innkuan sungah pa in vai akinpen ding ahi hi. Athanem zaw zi tungah ziadam ding kisam hi. Tua hileh natna tampi alutloh nadingin kong akhak ahi hi. Migi, maitai,, leh thapiakna kammalte in zatui sangin damna pia zaw hi. Alungkiate adingin hansanna pia dinga, migi gamtatna leh awnemin innkuan sungah lungnopna leh nitang hong tun hi. Tate pattahna pen atamzaw in zite tavuan ahihlam pate in thei ding hi. Tate’ gamtat suihding pen zi tawh kisai phadiak hi. Tua in zi’ vangikte azangsak dingin anempen thuakna kisamsak hi. Ama’ ngaihna lian tungah azi kingam sakin, vantung lamah alungsim khangkhan sak ding hi. Vantung pan bekin tha leh ngaihmuanna leh agimte adingin tawldamna om bek hi. Pasalin mitkhu atualsa in hong ciahlo ding hi. Innah amah aomna tawh inn vaksak dinga, Pasian umin aento dingin tha pia ding hi. Anih un, Pasian’ kamciamte muang ding uha, vantung’ hauhna thuphate innsungah lutpih ding uh hi.8

Lungnemtakin Makaihin.—Tuucing hoihte kiang panin pa leh pasalte in sinding om hi. Jacob in lampi haksa ah manlang takin khual azinding akisawl ciangin hihbangin nadawng hi:

“Naupangte ahatlohna ka topa in nathei hi. Tuu honte leh bawngte, anongek neite kalung phamawh hi. Nikhat sung kinawhhawl lua leh gan honte khempeuh siding uh hi. . . . Ka mai-aom ganhingte’ thahatna leh naupangte hatna tawh kituakin damdamin kong makaih ding hi.”

Agimhuai nuntaknaah pasal leh pa in “damtakin” naupangte’ thuakzawh dingin kikholhpih ding ahi hi. Hauhnopna leh thuneihnopna hangin amanlah leitungah kalsuan kip takin, hehnem leh panpih dingin kalsuan pih ding hi.

Pasalin atatsat ngeilo ngaihna leh hehpihna tawh azi huhding hi. Lungsim navak leh alungdam dingin, leh numei in innsungah khuavak ahih nadingin, pasalin azi akep nopleh, azi puak vangikte puakpih hen. Pasal’ hehpihna leh itna ziadamin azi adingin amanpha hanthotna ahi hi. Pasalin apiak lungnopna in azi lungsimah kipaakna leh kilemna guan ding hi.

Zi-in kinna leh hehnepna angahloh ciangin, nasepna, lungkhamna, lungkiatna tawh athate zangbei-in, athagumte leh khuak navakna leh tangzannate kibuluh ding hi. Nute nuntakna khuavak bangin taangsakin maitai sak, akitangsapnate, nasep gimluatnate, leh kintam nahangin lungkiatnate panin dalin, leh tate in cidamna ngah uh hileh, amaute in aneih uh thalawpna tawh amasuan uh phu zoding uh hi.9

TATE TAWH KILAWMTA

Tate tawh Hun Zangkhawm.—Pa atamzawte in tate tawh kikhihin kikholhkhop ding hun manpha tampi za’ang uh hi. Anasepna panin inn ahong ciah uhciangin nuamtakin nasep laihin tate tawh hun azat khop ding uh ahi hi.1

Pate in amaute’ amaanlo vangkhualna leh nopsak nate hangin hoituanlo-in tate tawh kikhawl ding hi. Abuainate uh theihpihin, itna tawh nalungtang tawh kinai dingin khih inla, theihnopna anei alungsimte huzaap in. Amaute thuhilhna in asiangtho nasepna ahi hi.2

Pasal note kin ngaihsutin.—Pasal note’ pate in amau tawh kinai-in, amaute muhna leh thuakna tampite mawltak leh ziadam takin genpih le-uh amaute’ lungtang tawh amah akikhih hiding hi. Amaute adingin ahoihpen vaihawm sak, alungnop nading uh deihsak ahihna atawntungin thei sak-in.3

