“Munawng Aading Thasanna”

February 18                                                                                                                         Norway

Nipi 7na (1st Qtr, 2017)

“Munawng Aading Thasanna”

(Agen : Pastor Reidar Olsen)

            Bethel Seventh-day Adventist pawlpi pen Norway khuapi lianbel ahi Oslo khuapi ah om a, Europe ah a kiphuh zawh a sawtpen pawlpi ahi hi. Tua pawlpi pen kumsim in a lianbel kilemna letsong a kipiakna inn lianpi (hau) panin tai khat khawng bek gamla hi.

            “America ah a teeng Denmark mi khat in Pasian’na hongsep na tungtawn in Norway gamah Topa Jesu hong paikik ding a lamen Sabbath a zuite’ nasep kipan hi” ci-in tu laitak a Bethel Adventist pawlpi a kem Pastor Reidar Olsen in hilh cian hi. Amah in, “ John Gottlieb Matteson pen America gam ah Adventist a suak khit ciangin Norway leh Denmark gamah hong pai hi. Kum thum bang amah hong om a, mundang leh Oslo khuapi ah pawlpi phut hi” ci-in genbeh hi.

            “Amah in biakinn leh cina bawlna inn lei aa kamsangnu Ellen White in zong hihmun tawh kisai mangmuhna nei ahih manin” Mun hoih hi” ci-in tha pia hi.” ci-in Pastor Olsen in gen hi. Tua banah kamsang nu Ellen White in tua pawlpi ah va hawh in tuni dong aa a kizang laai pulpit, (thugenna tau) tung panin thu hilh hi cih zong Pastor Olsen in genbeh lai hi.

            Tua pawlpi pen 1879 kum in kiphut a, laibu bawlna zong tua kum mahin kipan h. Battle Creek cina bawlna (Sanitarium) pan deegree a ngah (21) te in July 4, 1898 kumin cina bawlna (clinic) hong uh a, tua hun panin cidamna lam nasep kipan thei pah hi.

            Cina bawlna inn zong zatui tawh thuahto in cidamna nasepna kizom to hi. Oslo khuapi pan tai (39) a gamlaat na  Honefoss khua khanglam ah  Laibubawlna phualpi in zong a nasepna zomto thei hi. Sangkhak sung khuakhal sungin sang naupang te’n laibu zuakna tawh lungdamna thu  tangkona zong nei uh hi.

Apua Mite Vaphaakna

            Laihawm khiatna nasep baan ah, Oslo khuapi aa om Bethel Adventist pawlpi in radio tawh huih lak ah tangko na leh anhuanna saang pan in zong a pualam mite vapha uh hi.

            Pastor Olsen in radio tawh thu tangko na phualpi ah makaipi (director) sem hi. Tua phualpi panin Oslo khuapi sung zeel in lungdamna thu kitangko a, nisim in thungai 2000 bang phaa hi. Tua thu tangko na ah Sabbath School geelna, leh pawlpi nasepnate lasaknate leh teci pan nate kihel hi. Friday (kiginni) simin Pastor Olsen in thungaite Sabbath ni-in hong kikhawm dingin radio pan zawn a, thungai pawl khat hong kikhawm uh hi.

            Bethel Adventist pawlpi ah a kiphut anhuanzia sinna saang ah annek tuidawn lam a hilh sianu a tangzang pawlpimi zong a hi Lim Helene Stoelen in makaih hi.

            “Pawlpi thu kikupna (Church board) ah a pualam mite phaak zawh nadingin ngimna (5) ka khensat uh a, sa kihel lo anhuanna zong ki hel hi. Tua thu pen pawlpi Facebook leh zatote ah tangko ung. Tua thusin na a kah dingin pawlpimite leh lawm leh gualte hong pai uh hi. A pua lam vaphan na nasep na ah pawlpi mite in a lawmte uh a va sapna pen a muibun pen nasepna ahi hi,” ci-in Linn in gen hi.

            Pawlpi ah a moi ahaam pawlpimite leh minam tuamtuam zong om a, amau tawh kimeltheihna ka bawl hi. A pualam phak na nasep na ah pawlpimite lungdam thei mahmah a, nasep tam mah taleh nuamsa lel uh hi.

Mun Zai Kisam

            Bethel pawlpi pen amau gammi Norway minamte tawh bek hilo in Europe nisuahna lam Latin America, Africa leh Asia gam nisuah na khanglam pan a hong peem (lal) thakte tawh thalawp tak leh kizen tak in Topa’ nasepna ah mapang khawm uh hi. Tua khangnote lakah a tamzawtham in Oslo khuapi aa pilna saang sinna saangpi ah pilna sin sang naupang te ahi uh hi.

            Tu laitak in pawlpi kisap pen a kizang thei munzai khat ahi hi. 1879 kum lai aa a kiphut laibu bawlna set pen lui mahmah ta hi. Tu ni-in tua set pen puahkik ding leh bawl thak ding ki sam mahmah hi.

            Pastor Olsen in “Neekkhawm ka bawl uh ciangin khesilnading mun kician ka nei kei uh hi” ci hi. Amah in, “Anbuk khat, gualnuam aa kimawl theih nading mun khat, thunget nading mun khat leh khang note kikhop theih nading mun khat kisam ung”, ci-in genbeh hi. Bethel Adventist pawlpimite lunggulh lai pen anneekna ding khaangol khat Sabbath nitak aa gualnop nading leh khenneu thu kikupkhop nadingin a mun leh inn lian khat ahi hi.

            Tu kuata Sabbath sawm leh thumna sumpi pawlkhat pen a omsa setvante puah nading leh mun behlap a, Oslo khuapi aa om gam tuamtuam pan khangnote khaalam khantoh nadingin kizang ding hi.

            “Ka pawlpi uh leitungbup Adventist pawlpi in hong huh nuam ahih manin lungdam mahmah ung” Pastor Olsen in ci hi. “Gam nuam, gamhau ah ka ten uh hangin nasep thaman tawm bek angah saang naupang tampi ka neih uh baan ah amau leh amau ii nuntak na haaksa lai gamdang mi zong ka nei uh hi. Tua ban-ah piakkhiatna a hat nawnlo piteek puteek pawlkhat zong ka nei uh hi”, ci-in Pastor Olsen in genbeh hi.

            Cinghtak in tu kuata Sabbath sawm leh thumna sumpi nong piak man un lungdam mahmah ung.

***************