Zo Phualva Thupuak Vol 02, issue 03: KUMTHAK 2012 TAWH THAK KHAWM NI (AZOM)

KUMTHAK 2012 TAWH THAK KHAWM NI (AZOM)

Mi kicinlona a maisak zolo te tawh om khop pen, a puak kham ding time bomb khat tawh kibang hi. Mi khialhna a kawk nuam phadiak khat tawh nuntak a haksat dan pen, khialna neucik om sial- ak taw-phun bang hiding cihna hi. Pasal phunphun zong om thei hi. Pasal hanghang zong om thei hi. Kidop huai hi.

Tua bang, mi phunphun thei khat in, haza alai na meek khak na leng, hong phunsan lai ding hi. Maisaksa, mangngilhsa khat ahih aa leh phuang kik-kik se dah in. Lungkim lona khat, ki im tentan ding cihna hilo aa, i lungsim om zia te i kigen ding mah hi. Mi lungsim tawh zong saikak thei ding leh kim-le-pam tawh zong etkak ding kisam hi. Omna mun le gam te tawh kizui in zong, a hoih lam in nuntak thei ding kisam hi. Mun khat te ah, sin sona te, khasiatna te taanglai thei hi. Tua bang ciang, bang hang in om sak lailai ka hiam, cih kidot ding kisam hi. Ka kampi tawh maisak aa, ka takin maisak gai zo nailo kai tam maw ci in kidong in.

Ih deihna bulpi pen, mi khatpeuh kicinlona te i lung-sim sung ah i phawk khakciang, sinso gawp a, khasiatna te om saklo zaw in, tua bang kisapna khat om ngei cih ciang ding kisam hi. Zi le pasal te kiang, tua lai tua ci, tua lai tua ci cih dandan aa, ciaptehna te omsak nawnlo ding kisam hi. Mi kicinlah nate simsim ding hilo hi. Mangngilhna tuipi sungah paih khitciang, kaih khiat kikkik ding hi nawnlo hi. Ei-le-ei mahmah zong, i ki maisak zawh phot himhim ding kisam hi. Kimkhat ten, ka hahkat ciang, kiam semsem, sia semsem ing ci in lungkiat sawm thei hi. A mau-le-amau a kimai sak zolo ten, Zeisu in zong hong maisak zolo ding, ka mawhna lian lua ci in ngaisun uh hi. Zeisu in, maisak zawhlo neilo hi. Ei-le-ei zong, Innkuan sung, nupa kikal, mimal kikal, ki maisak in, mailam ma-suan zop ding ahi hi.

Mi gensiatna in Khasiangtho beng khia:

(i) Aniin, a kih huai munte ah khasiangtho teng thei lo hi. Zu, zatep, khainii leh drugs tuamtuam te zatna ah kha-siangtho teng theilo hi. Inn kiphiat lo na, inn niin te ah khasiangtho teng thei lo hi.

(ii) Tua mah bang in, lungsim niin te lungtang leh inn te ah khasiangtho teng thei lo hi.Lungsim niin icih te pen, mi hoihna sang, misiatna a gen nuam zaw te ahi hi. Thu sia bek bek a kam sung uh pan, a phul khia sak te a hi hi. Sun tawh zan tawh misiatna ding bekbek a ngaihsun te ahi uh hi. Tua te lungtang sungah khasiangtho teng theilo hi.

(iii) Mi kicinlahna tawh a buai nuam phadeuh ten, a kikhel ding uh thubaih hi lo hi. Mi hoihlona gen pen, zatui in nei uh hi. Bing (zakaang) in, mi gensiat zangh uh hi. A zingan leh a nitak-an kam limtuam sa phial uh hi. Ahi hangin, mi na gensiat ciangin, dawite nih le thum, in hong umcih pah hi. Dawite thusia huai hi. Ahi hangin, mi gensiatna mun ah

khasiangtho om theilo hi. Khatvei teh, izi i pasal te khial khakna gen akul zong om hi. Tua hi kei leh kiphawk khalo thei hi. A hihang in, mi khialhna na gen ciang, mawhsaknopna tawh kawk gega se ken la, na kikhel kei aa leh ci in, altimatum khawng pia se dah in. Nang zong, khial thei cih kiphawk in la, nang khial nasak khat, mi aa ding a maan mah-mah zong hi thei cih phawk in.

Ki tel khialna:

(i) Mihing te kikal, ki telkhialhna om icih pen, i theihna level kikim lo hi pi pen thei hi. Ih sandan level kikim lo hi thei hi.

(ii) Mun khat te ah, a thei hetlo pen khat in, a thei pen ding ut cih zong om thei hi. Kim khat te’n, kei taltak pen ka hih ciang ci in, mun khempeuh ah thusapi ut den hi. A munmun aa, na sem ding kiguan khin napi, kua mah i sawl peuhmah lo, mi khempeuh sainuam, mi khempeuh tung aa chairman za amah le amah kiguan tawm. Amah le a mah inspector pi, ai kei leh hausa thuzeek pi kiguan tawm nuam pahpah hi.