Innkuan sungah pasalno aneite in bang nasep asem ahizongin Pasian’ piak nasep amangngilh ding uh hilo hi. Asiangtholo lawm leh gualte, leh asia khangualte panin Pasian’ huhna tawh amaute ahemkhia ding ahi hi. Hihin Pasian’ piak nasep ahi hi. Pasal note in hih leitungah nang hangin ahongpiang uh ahi hi. Aom mawh naupangnote anu khut sungah apkhin ding hilo hi. Nu adingin vangik lua hi. Tate leh nu’ damna dingin ahoihpen ageel ding ahi hi. Nu in amah leh amah kikhalin, tate pil takin pattah ding baih hetlo ding hi. Hihbang ahihleh pa in vangik atamzaw apuakding kisam hi. Tate ahotkhiat nadingin khensatna tawh thasanin ahanciam ding kisam hi.4

Kimanna aneidingin Tate Pantahin.—Inn lutang ahi pa in nasem ding leh kimanna anei dingin pantah theiding hi. Nadang khempeuh sangin hihin nasep tuam diak ahi hi. Naupang aneu diak laitakin lungsim puak pattahna pen nu tavuan ahi hi. Hih pattahna ah pa tawh kikopden ding ahihna nu in theihding ahi hi. Pa in anasepna tawh abuaicip leh ainnkuan ah kimanna aneilo ahi hi. Atate tawh hun angah sak zaw ding nasep dang azon ding ahi hi. Tate a awlmawh keileh Pasian piak nasep ah athumaanlo tangding hi.

Leitung huzaap sangin alian zaw huzaapna pa in apiak kul hi. Amaute tangsapna leh alauhuai thute atheih nadingin innkuan sunga tate lungsim puakte atheih kul hi. Tuaciang bekin ahoihlote nencipin, ahoih thu ah ahanthawn thei panding ahi hi.5

Bangbang na asem ahizongin Topa’ lampi ah tate pattah ding nasep panin pa in paupeng theilo hi.6

Lungsimpuak Tuamtuamte Thei-in.—Tate pianzia leh atangsapna theilo liangin pate in anasepte leh laibu simna ah kiphumcip lo ding hi. Amaute’ lungsim puak tawh kituakin kimanna anei nasepte tawh tate manlah sak ding hi.7

Pate aw, natate uh tawh atamtheipen dingin hun zangkhawm un. Amaute lungsim puakte zong theihpih un. Tua hileh Topa kammal tawh pattahdan ding na thei ding hi. Na kam panin lungkiatsak nading khat zong pau kha kei in. Inn sungah khuamial lutsak ngei kei un. Kamkhumin, migi in, natate tungah ngaihna lak un. Hai huai takin ngekbawl kei un. Alungkiatnate zong puakpih un. Khat leh khat kilungkim lohnate nakiangah hong pai pih kei hen. Khat leh khat vangik akipuak sak theidingin leh khat leh khat kizahtakin kimuanna aneidingin pantah un.8

Kimawlna leh Nasepnaah Kikhawlun.—Pate aw, thuneihna leh ngaihna kipawlsak un. Migitna leh hehpihna tawh kiptakin sek un. Nahun awngte ah tate hun pia un. Amaute tawh kimawlna leh nasepna ah kithuah unla amaute’ muanna thalawh un. Adiakdiakin tapate tawh kilawmtatna lamto un. Hibangin natate tungah ahoih huzaapna na nei ding uh hi.9

Piansaknate panin Thuhilhun.—Pa in nu’ vangik te zangsak hen. Paak hoihte, singkung sangpite, mu sak in. Tuate’ tehte panin Pasian nasep leh a itna nakankhia theiding uh hi. Hih nate abawl Pasianin ahoih nate it ahihna hilhin. Christ in zangkuam a unokte leh huih laka vasate tawh hih vasate sangin amanpha zaw amite phawkin, kin ahihna nalak hi. Kineihna leh apuathamte sangin gamlaka apo paakhoihte hoihzaw pek ahihna natate lakin. Tua tawh bawltawm hoihnate panin piansaknate ah tate lungsim namakaih thei ding hi. Amaute’ nopsak nadingin Pasianin hih nahoihte ahong piakna phawk theiding uha, Amahin lungsim ie asiangtho pen leh ahoihpen nate hong pia nuam ahihna mu ding hi.10

