Chapter 13 TOPA’ SUNGAH LUNGDAMNA

Topa’ hoihna le hehpihna alak khia ding, Christ’ tangmi dingin Pasian’ tate hong kicial hi. Jesu in Pa’ zia-le-tong a maan ahong lah mah bangin, eite in zong Ama hehpih itna athei nai lo mite’ kiangah Christ alak khia ding ih hihi. Jesu in, “Amaute’ sungah kei om in, kei’ sungah Nang nong om ding hi;…leitung mite in, kei hong sawl nahih lam atheih theihna dingun,” ci hi (John 17:18-23). Jesu’ thuzuite’ kiangah Sawltak Paul in, “Note in, mi khempeuh in thei-a asim theih, …Christ’ lai nahih lam uh kilang hi,” ci hi (2 Corin 3:2, 3). A tate mal khat ciat tungtawn in Jesu in, leitung mite lai khak hi. Christ’ thuzui na hih nak leh nang’ tung pan Amah in, na tenna mun a na innkuanpihte, na khuapihte, konglak a omte lai khak hi. Na sungah Jesu hong tengin, Amah tawh a kimel theih nai lo lung sungah Ama’n thu gen nuam hi. Amaute in Lai Siangtho zong sim lo-in, Lai Siangtho pan a amaute a kihopihna lah za ngei lo-in, Pasian’ khutmate pan a Ama itna zong mu nai lo kha ding uh hi. Ahi zongin nang pen Jesu’ tangmi taktak nahih nak leh, nangma tungtawn in amaute in Ama hoihna khat peuh hong thei ding uh a, Amah a it ding le abia dingin amaute kingah thei ding hi.

Vantung paina lampi ah mei ade dingin Christiante hong kikoih hi. Amaute in Christ kiang pan a amaute’ tunga a taang khuavak, leitung ah taang sawn sak ding hi. Amau’ nuntakna le zia-le-tong pen, midangte in amaute’ tung pan a Christ le Ama nasepna a maan a amuh theih nading hiding hi.

(116) Eite in Christ’ lim ih puak leh, Ama nasepna ahi bang lian in alawp huai ih suaksak ding hi. Maigumna le dahna tawh kidim a, a phunphun a ciakciak Christiante in, Pasian le Christian nuntakna a maan lo lam in mite’ mai ah alak ahi uh hi. Amaute in, Pasian pen, A tate’ lungdam ding adeih lo bang khat a a kilangsak uh suak a, tua banga a hihna uh tawh amaute in vantung a om ih Pa, a lehlam a agen khia uh ahi hi.

Uplohna le lungkiatna lamah Pasian’ tate azol zawh ciangin Satan kipaak mahmah hi. Pasian muang lo-a, Ama hong hotkhiat nopna le hong hotkhiat zawhna um lah a ih om ding Satan in hong mu nuam hi. Topa in Ama vaihawmna mah tawh eite, gimna hong thuak sak ding hi ci-a ngaihsutna ih neih ding zong deih hi. Topa pen thukhualna le hehpihna anei lo banga ih kidawksak ding Satan’ nasep ahi hi. Topa tawh kisai thumaante zong a lehlam in gen hi. Pasian tawh kisai ngaihsutna a maan lo hong guan hi; vantung om ih Pa tawh kisai thumaante, eite in ngaihsun lo-in, Satan in a lehlam a adawksaknate ngaihsun zaw kha zel ih hih manin, Pasian muang lo-in Ama tungah ih phun khakzelna tawh Amah ih dai sak kha zel hi. Biakna nuntak pen maigumna khat asuak dingin Satan hanciam tawntung hi. A haksa le a cimtaak huai asuah ding zong deih hi; biakna pen Christiante in amau’ nuntakna mahmah tawh tua bang lam a a kidawk sak uh ciangin, tua banga a mau’ thu-uplohna tawh Satan’ zuau thu a thukimpih suak uh hi.

