Gaaltai Gambeelte A Itna

Mission Story - Nipi 1na (4th Qtr 2016)

Octobe 1, 2016                                                                                       Austria          

                                    

                                     Gaaltai Gambeelte A Itna     (Agen: Ahmad)

            Ahmad in a kum sawm aa simin lungnopna zong hi. Amasa in zu dawn a, tua zom ah lung amsak zatuite zang leuleu hi. Ahi zongin lungnopna ngah thei tuan peuhmah lo hi.  

            Guihtheih khamtheihte zat nawn loh dingin khensat a, ama’ pianna gam ii nisuahna a laizang lam ah a kiphuan guihtheih khamtheih zongsatnate phiatna phual ah kah ding khensat hi.  Tua phual panin guihtheih khamtheihte hong phiat zo takpi a, amah bangin guihtheih khamtheihte a zongsang midangte huh nuam hi. Tua ahih manin guihtheih khamtheih zongsatna phiatna phualpi ah ciaptehna laipi a ngah thuhilh sia hong suak hi. Ama’ inn ah guihtheih khamtheih zongsatna a nei midangte zong a huh theih nadingin  kumpi panin phalna laisen (license) ngah hi.

“Ka Lung Nuamta”

            Ahmad in laisim nuamsa a,  ni khat  Lai Siangtho tawh kisai thu manpha tampi a kiciaptehna laibu khat mu hi. Tua bang laibu nidang in sim ngeilo a, hong sim kawmkawm in a lung hong nuam hanhan hi.

            A lawmte kiangah a laibu sim lak kawm in, “A nuamzaw in nutakzia ding hong hilh laibu hi. It lua ing. Hih laibu ka sim ciangin ka lung nuam hi” ci-in awng in gen hi

            Tua zawh a sawt loin a lawm it khat in Ahmad sim ding Lai Siangtho bu khat pia hi.  Ahmad in La Siangtho hong sim ciangin a lung nuam semsem in tha zong ngah semsem hi. A lawm itpa tungah a telloh dot-na pawlkhat a dot ciangin a lawmpa’n zong Tapidaw pawlpimi tawm a simtham aa a kikhopna inn ah paipih hi. A kikhop lam uh kithei peuhmah leh a kithat lianding ahi uh hi.

            Ahmad in, “Ka gamah kumpi te’n na biakna na khel lam ahih keileh biakna dang na lunglut lam thu tawmcik khat nangawn a theih leh hong that ding uh hi. Tua ahih manin biakna khel nuam a om hangin tawpkik pahpah hi” ci hi.

            “Ahi zongin hih Lai Siangtho, Gumpa Topa Jesu leh Ama’ khuavak ka muh ka theih ciangin, ka nuntakna ah nakhempeuh  hong kikhel a, hih Thumaan midangte theihsak sawn ding pen ka lunglut mahmah hi”

ci-in genbeh lai hi.

“Eite Hong It Pasian Khat Om Hi”

            Ahmad in ama’ inn mah ah guihtheih khamtheih zongsatna phiatna makaih toto lai hi. A makaihte kiangah Topa Jesu thu genpih a, ahi zongin Topa amin in lo nai lo hi.

            “Eite hong it Pasian khat om hi. Pa khat ahi Pasian khat in eite ih mawhna pan hong gumkhia dingin Ama’ Tapa hong paisak hi” ci-in a pawlte tung gen hi.

            Ahi zongin ama’ makaih pawlkhatte’n Ahmad genkhiat thu za nuam lo uh hi. A pawlte’n, “Na thugente kidawm in. Na thugen khempeuh ciamteh uh hi. Hong buaisak ding uh hi” ci-in gen uh hi.