(iii) Mi khempeuh hawmthawh nuam lai in, mi kicinlah na ding zongzong in, phunciak den cih zong om thei hi. Hibang mite omna ah, kilemna leh khantona om theilo in, ki telkhialna, ki pumkhat lo na leh kiamsukna piangsak hi. Hi bangmi te’n kipum khatna suksiat ding nakpitak in hahkat in, gamtang uh hi. Nupa kikal ahizongin, koikoi ah, amau mah-mah in, hong kikhel nop kei aa leh kuamah in, khel theilo ding ahi hi. Khantohna ding sang, kiamsukna om leh a deihzaw te ahi hi. Makaai te tawh nasep khop theihna pen, khantona maleep hi aa, makai te thusim lo aa, tangpekna- makaai khat pepeuh thusim lo a, langdo nopna pen kiamsukna malep hi.

A vekpi in maisak in:

Midang kicinlahna khat i maisak aa leh a vekpi in i maisak ding hi. Themcik zong siit bawl lo ding. Maisak cih khitciang, kammal gingkhia dungzui in, i taksa mah in i zuih sak ding hi. Maisak khitciang, maisakna len suak in. Kicinlahna a om beh te ah, na maisaksa kipsak suak in la, mangngilh bawl zaw in.

Thusia gente thusia in bawm:

(i) Siatna agengen te, thusia in bawm takpi hi. A inn pan thupha kiza ngeilo in, mi kiciatlona teng ki za nilo hi. Amau en leng lah, agensiat te sang, hoihzaw tuan peuhmah lo. Sia zaw lai thei hi.

(ii) Na lungkimlo nate ngaihsunsun nawn sedah in. Phunphun, ciakciak lecin, na sin so sak tawmtawm ding hiteh. Nang ad-ing phat tuamna hong pia lo ding hi. Lung siatna a kiguan phapha na hi lel ding hi. Na lung zing ding a, na kim le pam te lung zong zing sak ding hi. Siatna kilawhsak ken la, thupha kilawhsak zaw in. Na kam pen thupha kizelsakna ah Pasian hong zat hiam? Na inn pen, thupha kizelsakna in Pasian hong zat hiam? A hih kei leh na kam pen, thusia kithehthang sakna in, Kha-nin hong zat ahiam? Na inn pen na lengla tekiang thu-sia kizelsak nang kha-nin in hong zat ahiam, ki sitel dih in.

(iii) Mi khat na maisak ciang, na kamal, na lungsim, na nuntakzia khempeuh tawh maisak takpi in. Mangngilh ding baihlo ding hi. Tua mun ah, Pasian ko in la, huhna ngen in. Leitung

ci-le-sa hangin, khasiatna te, a ven nang vantung huhna kisam hi. Pasian bek in, lungdaihna, maisakna leh maban zop kik theihna hong guan thei hi.

Mawhnei hi ing: Mi na mawhsak ma in, nang le nang nisim bangzah khial kha gige na hiam cih ki phawk masa in. Tua hi leh, mi kicinlahna te na maisak nang hong baih zaw ding hi. A mawh ngeilo, a khial ngeilo, Pasian in kei mawhna avekpi maisak zo ahih leh, nisial in a mawh den, keimah in, ka mihing pih te, bang hang maisak zo lo ding ka hi hiam cih ngaihsun in.

Bangzah vei maisak ding: Zeisu in, 7 mun 70 vei = 490 vei na mawhna te kimaisak uh na ci hi. Tua ii deihna in, a tawntung kimaisak zo ding a deihna ahi hi. Zeisu thungetna ah, kei tung aa, hong mawhte ka maisak mah bangin, kei mawhna zong hong maisak in, hi mawk hi. Mi mawhna khat ih maisak ciangin, Zeisu in ei mawhna zong hong maisak ding, na hi pan phing mawk hi. Mi tung aa, ih hehna, veng ngei kei aa, maisak zo ngei kei lehang Zeisu in zong, I mawhna te hong maisak zo lo ding na hi pah hi.

Galte it ding: Christian hihna thukhun bulpi khat ah, igal te it ding hi ngiau mawk hi. Hi pen thubaih deklo khat hi. Kua in hih zo mawk diam? Na galte na it un, na galte ading thu na ngetsak un, Zeisu in ci lai hi. Zeisu singlamteh tung a kikhai lai in, amah athat te ading thungetsak lai hi. Pa aw, amaute un bang bawl cih theilo hi, amawhna maisak in cilai hi. Stephen in zong Zeisu thunget bang lian mah in, amah athat te mawhna a kimaisak ding, Pasian kiang ah thum lai hi.

Ei Christian te pen, tua tawh ki leh bulh in, mi kicinlah nate zon ding leh kawkding ki taak lah mahamh zawsop hi hang. Nupa kikal ah, kimaisakna bulphuh leng, i lung hong vak zaw in, ki suakta a, lungnopna hong ngahsak hi. Ka pasal khial thei, ka zi khial thei, ka khial uh ciang, ki maisak zo tuak ung- cih lungsim na puak takpi ciang, nupa kikal hong nuam pan, innkuan kikal hong nuam pan ding hi. Khat le khat kikal, kimaisak na om lo in, nupa le innkuan sung nop ngeilo ding hi. Bang hang hiam icih leh mi khial thei vive ngentang, nupa kop leh innkuan te i hi hi. Ki maisakna in lungmuanna, lungdaih na hong ngahsak hi.

Ki cinlahna, khialhkhakna te pan, thuakzawhna leh ki maisak zawhnate bek in, lungdaihna le lungmuanna te hong pia thei hi. En ih maisak maksak lo in, Zeisu kiang pan maisakna kisang theilo hi. Pasian in, Pianthakna taktak kum 2012 sung ah hong ngahsak ciat lai ta hen. Pu Tong Seal