Chapter 12 UPLAHNA BANG CIH DING

Mi tampi, a diakdiak in Christian nuntakna ah amoi laite, upkhialhna thute tawh buai thei zel uh hi. Lai Siangtho sungah amaute in atel zawh loh uh, atheih zawh loh uh thu tampi om a, Lai Siangtho pen Pasian’ kiang pana hong pai thu hi, ci-a a upna uh suksiatsak nadingin Satan in tuate zang hi. Amaute in, “Lam maan bang ci theih ding ka hiam? Lai Siangtho pen Pasian’ kammal ahih takpi leh, hih uplahnate le lungmannate pan bangci suahtak theih ding ka hiam? ci uh hi.

Ih upna ih ngakna ding thu a kicing hong lak lopi-in Pasian in a um dingin eite hong sawl lo hi. Amah om a hihna, Ama zia-le-tong, Ama thu a maanna cihte khempeuh pen ih ngaihsuttheihna in asaan theih thupiang om in, kipsak a, hih thupiang om theihsakna zong tam mahmah hi. Pasian in ahih leh uplah theihna hem khia tuan lo hi. Ih upna pen muhna tungah nga lo-in theihtelna tungah ngak ding hizaw hi. A um lah nuamte in uplah theih ding nei-a, thumaan a thei nuam taktakte in lah, a upna uh a ngak nading uh thu tampi mah mu ding uh hi.

Mihing’ lungsim in, Vanglianpa’ nasepzia atheih khit zawh ding hilo hi. Pilna sang bel nei-a a lungsim navak belte’ a dingin zong Siangthopa’ thu pen thuthuk hiden ding hi. “Pasian’ thuthukte kan khia khin zo ding na hiam? Vanglianpa’ kicinna mu khia khin zo ding na hiam? Tua in vantung zah in sang hi, bang cih theih ding na hiam? Khul sangin tuate thuk zaw lai hi, bang cih thei ding na hiam?” (Job 11:7, 8).

(106) Sawltak Paul in, “Pasian’ ciimna leh theihna tam in thuk mah si! Ama thukhennate kan khiat theih lah hi lo, Ama lampite lah sul zuih zawh hi lo!” ci hi (Rom 11:33). Ahi zongin, “Meiipite le khuamial sahpi in Amah um cih” ahih hangin, “dikna le thutakte Ama tokhom nuaiphah ahi hi”(Late 97:2). Vangliatna tawh a kihual khawm abei thei lo itna le hehpihna ih tel theihna dingin, eite tawh Amah hong kizop dan le Ama zia- le-tongte panin ih thei thei hi. Eima hoihna dinga ei’ theih dinga kilawm Ama ngimnate ih thei thei hi; tua ban siah pen vangliatna tawh a kidim khut le, itna tawh a kidim lungtang, ih muan ding ahi hi.

Pasian’ Kammal pen Ama zia-le-tong mah tawh kibangin, mihing in ih theih khit zawh loh ding thuthuk om hi. Leitung ah mawhna hong lutna thu, Christ hong sung lutna thu, suahkikna thu, thawhkikna thu le, Lai Siangtho sunga hong kigen thu tampi tak pen, mihing’ lungsim in atheih khit zawh ding leh atel gen theih dingin thuthuk lua hi. Ahi zongin Pasian’ vaihawmna thuthukte ih theih khit zawh loh manin Ama thu uplahna ih neih ding hi tuan lo hi. Leitung nate ah zong ih theih khit zawh loh thuthuk tampi in hong umcih hi. Nuntakna anei aginalobel na khat peuh thu zong mipil belte in a kicianin gen siang thei tuan lo uh hi. Mun khempeuh ah ih theih khit zawh loh na lamdang om hi. Tua hi-a kha lam thu ah zong ih theih khit zawh loh thuthuk a tamna pen lamdang sa ding ih hiam? Mihing’ lungsim thanemna le toina hanga athei khin zo lo ih hizaw hi. Pasian in Lai Siangtho sungah Ama zia-le-tong (107) ih theih theihna ding a kicing hong lak khin ahih ciangin, Ama vaihawmna thuthuk khempeuh ih theih khit zawh loh manin, Ama Kammal ih up lah ding hi tuan lo hi.

