Zo Phualva Thupuak: Volume 06, Issue 26 - Christian Te in Christmas Pawi Bawl Huai Mah Hiam

CHRISTIAN TE IN CHRISTMAS PAWI BAWL HUAI MAH HIAM?

 Christian-te in Christmas pawi bawl ding pen adik mah hiam cih dotna kum simin laikhak ahi zong phone tawh ahi zong dotna ka ngah den hi. December 25 ni in Jesu hong hong suak hi cih Lai Siangtho matlap ding a kiciatlohna leh December 25 ni pen dawibiate pawi tawh a kinahvawh nahi hi. Christmas ni hong piankhiatna thu le, tua ni ni-tumdang diak ahihna thu matlap kician pawlkhat kong gen cian nuam hi.

        1. Christmas le Christian-te: Hih dotna tawh kisai kong gencian ma in, Christmas pen Adventist-te in ih nial ding hi tuan lo hi cih hong gen masa nuam ingh. Banghang in Jesu Christ suah hun phawkna pen eite in va nial tentan se ding ie hiam?  Bangbang ahi ta zong, hih pawi pen Lai Siangtho ah a siantho sakna(ordained) omlo ahih manin thu-ummite tawh kisai dingin ih ngaihsun kei hi. Eite in ni siangtho khat bek ie nei a, Piangsak pa le Honpa thu ie manna in ih siantho sak Sabbath ni ahi hi.

2. Christmas le Leitung Tangthu: Ih theihtek sa mah bangin “Christmas” cih pen tanglai mikang kammal ahi “Christmesse,” pan kila hi a, a khiatna in  “Christ’s Mass” kici “Khazih’ Pawi” cihna ahi hi. Hih Kammal pen khuamialpi hunlai in hong kizangto hi a, December 25 ni in Jesu hong suahna pawi kham ding kithawi in zan kim in Mass (Siangtho pumpi nekna: Catholics; src:https://www.merriam-webster.com/dictionary/mass) na nei den uh hi. Hih pawi pen Kammal dangte ah “Nativity” ci in zong kizang a, Latin kammal “Natalis” pan kila hi a, “Holy Night: Zan Siangtho” cihna ahi hi. (German: Weihnachten)

      Hih Christian-te pawi ie hong piankhiatzia abul taktak kician lo hi. Tangthu kan pawlkhat in hi nativity pawi pen AD kum zabi 4 lai pan kizang ta hi a ci om hi. Christian pawlkhatte in Christ sih ni pen March 25 hi ding cih thu bullet nei in tuat uh hi. Pawlkhatte in Amah pen December 25 ma kha 9 lai in suak ding hi ci in upmawh gen uh hi. Adangte leuleu in March 25 ni in Jesu suak sak uh hi.

A tamzaw te hilhcianna ah hih Christmas pen Romans te ie ciindan namkhat ahi December 25 ni sim a aneih den uh Zawhtheih loh Ni “Invincible Sun” (Latin: Sol Invictus) ie Suahkik ni “the Rebirth of the Sun” tawh kizom hi. Nativity pawi hun sung a meivakte a thupitsakna uh ih et ciang, Lai Siangtho sungah Christ zong meivak (Luke 1:78, 79) hi a, tuate nih kizopna nei gige hi. Hih thu en leng, Christiante in dawibiate pawi kimlai Christian pawi a suak dingin la a, lemtuah tawm uh hi. Hi thu zong hikha ding, ahi zong tangthu matlap ding haksa mahmah hi.

        3. Christmas le Thu-um mi: Eite in ih theih ding thu nam nih om hi: Eite in Pasian lamlahna tawh Jesu’ suahni ih kepcingna ding thu ih thei kei hi. Upmawh gen zong kullo hi. A nihna ah Christian bupphial in December 25 ni in Jesu’ suahni bawl hi. Ih laihkik thei kei a, laihkik zong kullo hi. Hih pawi tawh kisai bawlloh ding ih genna pen Lai Siangtho siksanna omlo bek thamlo in dawibia mite pawi tawh kizopna nei ahih man ahi hi. Tua ahih manin eite in ih ngaihsutna panin hi tawh kisai ih hepkhiat ding kisam hi.

Ih gensa mah bangin, Jesu in mihing bangin numei sung pan hong suahni phawkna le lungngaihna hun a tuam a neih ding pen khial vetlo hi cih kong genpha kik hi. Ngaihsutna kong piak nop khat ah, hih Christmas hun sungin a lamdang taka Jesu mihing hong suahna thu lungngaih ding hoih ka sa hi. Pasian’ Tapa takpi “Ci-le-sa suak” (John 1:14 ZIV) cih pen a lamdang mahmah thu hi a, mawhnei eite mawhna pan hong hotkhiatna dingin Piangsakpa ta-ngial mawhnei khat bangin hong suak hi.

     Nativity ih cih zong mihingte ading a Pasian hong piak letsong hi a, a Tapa tungtawn in Pasian in a lianpen letsong hong pia ahi hi. Amah pen vantung Pasian in a khawnkhong a hong piak vantung anlum (John 6:48-51) ahi hi.

      Tua bek hilo, Nativity ih cih pen taangko khiat hun ahi hi. Tua zan in vantungmite in tuucingte kiangah lungdamna thu na taangko uh a, “Lau kei un… Topa Christ ahi Honpa in note aa dingin David khua ah a suak zo hi.” (Luke 2:10,11 ZSV) ci uh hi. Eite in zong ih awte gingsak in Honpa Khazih Topa hanga ih ngah launa pan suahtakna le vangliatna dim lungdaihna te tua vanmite aw tawh kituak in ih taangko ding hi. Christmas in Bethlehem a mihing ci-le-sa a hong suak Jesu Christ thu phawkkikna ding hun manpha eite hong pia hi. A lungdam huai thu taangko ni!                ? David Lian

Ref: https://adventistbiblicalresearch.org/materials/practical-christian-living/should-adventists-celebrate-christmas

Volume 06, Issue 26 - Christian Te in Christmas Pawi Bawl Huai Mah Hiam on Scribd