Nuntak lampi a totna uah mi tampi in, a khialhnate, masuan atut lahnate leh a lungkiatnate bekbek uh ngaihsun uh ahih manin, a lungsim uh dahna le thazawmna tawh kidim uh hi. Europe gam ah ka om lai-in, lung gimna lianpi tawh hih banga a om numei khat in lai hong khakin hanthotna hong ngen hi. Ama hong lai khak ka sim khit azan tak ciangin mang ka man a, huan sung khat ah ka om hi. Huan neipa hileh a kilawm khat in huan sungteng hong vakpih (117) hi. Huan sunga paakte ka lo-a namtui kasa mahmah hi. Lai hong khak numeinu in zong ahong zui hi-a, a paina noksak a aom siamsuam lingte hong ko niloh hi. Tua tengah thuumin tau-in om hi. Lamlakpa’ nung zui in lampi ah amah pai lo-in, ling leh lopa lakah amah pai hi. “Hih huan hoih mahmah napi, ling in dep mang khin hi lo hiam?” ci-in thuum hi. Tua ciangin lam hilhpa in, “Lingte tua ci’n om sak lel in. Hong sun kha inteh. Ling paakte, unok paakte, lengtong paakte lo zaw in,” ci hi.

Na khan sungin nopsak khat beek nei lo na hiam? Pasian’ Kha nasepna hangin lungdamna kipahna hun khat beek nei ngei lo na hiam? A beisa hun a na nuntak sung na et kik ciangin nop sakna hun khat beek mu kha lo na hiam? Pasian’ kamciamte, a namtui paakte bangin na paina lamkim lampam ah po hi lo hiam? Tuate a hoihna le a namtuina na lung sung kidim sak lo ding na hiam?

Ling le lopate in hong liamsak in hong hehsak bek ding hi; tuate bek kai khawmin midangte va pia lecin, Pasian’ hoihna a simmawh bawl na suah bek tham lo-in, nuntakna lampi a tawn dingin nakim napam a om mite a khaktan suak lo ding na hiam?

Mawhna le lungmanna tawh a kidim, a beisa hun a anuam nuntakna teng kai khawm kik a, lungkia demdam a ih om dong, tuateng suutsuut a thuumthuum ding hi lo hi. A lungkia mipa khuamial in tuamcip a, ama sungah Pasian’ khuavak lut lo-in, midangte’ lampi zong khua mial sak hi.

(118) A lungdamhuai thute ahong lah manin Pasian’ tungah lungdam ni. Ih muh tawntung theih dingin Ama hong itna thuphate kai khawm ni. Satan’ khut sung pan a mihing ahot khiat theihna dinga, a pasian-hihna pen mihing-hihna tawh tuam a, Pasian’ Tapa in A Pa’ tokhom a nusiatna; mihingte’ a dingin van kong hong honsak a, Pasian in A vangliatna ahong lahkhiatna mun pen mihing’ muh theihin hong kilangsak a, eite’ a dinga agualzawhna; mawhna in a vuhcipna siatna dum sung pan a mawhneite kidom khia to-a, a kicing Pasian tawh kizom kik thei in, hong Tanpa upna tawh ze-etna thuak zo-in, Christ’ dikna tawh kituam a, Ama tokhom tunga atut sakna, cihte ih ngaihsutsut dinga Pasian in adeih thute ahi hi.

Pasian’ hong itna um lah a Ama kamciamte ih muan lah ciangin eite in Amah adahsak hi-in, A Kha Siangtho zong adah sak ihi hi. Nupi khat in a tate’ phattuam nading le nopsak nading akhan tawnin a hanciam khit ciangin, amau’ a ding a ngaihsut sak lo bangin a tate a nu uh’ tungah phun niloh leh, ama’n bang a ngaihsun diam? A tate un hih bang ngentang in hih le-uh nute pate in bang a ci ngaihsut ding uh hiam? Eite in nuntakna ih ngah theihna dingin, Ama Tapa khattang ahong piak nading dong apiangsak Ama hong itna, eite in muang kei lehang, vana ih Pa in eite bang hong ci ngaihsut ding hiam? Paul in, “Ama Tapa haza lo-a, eite khempeuh’ a dinga a hong pia khia pa in, Amah tawh na khempeuh hong pia khia gai lo-in om ding ahi hiam?” ci hi (Rom 8:32). Hi napi, kam tawh ahi kei phial zongin a gamtatna uh tawh mi (119) bangzah tak in, “Topa in kei’a ding aci hikei. Ama’n midangte a it hangin, kei hong it hi ke’n teh,” a ci tam!

