Zo Phualva Thupuak - Volume 01, Issue 11

PAAL LAI NI

Laisiangtho ah a khangmoipen kumpi asem pen katheih khialh kei leh Joash (2 Kum 11:21) ahi hi. Kum 7 in kumpi sem hi. Leitungbup ah kum tawmpen a kumpi sem pen Alfonso xiii of Spain declared king when he was born. His father Alfonso xii died six months before his son was born. Ka gennop taktak in akhangmoi kumpi semte thu hilo zaw in kum 8 aphak a, kumpi asem khat ii thu hi. Kumpite nihna 22,23: Khangtangthu nihna 34,35 ah kimu thei hi. Judah te kumpi hi’n aminpen Josiah hi. Anu Jedidah, Bozkath khuami Adaiah tanu hi. Josiah in Jerusalem ah kum 31 sung uk hi.

Apa Judah kumpi Amon pen anungta Pasian bialo in bawltawm milim bia in asia gamta semsem hi. A sawt lo khat ciang ama muan mahmah body guard cimai ni ama nasem te mah in ong suamlum mawk hi. Tua asuam lum te pen agammi te mah in lehsuamlup kik hi. Atom in apa sita ahih ciang amah Kumpi in ong kikoih to hi. Apu Manasseh kikhel pianpian sam napi apa Amon ciang sukkik asia gamta kik hi. Josiah kumpipa ahih leh naupang no khat ahih hang, Topa mit ah aman gamta hi, apa mit ah na cilo hi. Apa khekhap tawnlo in apu David khekhap tawn in themkhat zong lam piallo hi, na ci hi. Apa khekhap tawnlo apa biak bang biak pihlo cihciang Josiah pen tangsuah na hi gige hi. Haleluijah!

SDA ka tangsuah hi aci pawl khut laam! Topa minthan nading hi tahen. Josiah kumpi pa dan hi. Ei atangsuah lo-pawl bel tu-gemgam hak-seisai pongmawk in ataktak in ih Nu leh Pa milim bia nahih leh akikhel lo pawlpawl ding ihve. Josiah in kumpi sepzawh 12 kum ama khankum 20kum in Mualdawn a milim te, baal te asherah milim, akisek leh akisung milim beisiangsak ding kipan hi. Milim te ama muhna ah supai sak hi. Khangtangthu nihna 34:4.
(A)Kumpi hiven sawl ziauziau theilua hi zum ah tu hit-hiat thei hi, himah taleh amah ngiat missionary ong pai khia in sia dangdang te utlohna gamnawl, mualdawn te ah vakah to in na vasem hi, ama muhna ah ahoihlo milim te supai sak ngiat hi. Tulai sia pawlkhat te pawlpi tuazah kanei hi mizawng te nikhat in antang ipkhat ta kapia hi ci in manzaih in tua tawh tungsiah khawng puak ziauziau thei hi. Josiah kumpipa pen tuadan sia nengneng te’ khemzawh ding hivet lo in amah ngiat amun aphual va pha ngiat hi.

(B)Milim supai, supai khin hiven kicing lel lo maw? Mawkkoih deklo gawivui ci lai zen ei, gawivui kei leh na ciang kik thei uh hiding hi. Na kim napam ah nang ong nawikai sak milim biakna, zongsatna hoih lo khatpeuh peuh pen sukpaih bek tawh kingah lo ahih lam Josiah in onglak hi. Kitamzan sakding akitamzan lung-sim tawh zuan ding tua hileh akigawivui khin tua na zongsat hoihlohna pen ong tho kik langlang nawn peuh mah loding hi.
(C) Gawivui khin hiven pha-ta buang inteh, phasak nai suai lo tua agawivui te zong mawk paihlo cilia, milim biate han ah theh, paai hi ci hi. Josiah in gawivui te nangawn lamgei ah paileng kidik kik kha thei veve ahih lam ong lak leuleu hi. Tua ahih ciang tua nahoih loh nate milim bi-akna zongsat hoihlo nate han ah pai ding phum ding hi. Han cihciang kipai kik mengmeng khollo hi misi om masiah, ahoih lonate misi bangin vui bawl ding cihna hi. Na vui bawl khit akipan hih pakve, kuanman ong thei kenteh ci in na zongsat hoihlo mawhnate ong thokik khuankhuan nawn loding hi.

