Sinna 12: Jesu Hong Pai Kik Ciang

Thupatna:    Lai Siangtho sunga genkholhna a tam pepen in, Jesu Khrist leitung ah a hong paikikna ding thu a hihi. Thukhun Thak sung bekbek ah zong zali vei bang kimu thei hi. Bang hih dnga hong pai kik ding  hiam? Naungek bangin, suahna ding mun takpi zong om lo-in haksapi-in hong piang ding a hi hiam? Lai Siangtho in bang ci gen cih en dih ni.
1.        Leitung ah Jesu hong pai kik ding cih Lai Siangtho in gen a hiam? Hebrews 9:28.
            Theih ding:    Sihna a om takpi mah bangin (Heb. 9:27) Khrist  hong pai kik ding cih thu zong thu kician a hihi.

2.        Khrist hong kumkikna ding thu a kigenkholhna bang tan sawt zo hiam? Jude 14, 15.
            Theih ding:    Jesu Khrist hong paikikna ding tawh kisai a gen khol masa penpen, Adam pana khang sagihna Enoch a hihi,

3.        Jesu mahmah in bang hong kham hiam? John 14:3.
            Theih ding:    Hong khapna bangin Jesu a khatveina hong pai khin hi. A nihnveina zong hong pai takpi ding cih up huai mahmah hi.

4.        Khrist a simthamin hong pai kik ding hiam? Matthew 24, 26, 27; Mangmuhna 1:7.
            Theih ding:    Bethlehem khua-a Jesu hong suah lai-in a kitheih kholh loh hangin, hong pai kikna pen leitung buppi in thei ding hi. Naungek bangin hong pai lo dinga, gualzopa leh Kumpipa bangin hong pai ding hi.

5.        Jesu hong paikikna leh van a kahtohna koici kigen hiam? Sawltakte 1:9-11.
            Theih ding:    Jesu in a pumpi mahmah tawh muh theihin hih leitung paisan hi. Meiilompi khat in Amah la to hi. Hong pai kik ciangin vantung mite hong tonpih dinga, pumpi tawh om ding a hih manin muh theihin hong pai ding hi. Thamloin pengkul kimut zaza ding  hi.

6.        Jesu hong pai kik ciangin vantung mite in bang hih ding uh hiam? Matthew 24:31.
            Theih ding:    Vantung mite in Jesu hong zui ding uh hi. Amaute in gualzawhna pengkul mut ding uh hi. Leitung buppi-a tatsa mite khempeuh kaikhawmin Jesu' kiang paipih ding uh hi.

7.        Jesu in hong paikikna ding thu tawh kisai bang gen  hiam? John 14:2,3.
            Theih ding: Ih Lawmpa (John 15:14,15) leh ih  U-pa (1 John 3:1) a hi Jesu, ei tawh hong om khawm kik nuam mahmah hi. Eite tawh kikhawl dingin Amah a hong pai ding hi lo-a, Amah tawh a kikhawl dingin eite a hong la ding  hi zaw hi.

8.        Jesu hong paikikna in Amah uma a si khinsate bang ci sak ding hiam? 1 Thessalonian 4:16.
            Theih ding:    Han pan hong thawh khiat ciangin sihna tungah zawhna a neihna Jesu in hong lak hi. Sihna pan Lazarus leh midangte a phot khiat mah bangin hong pai kik ciangin, mawh maisakna a ngah a sisa mite Ama'n hing kik sak ding hi.

9.        Khrist hong pai kik ciangin midik a hinglaite' tungah bang piang ding hiam? 1 Thessalonia 4:17.
            Theih ding:    Vanlaizawl ah Jesu tawh a kimu dingin misite' lak pana hong tho kikte leh midik a nungta laite kila to ding uh hi. A pumpite uh minthang pumpi-in kilaih khin dinga, natna, satna leh, sihna mel pua nawn lo ding uh hi. Philipians 3:20, 21; 1 Corinthians 15:51-54.

10.        Jesu hong kilat ciangin mi gilote' tungah bang piang ding hiam? 2 Thessalonia 2:8.
            Theih ding:    Mawhna in Pasian leh mihing khen hi. Mawhna a kimaisakte a hih leh Pasia tawh kikhawl kik thei ding uh hi. Mawhna lampi a tawn vevete a dingin Pasian hong paikikna vaang taang lua mahmah a hih manin amaute in thuak zo lo-in si ding uh hi. Mangmuhna 6:15.

11.        Khrist hong kumkikna eite in bangci ngaihsut ding ih hiam? 2 Timothy 4:8.
            Theih ding:    Tu laitakin, ih mawhnate hong kimai sak a hih  lam ih theih manin eite ih lung nuamin, Pasian tawh kilemin ih om hi. A hi zongin natna satna thuak lai ih hih manin ih pumpi in mawhna gau thuak lai  hi. Khrist  hong pai kik ciangin ih pumpite kikhel dinga, mawhzolna leh mawhna gau panin ih suakta takpi ding hi. Titus 2:12,13; Isaiah 25:8,9.

12.        Amah hong pai kik takpi ding a hih manin Jesu in bang hong vaikhak hiam? Matthew 24:42-44.
            Theih ding:    Bethlehem khua ah Jesu hong suah lai-in Amah a dawn mi tawmcik bek om hi. Hong pai kik ciangin tua bang ih hih khak lohna dingin kiging ciat ni.

            Thukhupna:    Khrist hong paikikna in ei' a dingin hotkhiatna ding Pasian' vaihawmna ah a matutna a hihi. Pasian in a si dinga a Tapa hong piakna-i a meet a kiluak ding hi ta hi. Tua hun ciangin mawhzolna om nawn lo dinga, mawhna gau zong bei ding hi. Pasian' vaihawmna-i phattuamna a sang dingin tu-in Ama tungah eimahmah kipumpiaka, Amah tawh kikhawl thei dingin ih lungsim bawl pha-in, A gam sungah Amah tawh a om khawm dingin ih kiging khol ding hi.