Pa in tate paakhuan sungah paipihin paakpalh tuamtuamte leh paakngumte lak hen. Hih nate tawh Piangsakpa’ thu sin theiding uha, piansaknate laibupite phenin Pasian’ itna alak singkung, lopa, leh paakte namu ding hi. Tuabangin Pasianin tate lungsim lawngin, Pasianin hih singkung lopate kin ahihleh Ama’ lim leh meel sun a, abawl mihingte bangzahin kin zaw ding hiam, cih phawk sak ding hi. Pasianin tate makaihin, amaute in bawltawm nate tawh hilo, lungsim hoih, zia leh tong hoih, migitna leh itna te bekin kipakna leh lungnopna takpi pia thei ahihlam phawk sak ding hi.11

DEIH ABANGLO PASAL NAM

Vangik Azahnih Apuasaknuam Pasal.—Innkuan sungah a kum kikhai dimdiam tate in nu itna leh kinna kisam beklo-in ngaihna leh khauhtaka pa huzaapna zong kisam uh hi. Pa tawmte bekin hih thu kisam sa bek uh hi. Ama’ tavuante awlmawhlo ahihmanin nu tungah vangikpi suan hi. Tua bek thamlo-in ama thukhenna tawh kituakin nu pen mawhsak zaw lai hi. Kimawhsakna leh vangik apuakna ah nu in mawhna aom hetlo nate asep kul hi. Tua ahoihpen asep nahangin kisuantakna leh kisikna thuaksak lai hi. Tua bangin gimtakin asepnate pahtawi leh lungnuam sak sangsikin, dahna leh apasal mawhsakna nuaiah, apasalin ama’ nasepte awlmawhlo bek thamloin ama’ lungkim nading azi kizui sakin, a innkuan pianzia uh ukpih nuamlo hi.1

Pasal tampite in azite’ kinna leh buainate teltakin theihpih zolo uha, azite uh bangkua nasep semsak uh hi. Maimial sa-in inn hong ciahin, inn sungah khuavak tang saklo uh hi. An ahun lapin ki min keileh, inn nasem, naukem, inn sawltak nasep teng gawmin gimtakin asem azi pen mawhsakna tawh vaidawn hi. Nau kemin gima aom nu khelin naukepding zong zaniam kisain, azi anhuan amanlan theih zawh nadingin vaihawm pihlo hi. Nau acitloh ciangin nau acin ding leh akhoiding kisam salo hi. Acingkam theilo nau hangin azi-in nai bangzah gimlawh hiam, cih ngaihsut pih lo hi. Lungduai lo takin, “Hiah, anu, nata la in,” ci zaw lai hi. Ama’ ta ahihlam theilo hi. Tate khansuahna ah pa zong tavuan nei himawk lo hiam?2

Ukza akineisak Pasal Thuhilhna.—Pasal leh pa in innkuan ukna nang tungbekah om hi, ci kei zaw lecin, lungnopna nangah zaw ding hi. Nagamtatna in innkuan- khihpa nahihna lak hetlo hi. Nazi leh natate maan maanin nabawllohnate in nathu kineihsakna tawh na thu vaivaante maanlo ahihlam lak hi. Pansan khat nalak khit ciangin tua panin nakikhel thei nawn kei hi. Na ngimnate sepkhiat nasawm a, tampi vei mah nakhialhna kimu hi. Na kisap thu in ki-itna, thuakzawhna ahi hi. Kampau leh gamtat tawh nang thu bek thu sakei in. Innkuan-khihpa bangin gamta lo

nahihmanin midangte nencipin nasim mawh hi.

Nang ngaihsutnate midangte nazuih sak nopna tawh natna tampi hong pia zaw hi. Na ngaihsutnate hunkhat sung amaan tei hangin amaanloh ciangin midangte naza’ang a, nageelnate zong tuam diak hi. Amaanlo nate ngaihsutna aomlo zia leh tong tawh nakaithal hi.3

Na innkuan ukdan piandang hi. Zawhthawhthu zangin innkuan nauk a, amau’ khensatna kuamah nazangsak kei hi. Innkuan makai dingin kicing nakisa hi. Mi khatin set khat akhin bangin vai nahawm hi. Nang thu tawh thuneihna nala hi. Tua in vantungte hehpihna nakhasia sak a, Vantung nalung himawhsak hi. Nang bekin a uk thei bangin innkuan sung nazek hi. Na ngaihsutnate nazi in hong langpan ahihkei leh nakhensat nate hong teldot leh nathaukzo kei hi.4