Josiah khangno pa etteh ding hihang! Mawhna, milim, ong tuksak thei mawhna te na vat tuk khit ciang ciahsan pan in, mawhna hoihlo nate vaktuk suvui lopi in ih ciah san leh TB zatang chord cinglo a, khawl tawh kibang dingin phut hak tektek ding hi. Lungno ong hat tektek ding hi. Josiah zong vai khempeuh azawh khit ciangin Jerusa-lem ah ciahkik hi naci hi. Ama innphual bek ah nasem lo in va kuan khia ngiat hi.

Tuabang in Josiah in asiansuah na ah milim bia kamsangte’ han zong susia in aguh te zong hal in tua-bang ahih na ah Pasian kamsangpa han pen sukha kei un ci in kem in bangmah cih lo hi. 2 King 23:17-18 Tua ciangin amah in, "Hua galkhata ka muh phawkna mual bang ahi hiam?" a ci hi. Tua ciangin khuapi sung mite in ama kiangah, "Judah panin hong pai-in Bethel-a bi-akna tau tungah na bawl hih thute a genkhol Pasian' mipa' han ahi hi," ci-in a gen uh hi Tua ciangin amah in, "Amah tuaci omsak un; kuamah in ama guhte khin kei un," a ci hi. Tua ahih ciangin amaute in Samaria panin hong paikhia kamsangte' guhte leh ama guhte tuaci omsak uh hi. Siansuah cihsam hang in Buldozer tawh nik gaih ding hilo hi. Josiah in zong ahoih te nasit veve hi. Ngeina hoih te Pasian thutawh kituak te kep-cing ding ong phawk sak kik hi.

Josiah kumpipa’n paizia thakkhat lam ong hilh hi, nasep hawm hi. Biakinn puah dingin Khangtangthu nihna 34: 12 na ah mite in cihtakna tawh nasem uh hi. Tua pan Siampipa Hilkiah in thukham laibu ong mu hi. Lai atpa Shafan kiang gen hi. Shafan in tua thukham laibu la in Kumpipa Josiah mai ah asim hi. Hih laibu sung a dan in ihpu ihpa te, no zomisdamls te na innkuanpih te’n nungta lo zui lo, semlo uh hi. Josiah kumpipa in apuan balkek hi.
a. Khangno pawl: Ih kumte tawm thei mahmah lai napi huaihamna, duhhopna te tam thei mahmah hihang.
b. Khangham pawl: Ih ha-te tok khin, kitan khin kei napi mi-elna, hazatna te ki tan zo nai tuanlo hihang.
c. Tekkei ta vunbang kol dildel khinta napi hehna, thuhkik nopna te kol tuannailo kikang piatpuat lai.
d. Ih samte kang sitset khin napi ngaihsutna te vom bekbak lai, siangtho nai lo
e.Ih mitte hak gega napi hell lampi tawn a pai ihhih lam kiphawk tuan lo lailai.
Topa’n ih pallai khangno hunsung teng Josiah kum-pipa dan mah in ah kim-le-pam milim biakna, zongsat hoi-hlo nate: A satpuk zoding in thupha ongpia tahen! A gawi-vui zo ding in thupha ongpia tahen! Misi bangin han a avui thei dingin thupha ongpia tahen! Na lungsim khempeuh, na nuntakna khempeuh leh na thahatna khempeuh tawh Topa lam aki hei thei dingin ih biak Topa Pasian in thupha ong buaksuk taktak tahen! Amen
 Sia PaaKhai, Church Elder