Hihte in na kha susia ding hi; na pau khiat uplahna kammal khempeuh in hong khem dingin Satan zol hi; tua in na sungah up lahna hong khang saka, hong huh ding vantungmite zong dah sak hi. Satan in ahong khem ciangin uplahna khuamial kammal khat zong pau khia kei in. Satan’ thugente ngaih nasawm leh na lungsim ah muanlahna le thu kheldotnopna hong dim ding hi. Na upmawh thute na gen khiat leh, na gen khiat uplahna khempeuh nangma tung hong tu kik bek tham lo-in, midangte’ nuntakna sungah po khia-a, gah anei khaici suak ding hi. Na kammalte’ nasepna na khaam zo nawn kei ding hi. Mawh zolna pan le Satan’ thang panin nang mahmah na suakta kik thei phial ahi zongin, nangma huzaap tawh lam apialsa mite pen, na gensa uplohnate panin suakta zo nawn lo thei ding uh hi. Kha lam thahatna le nuntakna ahong guan ding thute bek ih gen ding thupi mahmah hi!

Vantung a om na Topa’ thu, leitung mite’ kiangah bangteng gen nahiam cih za nuamin, vantungmite’n na ngai hi. Pa’ mai-ah nang’ a ding thuumna ahong bawl sak dinga a om pa’ thu bek mah genin nei in. Na lawmte khat tawh khut na kilet ciangin, Pasian phatna na muk leh na lung sungah om sak in. Tua hileh amah in Jesu hong ngaihsun ding hi.

Mi khempeuh in, thuak dinga a haksa dahnate, nan’ dinga a haksa mawh zolnate ahi ze-etnate thuak hi. Na lunggimnate, a si thei na mihing-pihte’ kiangah gen kei in la, thungetna tawh a vekpi-in Pasian’ kiang tun zaw in. Uplahna le lungkiatna kammal khat peuh na gen khiat loh nading ngeina khat bawl in. Lamet huai kammalte le a siangtho hopihnate tawh (120) midangte’ nuntakna a nuam zaw ding le amau’ hanciamnate a mainawt zo dingin tampi mah nahih thei ding hi.

Ang sung le siatna mangpa tawh kidona ah a cimawh dekdek, mawhzolna nakpi taka athuak galhang mi tampi tak mah om hi. Hih banga haksatna athuak mi khat peuh lungkiasak kei un. Mai anawt zawh nadingin lamet huai kammalte tawh amah hansuah un. Tua bangin note’ kiang panin Christ’ khuavak taang sak un. “Amah le amah’ a dinga a nungta kuamah a om kei hi” (Rom 14:7). Ih theih khak khol loh ih huzapte hangin midangte in hanciamna le tha-khauhna a na ngah zong om a, ahih kei leh lungkiatna le, Christ le thumaan pana nung tolhna a na ngah zong om thei hi.

Christ’ nuntakna le zia-le-tong tawh kisai ngaihsutna alauhuai anei mi tampi om hi. Amah pen gualhuaina le maitaina anei lo, a phincil, a ngoltol le, lungdamna anei lo bangin amaute in ngaihsun uh hi. Thu tampi ah biakna vai khempeuh pen hih bang ngeungau dan in kimu hi.

Jesu kap hi, a maitai lam kithei ngei lo hi, kici thei zel hi; A taktakin hong Honpa pen dahna athuak Mi-pa hi-a, mite’ lung khamna khempeuh apua-pa ahih manin, dahna tawh Amah kidim hi. Ama nuntakna pen angsung-nialna, gimna le lung khamna tawh kituam ahih hangin; a lungsim kisia cip lo hi. Dahna le khasiatna maisuah pua tuan lo-in, lungmuang hithiat in om hi. Ama lungtang pen nuntakna tuinak hi-a, a paina khempeuh ah tawldamna, lungmuanna, lungdamna le lungnopna pua kawi-kawi hi.

Topa citak mahmah in, kuhkal ngiungeu mahmah a, ahi zongin maigum ngilngul ngei lo hi. Ama dung azil mite’ nuntakna zong kuhkalna lungsim tawh kidim hi; amau’ sep ding masuan ciat a om lam zong hong thei tek ding uh hi. Polhtehna hong nei lo ding hi; a uanglua gualnopna le akhel ciamnuihnate hong zang nawn lo ding hi; Jesu’ biakna in gunpi bangin lungnopna (121) hong pia hi. Lungdamna beimangsak lo hi; Kipahna zong khaam lo hi, maitaina zong mialsak lo hi. Christ pen a maang dinga hong pai hi lo-in, nasem dinga hong pai hizaw hi; ih lung sungah Ama itna ahong ten ciangin, eite in Ama’ zia ih zui ding hi.