            Ahmad zong hong kidawmzaw ta hi. Ahi zongin Ahmad in, “Ka mawk om ding hi sa thei keng. Guihtheih khamtheih zongsatna phiatna phual pan ka sin thute midang tungah hilhsawn ding tavuan nei ing. Tua baanah, ka upna ka kipsak nopleh Lai Siangtho sung pan sin aa ka theihkhiat thute midangte tungah gensawn ding tavuan nei ing” ci hi.         Ahmad zong net tawh Pasian’ thu kigente tei (download) sim in CD tawh tei kik hi. Tua a teina CD khatta leh Lai Siangtho buneu khatta tuunkhawm in a simtham in gam sung khempeuhah hawm khia hi.

“Pasian’ Pawlpi Ka Mu Khin Hi”

            Hihbang hun sungin amau gam pan Austria gam  a va zuan a lawm khat ahi Hamid tungpanin thu hoih hong za ta hi.

            Hamid in, “Lawm aw, nagen banglian in zu leh guihtheih khamtheih a zang lo ding aci pawlpi khat mu ta ing. Amaute’n hong lawmbawl in hoihtakin hong kikhoppih uh hi. Amau tawh nasem khawm dingin hong zol uh hi” ci-in lawptak in Ahmad tungah gen hi.  Hamid in Topa Jesu hong paikik ding lamen a, Pasian’ ni siangtho Sabbath ni aa Pasian a bia (Seventh-day Adventist) pawlpi mu taktak ta hi.

            Ahmad in, “Ih gam pan na paikhiat ding ciangin, ‘Kuama’n hong saang kenteh’ nong cih ciangin, ‘Amaute gual-huai thei mahmah uh hi. Pasian tawh naitak in nakizop theih nadingin hong huh ding uh hi” kong cih phawkkik dingin hong lamen ing” ci-in tha pia hi.

            Kum khat val hong sawt ciangin, Hamid in Austria gamah a om the Seventh-day Adventist pawlpi-ah kha lam khantohna a neihna thu a lawmpa Ahmad tungah theisak hi.  

Lauhuaina Pelhna

            Ahmad in ama’ gam sungah a om a simtham aa Pasian a bia thu-umte tawh a simtham in hong kituah zel uh hi. Ni khat, a Tapidaw lawmte khat hong mang diildeel mawk hi. Ahmad in a lawmpa biakna khelna thu kumpite’n a theih ciangin amah leh a zi a lauhuai simtham dinmun hong tung uh hi.

            A zi in nau a paai zawh kha (9) cing himah taleh a lauhuai dinmun pan a suahtak nadinguh pen gam sung pan pai khiat ding ahi hi. Simthamtak leh manlangtak in gamdang khat ah hong zin khiata uh hi.  Tua gam panin a lawmpa Hamid omna Austria gam ah a pai theih nadinguh lampi hong mu khiata uh hi.

Lungnopna Ngahna

            Ahmad te nupa Austria gam hong tun zawh uh a ni masa ni in, Hamid in Adventist biakinn ah paipih pah hi. “Hih lai munah na lung uh nuam ding hi” ci-in a singim nupate hanthawn hi.

            Ahmad in, “Lungnopna leh ki-itna ngah ing. Thuhkik ding a kisam lo huhna ka ngah masak penpen na hi. Topa Jesu it uh ahih man a, hong it uh ahi hi. Hihbang ki-itna ka innkuan sungah ngah kha keng. Hong huhte biakna hangin kanu leh kapate’n  hong khual zolo uh hi. Kanu leh kapate’n amau biakna ah Pasian in thukhualna nei lo hi cih upna nei uh hi. Ahi zongin hihlai munah, ‘No pen kong it uh gam beel galtaite na hi uh hi’ hong cih pen in ka lungsim uh hong sukha in ka lung uh hong  nuamsak mahmah hi” ci-in genhi.

            Ahmad, azi, leh a naungek tawh  Austria gam ah a om Adventist pawlpi ah kikhopnate peel ngeilo uh hi. Ahmad in a sin Lungdamnathu hawmkhiatna nasep zom to in, pawlpi ah gambeelte a tam zaw hong tunpih hi.

#######@@@@@@@@@@@@@@@@@@@#######