Sawltak Peter in, Lai Siangtho sungah, “theih ding a haksa thu om a, apil lo le akip lo mite in … a khiatna lumletin siat lawh thei uh hi,” ci hi (2 Peter 3:16). Lai Siangtho a haksatna munte, Lai Siangtho nialna-in thu-um lote in zang uh hi; ahi zongin tuate in Lai Siangtho pen Pasian’ humop ahih lam kilangsak zaw hi. Lai Siangtho sungah Pasian’ thuthuk kihel kei hen la, olno taka ih theihtheih ding thute bek kihel leh; mihing’ lungsim in Ama vangliatna le thupinate thei khin thei pah mawk leh, Lai Siangtho pen Pasian’ gelh ahih lam a kiciatna om zo lo ding hi. Lai Siangtho thu a thupinate le a thuthuknate in Pasian’ Kammal taktak ahih lam upna hong nei sak zaw hi.

Lai Siangtho in, mihing’ lunggulhna le kisapnate ah a kicing a zat theih dingin thumaan abaih thei pen in hong lak hi. Tua thu in pil a kisa mahmahte’ lungsim khimin abuai sak hangin, a seiniam belte le apil lo mite, hotkhiatna lampi mu tel sak hi. Ahi zongin tua thumaante baihno taka a kitheih theih hangin, mihing’ theih khit zawh loh ding asang mahmah, abat hak, a kicing thute tawh kizom veve a, Pasian in hong gen khia ahih man a tuate eite in asang thei ih hi bek hi. Mi khempeuh in Pasian’ lamah kisikkikna lampi atot theihna ding le, ih Topa Jesu Christ lamah upna nei-a, Pasian’ geelsa banga gupna a ngah theihna dingun, hih bangin tatkhiatna ding vaihawmna ih mai ah hong kilui hi; ahi zongin olno taka a kithei thei hih thumaante’ nuai ah Pasian’ thupina a kiseelna thuthukte om hi. Tua thuthukte lungsim in a kan khiat zawh loh hi napi-in, tuate in zahtakna le upna tawh thumaan azong mite, theihtheihna guan hi. Lai Siangtho kan tel semsem lehang, a nungta Pasian’ kammal a hihna le mihing’ (108) ngaihsutna in Lai Siangtho baan zo dek lo a hihna, ih upna hong thuk semsem hi.

Lai Siangtho thumaante ei’ theih khit zawh ding hilo hi, ih cih ciangin, mihing’ lungsim in Pasian’ lungsim baan zo lo hi, a ci ih hi-a; a kicing lo mihing’ thutheihna in, Theikimpa’ ngimnate athei khin lo ding mah ahi hi.

Thu-um lote in, Lai Siangtho thuthukte thei khin zo lo uh ahih manin, Pasian’ Kammal anial uh ahi hi; Lai Siangtho ka um hi, a cite zong, hih a lauhuai thu panin suakta khin lo uh hi. Paul in, “Ute naute aw, note’ lakah a nungta Pasian’ kiang panin pial khia-a, mawhna ahi uplohna lungsim a nei khat peuh na om lohna dingun kikem un,” ci hi (Hebrews 3:12). Lai Siangtho thute lim taka sim ding le, Lai Siangtho sunga hong kihilh zahzah “Pasian’ thuthukte” kan khiat ding ahi hi (1 Corin 2:10). “Thusimte Topa ih Pasian tawh a kisai hi-a, hong kilang khia thute ahih leh ei tawh a kisai ahi hi” (Thuhilh-kikna 29:29). Ahi zongin thu kantelna lungsim pen Satan in lumlet nuam tawntung hi. Lai Siangtho thumaan ngaihsutna ah kisaktheihna kim khat om thei ahih manin, a lungkimna zah ding uh a Lai Siangtho munte atel gen theih loh uh ciangin mite in thuak zo lo-in a guallel kisa thei uh hi. Pasian’ kammalte thei kei ung, acih ding uh neuhuai lua sa uh hi. Amaute’ tungah Pasian in thumaan lah tel huai asak hun dong amaute in ngak nuam lo uh hi. A panpih omlo pi-in mihing’ ciimna in Lai Siangtho a thei khin zo ding peuh sa uh ahih manin, amaute in Pasian’ hilhna ngak nuam lo-in, a tawpna ah Pasian’ thu nangawn nial ta uh hi. Tua ahih manin upna le thuhilhna tampite, Lai Siangtho pan a kila ahih tei hangin, Lai Siangtho’ hilhna tung taktak ah kinga lo tham lo-in, Lai Siangtho’ deihna bulpi tawh kilehbulh thei lai hi. Tuate in mi tampite’ lungsim ah up lahna leh lungmanna piangsak (109) hi. Ahi zong tuate hangin Pasian’ kammal ngawh ding hi lo-in, mihing in alum alet a, a hilhna hang hizaw hi.