Midangte’ gitlohna le diklohnate ih lungsim ah ngaihsut bel a ih neih leh, Christ in eite hong it bangin amaute ki-it thei lo hi; ahi zongin Christ in eite hong itna le hong hehpihna a lamdangte ngaihsut belin nei lehang; tua bang lungsim mah midangte’ kiangah luang khia sawn ding hi. Khialhnate le kicinlohnate om a, ih muh kawmkawm mah in eite khat-le-khat ki-it a ih kizahtak ding kilawm hi. Kiniamkhiatna le ei-le-ei kipummuan loh ding kisin a, midangte’ khialhnate thuakzawhna ih neih ding zong ih kisin ding hi. Tua hileh angsung lungsim toi khempeuh hong bei-in, lungsim taanzau le citna ih nei ding hi.

Laphuak siampa in, “Topa muang in la, apha gamta in; tua hileh gam sungah na teng dinga, nuam nasa ding hi,” ci hi (Late 37:3). “Topa muang in.” Ni khat simin ama van-gikte, ama lunghihmawhnate le buainate nei tek hi; eite in hamsatnate le ze-etnate ih tuah khak ciangin ih genzia ding bangzah in ih kiging khin zo hiam? Zontawm buaina tampite lutsak, launa tampite uanggen, tua bang patauhna van-gikpi ih pholak ciangin, ih ngetnate khempeuh hong za ding le huhna ih kisap hunhun a, hong huh pahpah ding, hong it ahong hehpih Honpa aneilo bangkeek in mi khat peuh in hong mu kha ding hi.

Mi kim khatte khalau den in gim kiguantawm tawntung uh hi. Ni simin Pasian’ itna hong lak limte in amaute kiim-um hi; ni simin Ama vaihawmsakna thuphate amaute in nopsakpih uh hi; ahi zongin amaute in tua thuphate phawk kha lo uh hi. A lungsim un amau’ tunga atung thei (122) adeih huai lo thu pawlkhat ngaihsun tawntung uh hi; haksatna kim khat pen hong tung takpi thei mah hi, tua pen thu neuno khat hiphial taleh, lungdam koh ding a kilawm thudang tampite amaute in muh loh lawh thei uh hi. A thuak uh haksatnate in, huhna ngah theihna bulpi khat bek ahi Pasian’ lamah amaute denna zaw lo-in, amaute in khasiatna le lungkimlohna in ngaihsun zaw uh ahih manin, tuate in Pasian tawh amaute kikhensak zaw hi.

Tua bang uplohna ih neih ding a kilawm hiam? Bang hangin lungdam lo-in muanglah thei ding ih hiam? Jesu ih lawm hi; vantung khempeuh in ei’ phattuam nading kin uh hi. Ih nisim nuntakna a lungmannate le lungnoplohnate tawh ih lung sosak in, ih tal ih zingsak kei ding hi. Tua banga ih hih kei leh hehna ding le thangpaih nading hong om tawntung ding hi. Ze-etna ahong thuak zo sak tuan lo, hehna le gimna bek ahong guan zawsop lungmanna bek ngaihsut in ih nei kei ding hi.

Nasepna ah lungkhamna zong om thei ding hi; na lametnate zong hong mial semsem in, supna zong na tuak kha thei ding hi; ahi zongin lungkia kei in; na vaiteng Topa ap inla, lungnuam takin om hithiat in. Na vaiteng siamna tawh nahih theih na-dingin ciimna ngen in. Tua bangin supna le tuahsiat nading kidal in. A deihhuai thute ahong piankhiat theih nadingin, nahih theih zahin hanciam in. Nang’ hanciamna kihel lo-in Jesu in huhna hong khaam tuan lo hi. Huhpa muanga nahih theih zah nahih khit ciangin, apiang bangbang tawh lungkim in.

Lung-himawhna tawh A mite a opcip dingin Pasian in hong deih lo hi. Topa in hong khem lo hi. “Lau kei un; na lampi uah a lauhuai omlo hi,” hong ci lo hi. Ze-etna le alauhuaite om a, tuate siang takin Ama’n hong gen hi. Mawhna le siatna leitung pan A mite alak khiat ding Ama’n gen lo hi. A sia theilo bukna hilh zaw hi. A nungzuite’ a ding thu a ngetna ah, “Leitung pan a amaute na lak khiat ding kong ngen kei hi, siatna pan a amaute Na kep ding (123) hong ngen kahi zaw hi,” ci hi (John 17:15). “Leitung ah note in gimna na thuak ding uh hi. Ahi zongin lungdam in kipaak un. Keimah in leitung ka zozo hi,” ci lai hi (John 16:33).