Phatngai leh ahehbaih Pasal.—Pasalte aw, nazite’ khalam nuntak nadingin hunpia un. Phatngai dingin nakihanthawn uha, naupangte zong uham bangin nabawl uh hi. Amaute in anaupang lungsim uh nusia nailo uh hi. Hih phatngaihna hangin athauknate uh khancin theilo a, hehbaih sak hi. Amaute bek sukha lo a, midang nuntakna zong susia hi. Ishmael’ lungsim paai uha, amahin mi khempeuh langpan a, mikhempeuhin amah langpan hi.5

Angsunggen leh Mihai Pasal.—Sanggampa B in innkuan sungah lungnopna atungsak thei mi hilo hi. Hih munin nasep kipat nadinga ahoih mun ahi hi. Amahin khuavak sangin meipi tawh kibangzaw hi. Innkuanpihte lungkimpihna agendingin angsung thu nagen lua hi. Amahpen hai a, kithunei sakin, akammalte pen mi nasak mahmah a, mite’ meima ah ci asung tawh kibang hi. Akhialhnate kipulaak zolo hi.

Sanggam B aw, nalungsim nem sak in. Picinna leh ziadamna kipantah in. Amah tawh akizakim nazi tungah amigi mahmah ding nahi hi. Nazi’ lungsim ah khua amial sakding kam napau keiding hi. Innah kipuahphatna akipan ding ahi hi. Ngaihna ah kilamthakin, kampau khauh, awzollo, midang thuaksiamlohna, leh amipi cinglo lungsimte azozo ding nahi hi.6

Angsung agen, ahai, angoltol pa leh pasal in amahmah lungnuam theilo hi. Tuabanah innkuanpihte tungah meeikai sak hi. Tuabang hangin na thaman ding na mu ding hi. Nazi lungkia in, damlo leh natate zong nalungsim puak mahin meelhem sak hi.7

Thuakzawhna Neilo, Amahbek hiakisa Pasal.— Nazi leh natate tung panin lametna nanei lua hi. Mi namawhsak lua hi. Amaute tungah maitai in, awnem takin hopih hilecin, dahna leh lungnoplohna meeikaaite nateenna inn panin lakhia in khuavak natangsak ding hi. Nang thu bek thu nasa hi. Na innkuan sungah nazi khensatnate thu in naseh kei hi. Na khensatnate natate in azahtak theihnadingin napantah kei a, nazi in ahong zahtak nadingin zong na om kei hi. Nazi zong nang tawh nakizakim sak kei hi. Innkuan ki ukna nangma khutah nakoih hi. A it thei leh ahehpih thei lungsim nanei kei hi. Na innkuan sungah Pasian’ thupha ahong lutding nadeih leh hih zia leh tong hoihlote hemkhia in ahoih nalamthak ding ahi hi.8

Christian Ziadam aawlmawhlopa.—Zite tungah migi in, thunemin, leh hehpih theihna pen thanemna in nangaihsun hi. Pasal hihna amaan leh mipitanna atelkhial nahi hi. Nabawl ding migitna bawllo in nanutsiat pen thanemna leh zia leh tong hemna hizaw hi. Pasianin Christian khempeuhin aneihding ziadam pen thanemna in nala hi. Hih ziadam pen Jesu mahmah in leitungah alahkhiat zia leh tong ahi hi.9

Pasalte in Itna leh Ngaihna Thupisak hen.— Pasal in ngoltol in, ngenin, azi mawhsakin aom ciangin zi’ zahtakna leh itna thalawh zolo hi. Kiteenna gimhuai sak hi. Pasal in a-ithuai in omlo ahihmanin azi in it theilo hi. Pasalte in kidawm dinga, mi kin ding, panpih kinken zo ding, thumaan ding, leh hehpihthei ding hi. Itna leh hehpihna pulaak den ding hi. Pasal in zia leh tong apicin ciangin, alungsim zong siangtho in, kisangkhanin hi. Christian khat ie neihding zia leh tong aneih ciangin kiteen kizopnnna ah kilang ding hi. Azi adamin kemdinga, lungsim tha ngahsak ding hi. Hehnepna kammalte paupih in, innkuan sungah kilemna kizel sak ding hi.10

Thukhen Kuana Zota Hang ei, Zom Lai Ni Maw!