Piansak mihingte in Pasian le Ama nasepnate thei khin thei uh hileh, tua ciang dong atung khin pen thumaan theih beh nopna zong om nawn lo dinga, theihna zong khang nawn lo ban ah, lungsim khantohna zong om nawn lo ding hi. Pasian lah alian bel hi nawn lo dinga; mihing lah theihtheihna tua ciang dong tung khin ci le’ng mainawtna om nawn lo ding hi. Tua bang apian loh pen Pasian’ tungah lung dam ni. Pasian kicing kim hi; Ama sungah “ciimna le theihna sumgil khempeuh” om hi (Colossians 2:3). A tawntung hun ah zong mite in kan tawntung, sin tawntung ding uh a, ahi zongin Pasian’ ciimna, hoihna le vangliatna sumgilte muh khiat khit in om lo ding hi.

Tuhun in zong Ama thumaan thutakte, A mite’ kiangah a kilah khiat tawntung ding Pasian in deih hi. Pasian’ Thu theihtheihna ding lampi khat bek om hi. A Thute amuam Kha Siangtho’ nasepna pan bekin Pasian’ Kammal theihtheihna kingah hi. “Pasian’ vaite kuamah in thei lo hi, Pasian’ Kha bek in thei hi;” “banghang hiam cihleh Kha in Pasian’ thuthuk ahi na khempeuh kan tel hi” (1 Corin 1:11, 10). “Thumaan thutak Kha Siangtho ahong tun ciangin, thumaan khempeuh ah note ahong kha ding hi… Amah in kei’ kiang panin a ngah dinga, tuateng note’ kiangah ahong lak ding hi,” ci-in Honpa in a nungzuite kamciam na pia hi (John 16:13, 14).

Mihing in a ngaihsutnate azat tawntung ding Pasian in deih hi; Lai Siangtho simna in lungsim thahatsak le sangtosak dinga, adang laite simna in tua zahin hih thei lo ding hi. Mihing’ ngaihsut theihna thanem in ginalo ahih manin Pasian zah a thu a ngaihsun thei (110) dingin ih seh kei ding hi. Lai Siangtho kammal a kician mahmah thumaante telcian theilo zah khop in, ih thutheihnate muikaai mialsak lo hi lehang, hilh bangbanga sin a thei nuam naupangno khat ii dik hit-hiatna le upna bang nei in Kha Siangtho’ huhna ih ngen ding hi. Pasian’ vangliatna le ciimna, eite in athei khin zo lo ding ih hihna, cihte ih phawkna in, kiniam khiatna hong nei sakin, Lai Siangtho hong lem nuam sakin, zahtakna tawh Ama mai hong zuan nuam sak hi. Lai Siangtho ih leem ciangin, ih ngaihsutna in amah sanga alian zaw thunei khat om hi ci-a atheih ding le, ih lungsim le ih pilna pen KEIMAH ahi pa’ mai-ah kiniamkhiat in akun ding kisam hi.

Haksa a lungman huai tawh a kibang thu tampi om mah a, ahi zongin tuate atheih zawhna ding uh a ahanciam mite’ tungah Pasian in theihtel theihna pia ding hi. Ahi zongin eite in Kha Siangtho’ makaihna ih ngah kei leh Lai Siangtho tawh ih kilai niloh kul dinga, amaan lo pi-in zong ih khia kha ding hi. Phattuamna ngah lo pi le siatlawh zawsop zah dongin Lai Siangtho tampi tak kisim thei hi. Zahtakna le thungetna lo tawh Lai Siangtho a kilem ciangin, Ngaihsutnate le lawpnate Pasian’ tungah kinga lo-a, Ama deihna tawh a kituah loh ciangin, lungsim sungah uplahna hong dim hi; Lai Siangtho simna panin thu-um lote in, ahi lo lamin tha ngah zaw thei lai uh hi. Galpa in ngaihsutnate ukin, a maan lo lamin Lai Siangtho hong khia sak hi. Pasian tawh a kilem nading uh a cihtakna tawh a hanciam lo mite, bangzahta in pil tase le-uh, Lai Siangtho a theihna uh khial thei veve a, amaute’ gennate zong muan ngam ding hi (111) lo hi. Thu kitukalhte a muhna ding uh a Lai Siangtho asimte in kha lam khua-muhna ngah lo uh hi. A muhna uh toi ahih manin a kician mahmah le a ol nono thute nangawn ah uplah leh uploh theihna ding thu tampi mu ding uh hi.