Mual tung thuhilhna ah Christ in, Pasian muan ding a kisapna tawh kisai thu manpha tampi A nungzuite hilh hi. Tua thuhilnate akhang akhang a Pasian’ mite hansuah nadinga a ki ngim hi-a, tuhun dong mah thuhilhna le hehnepna a kicing hong suak lai hi. “Amaute in khaici vawh lo, an la lo uh ahih hangin,” lung-hihmawhna bangmah om lo-in, phatna late sa uh hi ci-in, Honpa in a nungzuite’ muhin van a vasate kawk hi. Pa Pasian in vasate’ kisapna vaihawmsak hi. Honpa in, “Amaute sangin note manpha zaw tham buang hilo nahi uh hiam?” ci hi (Matthew 6:26). Mihing le ganhingte’ a ding a vaihawmsak Pa in, A khut phalh in A piansak khempeuhte vaak hi. Huih lak vasate Ama’n phawklo lo hi. A kam sunguh ah Amah in an abah loh hangin amaute a’ ding vaihawmsak hi. Amaute’ a dinga Pasian in atheh keek antangte, amaute in atop uh kul hi. A bu ding uh zong amau mah in atom uh kul hi. A note uh amau mah in avak uh kul hi. “Vantung a om na Pa un amaute vak” ahih manin lasa kawmin amaute vaikuan khia uh hi. “Amaute sangin note in manpha zaw tham buang hilo nahi uh hiam?” Kha lam a biakpiakna lungsim anei thei note, vantung a vasate sangin man tamzaw buang hilo nahi uh hiam? Amah ih muan nak leh, ih pumpi a Bawlpa, ih nuntakna a Kempa, Ama lim le meel sun a ahong meek Pa in, ih kitangsapnate hong vaihawmsak buang lo ding hiam?

Christ in A nungzuite, gamlak ah tampitak po-a apaak zeizai paakte lak hi. Tua (124) banga amau’ hoihna ciat tawh apalh zeizai paakte pen, vantung a om Pa Pasian in mihing ahong itna hong lahkhiatna ahi hi. Christ in, “Gamlak a unok paakte bangci khan uh hiam ngaihsun un,” ci hi. Tua paakte a hoihna le a etlawmna in, Solomon’ thupina khempeuh dem zo hi. Mihing in a siamtheih tawp uh a abawl ahoih bel puante le, Pasian’ piansaksa paakte pianpih hoihna le etlawmna tehkak theih hi vetlo hi. Jesu in, “Tuni in om a, zingciang a meikhuk sunga akikhul ding gamlak lopate nangawn Pasian in puan silhsak ahih leh, upna neu mite aw, Pasian in note hong silhsak zawtham buang lo ding hiam? ci hi (Matthew 6:28, 30). A zem siampa Pasian in, ni khat sunga avul thei paakte nangawn mel tuamtuam tawh hoih takin zem ahih leh, Ama lim-le-mel sun a, apiansak mihingte hong don zaw tham buang lo ding ahi hiam? Hih Christ’ thuhilhna pen, upna anei lo, patauhna, lungmana le, uplahna anei mite a taina ahi hi.

Topa in Ama tanu tapate khempeuh alungdam, alungmuang, a thumang dingin hong deih hi. Jesu in, “Ka khamuanna note kong pia hi. Leitung mite in apiak bangin ke’n kong pia kei hi. Na lung uh khamsak kei unla, alau zong lau kei un.” “Ka lungdamna note’ sungah om a, na lungdamna uh a kicin theihna dingin, hih thute note’ kiangah ka hong gen hi,” ci hi (John 14:27; 15:11).

Angsungkhualna lungsim le, hih ding masuan pelhna tawh a kizong lungnopna pen kikhai kim lo, kileek kim lo ahih manin tawm vei bek kip hi; bei mang pah a lungzuanna le dahna mah kidim kik veve hi; ahi zongin Pasian’ nasepna ah lungdamna le lungkimnate om hi’; a kician lo lampi atawn dingin Christiante hong kinusia lo hi; dahna le lungkiatna athuak dingin kinusia lo hi. Tu a ih nuntakna ah nopsakna ih nei kei phial zongin, hong tung lai (125) ding nuntakna lamen in lungdamna kinei thei veve lai hi.

Hih leitung mahmah ah zong Christiante in Christ tawh kikholhna a nopna kingah thei hi; Ama hong itna khuavak le Ama hong ompihna nuamte zong kingah thei hi. Nuntak kalsuanna khempeuh in Jesu tawh hong kinai zawsak thei-a, Amah hong itna athuk zaw in hong thei thei sak a, khamuanna innpi lam tawh kal khat khit kal khat hong kinai zawsak thei hi. Tua ahih ciangin eite in ih lametna khahsuah lo-in, a beisa hun sangin kipsak zaw, khosak zaw ni. “Hih ciang dong Topa in eite hong huh hi,” atawp dongin hong huh lai ding hi (1 Samuel 7:12). A susiapa’ khut sung pan a eite hong huhna ding le hong hotkhiat nadinga Topa’ nasepna ahong phawk kik sak mual suangte en dih ni. Topa in anul-keu khituite, adamsak natnate, abeisak lungkhamnate, ahawl khiat launate, ahih kitangsapnate, ahong piak thuphate-a kipan Topa in eite’ tunga ahong lah hehpihna khempeuh ih lung sungah phawk tawntung ni. Tua bangin ih khualzin nading a om laiteng ah ih phut khak ding khempeuh ih thuak zawh nading tha hong guan ding hi.

A hong tung ding kidona sunga lungkhamna athakte, eite in bangmah ih cih theih loh hangin ih mu khol thei hi. A beisa hun ngaihsun kawm le, ahong tung lai dingte en kholsa in, “Hih ciang dong Topa in hong huh zo hi,” “Na khan sungteng tua bang mah in na thahatna om ta hen,” ci ni (Thuhilh-kikna 33:25). Ze-etna pen ih thuak zawh nadinga hong kipia thahatna sangin nasia zaw lo ding hi. Tua ahih ciangin bangbang piang taleh ze-etna thuak zawhna ding tha hong kipia ding ahihna um in, sep ding ih muh khempeuh sem ni.

A sawt lo-in Pasian’ tate alut nading van kongpite kihong dinga, Vanglian Kumpipa’ kam panin amaute’ bil sungah, “Ka Pa’ thupha piakte aw, hong pai un la, leitung apian cil (126) a kipan note’ a dinga kibawl kholsa gam hong luah ta un,” cih thupha, la ngaih bel bangin ging ding hi (Matthew 25:34).

Tua ciangin amaute’ a dinga Jesu in abawl kholh innpi sungah tatkhiatte kitumsak ding hi. Tua lai-a alawn dingte uh pen, leitung a mi gilote, zuau gente, milim biate, mi-ninte le, thu-um lote hilo ding hi; Satan zo a, Pasian’ hehpihna tawh zia-le-tong a kicingtaak anei mite tawh amaute kikhawl tading uh hi. Hih leitung a amaute abawlsia, asia huai zongsatna lamsang khempeuh le, kicintaak lohnate khempeuh, Christ sisan tawh kisil siang khin zo hi. Ni sanga ataang zaw tham, Christ’ vangliatpi aphatna le, ataanna pen amaute tungah kiguan ding hi. Christ’ zia-le-tong a kicing le a etlawm pen, tu-a ih muh theih thupitna khempeuhte sanga a nasia zaw in, amaute’ tung panin taang khia ding hi. A lianpi tokhom kaang mai-ah amaute in mawh nei lo-in om uh a, vantung mite’ thupitna le hamphatnate amaute in ngah uh hi.

Ama a’ ding a thupi mahmah innluahza ngaihsun in, “mihing in a kha nuntakna bang tawh khek ding ahi hiam”? (Matthew 16:26). Zawng mahmah kha ding hi, ahi zongin leitung in cik mah hun a apiak theih loh hauhna le thupitna a sungah ama’n nei gige hi. Mawhna pan kitan khia-a a kisiangtho saksa kha pen, Pasian’ nasep nadinga a hatna khempeuh tawh a kipiak sawnsawn ciangin, manpha lua mahmah hi; tatkhiatna a ngah kha khat hangin, a siangtho gualzawhna la kisa in Pasian le a siangtho vantungmite a omna vantung ah lungdamna lianpi tawh kidim hi. 

xxXxx