Bangzahta-in sel in kineih mah tale uh, uplahna le uplohna apiang sak taktak pen atampen ah mawhna it a, mawhnopna ahi hi. Kiphasak a mawhnopna lungsim aneite in, Pasian’ Thu in a hong hilhna le ahong khamnate deih lo uh a; ahong ngette amang nuam lote in Pasian thu upna zong muanglah pah uh hi. Thumaan ih muh khiatna dingin, thumaan theih nopna taktak neih kul a, zuih nopna lungsim zong neih kul hi. Hih bang lungsim tawh Lai Siangtho asim mi khempeuh in, Lai Siangtho pen Pasian’ Thu ahih lam theihsakna tampi hong mu ding uh a, gupna a ngahna ding uh amaute apilsak ding thumaante theih theihna hong ngah ding uh hi.

Christ in, “Mi khat peuh in Pasian’ deih bang hihnopna a neih leh, amah in thuhilhna athei ding hi,” ci hi (John 7:17). Na theih loh thu khat kankan in na seksek sangin, na tunga hong taangsa khuavak don zaw lecin, alian zaw khuavak na ngah ding hi. Na theihsa nate, Christ’ hehpihna tawh sem khia lecin, tu-a na up lah thute telin na sem khia thei ding hi.

A pilbelte hita leh, ahaibelte hita leh, mi khempeuh tungah a kilang thu khat om a, tua in tuahkhak thu ahi hi. Ama thute a taktak a hihna le, A kamciamte thumaan a hihna a sittel dingin Pasian in hong cial hi. “Topa hoih a hihna ciam un la, thei ta un,” hong ci hi (Late 34:8). Midang khat peuh genna ih muan sangin, ei mahmah in ih ciap ding hizaw hi. Topa in, “Ngen un, na ngah ding uh hi,” hong ci hi (John 16:24). Ama kamciamte tangtung ding (112) hi. Tangtung lo ngei lo-a, zong tangtung lo thei lo hi. Jesu’ kiang neh zaw sem a, Ama itna kicing sungah ih lungdam tak ciangin, Ama hong om pihna khuavak sungah ih uplahna khuamial teng hong bei mang ding hi.

“Khuamial vangliatna panin Pasian in eite hong hon khia-in, A it A Tapa’ gam sungah eite hong lut sak hi,” ci-in Paul in hong gen hi (Colossians 1:13). Sihna pan a nuntakna ah a galkah sa khempeuh in, “Pasian thutang hi, ci-in kiptak in um uh hi” (John 3:33). Tua tham lo-in, “Huhna ka kisam a, Jesu’ sungah ka ngah hi. Ka kisapna khempeuh hong kipia-a, ka kha gilkial hong vah hi; tu-in Lai Siangtho pen kei’a dingin Jesu Christ hong kihilna ahi hi. Bang hangin Jesu um ka hiam nong cih leh, kei’ a dingin Amah ka Honpa ahi hi. Bang hangin Lai Siangtho um ka hiam? Banghang hiam cihleh Lai Siangtho pen ka kha’ a dingin Pasian’ awging ahi hi,” ci uh hi. Lai Siangtho a maan hi-a, Christ zong Pasian’ Tapa ahi hi, ci-in ei mahmah in theihna ih nei thei hi. Ngian siamna tawh a kibawl tawm thute a zui ih hih loh lam eite in ih thei hi.

Peter in, “Hehpihna le, ih Topa le Honpa Jesu Christ theihtelna ah khang to un,” ci-in a u a naute hanthawn hi (2 Peter 3:18). Pasian’ mite, hehpihna ah a khantoh uh ciangin, Pasian’ thu atelzaw a theihtheihna ngah tawntung uh hi. Lai Siangtho thumaan panin khuavak thak le a hoihna muh beh zel ding uh hi. A khang a khanga pawlpi tangthu ah hih bang mah na hi-a, atawp dongin kizom suak ding hi. “Mi dikte’ lampi, sun kim laitak donga a taang semsem zingsang khuavak tawh kibang hi,” (Paunak 4:18).

Upna tawh khua nung thu ding eite in ih mu khol thei-a, pilna a khanna dingin Pasian’ kamciam lenin, mihing’ siamnate Pasian’ a tawh gawmkhawm in, kha thahatna khempeuh’ (113) khuavak Bulpi tawh ih kizomsuaksak thei hi. Pasian’ vai hawmna sunga ih lungmanna khempeuh hong kitel siangin, theih dinga a haksa thu khempeuh hong kigen siang ding ahih manin lungdam in ih kipaak hi; ih lungsim a buaina le, ngimnate buai-a a tangtun lohna mun ah, kithutuahna ahoih bel leh a kicing bel ih mu ding hi. “Tu-in eite in limlang sunga bangin ih mu milmiala, ahi zongin tua ni ciangin maitang ih ki mu ding hi. Tu-in khen khatkhat bek ka thei-a, tua ni ciangin kei mah ka kitheih bangin ka thei ding hi,” (1 Corin 13:12). 

xxXxx